1. Ano nga mga problema an aton inaatubang, pero kay ano nga nalilipay hi Jehova ha iya matinumanon nga mga surugoon? (Kitaa an retrato hini nga pahina.)

SUGAD han iyo naieksperyensyahan, an pagkinabuhi hini nga sistema may mga kakurian. Damu ha iyo, hinigugma namon nga kabugtoan, an naatubang hin grabe nga sakit. An iba bisan kon hira mismo edaran na, nag-aataman ha ira lagas nga mga kapamilya. An iba liwat nangangalimbasog pagtagana ha ira pamilya, diri han marahalon nga mga butang nga ira karuyag, kondi han ira la nangunguna nga mga panginahanglan. Ngan maaram liwat kami nga damu ha iyo an naatubang diri la han usa hito nga mga problema, kondi han pipira hito nga durungan nga nahitatabo! Nagkikinahanglan ini hin daku nga panahon ngan nakakapaluya ha emosyon—diri pa upod hini an daku nga gastos ha pinansyal. Bisan pa hito, bug-os kamo nga nasarig ha mga saad han Dios; natoo gud kamo han maopay nga tidaraon. Sigurado nga nalilipay gud ha iyo hi Jehova!

2. Ano nga pagparig-on an aton mahibabaroan ha Isaias 40:29, pero ano nga daku nga sayop an bangin mabuhat naton?

² Kondi inaabat mo ba usahay nga diri mo na maaakos an mga problema? Kon oo, diri ka nag-uusahan. Iginpapakita han Biblia nga may matinumanon nga mga surugoon han Dios han naglabay nga inabat nga diri na nira kaya an problema. (1 Hadi 19:4; Job 7:7) Pero imbes  nga mawad-an hin paglaom, sinarig hira kan Jehova para hin kusog. Waray hira mapakyas kay an aton Dios “nahatag hin gahum ngadto ha nanluluya.” (Isa. 40:29) Makasurubo, an pipira han katawohan han Dios yana naghuhunahuna nga an pinakamaopay nga paagi basi malamposan an mga problema amo an pagpahuway anay ha pag-alagad, siring pa, nga baga hin an espirituwal nga mga buruhaton nakakapabug-at imbes nga bendisyon. Salit naundang hira ha pagbasa han Pulong han Dios, pagtambong ha Kristiano nga mga katirok, ngan pakigbahin ha ministeryo—sugad han karuyag gud ni Satanas nga buhaton nira.

3. (a) Ano an mahimo naton buhaton basi diri maglampos hi Satanas ha iya tumong nga paluyahon kita? (b) Ano an aton hihisgotan hini nga artikulo?

³ Maaram gud an Yawa nga an aton bug-os nga pakigbahin ha espirituwal nga mga buruhaton magpaparig-on ha aton, ngan diri niya karuyag nga magin marig-on kita. Salit kon nanluluya ka ha pisikal ngan emosyonal, ayaw igbulag an imo kalugaringon kan Jehova. Pangalimbasog nga magin mas duok ha iya kay hiya ‘magpaparig-on ha imo, ngan magpapakusog ha imo.’ (1 Ped. 5:10; San. 4:8) Hihisgotan hini nga artikulo an duha nga kahimtang nga mahimo magpaluya ha aton ha pag-alagad ha Dios, ngan hibabaroan naton kon paonan-o an pag-aplikar ha mga prinsipyo ha Biblia makakabulig ha aton nga malamposan ito. Pero magpokus anay kita ha abilidad ni Jehova ha pagparig-on ha aton sugad han mababasa ha Isaias 40:26-31.

4. Ano an igintututdo ha aton han Isaias 40:26?

⁴ Basaha an Isaias 40:26. Waray bisan usa nga tawo nga makakaihap han ngatanan nga bitoon ha uniberso. Natoo an mga syentista nga ha aton pa la Milky Way nga galaksi posible nga may 400 ka bilyon nga bitoon. Pero gintatagan ni Jehova hin ngaran o hin katawagan an tagsa hito. Ano an igintututdo hini ha aton? Kon interesado hi Jehova ha waray kinabuhi nga mga linarang, handurawa la kon ano an iya inaabat ha imo nga nag-aalagad ha iya, diri tungod kay gindisenyo ka nga buhaton ito, kondi tungod kay hinigugma mo hiya! (Sal. 19:1, 3, 14) An aton mahigugmaon nga Amay maaram gud han ngatanan mahitungod ha imo. “Maaram hiya bisan han kadamu han [imo] buhok ha ulo.” (Mat. 10:30) An salmista nagpapasarig ha aton nga hi Jehova “nagmamangno . . . hadton mga nagsusugot ha iya.” (Sal. 37:18, Maupay nga Sumat) Oo, nakikita niya an tagsa nga pagsari nga imo inaatubang, ngan mahimo ka niya tagan hin kusog basi mailob an tagsa hito.

5. Kay ano nga makakasiguro kita nga may abilidad hi Jehova ha paghatag ha aton hin kusog?

⁵ Basaha an Isaias 40:28. Hi Jehova an Surok han dinamiko nga kusog. Pananglitan, tagda an daku gud nga enerhiya nga iya iginhahatag ha aton Adlaw. An parasurat mahitungod ha syensya nga hi David Bodanis nagsiring nga kada segundo an aton Adlaw nagpapagawas hin enerhiya nga pariho kakusog ha pagbuto hin binilyon nga bomba atomika. Usa pa nga parasaliksik an nagbanabana nga an enerhiya nga iginpapagawas han adlaw ha usa ka segundo makakasuporta ha panginahanglan han tawo ha sulod hin 200,000 ka tuig! Makakasiguro gud kita nga an Usa nga naghahatag hin enerhiya ha adlaw makakahatag ha aton hin kusog nga aton ginkikinahanglan basi malamposan an bisan ano nga problema!

6. Kay ano nga masayon pas-anon an yugo ni Jesus, ngan ano an sadang magin epekto hito ha aton?

⁶ Basaha an Isaias 40:29. An pag-alagad kan Jehova naghahatag hin daku nga kalipay. Hi Jesus nagsiring ha iya mga disipulo: “Pas-ana an akon yugo.” Ngan hiya nagdugang: “Makakapahuway an iyo mga kalag. Kay an akon yugo masayon pas-anon ngan an akon iginpapapas-an ha iyo magaan.” (Mat. 11:28-30) Tinuod gud ito! Usahay, bangin kapoy kita nga nabaya ha balay basi tumambong ha Kristiano nga katirok o makigbahin ha ministeryo. Pero ano an aton inaabat pag-uli  naton? Narepreskohan—ngan mas andam na nga atubangon an mga problema. Oo, masayon pas-anon an yugo ni Jesus!

7. Pag-unabi hin eksperyensya nga nagpapakita nga tinuod an ginsisiring han Mateo 11:28-30.

⁷ Usa nga sister nga aton tatawagon nga Kayla an nag-aantos hin sakit nga chronic fatigue syndrome, depresyon, ngan migraine. Tungod hito, usahay nakukurian hiya pagtambong ha Kristiano nga mga katirok. Pero makausa, nangalimbasog hiya pagtambong ha katirok, ngan katapos hito hiya nagsurat: “An tema han pahayag mahitungod ha panluya. Iginpresenta han mamumulong an impormasyon ha mapinairon ngan mahigugmaon nga paagi nga tungod hito nakatangis ako. Napahinumdoman ako nga kinahanglan ko gud tumambong ha mga katirok.” Nalipay gud hiya nga nangalimbasog hiya pagtambong!

8, 9. Ano an karuyag sidngon ni Pablo han hiya nagsurat: “Kon ako maluya, makusog lugod ako”?

⁸ Basaha an Isaias 40:30. Mationan-o man kita kaeksperto ha pagbuhat han mga butang, limitado la an aton mahihimo ha aton kalugaringon nga kusog. Usa ito nga kamatuoran nga sadang naton hinumdoman. Tagda hi apostol Pablo. Bisan kon may abilidad hiya, may mga limitasyon hiya nga nagpugong ha iya ha pagbuhat han ngatanan nga karuyag niya himoon. Han iginsumat niya ha Dios an iya inaabat, ginsidngan hiya: “An akon gahum nagigin perpekto kon ikaw maluya.” Nasabtan ni Pablo an punto. Hiya nagsiring: “Kon ako maluya, makusog lugod ako.” (2 Cor. 12:7-10) Ano an iya karuyag sidngon hito?

⁹ Nasantop ni Pablo nga gutiay gud la an iya mahihimo kon waray bulig tikang ha mas hitaas nga surok. An baraan nga espiritu han Dios mahimo maghatag kan Pablo hin kusog kon diin hiya maluya. Labot pa hito, an espiritu han Dios mahimo maghatag kan Pablo hin gahum basi mahimo an mga butang nga diri gud niya mahihimo ha iya kalugaringon nga pangalimbasog. Ha pariho nga paagi, kon may-ada kita han kusog nga tikang kan Jehova, magigin makusog gud kita!

10. Paonan-o ginbuligan ni Jehova hi David basi malamposan an mga pagsari nga iya gin-atubang?

¹⁰ Damu ka beses nga naeksperyensyahan han salmista nga hi David an gahum han baraan nga espiritu han Dios. Hiya nagkanta: “Upud ha imo paglalanaton ko an mga kasondalohan; ngan tungud ha akon Dios lalakbayon ko an kuta.” (Sal. 18:29) May pipira nga sugad kuta nga mga problema nga diri naton kaya ‘malakbay,’ o masaka ha aton kalugaringon nga kusog; kinahanglan naton an bulig ni Jehova.

11. Ihulagway an papel han baraan nga espiritu ha pagbulig ha aton nga malamposan an aton mga problema.

¹¹ Basaha an Isaias 40:31. An agila diri nadepende ha iya la kalugaringon nga kusog basi makalupad hin hirayo. An mapaso nga hangin an nagdadara ha agila tipaigbaw, nga tungod hito natitipigan niya an iya kusog. Salit kon naatubang ka hin makuri nga toka, hinumdumi an agila. Pakimalooy kan Jehova nga tagan ka hin kusog pinaagi han “parabulig, an baraan nga espiritu.” (Juan 14:26) Mapasalamaton kita nga kon ginkikinahanglan naton ito, makakaaro kita hito ha ngatanan nga panahon—24 ka oras kada adlaw. Ngan bangin inaabat naton nga mas kinahanglan naton an bulig han Dios kon may-ada kita diri pagsinabtanay ha usa nga bugto ha kongregasyon. Pero kay ano nga nabangon an sugad nga problema?

12, 13. (a) Kay ano nga nabangon an diri pagsinabtanay ha mga Kristiano? (b) Ano an igintututdo ha aton han asoy may kalabotan kan Jose mahitungod kan Jehova?

¹² Nabangon an diri pagsinabtanay tungod kay kita ngatanan diri perpekto. Salit may mga panahon nga maaaringit kita ha mga ginyayakan o ginbubuhat han aton mga igkasi-tumuroo—o hira an maaaringit ha aton. Mahimo ini magin daku nga pagsari. Pariho ha iba nga pagsari, gintutugotan ni Jehova nga pamatud-an naton an aton integridad pinaagi ha paghibaro ha pagbuhat nga nagkakaurosa kaupod han aton kabugtoan nga iya hinigugma bisan pa han ira mga kaluyahan.

¹³ An kamatuoran nga gintutugotan ni Jehova nga umatubang hin mga pagsari an iya mga  surugoon iginpapakita ha asoy mahitungod kan Jose. Han batan-on hi Jose, iginbaligya hiya ha pagkauripon han iya kabugtoan kay naawa hira ha iya, salit nahingadto hiya ha Ehipto. (Gen. 37:28) Nakita ni Jehova kon paonan-o gintratar an iya matadong nga sangkay nga hi Jose, ngan sigurado nga nasubo gud hiya. Bisan pa hito, waray hiya manginlabot. Ha urhi, han gin-akusaran hi Jose nga karuyag niya luguson an asawa ni Potipar ngan iginpapriso hiya, waray liwat manginlabot hi Jehova. Pero ginpabay-an na gud ba han Dios hi Jose? Waray. An Biblia nagsiring: ‘An ginbubuhat ni Jose, ginpapauswag ni Jehova.’—Gen. 39:21-23.

14. Ano nga espirituwal ngan pisikal nga mga kapulsanan an aton makakarawat kon ‘babayaan’ naton an kasina?

¹⁴ Tagda an usa pa nga ehemplo. Pipira la nga tawo an gintratar hin maraot pariho han ginhimo kan David. Pero waray tuguti hinin sangkay han Dios nga an kasina magpabilin ha iya kasingkasing. Lugod, hiya nagsurat: “Baya-i an kasina, ngan baya-i an kangalas; diri ka magmasamdong, iton tikadto la ha pagbuhat hin maraut.” (Sal. 37:8) An pinakaimportante nga rason nga kinahanglan naton ‘bayaan’ an kasina amo an pagsubad kan Jehova, nga ‘diri nagbubuhat ha aton sumala han aton mga sala.’ (Sal. 103:10) Pero may-ada liwat praktikal nga mga kapulsanan an ‘pagbaya’ han kasina. An kasina mahimo magin hinungdan han paghitaas han presyon han dugo ngan sakit ha baga. Mahimo liwat ito makaapekto ha atay ngan hagudila, ngan mahimo magresulta hin problema ha panunaw. Kon nasisina kita, diri kita nakakapanhunahuna hin maopay. Ngan usahay an duro nga kasina nagriresulta hin depresyon ha sulod hin maiha nga panahon. Ha luyo nga bahin, “an murayaw nga kasingkasing amo an kinabuhi han unud,” siring han Biblia. (Prob. 14:30) Salit ano an aton mahimo buhaton kon may bugto nga nakasakit ha aton, ngan paonan-o kita makikigmurayaw ha iya? Pinaagi ha pag-aplikar han maaramon nga mga sagdon han Biblia.

15, 16. Ano an sadang naton himoon kon may nakasakit ha aton?

¹⁵ Basaha an Efeso 4:26. Diri kita nahipapausa kon gintatratar kita hin maraot han mga tawo ha kalibotan. Pero kon an usa nga igkasi-tumuroo o kapamilya an nagyayakan o nagbubuhat hin nakakasakit ha aton, bangin masubo gud kita. Ano man kon diri naton kaya palabyon ito nga kahimtang? Tutugotan ba naton an kasina nga magpabilin ha aton ha sulod hin mga katuigan? O susundon naton an maaramon nga sagdon han Biblia nga sulbaron dayon an diri pagsinabtanay? Samtang ginpipinaiha naton an pagsulbad hito, magigin mas makuri para ha aton an pakigmurayaw ha aton bugto.

¹⁶ Ano man kon nasakitan ka han usa nga bugto ngan diri mo kaya igbalewaray an iya ginbuhat? Ano nga positibo nga pitad an puydi mo himoon basi makigmurayaw? Siyahan, pag-ampo kan Jehova hin kinasingkasing. Hangyoa hiya nga buligan  ka nga makiistorya ha bugto ha makaparig-on nga paagi. Hinumdumi nga usa hiya han mga sangkay ni Jehova. (Sal. 25:14) Hinigugma hiya han Dios. Buotan hi Jehova ha iya mga sangkay, ngan naglalaom hiya nga ito liwat an aton bubuhaton. (Prob. 15:23; Mat. 7:12; Col. 4:6) Sunod, hunahunaa kon ano an imo isisiring. Ayaw hunahunaa nga gintuyo han imo bugto nga masakitan ka; bangin nagsayop la hiya o waray mo hiya masabti. Karawata an posibilidad nga may-ada ka liwat nahimo nga nagin hinungdan han iyo diri pagsinabtanay. Mahimo ka magtikang ha imo pakiistorya pinaagi ha pagsiring, “Bangin sobra la ako kasensitibo, pero han nakiistorya ka ha akon kakulop, inabat ko nga . . . ” Kon waray matuman an imo ginlalaoman nga positibo nga resulta ha iyo pag-istorya, pamiling hin iba nga higayon ha pakigmurayaw. Samtang ginhuhulat mo ito nga higayon, ig-ampo an imo bugto; hangyoa hi Jehova nga bendisyonan hiya. Pag-ampo ha Dios nga buligan ka nga magpokus ha mag-opay nga kalidad han imo bugto. Anoman an magin resulta, makakasarig ka nga malilipay hi Jehova han imo sinsero nga pangalimbasog nga makigmurayaw ha imo bugto, nga sangkay han Dios.

17. Ano an mahimo gamiton ni Jehova ha pagbulig ha aton basi maibalik an aton maopay nga relasyon ha iya kon nakabuhat kita hin sala, ngan kay ano nga sadang naton karawaton ito nga tagana?

¹⁷ An pipira naabat nga diri hira takos mag-alagad kan Jehova kay nakabuhat hira hin seryoso nga sala. An kakonsensya mahimo magin pariho hin waray kalooy nga agaron. Hi Hadi David nga nag-antos tungod han kakonsensya nagsiring: “Han nagmimingaw ako, an akon mga tul-an nagkakadadaan, tungud han akon paghinaroy ha bug-os nga adlaw. Kay ha adlaw ngan ha gab-i an imo kamot namumug-at ha akon.” Maopay na la, gin-atubang ni David an iya problema sugad han ginbubuhat han usa nga hamtong nga tawo. “Igin papahayag ko an akon sala ngadto ha imo,” siring niya, “ngan ikaw nagpasaylo han akon mga sala.” (Sal. 32:3-5) Kon nakasala ka hin seryoso, hi Jehova andam ha pagbulig ha imo basi maibalik an imo maopay nga relasyon ha iya. Pero kinahanglan mo karawaton an bulig nga iya igintatagana pinaagi han kongregasyon. (Prob. 24:16; San. 5:13-15) Ayaw paglangan—nakadepende dida hito an imo waray kataposan nga tidaraon! Kondi ano man kon maiha ka na nga ginpasaylo han imo sala pero nakukonsensya ka pa gihapon tungod han imo nabuhat?

18. Paonan-o an ehemplo ni Pablo makakabulig hadton mga naabat nga diri hira takos mag-alagad kan Jehova?

¹⁸ Matin-aw nga usahay nasusubo hi apostol Pablo tungod han iya mga sala hadto. Hiya nagsiring: “Ako an pinakaubos ha mga apostol, ngan diri ako angay tawagon nga apostol, kay gintimaraot ko an kongregasyon han Dios.” Pero hiya nagdugang: “Kundi tungod han grasya han Dyos nahimo ako nga amo ako yana.” (1 Cor. 15:9, 10; Maupay nga Sumat) Ginkarawat ni Jehova hi Pablo bisan pa han iya mga sayop hadto, ngan karuyag ni Jehova nga magin kombinsido hito hi Pablo. Kon sinsero ka nga nagbasol han imo mga sala hadto ngan iginsumat ito ha mga tigurang depende han kabug-aton han sala, makakalaom ka han kalooy ni Jehova. Salit sarig ha ginsiring ni Jehova, ngan karawata an iya pagpasaylo!—Isa. 55:6, 7.

19. Ano an tinuig nga teksto para ha 2018, ngan kay ano nga angayan ito?

¹⁹ Samtang nagtitikahirani an kataposan hini nga sistema, makakalaom kita nga magtitikaduro an aton mga problema. Pero makakasarig ka nga an Usa nga ‘nahatag hin gahum ngan hin kusog ha nanluluya’ makakahatag ha imo han anoman nga imo ginkikinahanglan basi makapadayon. (Isa. 40:29; Sal. 55:22; 68:19) Durante han 2018, mapapahinumdoman kita hinin importante nga kamatuoran ha kada pagtatambong naton hin katirok ha Kingdom Hall. Ito nga mensahe mababasa ha nakadispley nga aton tinuig nga teksto: “Hira nga naghuhulat kan Jehova magbabag-o han ira kusug.”—Isa. 40:31.