Nabasa mo ba hin maopay an mga isyu han An Barantayan hini nga tuig? Kitaa kon mababaton mo an masunod nga mga pakiana:

Paonan-o kita magpapahimulos kon maggagahin kita hin panahon basi makiistorya kan Jehova, mamati ha iya, ngan maghunahuna mahitungod ha iya?

Makakahimo kita hin mas maopay nga mga desisyon, magigin mas maopay kita nga magturutdo, magigin mas marig-on an aton pagtoo, ngan maghihilarom an aton gugma kan Jehova.—w22.01, p. 30-31.

Paonan-o kita mabubuligan kon mahibabaro kita pagsarig kan Jehova ngan ha iya mga representante?

Yana na an panahon nga mahibaro kita pagsarig ha paagi ni Jehova ha pagbuhat han mga butang pinaagi ha diri pagruhaduha ha giya ngan mga desisyon han mga tigurang. Pag-abot han daku nga kasakitan, magigin andam kita nga sumugot bisan kon makakarawat kita hin mga instruksyon nga baga hin makuri masabtan o makuri sugton.—w22.02, p. 4-6.

Ano an punto han anghel han nagsumat hiya kan Zacarias mahitungod han usa nga “tunton ha kamot ni [Gobernador] Zerubabel”? (Zac. 4:8-10)

Ini nga bisyon nagpasarig ha katawohan han Dios nga an simple nga templo nga gintutukod matatapos ngan makakaabot ha mga suruklan han Dios.—w22.03, p. 16-17.

Paonan-o kita magigin “susbaranan . . . ha pagyakan”? (1 Tim. 4:12)

Nagyayakan kita hin buotan ngan may respeto ha aton ministeryo, nagkakanta hin bug-os-kasingkasing, nagkukomento hin regular ha mga katirok, ngan nagyayakan hin tinuod ngan nakakaparig-on ha iba, nga ginlilikayan an nakakadaot nga panyakan.—w22.04, p. 6-9.

Kay ano nga an mga kalidad han upat nga hayop (mga ginhadian) nga gin-unabi ha Daniel kapitulo 7 makikita ha usa la nga hayop nga iginhuhulagway ha Pahayag 13:1, 2?

An hayop ha Pahayag 13 diri nagsisimbolo ha usa la nga espisipiko nga ginhadian, sugad han Roma. Lugod, nagsisimbolo ito ha ngatanan nga gobyerno nga nagmamando ha katawohan.—w22.05, p. 9.

Ano an usa nga nangunguna nga paagi han pagpakita nga nasarig kita ha hustisya han Dios?

Kon may nag-insulto, nakasakit, o nakasala ha aton, nangangalimbasog kita nga wad-on an kasina ngan pagdumot ngan itubyan an mga butang ha mga kamot ni Jehova. Wawad-on niya an ngatanan nga kadaot nga resulta han sala.—w22.06, p. 10-11.

Ano an angay hinumdoman han usa nga brother nga nangunguna ha pag-ampo ha katirok?

An pag-ampo diri dapat gamiton ha pagsagdon ha kongregasyon o ha paghimo hin pahibaro. Labi na ha tinikangan han katirok, diri kinahanglan gumamit hin “damu nga pulong.” (Mat. 6:7)—w22.07, p. 24-25.

Ha ano nga paagi “an mga nagbuhat hin maraot” makakakarawat hin “pagkabanhaw ngadto ha paghukom”? (Juan 5:29)

Diri hira makakakarawat hin negatibo nga paghukom base ha ira kinabuhi hadto. Oobserbaran hira ngan uusisahon an ira disposisyon ngan panggawi katapos hira banhawon.—w22.09, p. 18.

Ano an eksayting nga igin-aghat ni J. F. Rutherford ha usa nga kombensyon han Septyembre 1922?

Ha usa nga kombensyon ha Cedar Point, Ohio, U.S.A., nagsiring hiya: “An Hadi nagmamando na! Kamo an iya mga ahente nga magpapasamwak hito. Salit ipasamwak, ipasamwak, ipasamwak, an Hadi ngan an iya Ginhadian!”—w22.10, p. 3-5.

Uyon ha iginpapakita ha Isaias kapitulo 30, ano an tulo nga paagi nga an Dios nabulig ha aton nga makailob?

Iginpapakita hini nga kapitulo nga hiya (1) namamati ngan nabaton ha aton mga pag-ampo, (2) naggigiya ha aton, ngan (3) nagbibendisyon ha aton yana ngan magbibendisyon ha aton ha tiarabot.—w22.11, p. 9.

Kay ano nga makakasiring kita nga an mga pulong ha Salmo 37:10, 11, 29 natuman ha kadaan nga panahon ngan matutuman liwat ha tiarabot?

An ginsiring ni David usa nga angayan nga paghulagway han makalilipay nga kahimtang ha Israel, sugad han ha panahon han pagmando ni Solomon. Nag-unabi hi Jesus hin tiarabot nga paraiso ngan nagkotar han bersikulo 11. (Mat. 5:5; Luc. 23:43)—w22.12, p. 8-10, 14.