1. Ano an dapat buhaton han usa nga Kristiano nga lalaki basi magin malampuson?

 HI Hadi David nagsiring kan Solomon: “Magin marig-on ka ngan magpakalalaki.” (1 Hadi 2:​1-3) Ito nga sagdon importante gud nga iaplikar han ngatanan nga Kristiano nga kalalakin-an yana. Basi maglampos ha pagbuhat hito, kinahanglan pag-adman nira an pagsugot ha mga balaud han Dios ngan pag-aplikar han mga prinsipyo ha Biblia ha ngatanan nga bahin han ira kinabuhi. (Luc. 2:52) Kay ano nga importante gud ha mga batan-on nga brother nga magin hamtong nga mga Kristiano?

2-3. Kay ano nga importante nga an usa nga batan-on nga brother magin hamtong nga Kristiano?

² An Kristiano nga lalaki may importante nga mga responsabilidad ha pamilya ngan ha kongregasyon. Mga batan-on nga brother, sigurado nga ginhunahuna na niyo an iyo posible nga mga responsabilidad ha tiarabot. Bangin tumong mo nga magin bug-os-panahon nga ministro, ministeryal nga surugoon, ngan ha urhi tigurang ha kongregasyon. Bangin karuyag mo liwat mag-asawa ngan magkaada mga anak. (Efe. 6:4; 1 Tim. 3:1) Basi makab-ot mo ini nga mga tumong ngan maglampos, kinahanglan mo magin hamtong nga Kristiano. b

³ Ano an makakabulig ha imo basi magin hamtong nga Kristiano? May importante nga mga skill nga kinahanglan mo mahibaroan. Salit ano an mahimo mo buhaton yana basi mangandam ngan maglampos ha pagtuman ha bisan ano nga bangin magin responsabilidad mo ha tiarabot?

4. Diin ka makakabiling hin mag-opay nga ehemplo nga masusubad? (Kitaa liwat an piktyur.)

⁴ Pagpili hin mag-opay nga susbaranan. Ha Biblia may mga susbaranan  para ha batan-on nga kalalakin-an. Adto nga kalalakin-an ha naglabay nahigugma ha Dios ngan nagdumara hin iba-iba nga responsabilidad basi atamanon an iya katawohan. Makakabiling ka liwat hin susbaranan nga hamtong nga Kristiano nga kalalakin-an ha iyo pamilya ngan ha iyo kongregasyon. (Heb. 13:7) Ngan may-ada ka perpekto nga ehemplo, hi Jesu-Kristo. (1 Ped. 2:21) Samtang gin-aadman mo hin maopay ini nga mga ehemplo, hunahunaa an ira mag-opay gud nga kalidad. (Heb. 12:​1, 2) Katapos, pagdesisyon kon ano an imo bubuhaton basi masubad ini nga kalalakin-an.

5. Paonan-o ka magkakaada han abilidad ha paghunahuna, ngan kay ano nga importante ito? (Salmo 119:9)

⁵ Kultibara ngan “panalipdi . . . an abilidad ha paghunahuna.” (Prob. 3:21) An tawo nga may-ada hito nga abilidad, naghuhunahuna hin maopay ha iya mga opsyon antes hiya gumios. Salit paningkamot nga magkaada hito nga abilidad ngan tipigan ito. Kay ano? Damu yana nga batan-on nga kalalakin-an hini nga kalibotan an naghihimo hin mga desisyon nga iginbasar ha ira kalugaringon nga mga ideya ngan ha ira mga inaabat. (Prob. 7:7; 29:11) Mahimo liwat magkaada daku nga impluwensya ha imo an media. Pero paonan-o ka magkakaada hini nga abilidad ha paghunahuna? Pagtikang ha pag-aram han mga prinsipyo ha Biblia ngan hunahunaa kon kay ano nga mapulsanon ini. Katapos, gamita ito nga mga prinsipyo basi buligan ka ha paghimo hin mga desisyon nga magpapalipay kan Jehova. (Basaha an Salmo 119:9.) Kon makultibar mo ini nga importante nga skill, makakabulig gud ini ha imo nga magin hamtong nga Kristiano. (Prob. 2:​11, 12; Heb. 5:14) Pansina kon paonan-o an abilidad ha paghunahuna mabulig ha imo ha duha nga sitwasyon: (1) ha pagtratar ha mga sister ngan (2) ha paghimo hin mga desisyon parte ha imo personal nga hitsura.

6. Paonan-o an abilidad ha paghunahuna mabulig ha batan-on nga brother nga respetuhon an mga sister?

⁶ An abilidad ha paghunahuna mabulig ha imo nga respetuhon an mga babaye. Normal la ngan husto nga an batan-on nga brother magin interesado nga mas makilala pa an usa nga sister. Pero an batan-on nga lalaki nga may abilidad ha paghunahuna diri gud magyayakan, magsusurat, o magbubuhat hin bisan ano nga maghahatag hin sinyales nga naruruyag hiya labot la kon sinsero hiya nga naghuhunahuna nga an sister potensyal nga maarasawa. (1 Tim. 5:​1, 2)  Kon makikig-date hiya ha usa nga sister, puproteksyonan niya an maopay nga reputasyon han sister kon mag-uupod hira hin tsaperon.—1 Cor. 6:18.

7. Paonan-o an abilidad ha paghunahuna mabulig ha batan-on nga brother kon nagdidesisyon hiya ha iya pamado ngan pag-ayos?

⁷ An usa pa nga paagi nga an batan-on nga lalaki nagpapakita nga may-ada hiya maopay nga abilidad ha paghunahuna amo an pagkaada maopay nga desisyon ha iya pamado ngan pag-ayos. Agsob nga an mga uso nga estilo gindidisenyo ngan gin-aaghat han mga tawo nga diri nakilala kan Jehova o hadton nagkikinabuhi hin imoral. An ira imoral nga panhunahuna nakikita ha mga estilo han pamado nga fitting o ha estilo nga an mga lalaki nagigin pariho pagkit-on ha mga babaye. Kon nagpipili hin isusul-ot, an batan-on nga lalaki nga nagigin hamtong gin-gigiyahan han mga prinsipyo ha Biblia ngan ha mag-opay nga ehemplo ha kongregasyon. Mahimo niya pakianhan an iya kalugaringon: ‘An akon ba mga ginpipili nagpapakita nga maopay an akon panhunahuna ngan ginrirespeto an iba? Klaro ba ha akon pamado nga Kristiano ako?’ (1 Cor. 10:​31-33; Tito 2:6) An batan-on nga lalaki nga may abilidad ha paghunahuna rirespetuhon diri la han kabugtoan kondi pati liwat han iya langitnon nga Amay.

8. Paonan-o mahibabaro an batan-on nga brother nga magin masasarigan?

⁸ Magin masasarigan. An batan-on nga lalaki nga masasarigan seryoso gud nga nagtutuman han ngatanan niya nga responsabilidad. (Luc. 16:10) Pansina an perpekto nga ehemplo ni Jesus. Waray gud hiya magpabaya o magin iresponsable. Lugod, gintuman niya an mga toka nga iginhatag ha iya ni Jehova, bisan pa kon makuri ito buhaton. Hinigugma niya an mga tawo—labi na an iya mga disipulo—ngan kinaburut-on nga ginhatag niya an iya kinabuhi para ha ira. (Juan 13:1) Ha pagsubad kan Jesus, paningkamuti nga tumanon an bisan ano nga toka nga iginhatag ha imo. Kon diri ka sigurado kon paonan-o ito bubuhaton, magin mapainubsanon ngan mangaro hin bulig ha hamtong nga mga brother. Ayaw kakontento nga basta mo la nga natuman an iginpapabuhat ha imo. (Roma 12:11) Lugod, taposa an imo toka, buhata ito nga sugad hin “para kan Jehova, ngan diri para ha mga tawo.” (Col. 3:23) Syempre, diri ka perpekto, salit magin mapainubsanon ngan akseptara an bisan ano nga sayop nga imo nabubuhat.—Prob. 11:2.

9. Kay ano nga dapat mag-aram hin praktikal nga mga skill an batan-on nga brother?

⁹ Basi magin hamtong nga Kristiano, kinahanglan mo mag-aram hin praktikal nga mga skill. Mabulig ini ha imo nga matuman an mga responsabilidad ha kongregasyon, basi makabiling hin trabaho nga makakasuporta ha imo o ha pamilya, ngan basi magkaada maopay nga relasyon ha iba. Pansina an pipira hini nga importante nga mga skill.

10-11. Paonan-o an batan-on nga brother makakapahimulos ngan an kongregasyon kon mahibabaro hiya ha pagbasa ngan pagsurat hin maopay? (Salmo 1:​1-3) (Kitaa liwat an piktyur.)

¹⁰ Pag-aram ha pagbasa ngan pagsurat hin maopay. An Biblia nasiring nga an malipayon ngan  malampuson nga lalaki naggagahin hin panahon kada adlaw ha pagbasa han Pulong han Dios ngan ha pagpamalandong hito. (Basaha an Salmo 1:​1-3.) Pinaagi ha pagbasa han Biblia kada adlaw, mahibabaroan niya an panhunahuna ni Jehova nga mabulig ha iya nga maghunahuna hin klaro ngan mangatadongan hin maopay. (Prob. 1:​3, 4) An sugad nga kalalakin-an kinahanglan ha kongregasyon. Kay ano?

¹¹ An aton kabugtoan nanginginahanglan hin may kapas nga kalalakin-an nga makakahatag hin instruksyon ngan sagdon tikang ha Biblia. (Tito 1:9) Kon nakakabasa ka ngan nakakasurat hin maopay, makakaandam ka hin impormatibo ngan makaparig-on ha pagtoo nga mga pahayag ngan komento. Makakahimo ka liwat hin mapulsanon nga nota samtang nag-aaram ka ngan namamati ha mga pahayag ha katirok ha kongregasyon, asembleya, ngan kombensyon. Ini nga mga nota mabulig ha imo nga maparig-on an imo pagtoo ngan madasig an iba.

12. Ano an mabulig ha imo basi magin maopay ha pakigkomunikar?

¹² Admi an mga skill ha pakigkomunikar. An Kristiano nga lalaki kinahanglan mahibaro ha pakigkomunikar hin maopay. An lalaki nga maopay makigkomunikar, namamati ngan nakakaintindi ha panhunahuna ngan inaabat han iba. (Prob. 20:5) Mahimo niya masabtan an iginpapasabot han tono han tingog, ekspresyon han nawong, ngan gios han lawas han usa nga tawo. Diri mo ini mahibabaroan kon diri ka makikig-upod ha mga tawo. Kon pirme ka nagamit hin elektroniko ha pakigkomunikar, sugad han pag-email ngan pag-text, makakaiban ito han imo abilidad ha personal nga pakigkomunikar ha mga tawo. Salit paghimo hin mga oportunidad nga personal nga makaistorya an iba.—2 Juan 12.

13. Ano pa an kinahanglan mahibaroan han batan-on nga lalaki? (1 Timoteo 5:8) (Kitaa liwat an piktyur.)

¹³ Mahibaro nga suportaran an imo kalugaringon. An hamtong nga Kristiano nga lalaki dapat kaya suportaran an iya kalugaringon ngan an iya panimalay. (Basaha an 1 Timoteo 5:8.) Ha pipira nga nasud, an mga batan-on nga brother mahimo mahibaro hin sekular nga skill tikang ha ira tatay o ha iba nga paryente. Ha iba liwat nga nasud, an batan-on nga lalaki mahimo mag-aram hin trabaho o hin iba nga bokasyonal nga skill ha hayskul. Pirme gud maopay nga mahibaro hin skill nga mabulig ha imo nga makatrabaho. (Buh. 18:​2, 3; 20:34; Efe. 4:28) Magkaada reputasyon ha pagin maduruto ngan pagin pokus ha usa nga trabaho tubtob nga matapos ito. Kay kon sugad ka hito, mas daku an posibilidad nga makatrabaho ka ngan makapabilin hito. An mga kalidad ngan skill nga aton ginhisgotan importante liwat para ha Kristiano nga lalaki basi matuman niya an tiarabot nga mga responsabilidad. Hisgotan naton an pipira hito.

14. Paonan-o an batan-on nga brother makakapangandam para ha bug-os-panahon nga pag-alagad?

¹⁴ Bug-os-panahon nga pag-alagad. Damu nga hamtong nga Kristiano nga kalalakin-an an sinulod ha bug-os-panahon nga ministeryo han bata pa hira. An pagpayunir nabulig ha usa nga batan-on nga mahibaro pagtrabaho hin maopay upod ha iba-iba nga tawo. Nabulig liwat ito ha iya ha pagbadyet ngan ha pagsunod hito. (Fil. 4:​11-13) An usa nga maopay nga paagi ha pagtikang ha bug-os-panahon nga pag-alagad amo an pag-auxiliary payunir. Damu an nag-o-auxiliary payunir ha pipira ka panahon, ngan nag-aandam ito ha ira ha pagin regular payunir. An pagpayunir mahimo mag-abri han purtahan ngadto ha iba pa nga klase han bug-os-panahon nga pag-alagad, sugad han pagin construction servant o pagin Bethelite.

15-16. Paonan-o an batan-on nga brother mahimo magin kwalipikado ha pagserbi ha kongregasyon?

¹⁵ Ministeryal nga surugoon o tigurang. An Kristiano nga kalalakin-an dapat may tumong nga magin kwalipikado ha pagserbi ha ira kabugtoan sugad nga mga tigurang ha kongregasyon. An Biblia nasiring nga an kalalakin-an nga nagkakab-ot para hini nga tumong ‘maopay nga buhat an ira ginhihingyap.’ (1 Tim. 3:1) Antes magin tigurang, an usa nga brother kinahanglan magin kwalipikado anay sugad nga ministeryal nga surugoon. Ginbubuligan han mga ministeryal an mga tigurang ha damu nga paagi ha pag-ataman ha kongregasyon. An mga tigurang ngan mga ministeryal mapainubsanon nga nagsiserbi ha ira kabugtoan ngan madasigon ha ministeryo. An batan-on nga mga brother mahimo magin kwalipikado sugad nga mga ministeryal nga surugoon bisan kon 17 anyos pa la hira. Ngan an kwalipikado gud nga mga ministeryal nga surugoon mahimo magin tigurang bisan kon 20 anyos pa la.

¹⁶ An mga kwalipikasyon para magin ministeryal ngan tigurang nakarekord ha Biblia ngan iginbasar ito ha gugma kan Jehova, ha imo pamilya, ngan ha kongregasyon. (1 Tim. 3:​1-13; Tito 1:​6-9; 1 Ped. 5:​2, 3) Paonan-o ka magigin kwalipikado para hini nga mga responsabilidad? Paningkamot nga maintindihan an tagsa nga kwalipikasyon. Pangaro hin bulig kan Jehova nga makab-ot mo ini nga mga kwalipikasyon. c

17. Paonan-o an batan-on nga brother makakapangandam ha pagin bana ngan ulo han pamilya? (Kitaa liwat an piktyur.)

¹⁷ Bana ngan ulo han pamilya. Sugad han ginsiring ni Jesus, an pipira nga hamtong nga Kristiano nga kalalakin-an nagpapabilin nga solo. (Mat. 19:12) Pero kon magdidesisyon ka pag-asawa, magkakaada ka hin dugang nga mga responsabilidad han pagin bana ngan ulo han pamilya. (1 Cor. 11:3) Hi Jehova naglalaom nga hihigugmaon han  bana an iya asawa ngan aatamanon hiya ha pisikal, emosyonal, ngan espirituwal. (Efe. 5:​28, 29) An mga kalidad ngan skill nga ginhisgotan na hini nga artikulo, sugad han pagkultibar han abilidad ha paghunahuna, pagrespeto ha kababayin-an, ngan pagin masasarigan, mabulig ha imo nga magin maopay nga bana. Magigin andam ka gud ha pagtuman han imo mga responsabilidad sugad nga bana ngan ulo han pamilya.

18. Paonan-o an usa nga batan-on nga brother makakapangandam ha pagin tatay?

¹⁸ Tatay. Katapos mo magpakasal, bangin magin usa ka nga tatay. Ano an imo mahibabaroan tikang kan Jehova mahitungod ha pagin maopay nga tatay? May-ada damu nga leksyon. (Efe. 6:4) Hi Jehova waray mag-alang pagsiring ha iya Anak nga hi Jesus, nga hinigugma niya hiya ngan inuuyonan. (Mat. 3:17) Kon magin tatay ka, siguroha nga pirme mo pasarigon an imo mga anak nga hinigugma mo hira. Pirme gud maghatag hin kumendasyon ha mag-opay nga butang nga ira ginbubuhat. An mga tatay nga nagsusubad ha ehemplo ni Jehova nabulig ha ira mga anak nga magin hamtong nga mga Kristiano. Makakapangandam ka yana para hini nga responsabilidad pinaagi ha mahigugmaon nga pag-ataman hadton aada ha imo pamilya ngan ha kongregasyon ngan pinaagi ha pag-aram ha pagpahayag ha iba han imo gugma ngan apresasyon. (Juan 15:9) Mabulig ini ha imo nga matuman an posible nga tiarabot nga mga responsabilidad sugad nga bana ngan tatay. Ha pagkayana, magigin presyoso ka kan Jehova ngan daku nga bulig ha imo pamilya ngan ha kongregasyon.

19-20. Ano an mabulig ha mga batan-on nga brother nga magin hamtong nga mga Kristiano? (Kitaa an piktyur ha kobre.)

¹⁹ Mga batan-on nga brother, diri awtomatiko nga magigin hamtong kamo nga Kristiano. Kinahanglan niyo magpili hin mag-opay nga ehemplo nga susubaron, magkultibar han abilidad ha paghunahuna, magin masasarigan, magkaada praktikal nga mga skill, ngan mangandam para ha tiarabot nga mga responsabilidad.

²⁰ Bangin usahay nabubug-atan ka kon ginhuhunahuna mo an mga butang nga kinahanglan mo buhaton. Pero mahimo ka maglampos. Hinumdumi nga hi Jehova naruruyag gud pagbulig ha imo. (Isa. 41:​10, 13) Syempre, bubuligan ka liwat han imo kabugtoan ha kongregasyon. Kon makab-ot mo an klase han pagkatawo nga karuyag ni Jehova para ha imo, magigin makalilipay an imo kinabuhi. Hinigugma namon kamo mga batan-on nga brother! Hinaot hura nga bendisyonan ni Jehova an iyo paningkamot yana nga magin hamtong nga Kristiano nga kalalakin-an.—Prob. 22:4.