SIGURADO nga gin-aapresyar mo gud an iba-iba nga regalo tikang kan Jehova, upod na an imo kagawasan ha pagbuot kon paonan-o mahimo pahimulsan ini nga mga regalo. Sumala ha Biblia, an bino usa nga regalo tikang ha Dios, ngani nasiring ito: “An tinapay ginhihimo para ha pagkaragtatawa, ngan an bino nakakapalipay han kinabuhi.” (Ecles. 10:19; Sal. 104:15) Pero posible nga nahibaroan mo nga an pipira nga tawo nagkaada problema ha makahurubog nga irimnon. Dugang pa, ha bug-os nga kalibotan ngan ha mga kultura, iba-iba an mga opinyon ngan mga suruklan parte hito. Salit ano an makakabulig ha mga Kristiano nga makahimo hin maaramon nga desisyon?

Diin man kita naukoy o anoman nga kultura an aton gindak-an, kon an aton panhunahuna ngan mga desisyon ipapahiuyon ha panhunahuna han Dios, sigurado nga magpapahimulos kita ngan magriresulta hin mas malipayon nga kinabuhi.

Sugad han bangin mo naoobserbaran, damu nga tawo ha kalibotan an nainom hin damu ngan agsob. An iba bangin nainom kay nakakarelaks ito. An iba naman nainom basi makalimtan an mga problema. Ngan ha pipira nga lugar, an pag-inom hin damu ginhuhunahuna nga an usa daku na ngan tinuod nga lalaki.

Pero an mga Kristiano may-ada maaramon nga giya tikang ha ira mahigugmaon nga Maglalarang. Pananglitan, ginpahamangnoan kita niya han makasurubo nga mga resulta han sobra nga pag-inom. Bangin nabasa naton an Proberbios 23:​29-35 mahitungod han detalyado nga paghulagway han usa nga tawo nga nahubog ngan an mga problema nga nagin resulta. a Hi Daniel nga tigurang ha usa nga kongregasyon ha Europe, nag-istorya mahitungod han iya kinabuhi antes hiya magin Kristiano, “Tungod han akon sobra nga pag-ininom nagkaada ako diri maopay nga mga desisyon ngan makasurubo nga mga eksperyensya nga tubtob yana nasusubo la gihapon ako kon nahuhunahuna ko ito.”

Paonan-o magagamit han mga Kristiano an kagawasan ha pagbuot ngan malilikyan an mga problema nga resulta han sobra nga pag-ininom? Kinahanglan an aton panhunahuna ngan mga desisyon ipahiuyon ha panhunahuna han Dios.

Kitaon naton kon ano an ginsisiring han Biblia mahitungod ha makahurubog nga irimnon ngan kon kay ano nga nainom an iba.

An Pulong han Dios diri nagdidiri han eksakto la nga kadamu ha pag-inom hin makahurubog. Ngani, an Biblia nasiring nga an pag-inom hin bino mahimo magin makalilipay nga eksperyensya. Aton mababasa: “Kaona hin malipayon an imo pagkaon, ngan an imo bino inoma nga may malipayon nga kasingkasing.” (Ecles. 9:7) May mga panahon nga hi Jesus ininom hin bino, ngan pati liwat an iba nga matinumanon nga mga surugoon ni Jehova.—Mat. 26:​27-29; Luc. 7:34; 1 Tim. 5:23.

Pero klaro nga iginpapakita han Pulong han Dios an kaibahan han pag-inom hin eksakto la ngan paghubog. Klaro nga nagsiring ito: “Ayaw . . . kamo pagpakahubog hin bino.” (Efe. 5:18) Ngan nagsiring pa ngani ito nga an “mga parahubog . . . diri makakapanunod han Ginhadian han Dios.” (1 Cor. 6:10) Oo, igindidiri gud ni Jehova an sobra nga pag-inom ngan paghubog. Imbes nga basta magsunod la ha batasan nga impluwensyado han aton kultura, gin-aapresyar naton an pagkaada han panhunahuna han Dios.

An iba naghuhunahuna nga makakainom hira hin damu nga diri nahuhubog. Pero peligroso gud ito. An kasuratan klaro nga nasiring nga an pagin “uripon hin damu nga bino” mahimo magin hinungdan nga an usa nga lalaki (o usa nga babaye) makahimo hin seryoso nga sayop ngan makasala kan Jehova. (Tito  2:3; Prob. 20:1) Nagpahamangno pa ngani hi Jesus nga an “sobra nga pag-ininom” makakaulang ha usa ha pagsulod ha bag-o nga kalibotan han Dios. (Luc. 21:​34-36) Salit ano an makakabulig ha usa nga Kristiano nga malikyan an mga problema nga masayon la mahitabo kon nainom hin makahurubog?

Peligroso ha usa kon an kultura nga iya gindak-an amo an iya magigin basihan ha pag-inom. Maaramon nga ginbubuhat han mga Kristiano kon ano an nakakapalipay kan Jehova may kalabotan ha pagkaon ngan pag-inom. An Biblia nagpapahinumdom ha aton: “Nakaon man kamo o nainom o nagbubuhat hin bisan ano, buhata an ngatanan nga butang para ha himaya han Dios.” (1 Cor. 10:31) Ini an pipira nga pakiana ngan mga prinsipyo ha Biblia nga tatagdon:

Nainom ba ako basi makibagay ha iba? An Exodo 23:2 nasiring: “Ayaw pagsunod ha damu nga tawo.” Dinhi hi Jehova nagpapahamangno ha mga Israelita kontra ha pagsunod ha mga tawo nga diri nagpapalipay ha iya. Ito nga sagdon aplikado liwat ha mga Kristiano yana. Kon tutugotan naton nga an aton mga kaupod mag-impluwensya ha aton panhunahuna ngan mga desisyon parte ha pag-inom, magigin hinungdan ito nga mapahirayo kita kan Jehova ngan ha iya mga suruklan.—Roma 12:2.

Nainom ba ako basi ipakita nga makusog ako? Ha iba nga mga kultura, an agsob ngan sobra nga pag-inom, komon ngan normal. (1 Ped. 4:3) Pero tigamni an nakarekord ha 1 Corinto 16:13: “Magpadayon kamo nga nagmamata, magmarig-on ha pagtoo, padayon nga magpakalalaki, ngan magmakusog.” Makakabulig gud ba an makahurubog nga irimnon basi an usa nga tawo magmakusog? Diri gud. An makahurubog nga irimnon masayon la makapaluya ha abilidad han usa nga tawo basi diri makapanhunahuna ngan diri makahimo hin mag-opay nga desisyon. Salit imbes nga hunahunaon sugad nga tigaman han pagin makusog, an pag-inom hin damu nagpapakita lugod ito hin pagin maluya. Iginhuhulagway ha Isaias 28:7 an usa nga nahisisimang tungod han makahurubog nga irimnon nga sugad hin nagpaparadingpading ngan nahipapakdol.

An tinuod nga kusog nagtitikang kan Jehova ngan nagkikinahanglan ito nga padayon nga nagmamata ngan magmarig-on ha pagtoo. (Sal. 18:32) Mahihimo ini han sinsero nga Kristiano pinaagi ha pagpabilin nga alerto ngan ha paggios dayon nga proteksyonan an iya kalugaringon tikang ha espirituwal nga kadaot. Iginpakita ni Jesus an sugad nga kusog  han nakanhi hiya ha tuna, ngan damu an narespeto ha iya kay maisugon hiya ngan determinado nga buhaton an husto.

Nainom ba ako basi makalimtan an akon mga problema? An usa nga salmista gin-giyahan ha pagsurat: “Han an mga kabaraka nagtabon ha akon, [Jehova] imo ako ginliaw ngan ginpakalma.” (Sal. 94:19) Kon naiistres ka tungod han mga problema, sarig kan Jehova para hin bulig, diri ha makahurubog nga irimnon. An usa nga maopay nga paagi ha pagbuhat hito amo an pag-ampo kan Jehova hin mas agsob. Damu liwat an nakaobserbar nga nakakabulig an pangaro hin praktikal nga sagdon tikang ha hamtong nga sangkay ha kongregasyon. Ha pagkamatuod, an pag-inom hin makahurubog basi malamposan an mga problema makakapaluya han determinasyon han usa nga tawo nga buhaton an tama. (Hos. 4:11) Hi Daniel nga gin-unabi na, nagsiring: “Hadto nagsasakit ako tungod han kabaraka ngan kakonsensya. Nainom ako basi maibanan an akon kabaraka, pero nakadugang la ito han mga problema, salit nawarayan ako hin kasangkayan ngan pagrespeto ha kalugaringon.” Ano an nakabulig kan Daniel? “Nasantop ko nga kinahanglan ko sumarig kan Jehova, diri ha makahurubog nga irimnon. Han ginbuhat ko ito nalamposan ko an akon mga problema,” siring niya. Oo, hi Jehova pirme gud andam ha pagbulig ha aton bisan kon an aton sitwasyon baga hin waray na solusyon.—Fil. 4:​6, 7; 1 Ped. 5:7.

Kon usahay nainom ka, mahimo mo hunahunaon kon may kinahanglan ka ba himoon nga pagbag-o. Pakianhi an imo kalugaringon: ‘May kapamilya ba ako o duok nga sangkay nga nagpahayag hin kabaraka mahitungod ha akon pag-ininom?’ Kon amo, tigaman ito nga diri mo napapansin nga nagigin batasan mo na o problema an pag-ininom. ‘Mas damu na ba yana an akon gin-iinom?’ Kon ito an sitwasyon han usa bisan kon diri hiya mahilig ha pag-inom bangin nagigin sugad na hiya hito. ‘Nakukurian ba ako kon diri ako nakakainom ha sulod hin pipira ka adlaw o lahos pa?’ Kon oo, an pag-ininom bangin nakagamot na o alkoholiko ka na. Mahimo ito magpasabot nga kinahanglan mo an bulig han usa nga doktor basi malamposan ito nga problema.

Tungod kay an pag-inom mahimo magresulta hin damu nga problema, an iba nga Kristiano nagdesisyon nga diri uminom hin bisan ano nga makahurubog.  An iba nadiri pag-inom tungod la kay diri nira karuyag an rasa. Kon ito an desisyon han usa mo nga kaupod, maipapakita mo an pagin buotan kon rirespetuhon mo an iya desisyon nga diri hiya ginpapakaraot.

O bangin nakita mo nga maaramon an paghimo hin personal nga limitasyon kon ano kadamu an imo iimnon. O bangin naghimo an usa nga Kristiano hin personal nga surundon mahitungod ha kaagsob han iya pag-inom, bangin makausa ha usa ka semana o gutiay la ha mga panahon han pangaon. An iba naghimo hin mga limitasyon ha klase hin irimnon nga ira iinumon, sugad han bino o beer nga igo la pero diri han maisog nga irimnon, ngan bisan an ginhaloan nga irimnon. Kon an usa may-ada na klaro nga mga limitasyon ha pag-inom, mas masayon ha iya nga sundon ito. Ngan kinahanglan diri maawod an usa nga hamtong nga Kristiano kon naghimo hiya hito nga desisyon ngan istrikto nga sundon ito.

Kon naghihimo hin mga desisyon parte ha pag-inom, kinahanglan liwat nga hunahunaon naton an inaabat han iba. An Roma 14:21 nasiring: “Mas maopay nga diri kumaon hin karne o uminom hin bino o magbuhat hin bisan ano nga nakakapakdol ha imo bugto.” Paonan-o mo maiaaplikar ini nga sagdon? Magin mahigugmaon. Kon abaton mo nga an pag-inom bangin makapakdol ha usa, an gugma magpapagios ha imo nga diri uminom hito nga okasyon. Kon buhaton mo ito, ginpapakita mo nga ginrirespeto mo ngan ginhihigugma an iba, ngan ginhuhunahuna mo an ira kaopayan, kay ha imo.—1 Cor. 10:24.

An gobyerno bangin liwat may-ada mga balaud mahitungod ha pag-inom. Syempre, kinahanglan ito sundon han mga Kristiano. Bangin aada hito nga mga balaud an edad nga puydi na uminom o an pagdiri ha pag-inom ngan pag-drive o paggamit hin pipira nga makina.—Roma 13:​1-5.

Gintagan kita ni Jehova hin dignidad ha pagkaada kagawasan nga mapahimulsan an damu nga regalo tikang ha iya. Upod hito nga regalo an kagawasan ha pagbuot kon ano an aton kakaunon ngan kon ano an aton iinumon. Hinaot an aton mga pagpili nagpapakita nga gin-aapresyar gud naton ini nga kagawasan pinaagi ha paggamit hito basi lipayon an aton langitnon nga Amay.