1. Ano an bangin abaton han iba mahitungod han kinabuhi nga waray kataposan?

 DAMU nga tawo an naghihirot han ira ginkakaon ngan regular nga nag-iehersisyo basi pirme magin mahimsog. Pero diri hira naglalaom nga mabubuhi hira ha waray kataposan. An paglaom hito baga hin diri reyalistiko ngan diri makaruruyag tungod han kasakit nga resulta han kalagas. Bisan pa hito, hi Jesus nagyakan ha positibo nga paagi mahitungod han “kinabuhi nga waray kataposan,” sugad han mababasa ha Juan 3:16 ngan 5:24.

2. Ano an ginsisiring han Juan kapitulo 6 mahitungod han kinabuhi nga waray kataposan? (Juan 6:​39, 40)

² Usa ka adlaw, milagroso nga nagpakaon hi Jesus hin tinapay ngan isda ha yinukot nga tawo. a Nakakaimpres adto, pero mas nakakaimpres pa ngani an iya ginsiring ha sunod nga adlaw. Nagsinunod an mga tawo ha iya tubtob ha Capernaum, nga hirani ha baybayon han Galilea, diin didto ginsumatan niya hira nga magkakaada pagkabanhaw ngan mai-enjoy an kinabuhi nga waray kataposan. (Basaha an Juan 6:​39, 40.) Hunahunaa la kon ano an magigin kahulogan hito para ha imo kasangkayan ngan ha imo kapamilya nga nagkamatay na. Iginpapakita han mga pulong ni Jesus nga damu han nagkamatay na an babanhawon ngan ikaw ngan an imo mga hinigugma mahimo mag-enjoy han kinabuhi nga waray kataposan. Pero an mga ginsiring pa ni Jesus ha Juan kapitulo 6 nagin makuri gud masabtan han damu. Hisgotan naton hin maopay an ginsiring niya.

3. Sumala ha Juan 6:​51, ano an iginsumat ni Jesus mahitungod ha iya?

 ³ Nakita han mga tawo ha Capernaum an koneksyon han mga tinapay nga iginpakaon pa la ni Jesus ha ira ngan han manna nga igintagana ni Jehova ha ira mga kaapoy-apoyan. Ngani, gintatawag han Kasuratan ito nga manna nga “tinapay tikang ha langit.” (Sal. 105:40; Juan 6:31) Gin-gamit ni Jesus an manna sugad nga basihan para ha sunod niya nga igintutdo. Bisan kon an manna milagroso nga tagana tikang ha Dios, an mga kinaon hito ha urhi namatay. (Juan 6:49) Ha kabaliktaran, gintawag ni Jesus an iya kalugaringon nga an “tinuod nga tinapay tikang ha langit,” an “tinapay han Dios,” ngan an “tinapay han kinabuhi.” (Juan 6:​32, 33, 35) May ginpabug-atan hi Jesus nga importante nga kaibahan han manna ngan han iya kalugaringon. Hiya nagsiring: “Ako an buhi nga tinapay nga linusad tikang ha langit. Kon may bisan hin-o nga kumaon hini nga tinapay mabubuhi hiya ha kadayonan.” (Basaha an Juan 6:51.) Nawurok ito nga mga Judio. Kay ano nga masisiring ni Jesus nga hiya “an tinapay” nga linusad tikang ha langit nga mas labaw kay ha milagroso nga manna nga ginhatag han Dios ha ira mga kaapoy-apoyan? Hi Jesus naghatag hin makapainteres nga tigaman han hiya nagsiring: “An tinapay nga akon ihahatag amo an akon unod.” Ano an iya karuyag sidngon? Importante nga masabtan naton ito tungod kay an baton nagpapakita kon paonan-o magigin posible an kinabuhi nga waray kataposan para ha aton ngan ha aton mga hinigugma. Kitaon naton kon ano an karuyag sidngon ni Jesus.

BUHI NGA TINAPAY NGAN AN IYA UNOD

4. Kay ano nga nahipausa an iba han ginsiring ni Jesus?

⁴ Nahipausa an pipira han mga nakabati kan Jesus han hiya nagsiring nga iya ihahatag “an iya unod basi mabuhi an kalibotan.” Naghunahuna ba hira nga iya ihahatag ha ira an iya literal nga unod basi kaunon, nga usa nga klase hin kanibalismo? (Juan 6:52) Pero may ginsiring hi Jesus ha ira nga diri gud hira makatoo. Nagsiring hiya: “Diri kamo magkakaada kinabuhi ha iyo kalugaringon labot la kon kaunon niyo an unod han Anak han tawo ngan inumon an iya dugo.”​—Juan 6:53.

5. Kay ano nga makakasiguro kita nga diri karuyag sidngon ni Jesus nga dapat inumon han mga tawo an iya literal nga dugo?

⁵ Ha panahon ni Noe, igindiri han Dios nga kaunon han mga tawo an dugo. (Gen. 9:​3, 4) Ito nga pagdiri gin-utro ni Jehova ha iya Balaud ha Israel. An bisan hin-o nga nakaon han dugo “kinahanglan patayon.” (Lev. 7:27) Gintutdoan ni Jesus an mga Judio ha pagtuman han Balaud. (Mat. 5:​17-19) Salit diri gud niya igsusugo ha mga Judio nga kaunon an iya literal nga unod o imnon an iya dugo tikang ha iya mga ugat. Pero karuyag la ni Jesus nga tutdoan an mga tawo pinaagi hini nga mga pulong kon paonan-o makakarawat an kinabuhi—“kinabuhi nga waray kataposan.”​—Juan 6:54.

6. Paonan-o naton sasabton an mga pulong ni Jesus mahitungod ha pagkaon han iya unod ngan pag-inom han iya dugo?

⁶ Ano an karuyag ipasabot ni Jesus? Klaro nga nagyayakan hi Jesus ha simboliko nga paagi, sugad han iya ginhimo antes pa han ginsumatan niya an usa nga Samaritana: “An bisan hin-o nga nainom han tubig nga ihahatag ko ha iya diri na gud uuhawon, kondi an tubig nga ihahatag ko ha iya magigin burabod han tubig dida ha iya nga nagbubugwak basi maghatag hin kinabuhi nga waray kataposan.” (Juan 4:​7, 14) b Diri hi Jesus nasiring nga an  Samaritana magkakaada hin kinabuhi nga waray kataposan pinaagi la ha pag-inom hin literal nga tubig. Sugad liwat hito an iya punto han nakiistorya hiya ha mga tawo ha Capernaum nga mabubuhi hira ha waray kataposan kon kaunon nira an iya literal nga unod ngan inumon an iya literal nga dugo.

MGA KAIBAHAN HAN DUHA NGA HIGAYON

7. Ano an ginsisiring han iba mahitungod han mga pulong ni Jesus nga nakarekord ha Juan 6:53?

⁷ An iba nga relihiyoso nga mga tawo nasiring nga an mga pulong ni Jesus nga mababasa ha Juan 6:53 mahitungod ha pagkaon han iya unod ngan pag-inom han iya dugo naghahatag hin surubdan para ha Panihapon han Ginoo tungod kay ha sumunod nga higayon gin-gamit niya an mga pulong nga baga hin puropariho. (Mat. 26:​26-28) Nasiring hira nga an bisan hin-o nga naatender ha Panihapon han Ginoo dapat kumaon han tinapay ngan uminom han bino nga iginpapasa ha mga naatender. Tama ba ito? Importante gud nga usisahon naton kon totoo ba ito nga ginsisiring kay kada tuig minilyon ha bug-os nga kalibotan an nagkakatirok kaupod naton. Mapapansin naton an mga kaibahan ha nakarekord ha Juan 6:53 ngan ha ginsiring ni Jesus ha Panihapon han Ginoo.

8. Ano an pipira nga kaibahan han duha nga higayon? (Kitaa liwat an mga piktyur.)

⁸ Kitaon naton an duha nga kaibahan hini nga mga higayon. Siyahan, kakan-o ngan diin  nag-istorya hi Jesus han mga pulong nga nakarekord ha Juan 6:​53-56? Ginyakan niya ito ha mga Judio ha Galilea han 32 C.E. Mga usa ka tuig ito antes niya tikangan an Panihapon han Ginoo ha Jerusalem. Ikaduha, para kan kanay an iya ginsiring? Kadam-an han iya mga mamarati ha Galilea mas interesado ha pagtagbaw han ira temporaryo nga panginahanglan ha pisikal imbes ha espirituwal. (Juan 6:26) Ngani, han may ginsiring hi Jesus nga nakurian hira pagsabot, nawara dayon an ira pagtoo ha iya. Bisan an pipira han iya mga disipulo waray na umupod ha iya. (Juan 6:​14, 36, 42, 60, 64, 66) Ini nga mga tawo iba gud ha 11 nga matinumanon nga apostol nga kaupod ni Jesus han gintikangan niya an Panihapon han Ginoo paglabay hin mga usa ka tuig han 33 C.E. Hito nga higayon, an iya 11 nga maunungon nga apostol kaupod niya bisan kon waray nira bug-os nga masabti an ngatanan nga iya gintutdo. Bisan pa hito, diri pariho han kadam-an ha Galilea, an iya matinumanon nga mga apostol kombinsido gud nga hi Jesus an Anak han Dios nga linusad tikang ha langit. (Mat. 16:16) Iya ginkumendasyonan hira: “Kamo an inunong ha akon durante han akon mga pagsari.” (Luc. 22:28) Iginpapakita hito nga mga kaibahan nga an mga pulong ni Jesus ha Juan 6:53 diri nagsasaysay han mahitatabo ha Panihapon han Ginoo. Ngan may iba pa nga ebidensya.

NAHIUUPOD KA HINI

9. Ha ano nga grupo naaplikar an mga pulong ni Jesus ha Panihapon han Ginoo?

⁹ Ha panahon han Panihapon han Ginoo, naghatag hi Jesus ha iya mga apostol hin tinapay nga waray libadura ngan ginsidngan hira nga nagsisimbolo ito han iya lawas. Katapos, iginhatag niya ha ira an bino ngan nagsiring hiya nga nagsisimbolo ito han “dugo han kasabotan.” (Mar. 14:​22-25; Luc. 22:20; 1 Cor. 11:24) Importante gud ito. An bag-o nga kasabotan ginhimo “ha panimalay [han espirituwal nga] Israel”—nga magigin “ha Ginhadian han Dios”—diri ha bug-os nga katawohan. (Heb. 8:​6, 10; 9:15) Waray ito masabti han mga apostol hito nga panahon, pero diri na maiha didihogan hira han baraan nga espiritu ngan magigin bahin han bag-o nga kasabotan ha pagkaada lugar ha langit upod ni Jesus.​—Juan 14:​2, 3.

10. Ano pa an kaibahan han ginsiring ni Jesus ha Galilea ngan han iya ginsiring ha Panihapon han Ginoo? (Kitaa liwat an piktyur.)

¹⁰ Tigamni nga ha panahon han Panihapon han Ginoo, nagpokus hi Jesus ha “gutiay nga panon.” An siyahan nga bahin hito nga gutiay nga grupo amo an iya matinumanon nga mga apostol nga kaupod niya ha kwarto. (Luc. 12:32) Hira ngan an iba pa nga magigin bahin hito nga grupo ginlalaoman nga makikigbahin ha duha nga emblema—an tinapay ngan an bino. Magkakaada hira lugar ha langit kaupod hi Jesus. An iginpapasabot han iya ginsiring hini nga higayon iba ha iya ginsiring ha mga tawo ha Galilea. An iya ginsiring ha Panihapon han Ginoo naaplikar la ha gutiay nga grupo hin mga tawo. Pero an ginsiring niya ha Galilea naaplikar ha mas damu gud nga tawo.

11. Ano an ginsiring ni Jesus ha Galilea nga nagpapakita nga diri gutiay nga grupo an iya iginpapasabot?

¹¹ Han nakadto hi Jesus ha Galilea han 32 C.E., an iya gud ginsisiring amo an mga Judio nga tinapay la an karuyag ha iya. Pero nangalimbasog hi Jesus nga buligan hira nga masabtan nga may-ada mas importante kay ha literal nga pagkaon. Iginsumat niya an usa nga pagkaon nga makakahatag ha ira hin kinabuhi nga waray kataposan. Ngan hi Jesus nagsiring nga adton nagkamatay mahimo mabanhaw ha kataposan nga adlaw ngan mabubuhi  ha waray kataposan. An iya iginpapasabot diri an gutiay la nga pinili, nga limitado an kadamu, sugad han iya ginbuhat ha panahon han Panihapon han Ginoo. Lugod, an iya pokus ha Galilea amo an bendisyon nga mapapahimulosan han ngatanan nga tawo. Ngani, nagsiring hiya: “Kon may bisan hin-o nga kumaon hini nga tinapay mabubuhi hiya ha kadayonan . . . An tinapay nga akon ihahatag amo an akon unod basi mabuhi an kalibotan.”​—Juan 6:51. c

12. Ano an kinahanglan basi makapahimulos ha ginsiring ni Jesus?

¹² Waray hi Jesus magsiring ha mga Judio ha Galilea nga ini nga bendisyon makakarawat han tagsa nga tawo nga nabuhi o ipapanganak pa la. An ‘nakaon la hini nga tinapay,’ nga amo adton nagpapakita hin pagtoo, an magpapahimulos. Damu nga nag-aangkon nga mga Kristiano an naghuhunahuna nga matatalwas hira basta “tumuo” la kan Jesus ngan hunahunaon hiya sugad nga ira personal nga manluluwas. (Juan 6:​29, An Baraan nga Biblia) Pero an iba ha ira nga ha siyahan tinoo kan Jesus waray na magpadayon. Kay ano?

13. Ano an ginkikinahanglan basi magin tinuod nga disipulo ni Jesus?

¹³ Kadam-an han mga tawo nga ginpakaon ni Jesus nalilipay pag-inupod ha iya tubtob nga iginhahatag niya an ira karuyag. Interesado hira ha milagroso nga pagtambal, libre nga pagkaon, o mga katutdoan nga nauyon ha ira karuyag mabatian. Pero iginpakita ni Jesus nga may-ada pa ginkikinahanglan basi magin iya tinuod nga mga disipulo. Waray hiya kumanhi ha tuna basi la tagbawon an unudnon  nga mga hingyap han mga tawo. Kinahanglan nira gumios uyon ha iya imbitasyon nga ‘daop’ ha iya pinaagi ha pagkarawat ngan pagsugot ha tanan nga iya igintutdo.​—Juan 5:40; 6:44.

14. Ano an dapat naton buhaton basi magpahimulos ha unod ngan dugo ni Jesus?

¹⁴ Ginpabug-atan ni Jesus ha mga tawo nga kinahanglan nira magpakita hin pagtoo. Ha ano? Ha nakakatubos nga gahum han iya unod ngan dugo nga iya ihahatag sugad nga halad. Ito nga pagtoo importante para ha mga Judio, ngan importante la gihapon ito yana. (Juan 6:40) Oo, para magpahimulos kita ha unod ngan dugo ni Jesus, sugad han gin-uunabi ha Juan 6:​53, kinahanglan naton magpakita hin pagtoo ha lukat. Posible ito makarawat han damu gud nga tawo.​—Efe. 1:7.

15-16. Ano nga mga kapulsanan an aton mahibabaroan ha Juan kapitulo 6?

¹⁵ An rekord han Biblia ha Juan kapitulo 6 may-ada daku nga kapulsanan para ha aton ngan ha aton mga hinigugma. Iginpapakita hito nga hi Jesus interesado gud ha katawohan. Han nakadto hiya ha Galilea, nagtambal hiya han mga may sakit, nagtutdo mahitungod han Ginhadian, ngan ginsiguro nga maihatag an nangunguna nga panginahanglan han mga tawo ha pagkaon. (Luc. 9:11; Juan 6:​2, 11, 12) An mas importante, igintutdo niya nga hiya “an tinapay han kinabuhi.”​—Juan 6:​35, 48.

¹⁶ Adton gintawag niya nga “iba nga mga karnero” diri ngan diri gud dapat kumaon han tinapay ngan uminom han bino ha tinuig nga Panihapon han Ginoo. (Juan 10:16) Bisan pa hito, nagpapahimulos hira han unod ngan dugo ni Jesu-Kristo. Iginpapakita nira ito pinaagi ha pagpakita hin pagtoo ha iya halad nga nakakatubos. (Juan 6:53) Ha kabaliktaran, adton dapat kumaon han tinapay ngan uminom han bino nagpapakita nga kaapi hira ha bag-o nga kasabotan nga may paglaom nga magin manurunod han Ginhadian ha langit. Salit mga dinihogan man kita o iba nga mga karnero, damu gud an aton mahibabaroan ha rekord ha Juan kapitulo 6. Ginpapabug-atan hito nga importante gud an pagpakita hin pagtoo basi magkaada kinabuhi nga waray kataposan.