Nahibaroan ni Jesus an mga kalidad nga ha urhi nakabulig ha iya nga magin maopay gud nga ehemplo sugad nga igkasi-magburuhat han mga tawo nga iya nakaupod ha tuna. Paonan-o kita makakapahimulos ha ehemplo ni Jesus? Pinaagi ha pag-usisa hin maopay ha iya ehemplo, may mahibabaroan kita nga tulo nga prinsipyo nga makakabulig ha aton nga magin maopay nga igkasi-magburuhat. Ini nga mga prinsipyo mabulig ha aton nga mas maipakita an pagkaurosa ngan kooperasyon.

An maopay nga igkasi-magburuhat mapainubsanon. Gintatagan niya hin importansya an iya mga igkasi-magburuhat ngan diri hiya nagpapaimpres ha ira. Iton mapainubsanon nga disposisyon nahibaroan ni Jesus tikang ha iya Amay. Bisan kon hi Jehova la an angayan tawagon nga Maglalarang, karuyag niya nga mahibaroan han iba an importante nga buruhaton nga ginbuhat han iya Anak ngan igkasi-magburuhat. Makikita naton ito ha ginsiring han Dios: “Himoon naton an tawo uyon ha aton dagway.” (Gen. 1:26) Posible gud nga nasabtan ni Jesus nga mapainubsanon hi Jehova tikang hito nga Iya ginsiring.—Sal. 18:35.

Han nakanhi hi Jesus ha tuna, mapainubsanon liwat hiya. Kon gindadayaw hiya tungod han iya mga nahimo, iginhahatag niya an kadayawan ha Dios nga amo an angayan hito. (Mar. 10:17, 18; Juan 7:15, 16) Nangalimbasog liwat hi Jesus nga matipigan an iya murayaw nga relasyon ha iya mga disipulo, ngan gintratar niya hira sugad nga kasangkayan imbes nga  mga uripon. (Juan 15:15) Iya pa ngani hira ginhimsawan basi tutdoan hira nga magin mapainubsanon. (Juan 13:5, 12-14) Kinahanglan pasidunggan liwat naton an aton mga igkasi-magburuhat imbes nga unahon an aton personal nga mga interes. Kon aton ‘ginpapasidunggan an usa kag usa’ ngan diri kita nababaraka kon hin-o an makakakarawat hin kadayawan, mas damu an aton mahihimo.—Roma 12:10.

Maaram liwat an mapainubsanon nga tawo nga “may kalamposan ha damu nga magsaragdon.” (Prob. 15:22) Anoman an aton eksperyensya o abilidad, kinahanglan hinumdoman naton nga waray tawo nga maaram han ngatanan. Bisan hi Jesus nagsiring nga may mga butang nga diri hiya maaram. (Mat. 24:36) Interesado liwat hiya kon ano an nahibabaroan o ginhuhunahuna han iya diri perpekto nga mga disipulo. (Mat. 16:13-16) Salit diri urusahon nga nagin komportable ha iya an mga igkasi-magburuhat niya! Sugad man, kon mapainubsanon nga gin-aakseptar naton an aton mga limitasyon ngan gintutugotan an iba nga magsumat han ira ideya o suhestyon, nabulig kita nga matipigan an aton maopay nga relasyon ha ira, ngan kita ngatanan “may kalamposan.”

Importante gud nga subaron han mga tigurang an pagin mapainubsanon ni Jesus kon urosa hira nga nagbubuhat. Kinahanglan hinumdoman nira nga mahimo pagiuson han baraan nga espiritu an bisan hin-o nga tigurang nga iyakan an usa nga butang nga makakabulig ha lawas han mga tigurang nga makahimo hin maopay nga desisyon. Kon ha ira mga miting, ginsisiguro han mga tigurang nga diri mag-alang an kada tagsa ha pagsumat han iya ginhuhunahuna, makakahimo hira hin mga desisyon nga makakaopay ha bug-os nga kongregasyon.

An maopay nga igkasi-magburuhat makatadunganon ha iya pagtratar ha iya mga kaupod. Mapauyon-uyon hiya ngan diri niya iginpipirit an iya karuyag. Sigurado nga damu ka beses nga nakita ni Jesus an pagin makatadunganon han iya Amay. Pananglitan, ginsugo hiya ni Jehova basi talwason an katawohan tikang ha sentensya nga kamatayon nga angayan gud ha mga tawo.—Juan 3:16.

Nagin mapauyon-uyon hi Jesus kon ginkikinahanglan o angayan ha sitwasyon. Hinumdumi kon paonan-o niya ginbuligan an taga-Fenicia nga babaye, bisan kon iginsugo hiya para ha panimalay han Israel. (Mat. 15:22-28) Makatadunganon liwat hiya ha kon ano an iya ginlalaoman ha iya mga disipulo. Han iginnigar hiya ha publiko han iya duok nga sangkay nga hi Pedro, hi Jesus nagin andam ha pagpasaylo ha iya. Ha urhi, gintaporan niya hi Pedro hin importante nga mga responsabilidad. (Luc. 22:32; Juan 21:17; Buh. 2:14; 8:14-17; 10:44, 45) An ehemplo ni Jesus klaro nga nagpapakita nga kinahanglan  naton “ipakita ha ngatanan nga tawo an . . . pagkamakatadunganon” pinaagi ha pagin mapauyon-uyon.—Fil. 4:5.

An pagin makatadunganon magpapagios liwat ha aton nga magin mapauyon-uyon basi murayaw nga magbuhat kita kaupod han ngatanan nga klase hin tawo. Gintratar gud hin maopay ni Jesus an iya mga nakaupod salit gin-akusaran hiya han iya nangangabugho nga mga kaaway nga “usa [hiya] nga sangkay han mga parasukot hin buhis ngan han magpakasasala” nga kinarawat han iya mensahe. (Mat. 11:19) Mahimo ba liwat kita murayaw nga magbuhat kaupod an iba, pariho kan Jesus? Hi Louis, usa nga brother nga nagbuhat kaupod an iba-iba nga indibiduwal ha iya toka sugad nga paramangno han sirkito ngan ha Bethel, nagsiring: “An pagbuhat kaupod han iba iginpapariho ko ha paghimo hin pader gamit an mga bato nga iba-iba an kadaku. Basi magin tadong an pader, kinahanglan i-adjust an kabutang han pipira nga bato. Nangangalimbasog liwat ako nga maghimo hin mga pagbag-o ha akon kalugaringon basi murayaw nga magbuhat ako kaupod an iba ngan matapos namon an buruhaton.” Maopay gud ito nga disposisyon!

Ha ano nga mga sitwasyon maipapakita naton nga makatadunganon kita ha aton kabugtoan ha kongregasyon? May higayon kita nga maipakita ito kon kaupod naton an aton mga kagrupo ha pagsangyaw. Bangin makapartner naton an mga magwarali nga diri naton kaedad o may mga responsabilidad ha pamilya nga iba kay han aton. Mahimo ba kita mangalimbasog nga magin makatadunganon pinaagi ha pagpahiuyon ha kon ano an ira makakaya o ha paagi han pagsangyaw nga ira karuyag basi mabuligan hira nga magin mas malipayon ha ministeryo?

An usa nga maopay nga igkasi-magburuhat “andam ha pagpaangbit.” (1 Tim. 6:18) Samtang nagbubuhat hi Jesus kaupod han iya Amay, sigurado nga naobserbaran niya nga waray ginsisekreto hi Jehova. Han kan Jehova “igin-andam an kalangitan, nakadto” hi Jesus ngan mahimo hiya mahibaro tikang ha iya. (Prob. 8:27) Ha urhi, malipayon nga iginsumat mismo ni Jesus ha iya mga disipulo an mga “butang nga hinbatian [niya]” ha iya Amay. (Juan 15:15) Masusubad naton an ehemplo ni Jehova kon andam liwat kita nga isumat ha aton mga igkasi-magburuhat an aton kahibaro ngan eksperyensya. Oo, diri gud ginsisekreto han maopay nga igkasi-magburuhat an ginkikinahanglan o importante nga mga impormasyon basi la makontrol an iba. Malilipay hiya nga isumat ha iba an mag-opay nga mga butang nga iya nahibaroan.

Mahimo liwat kita magpaangbit ha aton mga igkasi-magburuhat hin makaparig-on nga mga pulong. Kon napapansin han iba an aton mga pangalimbasog ngan kinasingkasing nga ginpapasalamatan kita, diri ba nalilipay kita? Hi Jesus naggahin hin panahon basi isumat ha iya mga igkasi-magburuhat an mag-opay nga butang nga iya nakita ha ira. (Ikompara an Mateo 25:19-23; Lucas 10:17-20.) Nagsiring pa ngani hiya ha ira nga ‘magbubuhat hira hin mga buruhaton nga mas labaw pa’ kay ha iya. (Juan 14:12) Han gab-i antes hiya mamatay, iya ginkumendasyonan an iya matinumanon nga mga apostol: “Kamo an inunong ha akon durante han akon mga pagsari.” (Luc. 22:28) Hunahunaa la kon paonan-o an iya mga ginsiring nakabantad gud han ira kasingkasing ngan nag-aghat ha ira nga gumios! Kon maggagahin liwat kita hin panahon basi kumendasyonan an aton mga igkasi-magburuhat, sigurado nga magigin mas malipayon hira ngan posible nga mas damu an ira mahimo.

“Diri kinahanglan magin perpekto an usa nga maopay nga igkasi-magburuhat,” siring han brother nga hi Kayode, “pero nangangalimbasog hiya nga magin malipayon an iya mga nakakaupod ngan magin mas magaan ha ira an buruhaton.” Sugad ka ba hito nga igkasi-magburuhat? Kay ano nga diri mo pakianhan an pipira nga kabugtoan basi mahibaroan mo kon ano nga klase ka nga igkasi-magburuhat? Kon nalilipay hira magtrabaho kaupod ka, pariho han mga disipulo ni Jesus nga nalipay pagbuhat kaupod niya, makakasiring ka liwat han ginsiring ni apostol Pablo: “Mga igkasi-magburuhat kami para han iyo kalipay.”—2 Cor. 1:24.