1. Ano an “kamurayawan han Dios,” ngan paonan-o an pagkaada hito nakakabulig ha aton? (Filipos 4:6, 7)

 MAY usa nga klase hin kamurayawan nga diri nahibabaroan han mga tawo hini nga kalibotan. Ito an “kamurayawan han Dios,” an pagin kalmado nga resulta han pagkaada presyoso nga relasyon ha aton langitnon nga Amay. Kon may-ada kita han kamurayawan han Dios, naabat kita nga talwas. (Basaha an Filipos 4:6, 7.) May duok kita nga pakigsangkay ha iba nga nahigugma ha iya. Ngan kita mismo may duok nga relasyon ha ‘Dios han kamurayawan.’ (1 Tes. 5:23) Kon nakilala kita, nasarig, ngan nasugot ha aton Amay, an kamurayawan han Dios makakapakalma ha aton nababaraka nga kasingkasing kon naatubang kita hin makuri nga sitwasyon.

2. Kay ano nga makakasiguro kita nga posible an pagkaada han kamurayawan han Dios?

² Posible gud ba kita magkaada han kamurayawan han Dios kon naatubang hin daku nga problema, sugad han epidemya, kalamidad, kasamok, o pagtimaraot? An bisan hain hito puydi makapahadlok ha aton. Pero hi Jesus nagsagdon ha iya mga sumurunod: “Ayaw pabay-i nga an iyo kasingkasing masubo ngan manluya tungod han kahadlok.” (Juan 14:27) Makalilipay nga ginsunod han kabugtoan ito nga sagdon ni Jesus. Ha bulig ni Jehova, nagkaada hira kamurayawan bisan kon naatubang hin dagku nga problema.

3. Paonan-o an epidemya o pandemya mahimo makawara han aton kamurayawan?

³ An epidemya o pandemya nakakagbag-o gud han haros ngatanan nga bahin han kinabuhi. Pansina an nagin epekto han  COVID-19 ha damu nga tawo. Ha usa nga surbey, sobra katunga an nagsumat nga nakukurian hira pagkaturog ha panahon hito nga pandemya. An pandemya nagresulta ha pagdamu han nababaraka, nadidepres, naghuhubog ngan nagdudroga, nangangastigo ha kapamilya, ngan nagsasari pagpakamatay. Kon may epidemya ha iyo lugar, paonan-o mo makukontrol an imo kabaraka ngan magkakaada han kamurayawan han Dios?

4. Kay ano nga an paghibaro han tagna ni Jesus parte ha kataposan nga mga adlaw naghahatag ha aton hin kamurayawan?

⁴ Hi Jesus nagtagna nga ha kataposan nga mga adlaw, magkakaada mga epidemya “ha iba-iba nga mga lugar.” (Luc. 21:11) Paonan-o an paghibaro hito naghahatag ha aton hin kamurayawan? Diri kita nahipapausa kon may mga epidemya. Maaram kita nga nahitatabo ito sugad han ginsiring ni Jesus. Salit susundon ta an iya sagdon para ha mga nabubuhi ha panahon han kataposan: “Pag-ikmat nga diri kamo malisang.”—Mat. 24:6.

5. (a) Uyon ha ginsisiring han Filipos 4:8, 9, ano an dapat naton ig-ampo kon may epidemya? (b) Paonan-o makakabulig ha imo an pagpamati ha mga audio rekording han Biblia?

⁵ Kon may epidemya, bangin mabaraka gud kita ngan magpanik pa ngani. Nahitabo ito ha sister nga hi Desi. b Han namatay an iya batâ, patod, ngan doktor tungod han COVID-19, nahadlok hiya nga magkaada han virus ngan makatapon ha iya lagas nga nanay. Tungod han pandemya, aada liwat an posibilidad nga mawad-an hiya hin trabaho, salit naghunahuna hiya kon paonan-o hiya makakapalit hin pagkaon ngan makakabayad ha plete han balay. Nabaraka gud hiya salit diri hiya nahingangaturog ha gab-i. Pero nahibalik an kamurayawan ni Desi. Paonan-o? Espisipiko nga nag-ampo hiya kan Jehova nga buligan hiya nga magin kalmado ngan maghunahuna hin positibo nga mga butang. (Basaha an Filipos 4:8, 9.) Namati hiya ha “pakiistorya” ha iya ni Jehova pinaagi han mga audio rekording han Biblia. Nagsiring hiya, “An kalmado nga tingog han mga nagbabasa nakawara han akon kabaraka ngan nagpahinumdom ha akon han gugma ni Jehova.”—Sal. 94:19.

6. Paonan-o mabulig ha imo an personal nga pag-aram ngan an mga katirok?

⁶ Sigurado nga maaapektohan han epidemya an pipira nga bahin han imo rutina, pero ayaw tuguti nga maulang hito an imo personal nga pag-aram o pag-atender ha mga katirok. An mga eksperyensya nga makikita ha aton mga publikasyon ngan video magpapahinumdom ha imo nga an aton kabugtoan nagtitipig han ira integridad bisan pa han puropariho nga mga problema. (1 Ped. 5:9) An mga katirok mabulig ha imo nga maghunahuna hin positibo nga mga punto tikang ha Biblia.  Maghahatag liwat ito ha imo hin mga higayon nga makadasig ngan madasig. (Roma 1:11, 12) Samtang ginpapamalandong mo kon paonan-o ginbuligan ni Jehova an iya mga magsiringba han may sakit hira, nahahadlok, o namimingaw, an imo pagtoo magririg-on ngan makukombinse ka nga mabulig liwat hiya ha imo.

7. Ano nga leksyon an imo mahibabaroan tikang kan apostol Juan?

⁷ Paningkamuti nga makiistorya ha kabugtoan. Kon may epidemya, bangin kinahanglan kita mag-physical distancing bisan kon kaupod ta an aton mga igkasi-magsiringba. Ha sugad hito nga panahon, bangin abaton mo an gin-abat ni apostol Juan. Karuyag niya makita hin personal an iya sangkay nga hi Gayo. (3 Juan 13, 14) Pero ginkarawat ni Juan nga ha pipira ka panahon, diri niya makikita hi Gayo. Salit ginbuhat ni Juan an iya mahihimo; nagsurat hiya kan Gayo. Kon diri pirme posible nga makaistorya mo an kabugtoan hin personal, pangalimbasugi nga makontak hira pinaagi han telepono, video call, o text. Kon titipigan mo an komunikasyon ha imo mga igkasi-Kristiano, maiibanan an imo pag-abat nga nag-uusahan ngan magigin mas kalmado ka. Kontaka an mga tigurang kon naabat ka hin duro nga kabaraka, ngan karawata an ira mahigugmaon nga pagdasig.—Isa. 32:1, 2.

8. Paonan-o mahimo makawara han imo kamurayawan an kalamidad?

⁸ Kon nakaeksperyensya ka hin baha, linog, o sunog, bangin maiha nga inabat ka hin grabe nga kabaraka. Kon namatayan ka hin mga hinigugma o nawad-an hin mga panag-iya, posible nga nasubo ka, nawad-an hin paglaom, o nasina pa ngani. Diri ini nagpapasabot nga materyalistiko ka o kulang hin pagtoo. Nag-agi ka hin makuri nga problema, ngan bangin naglalaom na an iba nga magkakaada ka negatibo nga reaksyon. (Job 1:11) Pero bisan pa han nakakaistres nga mga kahimtang, mahimo ka magin murayaw. Paonan-o?

9. Ano an ginsiring ni Jesus basi maiandam kita ha mga trahedya?

⁹ Hinumdumi an igintagna ni Jesus. Diri pariho han iba nga naghuhunahuna nga diri gud hira makakaeksperyensya hin kalamidad, ginlalaoman ta na nga magdadamu an kalamidad, nga an iba hito puydi makaapekto ha aton. Hi Jesus nagsiring ha iya mga sumurunod nga magkakaada “magkusog nga mga linog” ngan iba pa nga kalamidad antes umabot an kataposan. (Luc. 21:11) Iya liwat igintagna nga magkakaada pag-uswag han pagkamatinalapason, ngan nakikita ito yana ha mga krimen, kamadarahog, ngan pag-atake han mga terorista. (Mat. 24:12) Waray gud magsiring hi Jesus nga an mga ginbayaan la ni Jehova an maaapektohan hini. Ngani, damu han matinumanon nga mga surugoon ni Jehova an nakaeksperyensya hin mga kalamidad. (Isa. 57:1; 2 Cor. 11:25) Bangin diri kita milagroso nga proteksyonan ni Jehova ha tanan nga kalamidad, pero ihahatag niya ha aton an aton ginkikinahanglan basi makapabilin nga kalmado ngan murayaw.

10. Kay ano nga pagpakita hin pagtoo an pagpangandam yana para ha kalamidad? (Proberbios 22:3)

¹⁰ Mas masayon kita makapabilin nga kalmado ha usa nga emergency kon abanse nga nagplano kita kon ano an bubuhaton. Pero an pagpangandam ba nagpapakita nga kulang kita hin pagtoo kan Jehova? Diri. Ngani, an pagpangandam para ha kalamidad nagpapakita nga may-ada gud kita pagtoo ha iya abilidad nga atamanon kita. Kay ano? Kay an Pulong han Dios nagsasagdon ha aton nga mangandam para ha posible nga mga kalamidad. (Basaha an Proberbios 22:3.) Ngan pinaagi han mga artikulo ha mga magasin, mga katirok, ngan napapanahon nga mga pahibaro, an organisasyon han Dios pauroutro  nga nag-aaghat ha aton nga mangandam para ha usa nga emergency. c Nasarig ba kita kan Jehova? Kon oo, susundon naton ito nga sagdon yana—antes pa magkaada kalamidad.

11. Ano an imo nahibaroan ha ehemplo ni Margaret?

¹¹ Pansina an eksperyensya han sister nga hi Margaret. Ginpaebakwit hiya han nagkaada wildfire ha ira lugar. Tungod kay damu gud nga tawo an nagdududrungan pagpalagiw, diri na nakakaabante an mga sarakyan tungod ha sobra nga trapik. Nagkaada madakmol ngan maitom nga aso, ngan maiha-iha nga waray makagawas hi Margaret ha iya awto. Pero nakatalwas hiya kay andam hiya. Ha iya pitaka may-ada hiya mapa nga magagamit niya ha pagbiling hin ruta ha pag-ebakwit. Nagdrayb na ngani hiya dida hito nga ruta basi masayon na niya ito masundan kon may emergency. Tungod han iya pagpangandam, nakatalwas hiya.

12. Kay ano nga nasunod kita ha mga instruksyon nga iginhahatag basi magin talwas kita?

¹² Basi maproteksyonan kita ngan maibalik an kahapsay ha komunidad, bangin hangyoon kita han mga awtoridad nga sundon an curfew, mag-ebakwit, o buhaton an iba pa nga praktikal nga butang. May mga tawo nga diri nasunod dayon o naglalangan kay nadiri hira bayaan an ira panag-iya. Ano an ginbubuhat han mga Kristiano? An Biblia nagsusugo ha aton: “Tungod ha Ginoo, magpasakop kamo ha tagsa nga hinimo han tawo, ha hadi man sugad nga hitaas an katungdanan o ha mga gobernador sugad nga iya ginsugo.” (1 Ped. 2:13, 14) An organisasyon han Dios naghahatag liwat ha aton hin instruksyon basi magin talwas kita. Regular kita nga ginpapahinumdoman nga ihatag ha mga tigurang an aton pinakabag-o nga contact information basi makontak kita nira kon may emergency. Ginbuhat mo na ba ito? Bangin makakarawat liwat kita hin instruksyon nga magpabilin ha balay o mag-ebakwit, kon paonan-o makakakuha hin mga relief supply, o kon paonan-o ngan san-o mabulig ha iba. Kon diri kita masunod, mahimo manelikado an aton kinabuhi ngan an kinabuhi han mga tigurang. Hinumdumi nga inin matinumanon nga kalalakin-an padayon nga nagbabantay ha aton. (Heb. 13:17) Hi Margaret nagsiring, “Natoo gud ako nga an pagsunod ha instruksyon han mga tigurang ngan han organisasyon nagtalwas han akon kinabuhi.”

13. Ano an nakabulig ha damu nga namalagiw nga Kristiano nga magin malipayon ngan murayaw?

¹³ Damu nga kabugtoan nga kinahanglan  pumalagiw tungod han kalamidad o girra o kasamok an nagbuhat han ira pinakamaopay basi makapahiuyon ha ira bag-o nga kahimtang ngan makigbahin dayon ha teokratiko nga mga buruhaton. Pariho han siyahan nga mga Kristiano nga nagpatlaag tungod han pagtimaraot, padayon hira nga “nagpapasamwak han maopay nga sumat han pulong.” (Buh. 8:4) An pagsangyaw nabulig ha ira nga magpokus ha Ginhadian imbes nga ha makuri nga kahimtang. Sugad nga resulta, nagpapabilin hira nga malipayon ngan murayaw.

14. Paonan-o an pagtimaraot mahimo makawara han aton kamurayawan?

¹⁴ Kon gintitimaraot kita, mahimo kita mawad-an hin damu nga butang nga nabulig ha aton nga magin murayaw. Malipayon kita ngan kontento kon may kagawasan kita nga magkatirok, magsangyaw, ngan buhaton an aton mga rutina kada adlaw, nga diri nahahadlok nga arestuhon. Kon mawara ito nga mga kagawasan, bangin kita mabaraka ngan mahadlok kon ano an sunod nga mahitatabo. Normal la nga abaton ta ito. Pero kinahanglan kita mag-ikmat. Nagsiring hi Jesus nga mahimo mahipakdol an iya mga sumurunod tungod han pagtimaraot. (Juan 16:1, 2) Salit paonan-o kita makakapabilin nga murayaw kon gintitimaraot?

15. Kay ano nga diri kita dapat mahadlok ha pagtimaraot? (Juan 15:20; 16:33)

¹⁵ An Pulong han Dios nagsusumat ha aton: “Pagtitimarauton liwat an ngatanan nga naghihingyap magkinabuhi nga may debosyon ha Dios sugad nga mga disipulo ni Kristo Jesus.” (2 Tim. 3:12) An brother nga hi Andrei nakurian pagkarawat hito nga kamatuoran katapos igdiri an buruhaton ha iya nasud. Naghunahuna hiya: ‘Damu gud an mga Saksi dinhi. Paonan-o kami ngatanan maaaresto han mga awtoridad?’ Pero imbes nga magin murayaw hi Andrei, pirme na lugod hiya nababaraka tungod hini nga panhunahuna. An iba nga kabugtoan sinarig kan Jehova ngan waray kombinsiha an ira kalugaringon nga diri hira maaaresto. Maaram hira nga bangin hira arestuhon, pero diri hira pariho kan Andrei nga nababaraka gud. Salit nagdesisyon hiya nga subaron an ira panhunahuna ngan isarig an iya kalugaringon ha Dios. Waray pag-iha, nagin murayaw an iya pag-abat, ngan yana malipayon na hiya bisan pa han mga problema. Mahimo liwat ito mahitabo ha aton. Hi Jesus nagsiring nga malalaoman naton an pagtimaraot,  pero iya liwat kita ginpasarig nga makakapabilin kita nga matinumanon.—Basaha an Juan 15:20; 16:33.

16. Ano nga mga instruksyon an kinahanglan naton sundon ha panahon han pagtimaraot?

¹⁶ Kon an aton buruhaton igdiri o magkaada daku nga restriksyon, puydi kita makakarawat hin mga instruksyon tikang ha sanga nga opisina ngan ha mga tigurang. Katuyoan hini nga proteksyonan kita, siguruhon nga padayon kita nga makakarawat hin espirituwal nga pagkaon, ngan buligan kita nga padayon nga makasangyaw tubtob nga posible. Buhata an imo pinakamaopay nga sundon an instruksyon nga imo nakakarawat, bisan diri mo bug-os nga nasasabtan kon kay ano nga iginhahatag ito. (San. 3:17) Ngan ayaw gud pagsumat hin impormasyon parte ha aton kabugtoan o ha mga buruhaton han kongregasyon ha mga tawo nga waray katungod nga mahibaro hito.—Ecles. 3:7.

17. Pariho han mga apostol ha siyahan nga siglo, ano an aton determinasyon?

¹⁷ Usa nga nangunguna nga rason ni Satanas ha pakiggirra ha katawohan han Dios amo an ira “buruhaton nga pagpamatuod mahitungod kan Jesus.” (Pah. 12:17) Ayaw patarhog kan Satanas ngan ha iya kalibotan. An pagsangyaw ngan pagtutdo bisan pa han pagkontra naghahatag ha aton hin kalipay ngan kamurayawan. Ha siyahan nga siglo, han an Judio nga mga awtoridad nagsugo ha mga apostol nga diri na magsangyaw, ginpili hiton matinumanon nga kalalakin-an nga sugton an Dios. Padayon hira nga nagsangyaw, ngan ito nga buruhaton nakapalipay ha ira. (Buh. 5:27-29, 41, 42) Syempre, kon may restriksyon an aton buruhaton, kinahanglan maghirot kita samtang nagsasangyaw. (Mat. 10:16) Pero kon bubuhaton ta an aton pinakamaopay, magkakaada kita kamurayawan kay napapalipay ta hi Jehova ngan iginsasangyaw an mensahe nga nagtatalwas han kinabuhi.

18. Hin-o an makakahatag ha aton hin tinuod nga kamurayawan?

¹⁸ Sarig nga bisan ha pinakamakuri nga mga panahon, puydi kita magkaada kamurayawan. Hito nga mga panahon, kinahanglan ta hinumdoman nga an kamurayawan nga aton ginkikinahanglan amo an kamurayawan han Dios, karuyag sidngon, an kamurayawan nga hi Jehova la an makakahatag. Sarig ha iya kon naatubang ka hin epidemya, kalamidad, o pagtimaraot. Magpabilin nga duok ha iya organisasyon. Hunahunaa an makalilipay nga kabubuwason nga naghuhulat ha imo. Kon bubuhaton mo ito, ‘an Dios han kamurayawan maupod ha imo.’ (Fil. 4:9) Ha sunod nga artikulo, hihisgotan ta kon paonan-o kita makakabulig ha aton mga igkasi-Kristiano nga naatubang hin kasakitan basi magkaada han kamurayawan han Dios.