Diri. Tinuod ngan reyalistiko ito nga ginsurat ni David.

Pansina an iya ginsurat dinhi ngan ha puropariho nga mga teksto: “Magkakanta ako hin mga pagdayaw ha imo ngaran ha kadayonan samtang gintutuman ko an akon mga saad kada adlaw.” “O Jehova nga akon Dios, bug-os-kasingkasing nga gindadayaw ko ikaw, ngan paghihimayaon ko an imo ngaran ha kadayonan.” “Dadayawon ko an imo ngaran ha kadayonan, oo ha kadayonan.”—Sal. 61:8; 86:12; 145:1, 2.

Hi David waray maghunahuna nga diri gud hiya mamamatay. Maaram hiya nga nagsiring hi Jehova nga an mga tawo mamamatay kay nakakasala hira, ngan gin-amin ni David nga makasasala hiya. (Gen. 3:3, 17-19; Sal. 51:4, 5) Maaram hiya nga bisan an kalalakin-an nga may pag-uyon han Dios, sugad kanda Abraham, Isaac, ngan Jacob, namatay. Ngan maaram hi David nga an iya mismo kinabuhi matatapos. (Sal. 37:25; 39:4) Pero makikita ha iya mga pulong ha Salmo 61:8 an iya hingyap ngan determinasyon nga dayawon an Dios ha kadayonan, karuyag sidngon, tubtob nga buhi hiya.—2 Sam. 7:12.

An pipira han mga sinurat ni David naghihisgot han iya mga eksperyensya, sugad han aton makikita ha mga superskripsyon han Salmo 18, 51, ngan 52. Ha Salmo 23, iginhulagway ni David hi Jehova sugad nga paraataman hin karnero nga naggigiya, nagrirepresko, ngan nagpuprotektar. Sugad hito nga paraataman hi David. Ngan karuyag niya mag-alagad ha Dios ‘ha ngatanan nga adlaw han iya kinabuhi.’—Sal. 23:6.

Hinumdumi liwat nga hi Jehova an naggiya kan David nga magsurat. Upod han iya ginsurat an mga tagna mahitungod han mga mahitatabo paglabay hin maiha pa nga panahon. Pananglitan, ha Salmo 110, gin-unabi ni David an panahon nga an iya Ginoo ‘malingkod ha too han Dios’ ha langit ngan makakakarawat hin daku nga gahum. Basi buhaton an ano? Basi sakupon an mga kaaway han Dios ngan ‘magpadapat hin paghukom kontra ha mga nasud’ ha tuna. Hi David usa nga kaapoy-apoyan han Mesias, nga amo an magmamando tikang ha langit ngan magigin “saserdote ha kadayonan.” (Sal. 110:1-6) Ginkompirma ni Jesus nga parte ha iya an tagna ha Salmo 110 ngan matutuman ito ha tiarabot.—Mat. 22:41-45.

Oo, gin-giyahan hi David nga magsurat mahitungod han iya panahon ngan han tiarabot nga panahon diin babanhawon hiya ngan makakagdayaw na kan Jehova ha kadayonan. Salit an Salmo 37:10, 11, 29 mahimo sabuton sugad nga paghulagway han mga kahimtang ha kadaan nga Israel ngan han magigin mga kahimtang ha bug-os nga tuna ha tiarabot kon tumanon na han Dios an iya mga saad.—Kitaa an parapo 8 han artikulo nga “Makakaupod Ko Ikaw ha Paraiso” hini nga isyu.

Salit iginpapakita han Salmo 61:8 ngan han iba pa nga bersikulo nga karuyag ni David himayaon hi Jehova ha kadaan nga Israel tubtob ha iya kamatay. Ngan iginpapakita hito kon ano an mahihimo ni David ha tiarabot kon ibalik na ni Jehova an iya kinabuhi.