1. Kay ano nga naiiba gud an aton panahon yana?

NAGKIKINABUHI kita ha panahon nga naiiba gud ha bug-os nga kasaysayan han tawo. Sugad han igintagna han Biblia, gintitirok ni Jehova an “daku nga grupo, . . . tikang ha ngatanan nga nasud, tribo, katawohan, ngan pinulongan.” Ini nga grupo nagkukompwesto han “usa nga nasud nga makusug” nga may-ada sobra walo ka milyon nga maglipayon nga katawohan nga ‘nagbubuhat hin sagrado nga pag-alagad ha Dios ha adlaw ngan gab-i.’ (Pah. 7:9, 15; Isa. 60:22) Yana gud la nagkaada sugad kadamu nga tawo nga nahigugma ha Dios ngan ha ira igkasi-tawo.

2. Ano nga sayop nga klase hin gugma an makikita ha mga tawo nga diri nag-aalagad ha Dios? (Kitaa an retrato hini nga pahina.)

² Pero an giniyahan nga Kasuratan nagtagna liwat nga ha aton panahon, an sayop nga klase hin gugma nga nagpapakita hin pagin makikalugaringon magigin komon ha mga tawo nga diri nag-aalagad ha Dios. Hi apostol Pablo nagsurat: “Ha kataposan nga mga adlaw . . . an mga tawo magigin mahigugmaon ha ira la kalugaringon, mahigugmaon ha kwarta, . . . mahigugmaon ha kalipayan imbes nga mahigugmaon ha Dios.”  (2 Tim. 3:1-4) Inin makikalugaringon nga klase hin gugma kabaliktaran gud han Kristiano nga gugma. An pagpokus ha makikalugaringon nga mga tumong diri naghahatag han kalipay nga ginlalaoman han mga tawo. Lugod, an sugad nga gugma nag-aaghat ha pagin makikalugaringon salit nagigin “makuri pakiangayan” an kalibotan.

3. Ano an aton uusisahon hini nga artikulo, ngan kay ano?

³ Maaram hi Pablo nga an pagin kalyap han makikalugaringon nga gugma mahimo makaimpluwensya ha mga Kristiano. Salit nagpahamangno hiya nga ‘maglikay’ ha mga tawo nga may-ada sayop nga klase hin gugma. (2 Tim. 3:5) Pero diri naton bug-os nga malilikyan an sugad nga mga tawo. Salit paonan-o naton malilikyan an kalibotanon nga panggawi nga kalyap yana ngan mapapalipay hi Jehova, an Dios han gugma? Kitaon naton an kaibahan han diosnon nga gugma ha gugma nga iginhuhulagway ha 2 Timoteo 3:2-4. An pagbuhat hini mabulig ha aton nga mausisa ngan mapauswag an gugma nga sadang naton ipakita, an klase hin gugma nga naghahatag han tinuod nga katagbaw ngan kalipay.

4. Kay ano nga diri sayop an pagkaada angayan nga gugma ha kalugaringon?

⁴ Hi Pablo gin-giyahan ha pagsurat: “An mga tawo magigin mahigugmaon ha ira la kalugaringon.” Sayop ba nga higugmaon naton an aton kalugaringon? Diri, normal ito, ngan ginkikinahanglan pa ngani an pagkaada angayan nga gugma ha kalugaringon. Ito an pagkadisenyo ni Jehova ha aton. Hi Jesus nagsiring: “Higugmaa an imo igkasi-tawo sugad ha imo kalugaringon.” (Mar. 12:31) Kon diri naton hinigugma an aton kalugaringon, imposible nga higugmaon naton an aton igkasi-tawo. Mababasa liwat naton ha Kasuratan: “Sadang higugmaon han mga bana an ira asawa pariho han ira paghigugma ha ira kalugaringon nga lawas. An nahigugma ha iya asawa nahigugma ha iya kalugaringon, kay waray tawo nga nasisina ha iya kalugaringon nga lawas, lugod ginpapakaon ngan ginpapaura niya ito.” (Efe. 5:28, 29) Salit importante an pagkaada angayan nga gugma ha kalugaringon.

5. Paonan-o mo ihuhulagway an mga tawo nga sobra nga nahigugma ha ira kalugaringon?

⁵ An gugma ha kalugaringon nga gin-uunabi ha 2 Timoteo 3:2 diri amo an normal o angayan nga gugma. Sayop ngan makikalugaringon ito nga gugma. An mga tawo nga sobra nga nahigugma ha ira kalugaringon naghuhunahuna han ira kalugaringon hin labaw kay ha angay nira hunahunaon. (Basaha an Roma 12:3.) An ira kalugaringon an pinakaimportante ha ira. Waray hira pagtagad ha iba. Kon maraot an nagigin resulta han ira ginbubuhat, ginbabasol nira an iba imbes nga karawaton an ira sayop. Inin makikalugaringon nga mga tawo diri tinuod nga malipayon.

6. Ano an mag-opay nga resulta kon hinigugma naton an Dios?

⁶ An mga eskolar ha Biblia naghuhunahuna nga gin-una ni apostol Pablo an gugma ha kalugaringon ha iya lista han magraot nga kalidad nga magigin kalyap ha kataposan nga mga adlaw tungod kay ito an nagigin hinungdan han iba pa nga magraot nga kalidad. Ha kabaliktaran, an mga tawo nga nahigugma ha Dios nagpapakita hin mag-opay nga kalidad. Iginpapakita han Biblia nga an gugma ha dios konektado ha kalipay, kamurayawan, hilawig nga pagpailob, pagkabuotan, pagkamaopay, pagtoo, pagkamalumo, ngan pagpugong ha kalugaringon. (Gal. 5:22, 23) An salmista nagsurat: “Malipayon an katawohan nga hi Jehova amo an ira Dios.” (Sal. 144:15) Hi Jehova malipayon nga Dios, salit malipayon liwat an iya katawohan. Dugang pa, diri pariho ha mga tawo nga mahigugmaon ha ira kalugaringon ngan interesado la ha pagkarawat, an mga surugoon ni Jehova nalilipay ha pagsakripisyo para ha kaopayan han iba.—Buh. 20:35.

7. Ano nga mga pakiana an mabulig ha aton ha pag-usisa han aton gugma ha Dios?

⁷ Paonan-o naton mahibabaroan kon mas hinigugma na naton an aton kalugaringon kay ha Dios? Hunahunaa an sagdon nga mababasa ha Filipos 2:3, 4: “Ayaw pagbuhat hin bisan ano tungod ha pagin makiawayon o tungod ha pagpaimportante ha kalugaringon, lugod mapainubsanon nga tagda nga mas labaw ha iyo an iba. Magin matinagaron kamo,  diri la para ha iyo kalugaringon nga kaopayan, kondi para liwat ha kaopayan han iba.” Mahimo naton pakianhan an aton kalugaringon: ‘Igin-aaplikar ko ba ha akon kinabuhi ito nga sagdon? Nangangalimbasog gud ba ako ha pagbuhat han kaburut-on han Dios? Nangangalimbasog ba ako pagbulig ha iba, ha kongregasyon man o ha ministeryo?’ Diri pirme masayon an paghatag han aton panahon ngan kusog para ha iba. Nagkikinahanglan ito hin pangalimbasog ngan pagsakripisyo. Pero may-ada pa ba iba nga mas makakapalipay ha aton kay ha paghibaro nga gin-uuyonan kita han Soberano ha uniberso?

8. An gugma ha Dios nagpapagios ha pipira nga buhaton an ano?

⁸ An gugma kan Jehova ngan an hingyap nga mag-alagad ha iya hin bug-os nagpapagios ha pipira nga bayaan an maopay nga karera nga puydi unta maghatag ha ira hin karikohan. Hi Ericka nga taga-Estados Unidos, usa nga doktor. Pero imbes nga magpokus hito nga iya dungganon nga propesyon, nagregular payunir hiya ngan nag-alagad ha pipira nga nasud kaupod an iya bana. Ha paghinumdom han naglabay, hiya nagsiring: “An amon damu nga eksperyensya ha pag-alagad ha teritoryo nga iba an linggwahe, pati na an pagkaada mga kasangkayan, naghatag gud ha amon hin makalilipay nga kinabuhi. Nagtatrabaho pa gihapon ako sugad nga doktor, pero an paggamit han kadak-an han akon panahon ngan kusog ha pagbulig ha iba nga matambal ha espirituwal ngan ha pagbulig ha mga buruhaton ha kongregasyon naghahatag ha akon hin kalipay ngan katagbaw.”

9. Kay ano nga an gugma ha kwarta diri naghahatag hin kalipay?

⁹ Hi Pablo nagsurat nga an mga tawo magigin “mahigugmaon ha kwarta.” Mga pipira ka tuig an naglabay, usa nga payunir ha Ireland an nakiistorya ha usa nga lalaki mahitungod ha Dios. Igin-gawas han lalaki an iya pitaka, nagkuha hin pipira nga kwarta nga papel, gin-alsa ito, ngan nagsiring, “Ini an akon dios!” Bisan kon diri damu an dayag nga magsusumat nga sugad hito an ira panhunahuna, kalyap ha kalibotan an mga tawo nga mahigugmaon ha kwarta ngan ha mga butang nga napapalit hito. Pero an Biblia nagpapahamangno: “Hiya nga nahigugma han salapi diri matatablaw han salapi; diri man hiya nga mahigugma han kahuraan matatablaw han tubo.” (Ekles. 5:10) An sugad nga mga tawo pirme maghihingyap hin mas damu nga kwarta, ngan an pangalimbasog ha pagpadamu hito maghahatag ha ira kalugaringon hin “damu nga kasakit.”—1 Tim. 6:9, 10.

10. Ano an iginsurat ni Agur may kalabotan ha karikohan ngan kapobrehan?

¹⁰ Syempre, kita ngatanan nagkikinahanglan hin kwarta. Naghahatag ito ha aton hin proteksyon. (Ekles. 7:12) Pero puydi ba magin tinuod nga malipayon an usa kon may-ada la hiya han iya nangunguna nga mga panginahanglan? Oo! (Basaha an Eklesiastes 5:12.) Hi Agur nga anak nga lalaki ni Jake nagsurat: “Ayaw ako hatagi han kakablasan o han bahandi; pakaona ako han karaonon nga kinahanglanon nakon.” Masasabtan naton kon kay ano nga nadiri hiya nga magin sobra kapobre. Sugad han iya sunod nga ginsiring, diri niya karuyag nga masulay nga mangawat tungod kay an pangawat magpapasipara ha Dios. Pero kay ano nga nag-ampo hiya nga diri magriko? Hiya nagsurat: “Kay bangin ako mabusug, ngan maglirong ha imo, ngan sumiring: Hin-o hi Jehova?” (Prob. 30:8, 9) Posible nga may nahuhunahuna ka nga mga tawo nga nasarig ha ira karikohan imbes nga ha Dios.

11. Ano an iginsagdon ni Jesus may kalabotan ha kwarta?

¹¹ Adton mga nahigugma ha kwarta diri makakapalipay ha Dios. Hi Jesus nagsiring: “Waray makakagserbi ha duha nga agaron kay masisina hiya ha usa ngan hihigugmaon an usa, o magpapabilin hiya ha usa ngan babayaan an usa. Diri niyo mahimo pagdunganon an pagpauripon ha Dios ngan ha Karikohan.” Pero antes niya ito igyakan, nagsiring anay hiya: “Ayaw na kamo pagtinirok hin bahandi ha tuna, kay kukutkuton la ito han mga insekto o tatauyon ngan kakawaton. Lugod, pagtirok kamo hin bahandi ha langit, kay didto diri ito kukutkuton han mga insekto, diri tatauyon ngan diri kakawaton.”—Mat. 6:19, 20, 24.

12. Paonan-o an simple nga pagkinabuhi mahimo makabulig nga magin mas masayon an pag-alagad ha Dios? Pag-unabi hin ehemplo.

 ¹² Napamatud-an han damu nga an simple nga pagkinabuhi diri la naghahatag ha ira hin kalipay kondi naghahatag liwat ha ira hin mas daku nga panahon ha pag-alagad kan Jehova. Hi Jack nga taga-Estados Unidos, nagbaligya han iya daku nga balay ngan negosyo kay maaram hiya nga kon bubuhaton niya ito, mahimo hiya makagpayunir kaupod an iya asawa. Hiya nagsaysay: “Makuri gud nga bayaan an amon maopay nga balay ngan panag-iya ha baryo. Pero ha sulod hin mga katuigan, nauli ako ha balay nga masurub-on tungod han mga problema ha trabaho. An akon asawa, nga usa nga regular payunir, malipayon gud pirme. Ginsisidngan niya ako, ‘Nagtatrabaho ako ha pinakamaopay nga agaron!’ Yana nga payunir na gihapon ako, pariho na kami nagtatrabaho ha uusa nga Persona, hi Jehova.”

13. Paonan-o naton mahibabaroan an aton panhunahuna ha kwarta?

¹³ Basi mahibaroan an aton panhunahuna ha kwarta, mahimo naton tangkod nga usisahon kon ano an aton baton hini nga mga pakiana: ‘Natoo gud ba ako ha ginsisiring han Biblia mahitungod ha kwarta ngan nagkikinabuhi uyon hito? An pamiling ba hin kwarta an pinakaimportante ha akon kinabuhi? Mas importante ba ha akon an materyal nga mga butang kay han akon relasyon kan Jehova ngan ha mga tawo? Nasarig gud ba ako nga magtatagana hi Jehova han akon mga panginahanglan?’ Makakasiguro kita nga diri gud niya papakyason adton mga nasarig ha iya.—Mat. 6:33.

14. Ano an timbang nga panhunahuna ha kalipayan?

¹⁴ Sugad han igintagna, damu nga tawo yana an “mahigugmaon ha kalipayan.” Sugad la nga diri sayop an pagkaada angayan ngan makatadunganon nga panhunahuna ha kalugaringon ngan ha kwarta, diri liwat sayop an pagkaada timbang nga panhunahuna ha kalipayan. Hi Jehova diri naruruyag nga pakurian naton an aton kalugaringon o nga maglikay kita ha mag-opay nga buruhaton nga naghahatag hin kalipay. An Biblia nag-aaghat ha matinumanon nga mga surugoon han Dios: “Lakat ha imo dalan, kaon han imo tinapay nga malipayon, ngan inum han imo alaksio ha malipayon nga kasingkasing.”—Ekles. 9:7.

15. Ano nga klase hin kalipayan an gintutudlok han 2 Timoteo 3:4?

¹⁵ An 2 Timoteo 3:4 nagtutudlok ha pagpamiling ha kalipayan nga diri na naghuhunahuna ha Dios.  Tigamni nga an teksto waray magsiring nga an mga tawo magigin mahigugmaon ha kalipayan labaw ha pagin mahigugmaon ha Dios, nga baga hin nagpapakita nga may-ada pa hira gutiay nga gugma ha Dios. Lugod, nagsiring ito “imbes nga mahigugmaon ha Dios.” Usa nga eskolar an nagsurat: “Ini [nga teksto] diri nagpapasabot nga may-ada liwat hira gutiay nga gugma ha Dios. Nagpapasabot ito nga waray gud hira gugma ha Dios.” Seryoso gud ini nga pahamangno para hadton nagtitipig hin diri angayan nga gugma ha kalipayan! An mga pulong nga “mahigugmaon ha kalipayan” angayan nga naghuhulagway hadton mga ‘nahisimang han kaliawan ha kinabuhi.’—Luc. 8:14.

16, 17. Ano nga susbaranan an iginpakita ni Jesus may kalabotan ha kalipayan?

¹⁶ Iginpakita ni Jesus an perpekto ngan timbang nga panhunahuna ha kalipayan. Tinambong hiya hin “panagtawo ha kasal” ngan “daku nga panagtawo.” (Juan 2:1-10; Luc. 5:29) Durante han kasal, milagroso nga ginhimo niya nga bino an tubig tungod kay nagkulang an bino. Ngan ha usa pa nga kahimtang, iya iginsalikway an nagpapakamatadong ha kalugaringon nga panhunahuna hadton sayop nga naghukom ha iya tungod han iya pagkaon ngan pag-inom.—Luc. 7:33-36.

¹⁷ Bisan pa hito, an kinabuhi ni Jesus diri nakapokus ha kalipayan. Iya gin-una hi Jehova ngan ginbuhat an ngatanan niya nga mahihimo ha pagbulig ha iba. Kinaburut-on nga gin-ilob niya an masakit nga kamatayon ha kahoy basi matalwas an damu nga tawo. Ginsidngan ni Jesus adton karuyag nga magin iya mga sumurunod: “Malipayon kamo kon an mga tawo nag-iinsulto ha iyo, nagtitimaraot ha iyo, ngan nagyayakan han ngatanan nga buwa nga pakaraot ha iyo tungod ha akon. Magkalipay kamo ngan magrayhak, kay daku an iyo balos ha langit. Kay an mga propeta hadto gintimaraot liwat nira ha sugad nga paagi.”—Mat. 5:11, 12.

18. Ano nga mga pakiana an mabulig ha aton nga mahibaroan an kadaku han aton gugma ha kalipayan?

¹⁸ Paonan-o naton mahibabaroan an kadaku han aton gugma ha kalipayan? Maopay nga pakianhan naton an aton kalugaringon: ‘Gin-uuna ko ba an mga kaliawan kay ha mga katirok ngan ha pagsangyaw? Andam ba ako nga isakripisyo an pipira nga butang nga akon nalilipayan basi makag-alagad ha Dios? Kon nagpipili ako hin mga kaliawan, gintatagad ko ba kon ano an panhunahuna ni Jehova ha akon mga ginpipili?’ Kon tinuod nga hinigugma naton an Dios, lilikyan gud naton diri la an mga butang nga maaram kita nga makakapasubo ha iya kondi pati an mga butang nga ginhuhunahuna naton nga bangin makapasubo ha iya.—Basaha an Mateo 22:37, 38.

19. Hin-o an diri gud magigin tinuod nga malipayon?

¹⁹ Katapos hin mga 6,000 ka tuig nga pag-antos han katawohan, an kalibotan ni Satanas hirani na matapos. An kalibotan yana puno hin mga tawo nga sobra nga nahigugma ha ira kalugaringon, ha kwarta, ngan ha kalipayan. Hira an mga tawo nga interesado la ha ira makukuha—mga tawo nga nakapokus ha pagpatagbaw han ira kalugaringon nga mga hingyap. Ini nga mga tawo diri gud magigin tinuod nga malipayon. Ha kabaliktaran, an salmista nagsurat: “Malipayon adton mayada magbarantay nga amo an Dios ni Jakob, nga an iya paglaum aada kan Jehova nga iya Dios.”—Sal. 146:5.

20. Paonan-o an gugma ha Dios naghahatag ha imo hin kalipay?

²⁰ An gugma kan Jehova han iya katawohan mas naghihilarom gud, ngan nagtitikadamu kita kada tuig. Pamatuod ini nga nagmamando na an Ginhadian han Dios; ngan diri na mag-iiha, papahinaboon hito an mga bendisyon nga diri gud naton mahuhunahuna! An tinuod ngan nagpapadayon nga kalipay nagtitikang ha pagbuhat han kaburut-on han Dios ngan ha paghibaro nga napapalipay naton an Gihitaasi nga Persona. Ngan adton mga nahigugma kan Jehova magigin malipayon ha kadayonan! Ha masunod nga artikulo, aton hihisgotan an pipira nga kalidad nga resulta han makikalugaringon nga gugma ngan mahibabaroan naton kon paonan-o ini nga mga kalidad iba gud ha mga kalidad han mga surugoon ni Jehova.