Han ginsugo ni Jehova an mga tawo nga ‘pun-on an tuna ngan kultibaron ito,’ iginpakita niya nga ha urhi an bug-os nga kalibotan magigin paraiso. (Gen. 1:28) Ito nga orihinal nga sugo tutumanon han mga makakapanunod han tuna. Pero ha tinikangan diri pa paraiso an tuna—waray na an garden han Eden. Katapos gud han Armagedon, magkakaada damu nga buruhaton ha paglimpyo han mga lugar nga nadaot na yana. Diri gud ito harumamay nga buruhaton!

Nagpapahinumdom ini ha aton han buruhaton nga iginhatag ha mga Israelita han binalik hira tikang ha Babilonya. Setenta ka tuig nga waray naukoy ha ira tuna. Pero nagtagna hi Isaias nga pinaagi han bendisyon ni Jehova, mapapaopay nira ito utro. An tagna nagsiring: “Hihimoon Niya nga pariho han Eden an iya kamingawan ngan pariho han garden ni Jehova an iya disyerto nga kapatagan.” (Isa. 51:3) An mga Israelita naglampos ha pagbuhat hito. Ha pariho nga paagi, pinaagi han bendisyon ni Jehova, adton makakapanunod han tuna maglalampos  ha paghimo hito nga paraiso. Ngan bisan yana maipapakita mo na nga karuyag mo umapi ha pagbuhat hito.

Usa nga paagi amo an paghimo han imo pinakamaopay basi matipigan nga limpyo ngan mahapsay an imo balay ngan palibot. Mahihimo mo ito bisan kon diri nanlilimpyo an imo mga amyaw. Puydi ka liwat bumulig ha paglimpyo ngan pagmintinar han iyo Kingdom Hall ngan han Assembly Hall. Kon igintutugot ha imo kahimtang, puydi ka liwat mag-aplay nga magboluntaryo ha disaster relief. Hito nga paagi iginpapakita mo nga andam ka pagbulig kon may panginahanglan. Pakianhi an imo kalugaringon, ‘Puydi ba ako mag-aram hin mga skill nga akon magagamit kon makarawat ko an bendisyon nga makapanunod han tuna?’

Katapos gud banhawon ni Jesus an anak nga babaye ni Jairo, nagsiring hiya nga dapat tagan hin makakaon an bata. (Mar. 5:42, 43) Posible nga diri makuri an panginano hiton 12 anyos nga bata. Pero hunahunaa an kinahanglan ta buhaton kon tumanon na ni Jesus an iya saad nga “an ngatanan nga aadto ha handumanan nga mga lubnganan makakabati han iya tingog ngan magawas.” (Juan 5:28, 29) An Biblia waray maghatag hin damu nga detalye, pero maiimadyin naton nga an mga binanhaw magkikinahanglan hin bulig basi magkaada pagkaon, urukyan, ngan bado. Maipapakita mo ba bisan yana nga karuyag mo magin andam ha pagbulig? Aadi an pipira nga pakiana nga puydi hunahunaon.

Kon iginpahibaro nga mabisita ha iyo kongregasyon an paramangno han sirkito, nagpipresenta ka ba nga imbitaron hiya ha pangaon? Kon may mga Bethelite nga na-reassign ngadto ha iyo lugar o kon may paramangno han sirkito nga natapos na an iya pag-alagad sugad nga nagbibiyahe nga paramangno, puydi mo ba hiya buligan pamiling hin mauukyan? Kon magkakaada regional o espesyal nga kombensyon ha iyo lugar, puydi ka ba magboluntaryo antes o katapos han kombensyon o magin andam pag-welcome ha mga delegado?

Tungod han ginsisiring han Buhat 24:15, ginlalaoman naton nga binilyon nga tawo an babanhawon. Damu ha ira an waray hadto magkaada oportunidad nga makilala hi Jehova. Magkakaada hira hito nga oportunidad katapos hira banhawon. a An matinumanon ngan eksperyensyado nga mga surugoon han Dios mabulig ha sugad nga buruhaton ha pagtutdo. (Isa. 11:9) Hi Charlotte, nga nagsangyaw ha Europe, South America, ngan Africa, eksayted nga buhaton ito. Malipayon nga nagsiring hiya: “Eksayted ako nga tutdoan an binanhaw nga mga tawo. Kon nagbabasa ako parte ha usa nga tawo nga nabuhi hadto, agsob ko mahunahuna: ‘Kon nakilala la unta hini nga tawo hi Jehova, posible nga iba gud an iya kinabuhi.’ Eksayted gud ako nga sumatan an binanhaw nga mga tawo nga magigin mas maopay gud an ira kinabuhi kon mag-aalagad hira kan Jehova.”

Damu an pag-aadman bisan hadton matinumanon nga mga surugoon ni Jehova nga nabuhi antes hi Jesus kumanhi ha tuna. Hunahunaa kon ano kadaku an kalipay ngan kadungganan nga isaysay kan Daniel an katumanan han mga tagna nga iya iginsurat pero waray niya masabti. (Dan. 12:8) O hunahunaa la an kalipay nga buligan hira Ruth ngan Naomi nga mahibaroan nga an ira pamilya kaapi han tulin nga gintikangan han Mesias. Makalilipay gud nga makaapi hiton bug-os-kalibotan nga programa han pagpanutdo, nga waray na an mga presyur ngan disturbo tikang ha maraot nga kalibotan yana!

Paonan-o mo yana maipapakita nga karuyag mo magin andam nga umapi hito nga programa? Usa nga paagi amo an pangalimbasog nga pauswagon an imo skill ha pagtutdo ngan an regular nga pakigbahin ha pagsangyaw nga buruhaton yana ha bug-os nga kalibotan. (Mat. 24:14) Bisan kon limitado na an imo nahihimo yana tungod han imo edad o han iba nga kahimtang, maipapakita han imo pangalimbasog nga andam ka pagtutdo ha mga binanhaw.

Oo, ini an usa nga importante nga pakiana, Ginpapamulat mo gud ba nga mapanunod an tuna? Eksayted ka ba ha paglaom nga kultibaron an tuna, pati na an pag-ataman ngan pagtutdo ha mga binanhaw? Maipapakita mo nga andam ka pinaagi ha pagsalingabot ha mga oportunidad yana nga makigbahin ha mga buruhaton nga puropariho han imo bubuhaton kon mapanunod mo na an tuna!