Nabasa mo ba hin maopay an mga isyu han An Barantayan hini nga tuig? Kitaa kon mababaton mo an masunod nga mga pakiana:

Ano an kinahanglan buhaton basi ‘mabag-o an iyo panhunahuna’? (Roma 12:2)

Kinahanglan diri ta la basta dekorasyonan an aton kinabuhi hin pipira nga mag-opay nga buhat. Nag-uupod ito ha pag-usisa kon ano gud an aton pagkatawo ngan paghimo hin mga pagbag-o basi masunod an mga suruklan ni Jehova ha pinakamaopay nga aton mahihimo.—w23.01, p. 8-9.

Paonan-o kita magigin balanse kon nagkikita ha mga panhitabo ha kalibotan?

Interesado kita kon paonan-o an mga panhitabo yana ha kalibotan nagtutuman han mga tagna ha Biblia. Imbes nga magbanabana, nga mahimo makaapekto han pagkaurosa, an aton ginyayakan dapat iginbabase ha mga iginpublikar han organisasyon ni Jehova. (1 Cor. 1:10)—w23.02, p. 16.

Ano an kaibahan han bawtismo ni Jesus ngan han bawtismo han iya mga sumurunod?

Natawo hi Jesus ha nasud nga dedikado ha Dios, salit diri na niya kinahanglan magdedikar kan Jehova. Perpekto hiya nga tawo ngan waray sala. Diri niya kinahanglan magbasol ha bisan ano nga sala.—w23.03, p. 5.

Paonan-o naton mabubuligan an iba nga makagkomento ha mga katirok?

Puydi ta haliputon an aton komento basi makapartisipar an iba. Mahimo ta liwat likyan an paghisgot hin sobra kadamu nga punto basi may makomentohan pa an iba.—w23.04, p. 23.

Ano nga “Dalan han Pagkabaraan” an gin-uunabi ha Isaias 35:8?

Ini nga simboliko nga kalsada nagtutudlok ha ruta han mga Judio tikang ha Babilonya ngadto ha ira kalugaringon nga nasud. Kumusta man yana ha moderno nga panahon? Ha sulod hin ginatos ka tuig antes han 1919, ginhimo an pagpangandam—paghubad ngan pag-imprinta hin mga Biblia, ngan iba pa. An katawohan han Dios nagbibiyahe dida ha “Dalan han Pagkabaraan” tipakadto ha espirituwal nga paraiso, nga magriresulta hin mga bendisyon han Ginhadian.—w23.05, p. 15-19.

An Proberbios kapitulo 9 naghahatag hin sagdon partikular ha ano nga duha nga simboliko nga babaye?

An Proberbios naghihisgot hin “lurong nga babaye” nga an imbitasyon nagriresulta ngadto ha “Lubnganan” ngan hin “tinuod nga kinaadman,” nga ginsisimbolohan han usa nga babaye, nga an imbitasyon nagriresulta ngadto “ha dalan han pagsabot” ngan kinabuhi. (Prob. 9:​1, 6, 13, 18)—w23.06, p. 22-24.

Paonan-o nakita an pagin mapainubsanon ngan pagkamakatadunganon han Dios ha iya pagtratar kan Lot?

Ginsidngan ni Jehova hi Lot nga pumalagiw tikang ha Sodoma ngadto ha kabukiran. Han naghangyo hi Lot nga didto lugod hiya mapalagiw ha Zoar, gintugotan hiya han Dios.—w23.07, p. 21.

Ano an mahimo buhaton han asawa kon an iya padis nagkikinita hin pornograpiya?

Dapat tigamnan niya nga diri hiya an may sayop. Dapat magpokus hiya ha iya relasyon ha Dios ngan mamalandong ha mga rekord ha Biblia parte ha kababayin-an nga nabaraka pero naliaw Niya. Mabubuligan niya an iya padis nga likyan an alanganin nga mga sitwasyon.—w23.08, p. 14-17.

Kon ginkukwestyon an aton gintotoohan, paonan-o an hilarom nga pagsabot mabulig ha aton nga magin malumo?

An pakiana o an pagkwestyon mahimo naton hunahunaon nga usa nga paagi basi mahibaroan an ginhuhunahuna o inaabat han usa. Salit mas masayon para ha aton nga magin malumo ha pagbaton.—w23.09, p. 17.

Ano an aton mahibabaroan kan Maria mahitungod ha pagkuha hin kusog?

Han nahibaro hi Maria nga magigin nanay hiya han Mesias, nakakuha hiya hin kusog tikang ha iba. Hira Gabriel ngan Elizabeth naghatag hin pagparig-on tikang ha Kasuratan. Mapaparig-on liwat kita han aton mga igkasi-magsiringba.—w23.10, p. 15.

Paonan-o mahimo batunon ni Jehova an aton mga pag-ampo?

Nagsasaad hiya nga mamamati hiya ha aton mga pag-ampo ngan ginhuhunahuna niya an iya katuyoan kon namamati hiya ha aton mga pag-ampo. (Jer. 29:12) Bangin bumaton hiya ha pariho nga mga hangyo ha iba-iba nga paagi, pero pirme hiya mabulig ha aton.—w23.11, p. 21-22.

Gin-uunabi ha Roma 5:2 an “paglaom,” salit kay ano nga ginhihisgotan ito utro ha bersikulo 4?

Pinaagi ha pakabati han maopay nga sumat, an usa nga tawo mahimo magkaada han paglaom nga mabuhi ha waray kataposan ha paraiso nga tuna. Pero samtang nakakaeksperyensya hiya hin mga kasakitan, nag-iilob, ngan naabat han pag-uyon han Dios, an iya paglaom posible gud nga nagigin mas marig-on ngan mas presyoso ha iya.—w23.12, p. 12-13.