1. Kay ano nga makakasiring kita nga marig-on an paglaom ni Abraham?

 NAGSAAD hi Jehova ha iya sangkay nga hi Abraham nga bibendisyonan an ngatanan nga nasud ha tuna pinaagi han iya tulin. (Gen. 15:5; 22:18) Tungod kay hi Abraham may hilarom nga pagtoo ha Dios, kombinsido hiya nga matutuman an Iya saad. Bisan pa hito, han hi Abraham 100 anyos na ngan an iya asawa 90 anyos, ito nga matinumanon nga mag-asawa waray la gihapon anak. (Gen. 21:​1-7) Pero an Biblia nasiring: “Basado ha paglaom, may pagtoo [hi Abraham] nga magigin amay hiya han damu nga nasud uyon ha ginsiring.” (Roma 4:18) Maaram ka nga natuman an paglaom ni Abraham. Nagin tatay hiya han iya anak nga maiha na niya nga ginpinamulat, hi Isaac. Ano an basihan han pagsarig ni Abraham?

2. Kay ano nga kombinsido hi Abraham nga matutuman an saad ni Jehova?

² Tungod kay hi Abraham may duok nga relasyon kan Jehova, “kombinsido gud hiya nga matutuman . . . han Dios an iya iginsaad.” (Roma 4:21) Gin-uyonan ni Jehova hi Abraham ngan gintawag hiya nga matadong tungod han iya pagtoo. (San. 2:23) Sugad han mababasa ha Roma 4:​18, hi Abraham may pagtoo ngan paglaom. Hisgotan ta yana an ginsiring ni apostol Pablo mahitungod ha paglaom, nga nakarekord ha Roma kapitulo 5.

3. Ano an iginsaysay ni Pablo mahitungod ha paglaom?

³ Iginsaysay ni Pablo kon kay ano nga makakasiguro kita nga an aton “paglaom diri nagriresulta hin kapakyasan.” (Roma 5:5) Ginbubuligan liwat kita niya nga masabtan kon paonan-o magigin mas marig-on an aton paglaom sugad nga Kristiano. Samtang aton gin-uusisa an proseso nga gin-unabi ni Pablo ha Roma  5:​1-5, hunahunaa an imo personal nga eksperyensya. Kon bubuhaton mo ito, posible nga makita mo nga nagtitikarig-on an imo paglaom. Ha aton paghisgot, masasabtan liwat naton kon paonan-o mo mas mapaparig-on pa an imo paglaom. Siyahan, hisgotan ta an makaruruyag nga paglaom nga ginsiring ni Pablo nga diri magriresulta hin kapakyasan.

4. Ano an ginhisgotan ha Roma 5:​1, 2?

⁴ Basaha an Roma 5:​1, 2. Ginsurat ni Pablo ito nga mga pulong para ha kongregasyon ha Roma. An kabugtoan didto nahibaro na mahitungod kan Jehova ngan kan Jesus, nagkaada pagtoo, ngan nagin mga Kristiano. Salit “iginpahayag na [hira han Dios] nga matadong sugad nga resulta han pagtoo,” ngan iya gindihogan hira han baraan nga espiritu. Oo, nagkaada hira tinuod ngan makaruruyag nga paglaom.

5. Ano an paglaom han mga dinihogan?

⁵ Ha urhi nagsurat hi Pablo ha dinihogan nga mga Kristiano ha Efeso mahitungod ha paglaom nga iginhatag ha ira han Dios. Ito nga paglaom nag-uupod ha pagkarawat han “panurundon han mga baraan.” (Efe. 1:18) Ngan gin-unabi liwat ni Pablo ha mga taga-Colosas kon diin nira makakarawat an ira balos. Gintawag niya ito nga “paglaom nga iginreserba para ha iyo ha langit.” (Col. 1:​4, 5) Kon sugad, an paglaom han dinihogan nga mga Kristiano amo an pagkabanhaw ngadto ha kinabuhi nga waray kataposan ha langit, diin magmamando hira kaupod han Kristo.—1 Tes. 4:​13-17; Pah. 20:6.

6. Ano an ginsiring han usa nga dinihogan nga brother mahitungod han iya paglaom?

⁶ Presyoso gud ha dinihogan nga mga Kristiano ito nga paglaom. An usa ha ira amo hi Brother Frederick Franz, nga nagsiring kon ano an iya inaabat: “An amon paglaom sigurado nga matutuman, an tagsa ha amon nga kaapi han 144,000 makarawat han iginsaad ha amon han Dios. An balos ha amon mas maopay kay ha amon naiimadyin.” Katapos mag-alagad ha Dios hin matinumanon hin damu nga katuigan, han 1991 hi Brother Franz nagsiring:  “Waray mawara ha amon an pagkapresyoso hito nga paglaom. . . . Samtang ginhuhulat namon ito mas gin-aapresyar namon ito. Sulit an paghulat hito bisan pa ha sulod hin usa ka milyon ka tuig. Mas ginpapabilhan ko ito nga paglaom yana kay ha kan-o pa man.”

7-8. Ano an paglaom han kadam-an? (Roma 8:​20, 21)

⁷ An kadam-an han nagsisingba kan Jehova yana may iba nga paglaom. Ito an paglaom ni Abraham—an kinabuhi nga waray kataposan ha tuna ilarom ha Ginhadian han Dios. (Heb. 11:​8-10, 13) Hi Pablo nagsurat mahitungod ha makaruruyag nga resulta para hadton may-ada hito nga paglaom. (Basaha an Roma 8:​20, 21.) Han siyahan mo nga nahibaroan an saad han Biblia mahitungod ha tiarabot, ano gud an imo pinakanaruruyagan hito? An panahon ba nga perpekto ka na, ngan diri ka na makakasala? O nalipay ka ba nga mahibaroan nga an imo mga hinigugma nga nagkamatay mabubuhi utro ha paraiso nga tuna? Mas nagin eksayted ka gud ha paghulat ha ‘igintagana niya nga paglaom.’

⁸ Naglalaom man kita nga mabuhi hin waray kataposan ha langit o ha tuna, may-ada kita makaruruyag nga paglaom nga naghahatag ha aton hin rason nga malipay. Ngan an aton makalilipay nga paglaom mahimo magin mas marig-on pa gud. An sunod nga ginsurat ni Pablo nagsasaysay kon paonan-o ito mahimo mahitabo. Hisgotan ta an iya ginsurat mahitungod ha aton paglaom. An pagbuhat hito magpaparig-on han aton pagsarig nga an aton ginlalaoman matutuman.

9-10. Sugad han iginpapakita han ehemplo ni Pablo, ano an mahimo maeksperyensyahan han mga Kristiano? (Roma 5:3) (Kitaa liwat an mga piktyur.)

⁹ Basaha an Roma 5:3. Pansina nga an pakaeksperyensya hin kasakitan mahimo magparig-on han aton paglaom. Bangin mahipausa kita. Ha pagkamatuod, an ngatanan nga sumurunod han Kristo mahimo makaeksperyensya hin kasakitan. Tagda an ehemplo ni Pablo. Ginsidngan niya an mga taga-Tesalonica: “Han kaupod  pa kami niyo, ginsinidngan na namon kamo nga daan nga mag-aantos kita hin kasakitan, ngan ito an nahitabo.” (1 Tes. 3:4) Ngan nagsurat hiya ha mga taga-Corinto: “Diri namon karuyag nga diri niyo hibaroan an kasakitan nga amon naeksperyensyahan . . . Waray gud kami kasigurohan bisan ha amon kinabuhi.”—2 Cor. 1:8; 11:​23-27.

¹⁰ An mga Kristiano liwat yana mahimo makaeksperyensya hin iba-iba nga kasakitan. (2 Tim. 3:12) Ikaw gintitimaraot ka ba kay natoo ka kan Jesus ngan nagsusunod ha iya? Bangin ginkukontra ka han imo kasangkayan ngan paryente. Bangin gintatratar ka pa ngani nira hin maraot. Gintitimaraot ka ba ha imo trabaho tungod han imo determinasyon nga magin tangkod ha ngatanan nga butang? (Heb. 13:18) Ginkukontra ka ba han gobyerno tungod kay ginsasangyaw mo ha iba an imo paglaom? Pero anoman nga klase hin kasakitan an bangin gin-aatubang naton, hi Pablo nagsiring nga dapat kita malipay. Kay ano?

11. Kay ano nga kinahanglan kita magin determinado nga ilubon an bisan ano nga problema?

¹¹ Mahimo kita magin malipayon kon nakakaeksperyensya hin kasakitan, kay nakakabulig ito nga makultibar an usa nga importante nga kalidad. Sugad han ginsiring ha Roma 5:​3, “an kasakitan nagriresulta hin pagpailob.” An ngatanan nga Kristiano makakaeksperyensya hin kasakitan, salit an ngatanan nga Kristiano kinahanglan magkaada pagpailob. Dapat kita magin determinado nga ilubon an bisan ano nga problema nga bangin naton atubangon. Kon ito an aton bubuhaton makikita naton an katumanan han aton ginlalaoman. Diri naton karuyag nga magin pariho ha mga liso nga nahulog ha batoon nga tuna ha ilustrasyon ni Jesus. Ha siyahan, ginkarawat nira an pulong nga may kalipay, pero “katapos umabot an kasakitan o pagtimaraot,” napakdol hira. (Mat. 13:​5, 6, 20, 21) Syempre, diri masayon o makalilipay an pag-atubang hin mga pagkontra o mga problema, pero an pag-ilob nagriresulta hin mga kapulsanan. Ha ano nga paagi?

12. Paonan-o kita nagpapahimulos kon gin-iilob naton an mga problema?

¹² Gin-unabi han disipulo nga hi Santiago an mga kapulsanan ha pag-ilob han mga problema. Hiya nagsurat: “Tuguti nga tapuson han pagpailob an buruhaton hito, basi magin bug-os kamo ngan mahimsog ha ngatanan nga bahin, nga diri nagkukulang hin bisan ano.” (San. 1:​2-4) Iginhulagway ni Santiago an pagpailob nga baga hin may trabaho o buruhaton nga hihimoon. Ano nga buruhaton an igintoka ha pagpailob nga kinahanglan hito matuman? Makakabulig ito ha imo nga madugangan an imo pagpailob, pagtoo, ngan pagsarig ha Dios. Pero an pagpailob may iba pa nga importante nga kapulsanan.

13-14. Ano an nagigin resulta kon nag-iilob kita, ngan ano an nagigin epekto hito ha aton paglaom? (Roma 5:4)

¹³ Basaha an Roma 5:4. Gin-unabi ni Pablo nga an pagpailob nagriresulta “hin pagin inuyonan.” Salit an imo pagpailob nagriresulta hin pag-uyon ni Jehova. Diri ini nagpapasabot nga nalilipay hi Jehova kon nakakaeksperyensya ka hin mga kakurian o mga problema. Lugod, malipayon hiya kay nag-iilob ka nga matinumanon. An imo pagpailob nagriresulta hin pagin inuyonan. Maopay gud ito nga bendisyon!—Sal. 5:12.

¹⁴ Hinumdumi nga gin-ilob ni Abraham an mga pagsari ngan nakarawat an pag-uyon han Dios. Gintagad hiya ni Jehova sugad nga Iya sangkay ngan gintawag nga matadong. (Gen. 15:6; Roma 4:​13, 22) Mahimo liwat ito mahitabo ha aton. Diri iginbabasar han Dios an iya pag-uyon ha kadamu han aton buruhaton ha pag-alagad ha iya o ha mga pribilehiyo. Hi Jehova nalilipay ha aton kon matinumanon kita  bisan pa han mga problema. Ngan anoman an aton edad, kahimtang, o abilidad, kita ngatanan makakailob. Nag-iilob ka ba hin problema yana ngan nagpapabilin nga matinumanon kan Jehova? Kon oo, nakakaliaw an paghibaro nga may-ada ka han pag-uyon han Dios. An paghibaro nga may-ada kita han pag-uyon han Dios nakakabulig ha aton nga magin mas marig-on an aton paglaom.

15. Ano pa nga punto an igindugang ni Pablo, ngan kay ano bangin makawurok ito ha pipira?

¹⁵ Sugad han iginsaysay ni Pablo, nagkakaada kita han pag-uyon ni Jehova pinaagi ha matinumanon nga pag-ilob han mga problema. Pansina kon paonan-o hi Pablo nagpadayon ha iya paghisgot: “An pagin inuyonan nagriresulta hin paglaom, ngan an paglaom diri nagriresulta hin kapakyasan.” (Roma 5:​4, 5) Posible ini makawurok ha pipira. Kay ano? Kay han naglabay, sugad han nakarekord ha Roma 5:​2, gin-unabi ni Pablo nga an mga Kristiano ha Roma may-ada na paglaom, an “paglaom nga makarawat an himaya han Dios.” Salit bangin may magpakiana, ‘Kon adto nga mga Kristiano may-ada na paglaom, kay ano nga an paglaom igin-api pa ni Pablo ha iya paghisgot?’

16. Paonan-o an paglaom nagtitikang magtubo ha usa nga tawo? (Kitaa liwat an mga piktyur.)

¹⁶ Mahimo naton masabtan kon ano an karuyag ipasabot ni Pablo kon huhunahunaon naton an paglaom nga sugad hin natubo. Ha pag-ilustrar: Nahinunumdoman mo ba han siyahan nga nabatian mo an makaruruyag nga paglaom nga aada ha Pulong han Dios? Hito nga panahon, bangin diri ka sigurado nga matutuman an paglaom nga mabuhi hin waray kataposan ha paraiso nga tuna. Pero han padayon ka nga nahibaro mahitungod kan Jehova ngan ha mga saad ha Biblia, nagin mas kombinsido ka nga ini nga paglaom sigurado nga matutuman.

17. Paonan-o padayon nga nagririg-on an imo paglaom katapos han imo dedikasyon ngan bawtismo?

¹⁷ Samtang padayon ka nga nahibabaro ngan nagigin hamtong ha espirituwal, an imo pagtoo  padayon nga nagririg-on, bisan katapos han imo dedikasyon ngan bawtismo. (Heb. 5:13–6:1) Posible nga naeksperyensyahan mo na an gin-unabi ha Roma 5:​2-4. Iba-iba nga kasakitan an imo naeksperyensyahan, pero gin-ilob mo ito ngan inabat an pag-uyon ha imo han Dios. Tungod kay maaram ka nga nalilipay ha imo an Dios, may mas daku ka nga rason yana nga maglaom nga makakarawat mo an mga butang nga iya iginsaad. An imo pagtoo mas nagin marig-on kay han una. Nagigin mas tinuod ito ngan nagigin mas presyoso ha imo. Salit may epekto ito ha tagsa nga bahin han imo kinabuhi ngan ginbabag-o ito an paagi han imo pagtratar ha imo pamilya, kon paonan-o ka naghihimo hin mga desisyon ngan bisan ha paggamit han imo panahon.

18. Ano nga garantiya an iginhatag ni Jehova?

¹⁸ An apostol nagdugang hin importante gud nga punto may kalabotan ha paglaom nga nakakarawat naton katapos kita uyonan han Dios. Ginpapasarig ka niya nga an imo paglaom matutuman. Kay ano nga makakasiguro ka gud? Gin-upod ni Pablo ini nga garantiya tikang ha Dios para ha mga Kristiano: “An paglaom diri nagriresulta hin kapakyasan; kay an gugma han Dios iginbubo ha aton kasingkasing pinaagi han baraan nga espiritu nga iginhatag ha aton.” (Roma 5:5) May-ada ka mga rason nga makasiguro hito nga paglaom—an imo paglaom.

19. Ha ano ka makakasiguro may kalabotan ha imo paglaom?

¹⁹ Pamalandonga an saad ni Jehova kan Abraham ngan kon paonan-o hiya gin-uyonan han Dios ngan gintawag nga Iya sangkay. An paglaom ni Abraham natuman. An Biblia nasiring: “Katapos ni Abraham magpakita hin pagpailob, nakarawat niya ini nga saad.” (Heb. 6:15; 11:​9, 18; Roma 4:​20-22) Sigurado nga waray gud hiya mapakyas. Makakasiguro ka liwat nga kon magpapabilin ka nga matinumanon, babalosan an imo paglaom. An imo paglaom tinuod; naghahatag ito hin kalipay, diri kapakyasan! (Roma 12:12) Hi Pablo nagsurat: “Hinaot an Dios nga nahatag hin paglaom maghatag ha iyo hin daku nga kalipay ngan kamurayawan pinaagi han iyo pagsarig ha iya, basi kamo mahura ha paglaom pinaagi han gahum han baraan nga espiritu.”—Roma 15:13.