1. Ano an epekto ha aton han pagpamalandong han saad ni Jehova nga kinabuhi nga waray kataposan?

 HI Jehova nagsasaad nga adton nasugot ha iya magkakaada “kinabuhi nga waray kataposan.” (Roma 6:23) Kon ginpapamalandong ta an iginhahatag ha aton ni Jehova, nagigin mas marig-on an aton gugma ha iya. Hunahunaa la: An aton langitnon nga Amay nahigugma gud ha aton salit diri gud kita mahibubulag ha iya.

2. Paonan-o nabulig ha aton an saad nga kinabuhi nga waray kataposan?

² An saad han Dios nga kinabuhi nga waray kataposan nabulig ha aton nga mailob an aton mga problema yana. Bisan kon an aton mga kaaway nagtatarhog nga patayon kita, diri kita magkukompromiso. Kay ano? An usa nga rason, kay maaram kita nga kon kita mamatay nga matinumanon kan Jehova, babanhawon kita niya nga may paglaom nga diri na gud mamatay. (Juan 5:28, 29; 1 Cor. 15:55-58; Heb. 2:15) Kay ano nga makakasiguro kita nga posible kita mabuhi ha kadayonan? Pansina an masunod nga mga rason.

3. Kay ano nga makakasiguro kita nga matitipigan kita ni Jehova nga buhi ha kadayonan? (Salmo 102:12, 24, 27)

³ Maaram kita nga matitipigan kita ni Jehova nga buhi ha kadayonan kay hiya an gintitikangan han kinabuhi ngan buhi hiya ha kadayonan. (Sal. 36:9) Pansina an pipira la nga teksto ha Biblia nga nagpapamatuod nga hi Jehova waray tinikangan ngan waray kataposan. An Salmo 90:2 nasiring nga hi Jehova “tikang ha waray tinikangan tubtob ha waray kataposan.” Puropariho hito an ginsisiring han Salmo 102. (Basaha an Salmo 102:12, 24, 27.) Ngan nagsurat hi propeta Habakuk parte ha aton langitnon nga Amay: “Diri ba waray ka tinikangan, O Jehova? O akon Dios, akon Baraan nga Dios, diri ka namamatay.”—Hab. 1:12.

4. Angay ba kita mabaraka kon nakukurian kita pagsabot han ideya nga hi Jehova waray tinikangan? Isaysay.

 ⁴ Nakukurian ka ba pagsabot han ideya nga hi Jehova “tikang ha waray tinikangan tubtob ha waray kataposan”? (Isa. 40:28) Diri ito urusahon. Hi Elihu nagsiring mahitungod ha Dios: “An kadamu han iya mga tuig diri masasabtan.” (Job 36:26) Pero diri karuyag sidngon nga diri tinuod an usa nga butang tungod la kay diri naton ito nasasabtan. Pananglitan, bangin diri naton bug-os nga nasasabtan kon paonan-o nasanag an lamrag, pero karuyag sidngon ba nga waray lamrag? Diri! Ha pariho nga paagi, kita nga mga tawo bangin diri bug-os nga makakasabot kon paonan-o nagin posible nga hi Jehova waray tinikangan ngan waray kataposan. Pero diri ito nagpapasabot nga an Dios diri nabubuhi ha kadayonan. An kamatuoran mahitungod ha Maglalarang diri nakadepende ha kon ano an aton nasasabtan o diri nasasabtan. (Roma 11:33-36) Ngan nakada na hiya antes pa magkaada bisan ano nga butang ha uniberso—upod na an mga gintitikangan han kalamrag sugad han adlaw. Ginpapasarig kita ni Jehova nga hiya “an Dios nga naghimo han tuna pinaagi han iya gahum.” Oo, nakada na hiya antes pa niya “unaton an kalangitan.” (Jer. 51:15; Buh. 17:24) Ano an usa pa nga rason nga makakasiguro kita nga posible kita mabuhi ha kadayonan?

5. Ano an paglaom han siyahan nga mag-asawa?

⁵ An ngatanan nga ginlarang ni Jehova ha tuna may tubtoban an kinabuhi, labot la ha mga tawo. Gintagan niya hira han waray kapariho nga paglaom nga diri gud mamatay. Pero nagpahamangno hi Jehova kan Adan: “Mahitungod ha kahoy han kahibaro han maopay ngan maraot, ayaw pagkaon han bunga hito, kay ha adlaw nga kumaon ka han bunga hito mamamatay ka gud.” (Gen. 2:17) Kon sinugot hira Adan ngan Eva kan Jehova, diri unta hira mamamatay. Makatadunganon la hunahunaon nga ha kamaihaan, tutugotan hira ni Jehova nga kumaon han bunga han “kahoy han kinabuhi.” Nangangahulogan unta ito nga ginpapasarig niya hira nga ‘mabubuhi [hira] ha kadayonan.’ b—Gen. 3:22.

6-7. (a) Ano pa an nagpapakita nga an mga tawo ginlarang diri basi mamatay? (b) Ano nga mga buruhaton an hingyap mo gud himoon ha tiarabot? (Kitaa an mga piktyur.)

⁶ Makapainteres nga may mga syentista nga nakadiskobre hin ebidensya nga an aton utok may kapasidad nga makagtipig hin mas damu  gud nga impormasyon kay ha aton mahibabaroan ha aton presente nga kinabuhi. Han 2010, usa nga artikulo ha barasahon nga Scientific American Mind an nagsiring nga an kapasidad han aton utok mga 2.5 ka milyon ka gigabyte, katugbang han tulo ka milyon ka oras (sobra 300 ka tuig) nga programa ha TV. Ngan bangin hamubo pa ngani ito nga numero. Pero iginpapakita la hito nga pagbanabana nga gindisenyo ni Jehova an aton utok nga makagtipig hin mas damu gud nga impormasyon kay han aton nahibabaroan ha 70 o 80 la ka tuig.—Sal. 90:10.

⁷ Gintagan liwat kita ni Jehova hin daku nga hingyap nga padayon nga mabuhi. May kalabotan ha mga tawo, an Biblia nasiring nga “iginbutang [han Dios] an kadayonan ha ira kasingkasing.” (Ecles. 3:11) Usa ito nga rason kon kay ano nga para ha aton, kaaway an kamatayon. (1 Cor. 15:26) Kon nagkakasakit kita hin grabe, ginkakarawat la ba naton ito ngan naghuhulat na la nga mamatay? Diri. Kasagaran na nga nagpapadoktor kita ngan bangin natumar hin medisina basi matambal an sakit. Ngani, ginbubuhat ta an ngatanan nga aton makakaya basi diri mamatay. Ngan kon namamatay an usa nga aton hinigugma, bata man hiya o lagas, diri ba naabat kita hin daku ngan maiha nga kasubo? (Juan 11:32, 33) Sigurado nga diri ihahatag ha aton han aton mahigugmaon nga Maglalarang an hingyap ngan kapasidad nga padayon nga mabuhi labot la kon katuyoan niya nga padayon nga mabuhi an mga tawo. Pero may-ada pa mas makakombinse nga mga rason nga tumoo nga puydi kita mabuhi ha waray kataposan. Hisgotan ta an pipira nga ginbuhat ni Jehova han naglabay ngan ginbubuhat niya yana nga nagpapamatuod nga waray magbag-o an iya orihinal nga katuyoan.

8. Mahitungod ha katuyoan ni Jehova para ha aton, ano an iginpapasarig ha aton han Isaias 55:11?

⁸ Bisan kon nakasala hira Adan ngan Eva ngan tungod hito namamatay an ira mga anak, waray bag-oha ni Jehova an iya hunahuna may kalabotan ha iya katuyoan. (Basaha an Isaias 55:11.) Katuyoan la gihap niya nga an matinumanon nga mga tawo mabuhi ha kadayonan. Maaram kita hito tungod ha mga ginsiring ngan ginbuhat ni Jehova basi matuman an iya katuyoan.

9. Ano an iginsaad han Dios? (Daniel 12:2, 13)

⁹ Nagsaad hi Jehova nga babanhawon niya an mga patay ngan tatagan hira hin oportunidad nga mabuhi ha waray kataposan. (Buh. 24:15; Tito 1:1, 2) Sigurado an matinumanon nga lalaki nga hi Job nga hingyap ni Jehova nga banhawon an mga nagkamatay. (Job 14:14, 15) Maaram hi propeta Daniel nga an mga tawo may paglaom nga banhawon ngan magkaada oportunidad nga mabuhi ha kadayonan. (Sal. 37:29; basaha an Daniel 12:2, 13.) An mga Judio ha panahon ni Jesus maaram liwat nga puydi ni Jehova tagan hin “kinabuhi nga waray kataposan” an iya matinumanon nga mga surugoon. (Luc. 10:25; 18:18) Hi Jesus pauroutro nga nagyakan mahitungod hini nga saad, ngan hiya mismo ginbanhaw han iya Amay.—Mat. 19:29; 22:31, 32; Luc. 18:30; Juan 11:25.

10. Ano an ginpapamatud-an han mga pagkabanhaw han naglabay? (Kitaa an piktyur.)

¹⁰ Hi Jehova an Humaratag han kinabuhi ngan may gahum hiya nga ibalik an kinabuhi han mga tawo. Iya gintagan hi propeta Elias hin gahum nga banhawon an anak nga lalaki han balo ha Zarepat. (1 Hadi 17:21-23) Ha urhi, ha bulig han Dios, ginbanhaw ni propeta Eliseo an anak nga lalaki han usa nga Sunamita nga babaye. (2 Hadi 4:18-20, 34-37) Ito ngan an iba pa nga mga pagkabanhaw nagpapamatuod nga may gahum hi Jehova nga ibalik an kinabuhi han mga tawo. Han nakanhi hi Jesus ha tuna, iya ginpamatud-an nga gintagan hiya han iya Amay hito nga gahum. (Juan 11:23-25, 43, 44) Yana aadto na hi Jesus ha langit ngan iginhatag na ha iya “an ngatanan nga awtoridad ha langit ngan ha tuna.” Salit matutuman niya an saad nga “an ngatanan nga aadto ha handumanan nga mga lubnganan” bubuhion nga may paglaom nga magpabilin nga buhi ha kadayonan.—Mat. 28:18; Juan 5:25-29.

11. Ano an nahihimo han lukat basi magin posible para ha aton nga mabuhi ha kadayonan?

¹¹ Kay ano nga gintugotan ni Jehova nga mamatay ha masakit nga paagi an iya hinigugma nga Anak? Iginsumat ni Jesus an rason han nagsiring hiya: “Hinigugma gud han Dios an kalibotan salit iginhatag niya an iya bugtong nga Anak, basi an bisan hin-o nga nagpapakita hin pagtoo ha iya diri mabungkag kondi magkaada kinabuhi nga waray kataposan.” (Juan 3:16) Pinaagi ha paghatag han iya Anak sugad nga lukat basi mapara an aton mga sala, ginhimo nga posible han Dios para ha aton nga magkaada kinabuhi nga waray kataposan. (Mat. 20:28) Iginsaysay ni apostol Pablo inin importante nga bahin han katuyoan han Dios han hiya nagsurat: “Tungod kay nagkaada kamatayon pinaagi han usa ka tawo, nagkakaada liwat pagkabanhaw han mga patay pinaagi han usa ka tawo. Kay sugad la nga tungod kan Adan an ngatanan namamatay, sugad man tungod han Kristo an ngatanan bubuhion.”—1 Cor. 15:21, 22.

12. Paonan-o an Ginhadian mabulig ha pagtuman han katuyoan ni Jehova para ha aton?

¹² Gintutdoan ni Jesus an iya mga sumurunod nga ig-ampo nga kumanhi an Ginhadian han Dios ngan matuman an kaburut-on han Dios dinhi ha tuna. (Mat. 6:9, 10) Bahin han katuyoan han Dios nga mabuhi an mga tawo ha  kadayonan dinhi ha tuna. Basi matuman ito, ginhimo ni Jehova nga Hadi han Mesianiko nga Ginhadian an iya Anak. Nagtitirok an Dios hin 144,000 ka tawo tikang ha tuna basi bumulig kan Jesus ha pagtuman han katuyoan han Dios.—Pah. 5:9, 10.

13. Ano an ginbubuhat ni Jehova yana, ngan ano an kinahanglan mo buhaton?

¹³ Gintitirok yana ni Jehova an “usa nga daku nga grupo” han mga tawo ngan ginbabansay hira nga magin mga sakop han iya Ginhadian. (Pah. 7:9, 10; San. 2:8) Bisan kon an kadam-an ha kalibotan yana nagkakabahin-bahin tungod han kapungot ngan girra, an mga kaapi hini nga grupo nangangalimbasog nga wad-on an ira kapungot ha iba nga nasud, tribo, ngan tawo. Simboliko nga ginpapanday na nira an ira mga espada basi magin mga punta han arado. (Mic. 4:3) Imbes nga umapi ha mga girra nga nagriresulta ha kamatay han damu, nabulig hira ha mga tawo nga mabilngan “an tinuod nga kinabuhi” pinaagi ha pagtutdo ha ira mahitungod ha tinuod nga Dios ngan ha iya mga katuyoan. (1 Tim. 6:19) Bangin kontrahon hira han ira mga kapamilya o magkuri ha pinansyal tungod han ira pagsuporta ha Ginhadian han Dios, pero ginsisiguro ni Jehova nga may-ada hira han ira mga panginahanglan. (Mat. 6:25, 30-33; Luc. 18:29, 30) Ini nga mga punto nagpapasarig ha aton nga tinuod an Ginhadian han Dios ngan padayon nga tutumanon hito an katuyoan ni Jehova.

14-15. Paonan-o matutuman an saad ni Jehova nga pagwawad-on an kamatayon ha kadayonan?

¹⁴ Hi Jesus Hadi na yana han Ginhadian han Dios ha langit ngan iya tutumanon an ngatanan nga iginsaad ni Jehova. (2 Cor. 1:20) Tikang han 1914, ginsasakop na ni Jesus an iya mga kaaway. (Sal. 110:1, 2) Diri mag-iiha, magigin bug-os an kadaogan niya ngan han iya mga igkasi-magmarando ngan bubungkagon nira an ngatanan nga magraot.—Pah. 6:2.

¹⁵ Ha panahon han Usa ka Yukot ka Tuig nga Pagmando ni Jesus, an mga patay babanhawon ngan an masinugtanon nga katawohan bubuligan nga magin perpekto. Katapos han ultimo nga pagsari, adton ginhukman ni Jehova nga magtadong “magtatag-iya han tuna, ngan maukoy hira dida ha waray kataposan,” o ha kadayonan. (Sal. 37:10, 11, 29) Makalilipay nga “an kataposan nga kaaway, an kamatayon, pagwawad-on.”—1 Cor. 15:26.

16. Ano an dapat magin nangunguna naton nga motibo ha pag-alagad kan Jehova?

¹⁶ Sugad han aton nahibaroan, an aton paglaom nga mabuhi ha kadayonan marig-on nga nakabase ha Pulong han Dios. Ito nga paglaom makakabulig ha aton nga magpabilin nga maunungon hinin makuri nga kataposan nga mga adlaw. Pero basi mapalipay hi Jehova, dapat diri la an hingyap nga magpabilin nga buhi an magpagios ha aton. An nangunguna nga rason nga nagpapabilin kita nga maunungon kan Jehova ngan kan Jesus amo an aton hilarom nga gugma ha ira. (2 Cor. 5:14, 15) Ito nga gugma nagpapagios ha aton nga subaron hira ngan isangyaw an aton paglaom. (Roma 10:13-15) Kon nahibabaro kita nga magsakripisyo para ha iba ngan magin mahinatagon, maruruyag hi Jehova nga magin mga sangkay kita niya ha kadayonan.—Heb. 13:16.

17. Ano an aton responsabilidad? (Mateo 7:13, 14)

¹⁷ Magigin kaapi ba kita hadton makakakarawat han kinabuhi nga waray kataposan? Gintatagan kita ni Jehova hito nga oportunidad. Yana kinahanglan pilion naton nga magpabilin ha dalan tipakadto ha kinabuhi. (Basaha an Mateo 7:13, 14.) Ano an magigin kahimtang han kinabuhi kon mabuhi na kita ha kadayonan? Hihisgotan naton an baton hito nga pakiana ha sunod nga artikulo.