1. Antes mamatay hi Jesus, ano an ginsiring niya ha usa nga kriminal ha sapit niya? (Lucas 23:39-43)

 HI Jesus ngan an duha nga kriminal ha sapit niya nag-aantos samtang hinay-hinay hira nga namamatay. (Luc. 23:32, 33) Gin-iinsulto hi Jesus hini nga mga kriminal, salit klaro nga diri niya hira mga disipulo. (Mat. 27:44; Mar. 15:32) Pero nagbag-o an disposisyon han usa ha ira. Nagsiring hiya: “Jesus, hinumdumi ako kon aadto ka na ha imo Ginhadian.” Binaton hi Jesus: “Ha pagkamatuod susumatan ko ikaw yana nga adlaw, makakaupod ko ikaw ha Paraiso.” (Basaha an Lucas 23:39-43.) Waray ebidensya nga ginkarawat na hini nga kriminal an mensahe parte ha “Ginhadian han langit,” nga iginsangyaw ni Jesus ha panahon han iya ministeryo. Ngan waray gud magsiring hi Jesus nga ito nga tawo mahingangadto ha Ginhadian. (Mat. 4:17) An gin-uunabi ni Jesus amo an tiarabot nga Paraiso ha tuna. Kay ano nga makakasiring kita hito?

2. Ano an nagpapakita nga Judio an nagbabasol nga kriminal?

² Posible gud nga Judio an nagbabasol nga kriminal. Ginsidngan niya an usa pa nga kriminal: “Diri ka gud ba nahahadlok ha Dios, yana nga nakarawat mo liwat an pariho nga sirot?” (Luc. 23:40) An mga Judio nagsisingba ha usa la nga Dios, pero an mga tawo ha mga nasud natoo ha damu nga dios. (Ex. 20:2, 3; 1 Cor. 8:5, 6) Kon diri Judio ito nga mga kriminal, bangin ini an pakiana, “Diri ka gud ba nahahadlok ha mga dios?” Dugang pa, hi Jesus ginsugo, diri ha mga tawo ha mga nasud, kondi ha “nagkawawara nga mga karnero han panimalay ni Israel.” (Mat. 15:24) An Dios nagsumat na ha mga Israelita nga bubuhion niya an mga namatay. Bangin maaram hini an nagbabasol nga kriminal, ngan iginpapakita han iya ginsiring nga naghuhunahuna hiya nga babanhawon ni Jehova hi Jesus basi maghadi ha Ginhadian han Dios. Matin-aw nga naglalaom ito nga tawo nga babanhawon liwat hiya han Dios.

3. Ano an posible nga nahunahuna han nagbabasol nga kriminal han gin-unabi ni Jesus an Paraiso? Isaysay. (Genesis 2:15)

 ³ Sugad nga Judio, an nagbabasol nga kriminal bangin maaram parte kanda Adan ngan Eva ngan han Paraiso diin iginbutang hira ni Jehova. Salit posible nga natoo ito nga kriminal nga an Paraiso nga gin-unabi ni Jesus usa nga mahusay nga garden dinhi ha tuna.—Basaha an Genesis 2:15.

4. Ano an dapat naton hunahunaon tungod han ginsiring ni Jesus ha usa han mga kriminal?

⁴ An ginsiring ni Jesus ha kriminal dapat mag-aghat ha aton nga maghunahuna kon ano an magigin kahimtang han kinabuhi ha Paraiso. Ngani, may mahibabaroan kita mahitungod ha Paraiso tikang ha murayaw nga pagmando ni Hadi Solomon. Ngan makakalaom kita nga hi Jesus, nga mas harangdon kan Solomon, magbubuhat upod han iya mga igkasi-magmarando basi himoon nga makaruruyag nga Paraiso an tuna. (Mat. 12:42) Klaro nga an “iba nga mga karnero” dapat magin interesado ha kon ano an kinahanglan nira buhaton basi magin kwalipikado nga mabuhi ha kadayonan ha Paraiso.—Juan 10:16.

5. Para ha imo, ano an magigin kahimtang han kinabuhi ha Paraiso?

⁵ Para ha imo, ano an magigin kahimtang han kinabuhi ha Paraiso? Bangin maimadyin mo an usa nga mahusay nga parke pariho han garden han Eden. (Gen. 2:7-9) Bangin mahinumdoman mo an tagna nga iginrekord ni Micas nga malingkod “an kada tagsa [han katawohan han Dios] ha ilarom han iya tanom nga ubas ngan ilarom han iya kahoy nga igos.” (Mic. 4:3, 4) Bangin mahunahuna mo liwat an mga bersikulo ha Biblia nga nasiring nga magkakaada damu nga pagkaon. (Sal. 72:16; Isa. 65:21, 22) Salit bangin maimadyin mo an imo kalugaringon ha mahusay nga garden, nga nalingkod ha may lamesa nga puno hin magrasa nga pagkaon. Bangin maimadyin mo nga bisan diin aada an makaruruyag nga hamot han mga tanom ngan mga bukad. Ngan posible gud nga maimadyin mo an imo pamilya ngan kasangkayan—pati an mga binanhaw—nga nagkakaragtatawa ngan nag-i-enjoy ha pagkaurupod. Ito ngatanan diri kay inop la. Makakasiguro kita nga mahitatabo ito ha tuna. Pero ha Paraiso, magkakaada liwat kita makalilipay nga buruhaton.

6. Ano an aton hihimoon ha Paraiso? (Kitaa an piktyur.)

⁶ Ginlarang kita ni Jehova nga may abilidad nga malipay ha aton buruhaton. (Ecles. 2:24) Labi na nga magigin busy kita ha panahon han Usa ka Yukot ka Tuig nga Pagmando han Kristo. Adton makakatalwas ha daku nga kasakitan, pati na an minilyon nga mababanhaw, magkikinahanglan hin bado, pagkaon, ngan urukyan. Para maihatag ito, kinahanglan kita magbuhat hin damu nga makalilipay nga buruhaton. Sugad la nga hira Adan ngan Eva  ginsugo nga kultibaron an tuna, magkakaada kita pribilehiyo nga himoon nga Paraiso an tuna. Imadyina liwat kon ano kamakalilipay an pagtutdo ha minilyon nga babanhawon nga gutiay la an nahibabaroan parte kan Jehova ngan ha iya katuyoan ngan an pagbulig ha mga matinumanon nga nabuhi maiha pa antes han panahon ni Jesus basi mahibaro hin dugang pa!

7. Ha ano kita makakasarig, ngan kay ano?

⁷ Makakasarig kita nga an kinabuhi ha tiarabot nga Paraiso magigin murayaw, may kahuraan, ngan organisado gud. Kay ano? Kay gintagan na kita ni Jehova hin sampol han magigin kahimtang han kinabuhi ilarom han pagmando han iya Anak. Makikita naton ito ha rekord han pagmando ni Hadi Solomon.

8. Paonan-o nagkaada katumanan an mga pulong ha Salmo 37:10, 11, 29 katapos ito isurat ni Hadi David? (Kitaa an “Mga Pakiana Tikang ha mga Magbarasa” hini nga isyu.)

⁸ Gin-giyahan hi Hadi David ha pagsurat mahitungod han magigin kahimtang han kinabuhi kon magmando na an usa nga maaramon ngan matinumanon nga hadi. (Basaha an Salmo 37:10, 11, 29.) Agsob ta basahon ha iba an Salmo 37:11 kon nakikiistorya kita parte ha tiarabot nga Paraiso. May maopay kita nga rason nga buhaton ito kay hi Jesus nagkotar hito nga teksto ha iya Sermon ha Bukid, nga nagpapakita nga magkakaada ito katumanan ha tiarabot. (Mat. 5:5) Pero iginpakita liwat han ginsiring ni David kon ano an magigin kahimtang han kinabuhi ha panahon ni Hadi Solomon. Han nagmando hi Solomon ha Israel, an katawohan han Dios nagkaada daku nga kamurayawan ngan kahuraan ha tuna nga “nag-aawas hin gatas ngan dugos.” An Dios nagsiring hadto: “Kon padayon nga sundon niyo an mga surundon nga akon iginhatag . . . , pahihinaboon ko nga magkaada kamurayawan ha tuna, ngan mahigda kamo nga waray ginkakahadlokan.” (Lev. 20:24; 26:3, 6) Ito nga mga saad natuman ha panahon han paghadi ni Solomon. (1 Cron. 22:9; 29:26-28) Iginsaad liwat nga an magraot “mawawara na.” (Sal. 37:10) Salit an mga pulong ha Salmo 37:10, 11, 29 natuman ha kadaan nga panahon ngan matutuman liwat ha tiarabot.

9. Ano an ginsiring han rayna han Sheba mahitungod han pagmando ni Hadi Solomon?

⁹ Nakaabot ha rayna han Sheba an balita mahitungod  han kamurayawan ngan kahuraan nga napapahimulosan han mga Israelita ilarom han pagmando ni Solomon. Nagbiyahe hiya hin hirayo ngadto ha Jerusalem basi makita niya mismo an kahimtang didto. (1 Hadi 10:1) Katapos usisahon an ginhadian ni Solomon, nagsiring hiya: “Waray ngani magkatunga an iginsumat ha akon. . . . Malipayon an imo mga tawo, ngan malipayon an imo mga surugoon nga natindog pirme ha imo atubangan, nga namamati han imo kinaadman!” (1 Hadi 10:6-8) Pero an mga kahimtang ilarom han pagmando ni Solomon sampol la han bubuhaton ni Jehova para ha katawohan ilarom han pagmando han Iya Anak, hi Jesus.

10. Ha ano nga mga paagi hi Jesus labaw kan Solomon?

¹⁰ Hi Jesus labaw kan Solomon ha ngatanan nga paagi. Hi Solomon diri perpekto nga tawo nga nakahimo hin dagku nga sayop nga ha urhi nagresulta hin mga problema ha katawohan han Dios. Pero hi Jesus perpekto nga Magmarando nga diri nagsasayop. (Luc. 1:32; Heb. 4:14, 15) Nagpabilin hiya nga matinumanon ha Dios bisan pa han makuri gud nga mga pagsari ha iya ni Satanas. Ginpamatud-an han Kristo nga diri gud hiya makakasala o magbubuhat hin bisan ano nga makakadaot ha iya maunungon nga mga sakop. Daku gud nga kadungganan nga hiya an aton Hadi.

11. Hin-o an mabulig kan Jesus ha pagmando?

¹¹ Hi Jesus magkakaada 144,000 nga igkasi-magmarando nga mabulig ha iya ha pag-ataman ha mga tawo ngan ha pagtuman han katuyoan ni Jehova para ha tuna. (Pah. 14:1-3) Ini hira nakaeksperyensya hin damu nga pagsari ngan kakurian han mga tawo pa hira, salit magigin mapinairon hira nga mga igkasi-magmarando. Ano an bubuhaton hini nga mga igkasi-magmarando?

12. Ano an itutoka ni Jehova ha 144,000?

¹² An igintoka kan Jesus ngan ha iya mga igkasi-magmarando mas daku gud kay han igintoka kan Solomon. Kinahanglan atamanon hito nga hadi han Israel an minilyon nga tawo ha usa la nga nasud. Pero adton magmamando ha Ginhadian han Dios mabulig ha pag-ataman ha binilyon nga tawo nga naukoy ha bug-os nga tuna. Daku gud nga pribilehiyo an iginhahatag ni Jehova ha 144,000!

13. Ano an upod ha espesyal nga responsabilidad han mga igkasi-magmarando ni Jesus?

¹³ Pariho kan Jesus, an 144,000 magigin mga hadi ngan saserdote. (Pah. 5:10) Han an Israel sakop pa han Mosaiko nga Balaud, an mga saserdote an labi na nga may responsabilidad nga proteksyonan an pisikal nga kahimsog han mga tawo ngan siguruhon liwat nga mahimsog an ira espirituwalidad. An Balaud usa nga “lambong han mag-opay nga mga butang nga maabot,” salit makatadunganon la hunahunaon nga an mga igkasi-magmarando ni Jesus mabulig ha waray kapariho nga buruhaton ha pag-ataman han pisikal ngan espirituwal nga panginahanglan han katawohan Dios. (Heb. 10:1) Diri pa kita maaram yana kon paonan-o ini nga mga hadi ngan mga saserdote makikigkomunikar ha mga sakop han Ginhadian nga aanhi ha tuna. Anoman an magigin kahikayan ni Jehova, makakasarig kita nga ha maabot nga Paraiso, makakarawat hadton aanhi ha tuna an giya nga ira kinahanglan.—Pah. 21:3, 4.

14. Ano an relasyon han “iba nga mga karnero” ngan han kabugtoan han Kristo?

¹⁴ Gintawag ni Jesus nga “gutiay nga panon” adton makakaupod niya ha pagmando. (Luc. 12:32) Nag-unabi liwat hiya hin ikaduha nga grupo, nga gintawag niya nga “iba nga mga karnero.” Inin duha nga grupo uusa la nga nagkakaurosa nga panon. (Juan 10:16) An mga kaapi hinin duha nga grupo nagbubuhat na nga urosa, ngan magpapadayon ito samtang ginhihimo nga  Paraiso an tuna. Syempre, hito nga panahon an mga kaapi han “gutiay nga panon” aadto na ha langit ngan an mga kaapi han “iba nga mga karnero” magkakaada paglaom nga mabuhi ha kadayonan ha tuna. Pero may mga butang nga kinahanglan buhaton yana han “iba nga mga karnero” basi magin kwalipikado nga mabuhi ha Paraiso.

15. (a) Paonan-o ginsusuportaran han “iba nga mga karnero” an kabugtoan han Kristo? (b) Paonan-o mo masusubad an ehemplo han brother ha tindahan? (Kitaa an piktyur.)

¹⁵ An nagbabasol nga kriminal namatay antes hiya magkaada oportunidad nga maipakita hin bug-os an iya apresasyon ha Kristo. Pero kita nga kaapi han “iba nga mga karnero” may damu nga oportunidad yana nga ipakita kon ano an aton inaabat kan Jesus. Pananglitan, iginpapakita ta an aton gugma ha iya ha aton paagi han pagtratar ha iya dinihogan nga kabugtoan. Nagsiring hi Jesus nga magigin basihan niya ito ha paghukom ha mga karnero. (Mat. 25:31-40) Masusuportaran ta an kabugtoan han Kristo pinaagi ha madasigon nga pagbulig ha ira ha buruhaton nga pagsangyaw ngan panhimo hin disipulo. (Mat. 28:18-20) Salit karuyag naton gamiton hin maopay an mga bulig ha pag-aram ha Biblia nga ira igintatagana, sugad han libro nga Mabuhi hin Malipayon ha Waray Kataposan! Kon waray ka pa gindudumarahan hin pag-aram ha Biblia, kay ano nga diri magin tumong nga magtanyag hin pag-aram ha Biblia ha pinakadamu nga tawo tubtob ha imo mahihimo?

16. Ano an mahihimo naton sugad nga pagpangandam ha pagin sakop han Ginhadian han Dios?

¹⁶ Diri ta kinahanglan maghulat nga didto na kita ha Paraiso magigin klase hin tawo nga karuyag ni Jehova nga mag-ukoy didto. Yana pa la, puydi na kita mangalimbasog nga magin tangkod ha aton panyakan ngan mga buhat ngan magin timbang ha aton kinabuhi. Ngan puydi kita magin maunungon kan Jehova, ha aton asawa, ngan ha aton mga igkasi-Kristiano. Kon susundon ta an mga suruklan han Dios samtang nagkikinabuhi kita hinin maraot nga kalibotan, magigin mas masayon para ha aton nga sundon ito ha Paraiso. Puydi liwat kita mag-aram hin mga skill ngan magkultibar hin mga batasan basi ipakita nga nag-aandam kita nga mabuhi hito nga panahon. Kitaa an artikulo nga “Andam Ka ba nga ‘Mapanunod an Tuna’?” nga mababasa hini nga isyu.

17. Dapat ba kita madepres tungod han aton mga sala hadto? Isaysay.

 ¹⁷ Kinahanglan liwat kita mangalimbasog nga diri na makonsensya tungod han seryoso nga mga sala nga aton nahimo hadto. Syempre, diri gud naton hihimoon nga pasangil an halad-lukat basi ‘tinuyo nga magbuhat hin sala.’ (Heb. 10:26-31) Pero makakasarig kita nga kon tinuod nga ginbasolan na naton an usa nga seryoso nga sala, nangaro han bulig ni Jehova ngan han mga tigurang, ngan nagbag-o han aton panggawi, bug-os nga ginpasaylo na kita niya. (Isa. 55:7; Buh. 3:19) Hinumdumi an ginsiring ni Jesus ha mga Pariseo: “Kinanhi ako basi tawagon, diri an magtadong nga mga tawo, kondi an magpakasasala.” (Mat. 9:13) Daku gud an gahum han halad-lukat ha pagpara han ngatanan naton nga sala.

18. Ano an karuyag mo ipakiistorya ha kriminal nga namatay ha sapit ni Jesus?

¹⁸ Naiimadyin mo ba an imo kalugaringon ha Paraiso, nga kaistorya an kriminal nga nakiistorya kan Jesus? Sigurado nga ipapahayag niyo nga duha an iyo apresasyon ha halad ni Jesus. Bangin hangyoon mo hiya nga sumatan ka pa kon ano an nahitabo ha ultimo nga mga oras han kinabuhi ni Jesus ha tuna ngan kon ano an iya inabat han ginbaton ni Jesus an iya hangyo. Hiya naman bangin magpakiana ha imo kon ano an kahimtang han kinabuhi ha kataposan nga mga adlaw han sistema ni Satanas. Daku gud nga kadungganan an pag-aram ha Pulong han Dios upod an mga tawo nga pariho ha iya!—Efe. 4:22-24.

19. Kay ano nga diri magigin boring an kinabuhi ha Paraiso? (Kitaa an piktyur ha kobre.)

¹⁹ Diri gud magigin boring an kinabuhi ha Paraiso. Pirme kita may makikilala nga mga tawo nga makaruruyag igkaupod ngan magkakaada mapulsanon nga trabaho. Ngan an pinakamaopay, kada adlaw mas makikilala ta an aton langitnon nga Amay ngan mai-enjoy an iya igintatagana. Diri gud kita mauubosan hin mga butang nga mahibabaroan parte ha iya, ngan damu gud an aton mahibabaroan parte ha iya mga linarang. Samtang nagtitikaiha an aton kinabuhi, magtitikahilarom liwat an aton gugma ha Dios. Mapasalamaton gud kita kan Jehova ngan kan Jesus ha paghatag ha aton han saad nga puydi kita mabuhi ha kadayonan ha Paraiso!