1. Ha ano nga paagi agsob nga ginbabaton ni Jehova an mga pag-ampo han iya mga surugoon?

 MAARAM ka ba nga puydi ka gamiton ni Jehova basi batunon an pangamuyo han usa nga bugto? Puydi ka makabulig tigurang ka man, ministeryal nga surugoon, payunir, o magwarali ha kongregasyon. Mahihimo mo liwat ito batan-on ka man o lagas o brother ka man o sister. Kon an usa nga nahigugma kan Jehova nangangaro ha Iya hin bulig, agsob gamiton han aton Dios an mga tigurang ngan an iba pa nga matinumanon nga mga surugoon basi ‘maghatag hin daku nga pagliaw’ ha iya. (Col. 4:11) Pribilehiyo gud an pag-alagad kan Jehova ngan pagserbi ha aton kabugtoan hito nga paagi! Mahihimo naton ito kon may epidemya, kalamidad, o pagtimaraot.

2. Kay ano nga bangin makuri an pagbulig ha iba ha panahon han epidemya?

² Kon may epidemya, puydi kita makurian pagbulig ha iba. Pananglitan, bangin karuyag ta bisitahon an aton mga sangkay, pero diri safe an pagbuhat hito. Bangin karuyag ta imbitaron ha pangaon adton nagkukuri ha pinansyal, pero diri liwat ito posible. Bangin karuyag ta buligan an iba, pero mahimo ito magin makuri kon an aton mismo kapamilya may problema. Bisan pa hito, karuyag ta buligan an aton kabugtoan, ngan nalilipay hi Jehova kon ginbubuhat ta an aton mahihimo para ha ira. (Prob. 3:27; 19:17) Ano an aton mahihimo?

3. Ano an aton mahibabaroan ha ehemplo han mga tigurang ha kongregasyon ni Desi? (Jeremias 23:4)

³ An mahihimo han mga tigurang. Kon usa ka nga tigurang, kilalaha hin maopay an mga karnero. (Basaha an Jeremias 23:4.) Hi Desi, an sister nga gin-unabi ha nauna nga artikulo, nagsiring, “Hadto, an mga tigurang ha amon grupo han pagsangyaw  naupod ha akon ngan ha iba ha ministeryo ngan mga get-together.” b Tungod han pangalimbasog hito nga mga tigurang, nagin mas masayon para ha ira nga buligan hi Desi han nagtikang an COVID-19 nga pandemya ngan namatay an pipira niya nga kapamilya tungod han virus.

4. Kay ano nga nabuligan han mga tigurang hi Desi, ngan ano an leksyon?

⁴ Hi Desi nagsiring, “Tungod kay kilala ko na an mga tigurang sugad nga akon mga sangkay, masayon para ha akon nga isumat ha ira an akon inaabat ngan nababarak-an.” Ano an leksyon para ha mga tigurang? Atamana adton iyo ginmamangnoan antes pa magkaada daku nga problema. Magin sangkay nira. Kon diri ka makakabisita kay may epidemya, paghimo hin iba nga mga paagi. “May mga panahon nga ha usa la ka adlaw pipira nga tigurang an natawag o na-text ha akon,” siring ni Desi. “Nabantad ako han ira ginbasa nga mga teksto, bisan kon maaram na gud ako hito nga mga bersikulo.”

5. Paonan-o mahibabaroan han mga tigurang kon ano an ginkikinahanglan han kabugtoan ngan mabubuligan hira?

⁵ Usa nga paagi nga imo mahibabaroan an panginahanglan han kabugtoan amo an pagpakiana ha ira ha mataktika nga paagi. (Prob. 20:5) May igo ba hira nga pagkaon, medisina, ngan iba pa nga suplay? Naninelikado ba hira nga mawad-an hin trabaho o hin urukyan pa ngani? Nagkikinahanglan ba hira hin bulig ha paghangyo hin ayuda tikang ha gobyerno? Hi Desi nakakarawat hin materyal nga bulig tikang ha kabugtoan. Pero an emosyonal ngan espirituwal nga bulig han mga tigurang amo an nakabulig gud ha iya nga makaya an iya mga problema. Siring niya: “An mga tigurang nag-ampo kaupod ko. Diri ako nahinunumdom kon ano gud an ira ginsiring, pero nahinunumdoman ko kon ano an akon inabat. Amo adto an paagi ni Jehova han pagsiring, ‘Diri ka nag-uusahan.’”—Isa. 41:10, 13.

6. Ano an mahihimo han damu ha kongregasyon basi buligan an iba? (Kitaa an piktyur.)

⁶ An mahihimo han iba. Husto la nga laoman naton nga an mga tigurang an mangunguna. Pero hi Jehova nag-aaghat ha aton ngatanan nga dasigon ngan buligan an iba. (Gal. 6:10) Bisan an gutiay la nga kapahayagan han aton gugma mahimo na magkaada daku nga epekto ha usa nga may sakit. An usa nga bata puydi magpadara hin kard o drowing basi parig-unon an  usa nga brother. An usa nga batan-on bangin puydi mamalit o magbuhat hin iba pa para ha usa nga sister. Puydi liwat mag-andam hin pagkaon nga safe nga maibibilin ha balay han usa nga may sakit. Syempre, kon may epidemya, an tanan ha kongregasyon nagkikinahanglan hin pagparig-on. Bangin puydi kita magpabilin hin maiha-iha katapos han mga katirok basi makiistorya ha kabugtoan, ha personal man o pinaagi han videoconferencing. Ngan an mga tigurang nagkikinahanglan liwat hin pagparig-on. An pipira nga Saksi nagpadara hin surat ha pagpasalamat ha mga tigurang, nga agsob nga mas busy ha panahon han epidemya. Maopay gud kon ginbubuhat ta an aton bahin basi “padayon nga dasigon . . . an usa kag usa ngan parig-unon an usa kag usa”!—1 Tes. 5:11.

7. Ano nga kakurian an bangin mahitabo katapos han kalamidad?

⁷ An usa nga kalamidad tigda la nga makakagbag-o han kinabuhi han usa nga tawo. An mga biktima mahimo mawad-an han ira mga panag-iya o urukyan o mamatayan pa ngani han ira mga hinigugma. Ini nga mga trahedya nahitatabo liwat ha aton kabugtoan. Paonan-o kita makakabulig?

8. Ano an mahihimo han mga tigurang ngan han mga ulo han pamilya antes magkaada kalamidad?

⁸ An mahihimo han mga tigurang. Mga tigurang, buligi an kabugtoan nga magin andam antes pa magkaada kalamidad. Siguroha nga maaram an tanan ha kongregasyon kon ano an ira bubuhaton basi makapabilin nga talwas ngan makontak an mga tigurang. Hi Margaret, nga gin-unabi ha nauna nga artikulo, nagsiring: “Ha lokal nga mga panginahanglan nga bahin, an amon mga tigurang nagpahamangno ha amon nga may posibilidad pa gihapon nga magkaada wildfire ha amon lugar. Siring nira nga kon magsugo an mga awtoridad nga mag-ebakwit kami o kon magin delikado an sitwasyon, kinahanglan bumaya dayon kami.” Napapanahon adto nga impormasyon kay paglabay hin lima ka semana, nagkaada peligroso gud nga wildfire. Ha panahon han pagsingba han pamilya, puydi repasuhon han mga ulo han pamilya kon ano an bubuhaton han tagsa nga membro han pamilya. Kon andam ka ngan an imo mga anak, mas daku an posibilidad nga magpabilin kamo nga kalmado kon magkaada kalamidad.

9. Paonan-o maoorganisar han mga tigurang an ira mga buruhaton antes ngan katapos han kalamidad?

⁹ Kon usa ka nga paramangno han grupo, siguroha nga antes pa magkaada kalamidad may-ada ka na han tama nga contact information han ngatanan ha imo grupo han pagsangyaw. Ilista ito ngan pirme ig-update, basi kon magkaada kalamidad, makukontak mo an tagsa nga magwarali para mahibaroan an iya panginahanglan. Ipasa dayon ini nga impormasyon ha koordinetor han lawas han mga tigurang, ngan iya kukontakon an paramangno han sirkito. Daku an mahihimo han iyo pagburublig. Katapos han wildfire, an paramangno han sirkito nira Margaret waray kumaturog hin 36 ka oras; busy hiya ha pag-organisar han buruhaton han mga tigurang samtang nangangalimbasog hira nga makontak ngan maataman an 450 nga kabugtoan nga nag-ebakwit. (2 Cor. 11:27) Salit napanginano an tanan nga nagkikinahanglan hin mauukyan.

10. Kay ano nga para ha mga tigurang importante an pag-shepherding? (Juan 21:15)

¹⁰ Bahin han buruhaton han Kristiano nga mga tigurang an paghatag hin espirituwal ngan emosyonal nga bulig. (1 Ped. 5:2) Kon may kalamidad, siyahan kinahanglan siguruhon han mga tigurang nga talwas an tagsa nga bugto ngan may-ada hiya pagkaon, bado, ngan mauukyan. Pero ha sulod hin damu ka bulan  katapos hito, an mga nakatalwas posible gud nga magkikinahanglan hin espirituwal ngan emosyonal nga bulig. (Basaha an Juan 21:15.) “Ginkikinahanglan an panahon antes makarekober,” siring ni Harold, nga membro han usa nga Branch Committee ngan may nakaistorya na nga damu nga kabugtoan nga naapektohan han mga kalamidad. “Bangin hinay-hinay nga magin normal na an ira kinabuhi, pero bangin magbalik-balik ha ira hunahuna an ira namatay nga hinigugma, an ira presyoso nga napanunod nga panag-iya, o an panhitabo nga nanelikado an ira kinabuhi. Ngan tungod hito bangin tigda nga masubo na liwat hira. Diri ito kakulang hin pagtoo kondi normal la nga reaksyon han tawo.”

11. Ano an bangin padayon nga pagkinahanglanon han mga pamilya?

¹¹ Ginsiseryoso han mga tigurang an sagdon nga ‘magtangis upod han mga nagtatangis.’ (Roma 12:15) An mga nakatalwas bangin magkinahanglan hin pasarig nga hinigugma la gihap hira ni Jehova ngan han ira Kristiano nga kabugtoan. Maruruyag an mga tigurang nga buligan an mga pamilya nga matipigan an ira espirituwal nga rutina, upod na an pag-ampo, pag-aram, pag-atender ha mga katirok, ngan pagsangyaw. Puydi liwat dasigon han mga tigurang an mga kag-anak nga buligan an ira mga anak nga magpokus ha mga butang nga diri kaya wad-on han bisan ano nga kalamidad. Mga kag-anak, pahinumdoma an iyo mga anak nga hi Jehova pirme magigin ira Sangkay ngan pirme hiya aada para ha ira. Ngan isaysay ha ira nga pirme hira magkakaada bug-os-kalibotan nga pamilya han kabugtoan nga andam bumulig ha ira.—1 Ped. 2:17.

12. Ano an mahihimo han iba basi makabulig ha disaster relief? (Kitaa an piktyur.)

¹² An mahihimo han iba. Kon an usa nga kalamidad nahitabo ha kahirani la nga lugar, pakianhi an mga tigurang kon paonan-o ka makakabulig. Bangin puydi mo paukyon hin temporaryo an mga nag-ebakwit o an mga nabulig ha disaster relief. Bangin puydi ka magdul-ong hin pagkaon ngan mga suplay ha mga magwarali nga nanginginahanglan. Kon an kalamidad nahitabo ha mas hirayo nga lugar, makakabulig ka la gihapon. Paonan-o? Pinaagi ha pag-ampo para ha mga naapektohan. (2 Cor. 1:8-11) Bangin puydi ka maghatag hin pinansyal nga suporta ha disaster relief pinaagi han pagdonar para ha bug-os-kalibotan nga buruhaton. (2 Cor. 8:2-5) Kon kaya mo magbiyahe ngadto ha naapektohan nga lugar basi bumulig, pakianhi an mga tigurang kon  paonan-o ka makakaboluntaryo. Kon imbitaron ka nga magboluntaryo, posible gud nga makakakarawat ka hin training basi makabulig ka ha pinakamaopay nga paagi.

13. Ano an mga problema han aton kabugtoan ha mga nasud nga igindidiri an aton buruhaton?

¹³ Ha mga nasud nga igindidiri an aton buruhaton, nagigin mas komplikado an kinabuhi tungod han pagtimaraot. An kabugtoan hito nga mga nasud nagkakaproblema la gihapon ha pinansyal, nagkakasakit, ngan namamatayan hin mga hinigugma. Pero tungod han pagdiri, bangin diri basta-basta nga mabisita o makaistorya han mga tigurang adton nagkikinahanglan hin pagparig-on. Nahitabo ito kan Andrei, nga gin-unabi ha nauna nga artikulo. Usa nga sister ha iya grupo han pagsangyaw an may problema ha pinansyal. Katapos, an sister naaksidente ha awto. Kinahanglan hiya operahan hin pipira ka beses ngan diri makakatrabaho. Bisan pa han pagdiri ngan han pandemya, ginbuhat han kabugtoan an ira mahihimo para makabulig, ngan hi Jehova nagkikita.

14. Paonan-o an mga tigurang makakapakita hin susbaranan pinaagi ha pagsarig kan Jehova?

¹⁴ An mahihimo han mga tigurang. Nag-ampo hi Andrei ngan ginbuhat an iya mahihimo. Paonan-o ito ginbaton ni Jehova? Ginpagios niya an kabugtoan nga mas may kagawasan ha pagbulig ha sister. Gin-updan han iba an sister ha iya mga appointment ha doktor. An iba naghatag hin kwarta basi buligan hiya. Ginpagios hira ni Jehova nga buhaton an ira mahihimo, ngan ginbendisyonan niya an ira urosa ngan maisugon nga mga pangalimbasog. (Heb. 13:16) Mga tigurang, kon may restriksyon an buruhaton, hangyoa an iba nga bumulig. (Jer. 36:5, 6) Labaw ha ngatanan, sarig kan Jehova. Mabubuligan kamo niya nga maihatag an panginahanglan han aton kabugtoan.

15. Paonan-o ta matitipigan an aton Kristiano nga pagkaurosa kon may pagtimaraot?

¹⁵ An mahihimo han iba. Kon may pagdiri, bangin kinahanglan limitahan ta an aton pakig-upod ha kabugtoan ha mas gudtiay nga grupo. Salit mas importante gud nga tipigan naton an murayaw nga relasyon ha ira. Pakig-away kan Satanas, diri ha imo mga igkasi-tumuroo. Palabya an mga sayop han kabugtoan, o pangalimbasugi nga masulbad dayon an mga diri pagsinabtanay. (Prob. 19:11; Efe. 4:26) Magin andam ha pagbulig ha usa kag usa. (Tito 3:14) An bulig nga iginhatag han iba ha sister nga nanginahanglan nagkaada maopay nga epekto ha  grupo han pagsangyaw. Nagin mas duok hira, pariho hin pamilya.—Sal. 133:1.

16. Uyon ha Colosas 4:3, 18, paonan-o naton mabubuligan an aton kabugtoan nga gintitimaraot?

¹⁶ Yinukot han aton kabugtoan an nag-aalagad kan Jehova bisan pa han mga restriksyon han gobyerno. An pipira ha ira ginpriso tungod han ira pagtoo. Puydi ta hira ig-ampo, an ira pamilya, ngan adton nagbubutang han ira mismo kagawasan ha peligro basi mahatagan ini nga kabugtoan hin espirituwal, pisikal, ngan legal nga suporta. c (Basaha an Colosas 4:3, 18.) Ayaw gud minosa an mahihimo han imo mga pag-ampo!—2 Tes. 3:1, 2; 1 Tim. 2:1, 2.

17. Paonan-o ka makakapangandam yana para ha pagtimaraot?

¹⁷ Puydi ka ngan an imo pamilya makapangandam yana para ha pagtimaraot. (Buh. 14:22) Ayaw hunahunaa an tanan nga magraot nga butang nga posible mahitabo. Lugod, parig-ona an imo pakigsangkay kan Jehova ngan buligi an imo mga anak nga buhaton liwat ito. Kon may mga panahon nga nababaraka ka, isumat ha Dios an aada ha imo kasingkasing. (Sal. 62:7, 8) Sugad nga pamilya, hisguti an tanan nga rason kon kay ano nga makakasarig kamo ha iya. d An imo pagpangandam ngan pagsarig kan Jehova mabulig ha ira nga magkaada kaisog ngan kamurayawan, sugad la nga mabulig liwat ito ha ira kon maatubang kamo hin kalamidad.

18. Ano an aton magigin kabubuwason?

¹⁸ An kamurayawan han Dios nabulig ha aton nga umabat nga talwas. (Fil. 4:6, 7) Pinaagi hito, ginpapakalma ni Jehova an aton kasingkasing bisan pa han mga sakit, kalamidad, ngan pagtimaraot nga mahimo makaapekto ha aton yana. Gin-gagamit niya an maduruto nga mga tigurang basi atamanon kita. Ngan gintatagan niya kita ngatanan han pribilehiyo nga buligan an usa kag usa. An kamurayawan nga aton naieksperyensyahan yana mag-aandam ha aton nga atubangon an mas dagku nga pagsari nga maabot, bisan an “daku nga kasakitan.” (Mat. 24:21) Hito nga panahon, kinahanglan tipigan ta an aton kamurayawan ngan buligan an iba nga buhaton liwat ito. Pero katapos hito, diri na kita maatubang hin dagku nga problema nga makakapabaraka ha aton. Maieksperyensyahan na naton an karuyag ni Jehova para ha aton tikang pa hadto—an tinuod nga kamurayawan ha kadayonan.—Isa. 26:3, 4.