1. Ano an dapat buhaton basi magtubo ha pagin hamtong nga Kristiano?

 URUSAHON gud makita nga madagmit la magtubo an bata ngadto ha pagin adulto. Ito nga pagtubo baga hin awtomatiko la. Pero an pagtubo ngadto ha pagin hamtong nga Kristiano diri gud awtomatiko. b (1 Cor. 13:11; Heb. 6:1) Basi makab-ot ito nga tumong, kinahanglan naton hin hilarom nga personal nga relasyon kan Jehova. Kinahanglan ta liwat an iya baraan nga espiritu ha pagkultibar han diosnon nga mga kalidad, pagkaada praktikal nga mga skill, ngan pagpangandam ha tiarabot nga mga responsabilidad.—Prob. 1:5.

2. Ano an aton mahibabaroan ha Genesis 1:​27, ngan ano an aton hihisgotan?

² Ginhimo ni Jehova an mga tawo nga lalaki ngan babaye. (Basaha an Genesis 1:27.) Masayon la makita an pisikal nga kaibahan han lalaki ngan babaye, pero may iba pa hira nga mga kaibahan. Pananglitan, ginhimo ni Jehova an lalaki ngan babaye ha pagtuman hin espisipiko nga mga papel, salit kinahanglan nira hin mga kalidad ngan skill basi mabuhat an ira tagsa nga toka. (Gen. 2:18) Hini nga artikulo, hihisgotan ta kon ano an mahimo buhaton han batan-on nga sister basi magin hamtong. Ha sunod nga artikulo, hihisgotan ta kon ano an mahimo buhaton han mga batan-on nga brother.

3-4. Diin makakabiling hin mag-opay nga susbaranan an mga batan-on nga sister? (Kitaa liwat an piktyur.)

³ An Biblia nag-uunabi hin damu nga mag-opay gud nga kababayin-an  nga nahigugma ngan nag-alagad kan Jehova. (Kitaa ha jw.org an artikulo nga “Kababayin-an ha Biblia—Ano an Aton Mahibabaroan Tikang ha Ira?”) Nagpakita hira hin mga kalidad nga gin-unabi ha tema nga teksto, “kontrolado an pamatasan” ngan “matinumanon ha ngatanan nga butang.” Dugang pa, an mga sister makakabiling ha ira kongregasyon hin mga hamtong nga sister nga angay subaron.

⁴ Mga batan-on nga sister, may kilala ba kamo nga mga hamtong nga sister nga puydi niyo subaron? Obserbari an ira mag-opay nga kalidad; ngan hunahunaa kon paonan-o mo maipapakita ito. Ha masunod nga mga parapo, hihisgotan naton an tulo nga importante nga kalidad nga kinahanglan kultibaron basi magin hamtong.

5. Kay ano nga an pagin mapainubsanon importante ha usa nga hamtong nga Kristiano nga babaye?

⁵ An pagin mapainubsanon usa nga importante nga kalidad ha pagin hamtong. Kon mapainubsanon an usa nga sister, magkakaada hiya maopay nga relasyon kan Jehova ngan ha iba. (San. 4:6) Pananglitan, an usa nga babaye nga nahigugma kan Jehova mapainubsanon nga nasuporta ha prinsipyo han pagkaulo nga gin-establisar han iya langitnon nga Amay. (1 Cor. 11:3) Ito nga prinsipyo espisipiko nga maiaaplikar ha kongregasyon ngan ha kahikayan ha pamilya. c

6. Ano an mahibabaroan han mga batan-on nga sister mahitungod ha pagin mapainubsanon ni Rebeca?

⁶ Pansina an ehemplo ni Rebeca. Baltok hiya ngan ha iya bug-os nga kinabuhi may kaisog hiya ha pagdesisyon ngan maaram kon san-o ngan paonan-o magios. (Gen. 24:58; 27:​5-17) Pero matinalahuron ngan mapinasakupon hiya. (Gen. 24:​17, 18, 65) Kon mapainubsanon ka nga nasuporta ha mga kahikayan ni Jehova, sugad kan Rebeca, magigin maopay ka nga ehemplo ha iyo pamilya ngan ha kongregasyon.

7. Paonan-o masusubad han mga batan-on nga sister hi Esther ha pagkilala han iya limitasyon?

⁷ An pagkilala han limitasyon usa pa nga kalidad nga kinahanglan han ngatanan nga hamtong  nga Kristiano. An Biblia nasiring nga “an kinaadman aada ha mga mapainubsanon” o nakilala han ira limitasyon. (Prob. 11:2) Bisan han nagin rayna hi Esther maaram hiya han iya limitasyon ngan waray hiya magin paragbuot. Ginpakita niya ito han namati hiya ngan ginsunod an sagdon han iya magurang nga patod nga hi Mordecai. (Est. 2:​10, 20, 22) Pariho kan Esther, maipapakita mo nga maaram ka han imo limitasyon kon mangangaro ka hin sagdon ngan iaaplikar ito.—Tito 2:​3-5.

8. Sumala ha 1 Timoteo 2:​9, 10, paonan-o an pagrespeto ha opinyon han iba makakabulig ha sister nga makahimo hin maaramon nga desisyon ha pamado ngan pag-ayos?

⁸ Iginpakita liwat ni Esther ini nga kalidad pinaagi ha pagrespeto ha opinyon han iba. Hi Esther “maopay an lawas ngan mahusay”; pero waray hiya magpapansin. (Est. 2:​7, 15) Ano an mahibabaroan han mga sister ha susbaranan ni Esther? An usa hito amo an mababasa ha 1 Timoteo 2:​9, 10. (Basaha.) Ginsagdonan ni apostol Pablo an Kristiano nga kababayin-an nga mamado nga may kasadangan ngan maopay nga panhunahuna. An Griego nga mga pulong nga gin-gamit dinhi nagpapakita nga an pamado han Kristiano nga babaye kinahanglan magpakita hin respeto ngan konsiderasyon ha pag-abat o opinyon han iba. Proud gud kita ha aton mga hamtong nga sister nga an pamado nagpapakita hin respeto ha iba!

9. Ano an aton mahibabaroan ha ehemplo ni Abigail?

⁹ An husto nga pagturotimbang usa pa nga kalidad nga kinahanglan kultibaron han ngatanan nga sister basi magin hamtong. Ano an husto nga pagturotimbang? Ito an abilidad nga mahibaroan an husto ngan sayop ngan buhaton an husto. Tagda an ehemplo ni Abigail. An iya bana naghimo hin maraot nga desisyon nga makakadaot gud ha iya bug-os nga panimalay. Gumios dayon hi Abigail. An iya maopay nga pagturotimbang nakatalwas hin mga kinabuhi. (1 Sam. 25:​14-23, 32-35) An husto nga pagturotimbang nabulig liwat ha aton nga mahibaro kon san-o magyayakan ngan kon san-o mahilom. Ngan nabulig liwat ito ha aton nga magin timbang ha pagpakita hin personal nga interes ha iba.—1 Tes. 4:11.

10-11. Paonan-o makakabulig ha imo ngan ha iba an pagbasa ngan pagsurat hin maopay? (Kitaa liwat an piktyur.)

¹⁰ An usa nga sister kinahanglan mag-aram hin praktikal nga mga skill. An pipira nga skill nga nahibaroan han usa nga babaye han bata pa hiya mapapahimulsan niya ha iya bug-os nga kinabuhi. Pansina an pipira nga ehemplo.

¹¹ Pag-aram ha pagbasa ngan pagsurat hin maopay. Ha pipira nga kultura, an pagbasa ngan pagsurat diri ginhuhunahuna nga importante nga mga skill nga kinahanglan pag-adman han mga babaye. Pero importante ini ha ngatanan  nga Kristiano. d (1 Tim. 4:13) Salit bisan kon makuri ito, padayon nga mag-aram ha pagbasa ngan pagsurat hin maopay. Ano an balos hito? Mabulig ito ha imo nga makabiling hin trabaho ngan magpabilin hito. Magigin mas maopay ka nga estudyante ngan magturutdo han Pulong han Dios. Labaw ha ngatanan, magigin mas duok ka kan Jehova samtang imo ginbabasa an iya Pulong ngan ginpapamalandong ito.—Jos. 1:8; 1 Tim. 4:15.

12. Ano an imo nahibaroan ha Proberbios 31:26 basi magin maopay ha pakigkomunikar?

¹² Admi an mga skill ha pakigkomunikar. Importante ito ha mga Kristiano. Mahitungod hini, an disipulo nga hi Santiago naghatag hin praktikal nga sagdon ha aton, nga nasiring: “An ngatanan kinahanglan magin alisto ha pagpamati, mahinay ha pagyakan.” (San. 1:19) Kon namamati ka hin maopay samtang nagyayakan an iba, nagpapakita ka hin empatiya, o “simpatiya,” ha ira. (1 Ped. 3:8) Kon diri ka sigurado nga naiintindihan mo an ginsiring o inaabat han usa, pagbangon hin angayan nga mga pakiana ha iya. Ngan panhunahuna anay antes ka magyakan. (Prob. 15:​28, ftn.) Pakianhi an imo kalugaringon: ‘An akon ba iyayakan totoo ngan makaparig-on? May respeto ba ito ngan pagkabuotan?’ Mahibaro tikang ha mga hamtong nga sister nga maopay makigkomunikar. (Basaha an Proberbios 31:26.) Obserbari hin maopay an paagi han ira pagyakan. Kon mas nahibabaro ka hini nga skill, mas magigin maopay an imo relasyon ha iba.

13. Paonan-o ka mahibabaro ha pagdumara hin panimalay? (Kitaa liwat an piktyur.)

¹³ Admi an pagdumara hin panimalay. Ha damu nga lugar, an kababayin-an damu gud an buruhaton ha panimalay. An imo nanay o iba pa nga eksperyensyado nga sister mahimo makabulig ha imo nga mahibaro hin ginkikinahanglan nga mga skill. An sister nga hi Cindy, nagsiring: “An usa han pinakamaopay nga regalo nga iginhatag han akon nanay amo an pagtutdo ha akon nga an pagin maduruto naghahatag hin kalipay. An paghibaro han mga skill sugad han pagluto, panlimpyo, panahi, ngan panmerkado nakabulig ha akon nga magin mas masayon an akon kinabuhi ngan mas damu an akon nahimo para kan Jehova. Gintutdoan liwat ako ni Nanay nga magin maabiabihon, ngan tungod hini nakilala ko an mag-opay nga kabugtoan nga mga susbaranan.” (Prob. 31:​15, 21, 22) An maduruto ngan maabiabihon nga babaye nga nahibaro ha pagdumara ha usa nga panimalay bendisyon gud ha iya pamilya ngan ha kongregasyon.—Prob. 31:​13, 17, 27; Buh. 16:15.

14. Ano an imo nahibaroan ha eksperyensya ni Crystal, ngan ha ano ka dapat magpokus?

¹⁴ Mahibaro ha paglugaring. Importante ini nga mahibaroan han ngatanan nga hamtong nga Kristiano. (Fil. 4:11) An sister nga hi Crystal nagsiring: “Gin-aghat ako han akon mga kag-anak nga pilion an pag-aram hin mga skill ha  hayskul nga magagamit ko ha urhi. Gindasig ako han akon tatay nga magpili hin mga subject ha accounting, ngan nakabulig gud ito ha akon.” Labot pa ha pag-aram hin mga skill nga ginkikinahanglan para makatrabaho, mahibaro ha pagbadyet ngan sunda ito. (Prob. 31:​16, 18) Magpokus ha imo espirituwal nga mga tumong pinaagi ha paglikay ha diri ginkikinahanglan nga pag-utang ngan pagin kontento ha simple nga pagkinabuhi.—1 Tim. 6:8.

15-16. Paonan-o nakakabulig ha iba an solo nga mga sister? (Marcos 10:​29, 30)

¹⁵ Kon magkultibar ka hin espirituwal nga mga kalidad ngan mapulsanon nga mga skill, magigin mas andam ka para ha tiarabot nga mga responsabilidad. Tagda an pipira nga ehemplo nga puydi mo buhaton.

¹⁶ Puydi ka magpabilin nga solo ha pipira ka panahon. Uyon ha mga pulong ni Jesus, an pipira nga kababayin-an nagdesisyon nga diri mag-asawa, bisan kon ha ira kultura diri gin-aaghat an pagin solo. (Mat. 19:​10-12) An iba bangin magpabilin nga solo tungod han mga kahimtang. Makakasarig ka nga diri ka ginmiminos ni Jehova ngan ni Jesus tungod la kay solo ka. Ha bug-os nga kalibotan, maopay nga ehemplo ha kongregasyon an solo nga mga sister. An ira gugma ngan sinsero nga interes ha iba nag-aaghat hinin Kristiano nga kababayin-an nga magin espirituwal nga kabugtoan ngan nanay ha damu.—Basaha an Marcos 10:​29, 30; 1 Tim. 5:2.

17. Paonan-o makakapangandam yana an batan-on nga sister nga makag-alagad hin bug-os-panahon?

¹⁷ Puydi ka makag-alagad hin bug-os-panahon. An Kristiano nga kababayin-an may daku gud nga nahihimo ha bug-os nga kalibotan nga pagsangyaw. (Sal. 68:11) Puydi ka ba magplano nga sumulod ha bug-os-panahon nga ministeryo? Puydi ka mag-alagad sugad nga payunir, magboluntaryo ha pagpanukod, o magin Bethelite. Ig-ampo an imo tumong. Pakig-istorya ha iba nga nakakab-ot na hito nga tumong, ngan usisaha kon ano dapat an imo buhaton basi magin kwalipikado. Ngan paghimo hin reyalistiko nga plano. Kon nag-aalagad ka na hin bug-os-panahon maghahatag ito ha imo hin damu nga magpakaruruyag nga oportunidad ha pag-alagad kan Jehova.

18. Kay ano nga dapat pilion hin maopay han usa nga sister an iya magigin bana? (Kitaa liwat an piktyur.)

¹⁸ Bangin magdesisyon ka nga mag-asawa. An mga kalidad ngan skill nga aton ginhisgotan makakabulig ha imo nga magin maopay nga asawa. Syempre, kon nagpaplano ka ha pag-asawa, dapat pilion mo hin maopay an imo magigin padis.  Usa ito han pinakaimportante nga desisyon nga imo hihimoon. Tigamni nga kinahanglan mo sundon an pagpanguna han lalaki nga imo ginpili nga magin bana. (Roma 7:2; Efe. 5:​23, 33) Salit pakianhi an imo kalugaringon: ‘Hamtong ba hiya nga Kristiano? Prayoridad ba ha iya kinabuhi an espirituwal nga mga butang? Naghihimo ba hiya hin maaramon nga mga desisyon? Gin-aamin ba niya an iya mga sayop? Ginrirespeto ba niya an kababayin-an? May-ada ba hiya han mga skill nga ginkikinahanglan basi masuportahan ako ha espirituwal, materyal, ngan emosyonal? Gintutuman ba niya hin maopay an iya responsabilidad? Pananglitan, ano an iya mga toka ha kongregasyon ngan kumusta man an iya pagdumara hito?’ (Luc. 16:10; 1 Tim. 5:8) Syempre, kon karuyag mo makabiling hin maopay nga magigin bana, kinahanglan maopay ka nga magigin asawa.

19. Kay ano nga nakakahatag hin kadungganan an papel han “kabulig”?

¹⁹ An Biblia nasiring nga an maopay nga asawa “kabulig” han iya bana ngan “angayan nga padis” niya. (Gen. 2:18) Nakakaminos ba ini nga paghulagway? Diri! Ha pagkatinuod, dungog ito para ha asawa. Ngani, an Biblia agsob magsiring nga hi Jehova usa nga “parabulig.” (Sal. 54:4; Heb. 13:6) An asawa tinuod nga kabulig han iya bana kon iya ginsusuportaran hiya ngan ginbubuligan nga maipatuman an mga desisyon nga makakaapekto ha pamilya. Ngan tungod kay hinigugma niya hi Jehova, ginpapaopay niya an reputasyon han iya bana. (Prob. 31:​11, 12; 1 Tim. 3:11) Yana makakapangandam ka para hinin posible nga papel ha tiarabot pinaagi ha pagparig-on han imo gugma kan Jehova ngan ha pagin kabulig ha iba ha panimalay ngan ha kongregasyon.

20. Ano nga kaopayan an mahihimo han usa nga nanay ha iya pamilya?

²⁰ Bangin magin usa ka nga nanay. Katapos han iyo kasal, bangin magkaada kamo mga anak. (Sal. 127:3) Salit maaramon nga hunahunaon ito hin abanse. An mga kalidad ngan skill nga aton ginhisgotan hini nga artikulo makakabulig ha imo kon magin usa ka nga asawa ngan nanay. An imo gugma, pagkabuotan, ngan pagpailob makakabulig ha imo pamilya nga magin malipayon ngan abaton han imo mga anak nga protektado hira ngan hinigugma.—Prob. 24:3.

21. Ano an aton inaabat mahitungod ha aton mga sister, ngan kay ano? (Kitaa an piktyur ha kobre.)

²¹ Hinigugma namon kamo mga sister, tungod han ngatanan niyo nga ginbubuhat para kan Jehova ngan ha iya katawohan. (Heb. 6:10) Naniningkamot kamo nga magkultibar hin mga kalidad ngan skill nga mas makakapalipay ha iyo kinabuhi ngan ha kinabuhi hadton nakakaupod niyo, ngan basi makapangandam hin maopay ha posible nga mga responsabilidad ha tiarabot. Presyoso gud kamo ha organisasyon ni Jehova!