Nagsurat hi apostol Pablo ha iya igkasi-tigurang nga hi Timoteo: “Seryoso nga ginsusugo ko ikaw ha atubangan han Dios ngan ni Kristo Jesus ngan han pinili nga mga anghel nga tumanon ini nga mga instruksyon nga waray gud gindadapigan o ginpapaurog.”​—1 Tim. 5:21.

Siyahan, hihisgotan naton kon hin-o an diri nahiuupod hini nga mga anghel. Klaro nga diri hira an kaapi han 144,000. Han hi Pablo nagsurat kan Timoteo, waray pa magtikang an pamanhaw han dinihogan nga mga Kristiano ngadto ha langit. An mga apostol ngan an iba nga mga dinihogan waray pa magin espirituhanon nga linarang, salit diri puydi nga hira an “pinili nga mga anghel.”​—1 Cor. 15:​50-54; 1 Tes. 4:​13-17; 1 Juan 3:2.

Diri liwat puydi nga an mga anghel nga waray magin masinugtanon ha panahon han Baha amo an “pinili nga mga anghel.” Ito nga mga anghel dinapig kan Satanas ngan nagin mga demonyo, nga kinontra kan Jesus. (Gen. 6:2; Luc. 8:​30, 31; 2 Ped. 2:4) Ha tiarabot, ilalabog hira ngadto ha kahiladman ha sulod hin 1,000 ka tuig ngan katapos bubungkagon hira kaupod han Yawa.​—Jud. 6; Pah. 20:​1-3, 10.

Sigurado nga an gin-unabi ni Pablo nga “pinili nga mga anghel” amo an mga anghel ha langit nga sinuporta ha “Dios ngan [kan] Kristo Jesus,” nga gin-unabi ha pariho nga bersikulo.

May-ada yinukot-yukot nga matinumanon nga anghel. (Heb. 12:​22, 23) Diri naton angay hunahunaon nga an kada tagsa ha ira may-ada pariho nga toka ha pariho nga panahon. (Pah. 14:​17, 18) Hinumdumi nga usa ka beses ginsugo an usa nga anghel nga patayon an 185,000 nga armado nga Asiryano. (2 Hadi 19:35) Damu nga anghel an posible tokahan nga ‘tirukon tikang ha Ginhadian ni Jesus an ngatanan nga butang nga nagigin hinungdan han kahipakdol ngan an mga tawo nga matinalapason.’ (Mat. 13:​39-41) An iba nga anghel posible sugoon nga ‘tirukon an iya mga pinili’ ngadto ha langit. (Mat. 24:31) Ngan an iba naman ginsusugo nga ‘bantayan kita ha ngatanan naton nga dalan.’—Sal. 91:11; Mat. 18:10; ikompara an Mateo 4:11; Luc. 22:43.

An “pinili nga mga anghel” nga gin-unabi ha 1 Timoteo 5:21 posible gud nga amo an mga anghel nga gintagan hin espesyal nga mga toka nga konektado ha katawohan han Dios. Ha konteksto, naghatag hi Pablo hin maaramon nga sagdon mahitungod ha mga tigurang nga angay kumarawat hin respeto tikang ha kongregasyon. Para ha bahin han mga tigurang, dapat nira tumanon an ira mga responsabilidad nga “waray gud gindadapigan o ginpapaurog” ngan dapat diri hira maghimo hin desisyon o maghukom nga diri ginhuhunahuna hin maopay. Katapos, naghatag hi Pablo hin importante nga rason nga sundon an iya sagdon kay tutumanon nira an ira responsabilidad “ha atubangan han Dios ngan ni Kristo Jesus ngan han pinili nga mga anghel.” Salit klaro nga may mga anghel nga gintokahan hin mga responsabilidad may kalabotan ha kongregasyon, sugad han paghatag hin proteksyon, paggiya ha pagsangyaw, ngan ha pagsumat kan Jehova han ira naobserbaran.​—Mat. 18:10; Pah. 14:6.