1, 2. (a) Ano an iba-iba nga panhunahuna han mga tawo may kalabotan ha kagawasan ha pagbuot? (b) Ano an igintututdo ha aton han Biblia may kalabotan ha aton kagawasan ha pagbuot, ngan ano nga mga pakiana an aton hihisgotan?

HAN kinahanglan maghimo hin personal nga desisyon an usa nga babaye, ginsidngan niya an iya sangkay: “Ayaw na ako papaghunahunaa; sumati na la ako han akon hihimoon. Mas madali ito.” Karuyag hini nga babaye nga diktahan la hiya han iya bubuhaton imbes nga gamiton an presyoso nga regalo ha iya han Maglalarang, an kagawasan ha pagbuot. Kumusta ka man? Naruruyag ka ba nga ikaw an nagdidesisyon para ha imo kalugaringon, o mas karuyag mo nga may nagdidesisyon para ha imo? Ano an imo panhunahuna may kalabotan ha kagawasan ha pagbuot?

² Maiha na nga gindidebatehan ini nga topiko. An pipira nasiring nga waray tinuod nga kagawasan ha pagbuot—nga an ngatanan nga aton ginbubuhat igintanda na nga daan han Dios. Nangangatadongan an iba nga posible la an tinuod nga kagawasan ha pagbuot kon may-ada kita bug-os nga kagawasan. Pero basi magkaada kita husto nga pagsabot may kalabotan hini, kinahanglan naton usisahon an ginsisiring han Pulong han Dios, an Biblia. Kay ano? Iginpapakita hito nga ginlarang kita ni Jehova nga may kagawasan ha pagbuot—an abilidad ngan kagawasan ha paghimo hin maaramon ngan personal nga mga desisyon. (Basaha an Josue  24:15.) Hibabaroan liwat naton ha Biblia an baton han mga pakiana sugad han: Paonan-o naton sadang gamiton an aton kagawasan ha pagbuot? May mga limitasyon ba ito? Paonan-o an aton paagi han paggamit hito nagpapakita han aton daku nga gugma kan Jehova? Paonan-o naton maipapakita nga ginrirespeto naton an desisyon han iba?

3. Paonan-o ginagamit ni Jehova an iya kagawasan?

³ Hi Jehova la an may bug-os nga kagawasan; pero may mahibabaroan kita han iya paagi ha paggamit hito. Pananglitan, iya ginpili an nasud han Israel nga magin iya katawohan, an iya espesyal nga ‘panag-iya.’ (Deut. 7:6-8) Ini nga iya pagpili diri kay waray basihan. Gintuman ni Jehova an iya saad ha iya sangkay nga hi Abraham mga siglo na an naglabay. (Gen. 22:15-18) Dugang pa, pirme ginagamit ni Jehova an iya kagawasan uyon ha iya kalidad nga gugma ngan hustisya. Makikita ini ha iya paagi han pagdisiplina ha mga Israelita nga pauroutro nga binaya ha tinuod nga pagsingba. Kon sinsero hira nga nagbabasol, andam hiya magpakita ha ira hin gugma ngan kalooy. Hiya nagsiring: “Pababalikon ko ngadi ha akon an akon mga tawo. Hihigugmaon ko hira hin kinasingkasing.” (Ose. [Hos.] 14:4, Maupay nga Sumat) Maopay gud nga susbaranan ha paggamit han iya kagawasan para ha kapulsanan han iba!

4, 5. (a) Hin-o an siyahan nga nakakarawat han regalo han Dios nga kagawasan ha pagbuot, ngan paonan-o niya ito gin-gamit? (b) Ano an sadang naton igpakiana ha aton kalugaringon?

⁴ Han ginhimo ni Jehova an iya intelihente nga mga linarang, mahigugmaon nga nagdesisyon hiya nga tagan hira hin kagawasan ha pagbuot. An siyahan nga nakakarawat hini nga regalo amo an iya suhag nga Anak, “an dagway han diri-nakikita nga Dios.” (Col. 1:15) Antes pa kumanhi hi Jesus ha tuna, ginpili niya nga magpabilin nga maunungon ha iya Amay ngan diri umupod ha pagrebelde ni Satanas. Ha urhi, han nakanhi hiya ha tuna, ginpili niya nga isalikway an mga pagsulay han nangunguna nga Kaaway. (Mat. 4:10) Ha gab-i antes patayon hi Jesus, sinsero hiya nga nag-ampo. Hito nga takna, iginpakita niya utro nga determinado gud hiya nga buhaton an kaburut-on han Dios. Hiya nagsiring: “Amay ko, kon karuyag mo, alayon kuhaa ha akon ini nga kopa. Pero diri an akon kaburut-on an matutuman kondi an imo.” (Luc. 22:42) Hinaot subaron naton hi Jesus ngan gamiton naton an aton kagawasan ha pagbuot ha pagpasidungog kan Jehova ngan ha pagbuhat han iya kaburut-on! Mahihimo gud ba naton ito?

⁵ Oo, masusubad naton hi Jesus kay ginlarang liwat kita ha ‘dagway han Dios.’ (Gen. 1:26) Pero waray kita bug-os nga kagawasan nga pariho han kan Jehova. Iginsasaysay han Biblia nga may mga limitasyon an aton kagawasan ngan kinahanglan kita gumios uyon hito nga mga limitasyon nga iginhatag ni Jehova. Pananglitan, an asawa kinahanglan magpasakop ha iya bana ngan an mga anak ha ira mga kag-anak. (Efe. 5:22; 6:1) Tungod hito nga mga limitasyon, ha ano nga paagi sadang naton gamiton an aton kagawasan ha pagbuot? An baton hini makakaapekto ha aton waray kataposan nga tidaraon.

6. Iilustrar kon kay ano nga husto an pagkaada mga limitasyon ha aton kagawasan.

⁶ Kon an aton kagawasan ha pagbuot may limitasyon, matatawag ba ito nga tinuod nga kagawasan? Oo! Kay ano? An mga limitasyon ha kagawasan han tawo nagpapanalipod ha aton. Pananglitan, mahimo naton gamiton an aton kagawasan nga magdrayb pakadto ha hirayo nga syudad. Pero magigin talwas ba an aton pagbiyahe kon waray mga balaud ha trapiko ngan an ngatanan puydi la magbuot kon mationan-o kalaksi hira magpapadalagan, o kon diin nga linya han kalsada hira maagi? Diri gud. Kinahanglan an mga limitasyon basi an ngatanan magpahimulos ha mga bendisyon han tinuod nga kagawasan. Basi mas masabtan kon kay ano nga maaramon an paggamit han aton kagawasan ha pagbuot uyon ha mga limitasyon nga  iginhatag ni Jehova, hisgotan naton an pipira nga ehemplo ha Biblia.

7. (a) Kay ano nga naiiba hi Adan ha mga hayop? (b) Ihulagway an usa nga ehemplo han paggamit ni Adan han iya kagawasan ha pagbuot.

⁷ Han ginlarang an siyahan nga tawo nga hi Adan, gintagan liwat hiya han Dios han regalo nga Iya iginhatag ha mga anghel—an kagawasan ha pagbuot. Tungod hini, naiiba hi Adan ha mga hayop kay an mga hayop nagios uyon ha mga kinaiya hito. Tagda an usa nga ehemplo han husto nga paggamit ni Adan han iya kagawasan ha pagbuot. An mga hayop una nga ginlarang kay ha tawo. Pero iginhatag ni Jehova ha siyahan nga tawo an makalilipay nga pribilehiyo nga ngaranan an mga hayop. ‘Gindara hira han Dios ngadto ha lalaki pagpakita kon ano an iya igngangaran ha ira.’ Katapos ni Adan obserbaran an tagsa nga hayop ngan tagan ito hin angayan nga ngaran, waray na bag-oha ni Jehova an anoman nga nagin desisyon ni Adan. Lugod, “kon ano an iginngaran han lalaki ha tagsa nga buhi nga mananap, amo man an ngaran.”—Gen. 2:19.

8. Ha ano nga paagi sayop nga gin-gamit ni Adan an iya kagawasan ha pagbuot, ngan ano an resulta hito?

⁸ Makasurubo, waray makontento hi Adan ha toka ha iya han Dios nga kultibaron an tuna nga magin paraiso ngan atamanon ito. Waray liwat hiya makontento ha daku nga kagawasan nga iginhatag ha iya han Dios han ginsugo hiya: “Magmabungaon kamo ngan magdamu ngan pun-on niyo an tuna, ngan pagtagiyaha niyo ito: ngan paghadian niyo an kaisda-an . . . an katamsihan . . . ngan an ngatanan nga mga mananap nga nabantad ha bawbaw han tuna.” (Gen. 1:28) Lugod, ginpili ni Adan nga diri sundon an mga limitasyon nga iginhatag ha iya han Dios pinaagi ha pagkaon han igindidiri nga bunga. Inin tinuyo ngan sayop nga pag-gamit han kagawasan ha pagbuot nagresulta hin pag-antos ngan kakurian han mga tulin ni Adan ha sulod hin yinukot na nga katuigan. (Roma 5:12) An paghibaro ha maraot nga resulta han desisyon ni Adan sadang magpagios ha aton nga gamiton ha husto nga paagi an aton kagawasan ngan gumios uyon ha mga limitasyon nga iginhatag ni Jehova.

9. Ano an iginhatag ni Jehova nga mapipilian han iya katawohan, ngan ano an ginpili han mga Israelita?

⁹ An mga tulin nira Adan ngan Eva nakapanunod han pagkadiri-hingpit ngan kamatayon tikang hinin diri masinugtanon nga mga kag-anak. Bisan pa hito, waray mawara an ira kagawasan ha pagbuot. Makikita ini ha paagi han pagtratar han Dios ha nasud han Israel. Pinaagi kan Moises, ginpapili hira ni Jehova kon kakarawaton o isasalikway ba nira an pribilehiyo nga magin Iya espesyal nga panag-iya. (Eks. 19:3-6) Ano an ira ginpili? Kinaburut-on nga ginpili nira nga sundon an mga ginkikinahanglan para magin katawohan nga nagpapasidungog ha ngaran han Dios ngan urosa nga nagsiring: “An ngatanan nga iginyakan ni Jehova amon bubuhaton.” (Eks. 19:8) Makasurubo nga ha urhi, sayop nga gin-gamit han mga Israelita an ira kagawasan ha pagpili ngan waray tumana an ira saad. Sadang gud kita mahibaro hin leksyon ha ira diri maopay nga ehemplo, ngan hinaot padayon naton nga apresyaron an regalo ha aton nga kagawasan ha pagbuot pinaagi ha pagpabilin nga duok kan Jehova ngan pagsunod ha iya matadong nga suruklan.—1 Cor. 10:11.

10. Ano nga mga ehemplo an nagpapamatuod nga posible para ha diri hingpit nga mga tawo nga gamiton an ira kagawasan ha pagbuot ha pagpasidungog ha Dios? (Kitaa an retrato ha tinikangan hini nga artikulo.)

¹⁰ Ha Hebreo kapitulo 11, mababasa naton an ngaran han 16 nga surugoon han Dios nga nagpili nga gamiton an ira kagawasan ha pagbuot uyon ha mga limitasyon nga iginhatag ni Jehova. Salit nagpahimulos hira hin hura nga bendisyon ngan may-ada hira sigurado nga paglaom ha tidaraon. Pananglitan, iginpakita ni Noe an iya daku nga pagtoo, ngan ginpili niya nga sundon an mga instruksyon han Dios ha pagtukod han arka basi matalwas an iya pamilya ngan an masunod nga henerasyon han katawohan. (Heb. 11:7) Kinaburut-on nga ginsunod nira Abraham ngan Sarah an paggiya ha ira han Dios tipakadto ha tuna nga iginsaad. Bisan kon hirayo na hira ha ira paglakaton, “may oportunidad unta hira nga bumalik” ha mainuswagon nga syudad han Ur. Pero an ira pagtoo nakabulig ha ira nga magpokus ha “katumanan han mga saad” han Dios;  ‘naghingyap hira hin mas maopay nga lugar.’ (Heb. 11:8, 13, 15, 16) Iginsalikway ni Moises an mga bahandi ha Ehipto ngan “mas ginpili niya nga maltratuhon hiya kaupod han katawohan han Dios imbes nga pahimulsan an temporaryo nga kalipayan han sala.” (Heb. 11:24-26) Hinaot subaron naton an pagtoo hini nga mga surugoon han Dios hadto pinaagi ha pag-apresyar han regalo ha aton nga kagawasan ha pagbuot, ngan gamiton ito nga regalo ha pagbuhat han kaburut-on han Dios.

11. (a) Ano an usa han pinakamaopay nga bendisyon nga aton napapahimulosan tungod han kagawasan ha pagbuot? (b) Kay ano nga karuyag mo gamiton ha husto nga paagi an imo kagawasan ha pagbuot?

¹¹ Bangin mas masayon kon may nagdidesisyon para ha aton. Pero kon ito an kahimtang, diri naton mapapahimulsan an usa han pinakamaopay nga bendisyon han kagawasan ha pagbuot. Iginpapakita ito ha Deuteronomio 30:19, 20. (Basaha.) Iginhuhulagway ha bersikulo 19 nga gintagan han Dios an mga Israelita hin mapipilian. Iginsusumat ha bersikulo 20, nga gintagan hira ni Jehova hin presyoso nga higayon nga ipakita ha iya kon ano gud an aada ha ira kasingkasing. Yana, mahimo liwat kita magdesisyon nga magsingba kan Jehova. Waray na gud mas maopay nga rason ha paggamit han aton kagawasan ha pagbuot kay ha paggamit hito basi ipakita an aton gugma, pagpasidungog, ngan pagdayaw ha iya!

12. Ano an diri naton sadang buhaton may kalabotan ha regalo ha aton nga kagawasan ha pagbuot?

¹² Handurawa nga gintagan mo an imo sangkay hin presyoso nga regalo. Ano daw la an imo aabaton kon hinbaroan mo nga iginlabog niya an imo regalo o, mas maraot pa gud, gin-gamit niya ito basi dauton an iba? Sigurado nga masusubo ka gud! Hunahunaa la kon ano an inaabat ni Jehova samtang iya nakikita an damu nga tawo nga ginagamit an ira kagawasan ha sayop nga paagi o ha pagdaot pa ngani ha iba. Oo, sugad han igintagna han Biblia, an mga tawo ha “kataposan nga mga adlaw” magigin “diri mapasalamaton.” (2 Tim. 3:1, 2) Hinaot diri naton gamiton ha sayop nga paagi o igbalewaray an presyoso nga regalo ha aton ni Jehova. Pero paonan-o naton malilikyan an sayop nga paggamit han aton kagawasan ha pagbuot?

13. Ano an usa nga paagi nga malilikyan naton an sayop nga paggamit han aton kagawasan?

¹³ Kita ngatanan may kagawasan ha pagpili hin kaupod, pamado ngan pag-ayos, ngan kaliawan. Pero an aton kagawasan mahimo magin “tahob ha pagbuhat hin sayop” kon pipilion naton nga magin uripon han aton makasasala nga mga hingyap o magsinunod ha mga uso ngan hilig han kalibotan. (Basaha an 1 Pedro 2:16.) Imbes nga gamiton an  aton kagawasan “sugad nga higayon ha pagbuhat han makasasala nga mga hingyap,” sadang naton gamiton ito ha paagi nga masusunod naton ini nga sagdon: “Buhata an ngatanan para ha kadayawan han Dios.”—Gal. 5:13; 1 Cor. 10:31.

14. Kon ginagamit naton an aton kagawasan ha pagbuot, kay ano nga kinahanglan kita sumarig kan Jehova?

¹⁴ Usa pa nga makakabulig basi magamit naton ha maopay nga paagi an regalo ha aton nga kagawasan ha pagbuot amo an pagsarig kan Jehova ngan pagpagiya ha iya uyon ha mga limitasyon nga iya iginhatag. Hiya la an nagtututdo ha aton basi kita magpahimulos ngan naggigiya ha aton ha husto nga dalan. (Isa. 48:17) Sadang naton kilalahon inin giniyahan nga mga pulong: “An paagi han tawo diri aada ha iya ngahaw, diri aada ha tawo nga naglalakat an pagmando han iya mga pitad.” (Jer. 10:23) Hinaot diri gud naton pilion nga sumarig ha aton kalugaringon nga pagsabot, sugad han ginbuhat ni Adan ngan han rebelyoso nga mga Israelita. Lugod, sadang kita ‘sumarig kan Jehova ha bug-os naton nga kasingkasing.’—Prob. 3:5.

15. Ano an aton mahibabaroan ha prinsipyo ha Galacia 6:5?

¹⁵ An usa pa nga limitasyon han aton kagawasan ha pagbuot amo an pagrespeto ha katungod han iba ha paghimo hin personal nga mga desisyon. Kay ano nga kinahanglan naton ito buhaton? Kita ngatanan may kagawasan ha pagbuot, salit may mga higayon nga diri magkakapariho an desisyon han duha nga Kristiano. Nahitatabo ini bisan ha mga butang may kalabotan ha aton panggawi ngan pagsingba. Tigamni an prinsipyo ha Galacia 6:5. (Basaha.) Kon ginkikilala naton nga an tagsa nga Kristiano kinahanglan ‘magdara han iya kalugaringon nga pinas-an,’ rirespetuhon naton an katungod han usa ha paggamit han regalo ha iya nga kagawasan ha pagbuot.

16, 17. (a) Kay ano nga nagin isyu ha Corinto an kagawasan ha pagbuot? (b) Paonan-o ginsulbad ni Pablo ini nga problema, ngan ano an igintututdo hini ha aton may kalabotan ha kagawasan han iba?

¹⁶ Tagda an usa nga ehemplo ha Biblia nga nagpapakita kon kay ano nga kinahanglan naton irespeto an kagawasan han kabugtoan nga maghimo hin personal nga mga desisyon uyon han ira konsensya. An mga Kristiano ha Corinto waray magkauruyon may kalabotan ha pagkaon hin karne nga bangin iginhalad ha mga dios-dios ngan katapos iginbaligya ha merkado. An pipira nangatadongan: ‘Waray man kinabuhi an mga dios-dios, salit puydi kaunon an karne.’ Pero para ha iba nga nagsisingba hadto ha mga dios-dios, an pagkaon hito nga karne katugbang na ha pagsingba. (1 Cor. 8:4, 7) Seryoso gud ini nga isyu kay mahimo ini magin hinungdan han pagkabahin-bahin han kongregasyon. Paonan-o ginbuligan ni Pablo an mga Kristiano ha Corinto nga magkaada han panhunahuna han Dios may kalabotan hini?

¹⁷ Siyahan, ginpahinumdoman ni Pablo an tagsa nga grupo nga an karaunon diri makakapahirani ha ira ha Dios. (1 Cor. 8:8) Katapos, ginpahamangnoan niya hira nga diri tugotan an ira “katungod ha pagpili” nga “magin hiparakdolan han magluya.” (1 Cor. 8:9) Ha urhi, ginsidngan niya adton may mas sensitibo nga konsensya nga diri hukman adton mga nakaon hito nga karne. (1 Cor. 10:25, 29, 30) Salit hinin importante nga butang may kalabotan ha pagsingba, an tagsa nga Kristiano kinahanglan maghimo hin desisyon uyon ha iya konsensya. Kon sugad, diri ba sadang liwat naton irespeto an katungod han kabugtoan ha paghimo hin personal nga mga desisyon ha mga butang nga diri sugad kaimportante?—1 Cor. 10:32, 33.

18. Paonan-o mo maipapakita nga gin-aapresyar mo an regalo ha imo nga kagawasan ha pagbuot?

¹⁸ An regalo ha aton ni Jehova nga kagawasan ha pagbuot naghahatag ha aton hin tinuod nga kagawasan. (2 Cor. 3:17) Gin-aapresyar naton ini nga regalo kay naghahatag ini ha aton hin higayon nga maghimo hin mga desisyon nga nagpapakita nga hinigugma gud naton hiya. Hinaot padayon naton nga apresyaron inin presyoso nga regalo pinaagi ha paggamit hini ha pagpasidungog ha Dios ngan pagrespeto ha paagi han paggamit han iba hini nga regalo.