1, 2. Paonan-o iginpapakita ni Jehova an iya pagin mahinatagon ha paagi han iya paggamit han natural nga mga bahandi han tuna?

HI Jehova mahinatagon nga Dios. An ngatanan nga aton gintatag-iya tikang ha iya. Hi Jehova an nagtatag-iya han ngatanan nga bulawan ngan silber upod na an ngatanan nga iba pa nga natural nga bahandi han tuna, ngan ginagamit niya ito ha pagsustinir han kinabuhi. (Sal. 104:13-15; Hag. 2:8) Mababasa ha Biblia an damu nga asoy kon paonan-o milagroso nga gin-gamit ni Jehova inin presyoso nga mga butang basi taganahan an iya katawohan.

² Ha sulod hin 40 ka tuig, nagtagana hi Jehova hin mana ngan tubig para ha nasud han Israel samtang nakadto hira ha kamingawan. (Eks. 16:35) Sugad nga resulta, “waray nakulang ha ira.” (Neh. 9:20, 21) Pinaagi kan propeta Eliseo, milagroso nga ginpadamu ni Jehova an gutiay nga lana para ha matinumanon nga balo nga babaye. Inin regalo han Dios nakabulig ha balo nga mabayaran an iya mga utang ngan magkaada igo nga kwarta nga makakasuporta ha iya ngan ha iya anak. (2 Hadi 4:1-7) Ha bulig ni Jehova, milagroso nga nagtagana hi Jesus hin pagkaon ngan hin kwarta pa ngani han ginkinahanglan ito.—Mat. 15:35-38; 17:27.

3. Ano an aton hihisgotan hini nga artikulo?

 ³ Mahimo gamiton ni Jehova an damu hinduro nga natural nga bahandi ha pagsustinir han iya mga linarang ha tuna. Bisan pa hito, gin-aaghat niya an iya mga surugoon nga gamiton an ira materyal nga mga butang ha pagsuporta ha mga buruhaton han iya organisasyon. (Eks. 36:3-7; basaha an Proberbios 3:9.) Kay ano nga naglalaom hi Jehova nga maghahatag kita ha iya gamit an birilhon nga mga butang nga iya iginhatag ha aton? Ha kadaan nga panahon, paonan-o ginsuportaran ha pinansyal han matinumanon nga katawohan an mga buruhaton han mga representante ni Jehova? Paonan-o ginagamit han organisasyon an kwarta nga igindudonar yana? Hihisgotan ito hini nga artikulo.

4. Ano an aton iginpapakita kan Jehova kon ginsusuportaran naton an iya buruhaton?

⁴ Naghahatag kita kan Jehova kay hinigugma naton hiya ngan mapasalamaton kita ha iya. Kon ginpapamalandong naton an mga ginhimo ni Jehova para ha aton, nababantad gud an aton kasingkasing. Han iginpahibaro ni Hadi David an mga panginahanglan para ha tiarabot nga proyekto ha pagtukod han templo, nagsiring hiya nga an ngatanan nga aton nakakarawat tikang kan Jehova ngan anoman nga butang nga aton iginhahatag kan Jehova nagtikang mismo ha mga butang nga iya iginhatag ha aton.—Basaha an 1 Kronikas 29:11-14.

5. Paonan-o iginpapakita han Kasuratan nga an kinaburut-on nga paghatag importante nga bahin han tinuod nga pagsingba?

⁵ An paghatag usa liwat nga kapahayagan han aton pagsingba kan Jehova. Pinaagi hin bisyon, nabatian ni apostol Juan an mga surugoon ni Jehova ha langit nga nasiring: “Jehova nga amon Dios, takos ka ha pagkarawat han himaya, dungog, ngan gahum, kay ikaw an naghimo han ngatanan nga butang, ngan tungod han imo kaburut-on ineksister hira ngan ginpanhimo.” (Pah. 4:11) Diri ka ba mauyon nga takos gud hi Jehova han ngatanan nga himaya ngan dungog nga aton maihahatag ha iya pinaagi ha paghalad ha iya han aton pinakamaopay? Pinaagi kan Moises, ginsugo ni Jehova an nasud han Israel nga umatubang ha Iya ha tulo nga tinuig nga piyesta. Sugad nga bahin han ira pagsingba durante hito nga mga piyesta, an mga Israelita diri sadang ‘umatubang kan Jehova nga waray dara.’ (Deut. 16:16) Ha pariho nga paagi, an kinaburut-on nga paghatag yana sugad nga pagpakita hin apresasyon ngan suporta ha buruhaton han tunan-on nga bahin han organisasyon ni Jehova importante nga bahin han aton pagsingba.

6. Kay ano nga an pagin mahinatagon makakaopay ha aton? (Kitaa an retrato ha tinikangan hini nga artikulo.)

⁶ Makakaopay ha aton an pagin mahinatagon, diri la kay magkinarawat. An Biblia nasiring: “Pauraha in suruguon tikang ha pagkabata, ngan ha kaurhian magigin usa hiya nga bungalos.” (Dar. [Prob.] 29:21, Baraan nga Biblia) Bangin mahunahuna naton an usa nga bata nga naghahatag hin regalo ha iya mga kag-anak tikang ha gutiay nga kantidad hin kwarta nga ira iginhahatag ha iya. Malilipay gud hito nga regalo an mga kag-anak! An usa nga batan-on nga payunir nga nalungon ha iya mga kag-anak bangin makatadunganon nga maghatag hin kwarta ha iya mga kag-anak basi makabulig ha kagarastohan ha ira balay. Bisan kon bangin diri naglalaom hito an mga kag-anak, bangin karawaton nira ito kay usa ito nga paagi han anak ha pagpakita han iya apresasyon han ngatanan nga ira ginbubuhat para ha iya. Sugad man, maaram hi Jehova nga an paghatag tikang ha aton birilhon nga mga butang makakaopay ha aton.

7, 8. Paonan-o an katawohan ni Jehova ha panahon han Biblia nagpakita hin susbaranan ha paghatag (a) para ha espisipiko nga mga proyekto? (b) para ha pagsuporta ha pankabug-osan nga buruhaton?

⁷ Damu an aton mababasa ha Kasuratan mahitungod ha katawohan ni Jehova nga naghatag tikang ha ira mga panag-iya. Ha pipira nga kahimtang, naghatag hira para ha espisipiko nga mga proyekto. Pananglitan, gin-aghat ni Moises an mga Israelita nga magdonar para ha pagtukod han tabernakulo, ngan ito liwat an ginbuhat ni Hadi David para  ha pagtukod han templo. (Eks. 35:5; 1 Kron. 29:5-9) Ha panahon ni Hadi Jehoas, gin-gamit han mga saserdote an nakolekta nga kwarta ha pag-ayad han balay ni Jehova. (2 Hadi 12:4, 5) Han iginpahibaro ha Kristiano nga mga kongregasyon han siyahan nga siglo an panginahanglan tungod han gutom, an kabugtoan “nagdesisyon nga magpadara hin ayuda ha kabugtoan ha Judea uyon han maaakos han tagsa ha ira.”—Buh. 11:27-30.

⁸ Ha iba nga mga kahimtang, an katawohan ni Jehova naghatag hin pinansyal nga bulig ha mga nangunguna ha buruhaton. Ha Mosaiko nga Balaud, an mga Lebita waray panurundon, diri pariho han iba nga tribo. Lugod, gintatagan han mga Israelita an mga Lebita han ‘ikanapulo’ basi makapadayon hira ha ira mga buruhaton ha tabernakulo. (Num. 18:21) Ha urhi, nagpahimulos liwat hi Jesus ngan an iya mga apostol ha pagin mahinatagon han kababayin-an nga “naggamit han ira panag-iya ha pag-asikaso” ha ira.—Luc. 8:1-3.

9. Diin nagtitikang an mga donasyon hadto?

⁹ Syempre, iba-iba an gintitikangan han mga donasyon. Han nagdonar an mga Israelita para ha pagtukod han tabernakulo ha kamingawan, posible nga an ira iginhatag amo an mga butang nga ira dara tikang ha Ehipto. (Eks. 3:21, 22; 35:22-24) Han siyahan nga siglo, iginbaligya han pipira nga Kristiano an ira mga panag-iya, sugad han tuna o balay, ngan gindara an kwarta ha mga apostol. Iginhatag han mga apostol ini nga pundo ha mga nanginginahanglan. (Buh. 4:34, 35) An iba naglalain hin kwarta ngan regular nga nagdudonar para suportaran an buruhaton. (1 Cor. 16:2) Salit, an mga tawo nga iba-iba an kahimtang ha kinabuhi—tikang ha pinakariko ngadto ha pinakapobre—nakigbahin ha paghatag.—Luc. 21:1-4.

10, 11. (a) Paonan-o naton mahimo masubad an mahinatagon nga mga surugoon ni Jehova ha panahon han Biblia? (b) Ano an imo pagtagad ha imo pribilehiyo ha pagsuporta ha buruhaton han Ginhadian?

¹⁰ Yana, bangin hangyoon liwat kita nga maghatag hin donasyon para ha espisipiko nga katuyoan. Pananglitan, may-ada ba plano ha pagtukod hin bag-o nga Kingdom Hall para ha iyo kongregasyon? O gin-aayad ba an iyo Kingdom Hall? Bangin igpahibaro ha aton an panginahanglan ha pinansyal may kalabotan ha pag-ayad ha aton sanga nga opisina, kagarastohan ha kombensyon nga aton gintatambongan, o pagbulig ha kabugtoan nga naapektohan hin kalamidad. Nagdudonar liwat kita basi suportaran adton nagbuboluntaryo ha headquarters ngan ha mga sanga nga opisina ha bug-os nga kalibotan. An aton mga donasyon ginagamit ha pagsuporta ha mga misyonero, espesyal payunir, ngan hadton nag-aalagad ha sirkito nga buruhaton. An iyo kongregasyon sigurado nga may resolusyon liwat ha paghatag hin pinansyal nga bulig para ha bug-os-kalibotan nga programa han pagpanukod hin mga Assembly Hall ngan Kingdom Hall, nga napapahimulosan han aton kabugtoan ha bug-os nga tuna.

¹¹ Kita ngatanan mahimo makigbahin ha pagsuporta ha buruhaton nga ginhihimo ni Jehova hinin kataposan nga mga adlaw. Kadam-an han nagdudonar diri nagpapakilala. Diri naton iginpapahibaro kon naghuhulog kita hin kwarta ha kahon para ha donasyon ha Kingdom Hall, o kon nagdudonar kita online pinaagi ha jw.org/war. Bangin hunahunaon naton nga diri importante an aton gutiay nga donasyon. Ha pagkamatuod, kadam-an han mga donasyon nga nakakarawat han organisasyon nagtitikang ha damu nga gudtiay nga donasyon imbes nga ha pipira nga dagku nga donasyon. An aton kabugtoan, bisan adton mga pobre, nagsusubad ha mga taga-Macedonia nga bisan pa han ira “kapobrehan,” naghangyo nga magkaada hira pribilehiyo ha paghatag ngan ginbuhat ito hin kinasingkasing.—2 Cor. 8:1-4.

12. Paonan-o an organisasyon nangangalimbasog ha paggamit han mga donasyon ha pinakamaopay nga paagi?

¹² An Nagmamando nga Lawas mainampoon nga nangangalimbasog nga magin matinumanon ngan maaramon may kalabotan ha paggamit han pundo han organisasyon. (Mat. 24:45) An mga donasyon  nga nakakarawat ginbabadyet ngan gin-gagasto uyon ha panginahanglan. (Luc. 14:28) Ha panahon han Biblia, ginsusunod han mga tawo nga gintaporan han pundo an mga instruksyon basi masiguro nga an mga donasyon gagamiton la uyon ha katuyoan hito. Pananglitan, hi Esra binalik ha Jerusalem dara an mga donasyon han hadi han Persia—mga bulawan, silber, ngan iba pa nga butang nga nagkakantidad hin sobra $100 ka milyon (U.S.) basado ha balor hito yana. Gintagad ini ni Esra sugad nga kinaburut-on nga halad para kan Jehova ngan naghatag hiya hin detalyado nga mga instruksyon basi mapanalipdan ini nga mga donasyon durante han makuri nga pagbiyahe ha peligroso nga teritoryo. (Esra 8:24-34) Hi apostol Pablo nangolekta hin pundo sugad nga ayuda para ha kabugtoan ha Judea. Naghatag hiya hin mga instruksyon basi masiguro nga an mga nagdadara han pundo “tangkod nga nag-aasikaso hini ngatanan, diri la ha pagkita ni Jehova, kondi ha pagkita liwat han mga tawo.” (Basaha an 2 Corinto 8:18-21.) Sugad nga pagsubad ha ehemplo nira Esra ngan Pablo, an aton organisasyon yana may ginsusunod nga espisipiko nga mga instruksyon may kalabotan ha pagtipig ngan paggastos han mga donasyon.

13. Ano an sadang naton magin pagtagad hinin bag-o la nga mga pagpasimple nga ginhihimo han organisasyon?

¹³ An usa nga pamilya bangin maghimo hin mga pagbag-o basi magin timbang ha paggamit han ira kwarta nga diri hira gumasto hin labaw han ira kità o basi pasimplihon an ira kinabuhi ngan maibanan an ira gastos para mas damu pa an ira mahimo ha pag-alagad kan Jehova. Ito liwat an ginhihimo han organisasyon ni Jehova. Hinin bag-o la, damu nga bag-o nga proyekto an ginhihimo han organisasyon. Tungod hini, usahay mas daku an gastos kay han nakakarawat nga mga donasyon ha sulod hin pipira ka panahon. Salit an organisasyon naghihimo hin mga paagi nga maibanan an gastos ngan mapasimple an buruhaton basi magamit gud hin maopay an iyo kinasingkasing nga mga donasyon.

14-16. (a) Ha ano ginagamit an imo mga donasyon? (b) Paonan-o ka personal nga nagpapahimulos hini nga mga tagana?

¹⁴ Damu han mag-iha na nga alagad ni Jehova an nasiring nga yana la nira nakita an sugad kadamu nga espirituwal nga tagana. Hunahunaa la! Hinin naglabay la nga mga tuig, nakita naton an pagtikang han jw.org ngan JW Broadcasting. An New World Translation of the Holy Scriptures naipupublikar na ha mas damu pa nga linggwahe. Han 2014/2015, an tulo ka adlaw nga “Padayon nga Unaha an Pagpamiling han Ginhadian han Dios!” nga Internasyonal nga Kombensyon gindumara ha pipira han pinakadagku nga estadyum ha 14 nga syudad ha bug-os nga kalibotan. Nalipay gud an mga tinambong hito.

¹⁵ Damu an nagpahayag hin apresasyon tungod  han mapulsanon gud nga mga tagana nga ira nakakarawat tikang ha organisasyon ni Jehova. Pananglitan, may kalabotan han tagana nga JW Broadcasting, usa nga mag-asawa nga nag-aalagad ha usa nga nasud ha Asia an nagsurat: “Nag-aalagad kami ha usa nga gutiay nga syudad. Tungod hito, usahay inaabat namon nga hirayo kami hinduro, ngan masayon la namon hingalimtan an kahaluag han buruhaton ni Jehova. Pero kon nagkikita kami han iba-iba nga programa ha JW Broadcasting, napapahinumdoman kami nga bahin kami han internasyonal nga pagminagburugto. An aton lokal nga kabugtoan eksayted gud ha pagkita han JW Broadcasting. Agsob namon hira mabatian nga nasiring nga katapos nira makita an binulan nga mga programa, inaabat nira nga nagigin duok hira ha mga membro han Nagmamando nga Lawas. Yana, mas proud na hira nga bahin hira han organisasyon han Dios.”

¹⁶ Ha bug-os nga kalibotan, haros 2,500 nga Kingdom Hall an gintutukod o gin-aayad yana. Han gin-gamit na han kabugtoan ha usa nga kongregasyon ha Honduras an ira bag-o nga Kingdom Hall, hira nagsurat: “Nalilipay gud kami nga nagin bahin kami han bug-os-uniberso nga pamilya ni Jehova ngan nagpapahimulos han makaruruyag nga bug-os-kalibotan nga pagminagburugto; nakabulig ini nga matuman an amon hingyap nga magkaada Kingdom Hall ha amon lugar.” Ito liwat an inabat han damu nga iba pa han nakarawat nira an Biblia ngan an iba pa nga publikasyon nga iginhubad ha ira kalugaringon nga linggwahe, han nakakarawat hira hin ayuda katapos hin kalamidad, o han nakita nira an mag-opay nga resulta han metropolitan witnessing ngan pagsangyaw ha publiko ha ira komunidad.

17. Kay ano nga masisiring naton nga an aton organisasyon yana ginbubuligan ni Jehova?

¹⁷ Diri nasasabtan han mga nag-oobserbar kon paonan-o naton nahihimo ini ngatanan nga buruhaton gamit la an boluntaryo nga mga donasyon. Katapos mag-tour ha usa han aton mga imprintahan an manidyer han usa nga daku nga kompanya, diri hiya makatoo nga an ngatanan nga buruhaton ginhihimo han mga boluntaryo, ginsusuportaran hin donasyon, ngan nagpapadayon bisan kon waray kità o pangulekta hin pundo. Nagsiring hiya nga imposible gud an aton ginhihimo. Nauyon kita hito! Maaram kita nga nagigin posible la ini tungod han bulig ni Jehova.—Job 42:2.

18. (a) Ano nga mga bendisyon an aton nakakarawat kon naghahatag kita sugad nga pagsuporta ha Ginhadian? (b) Paonan-o naton mahimo matutdoan an aton mga anak ngan an mga bag-ohan nga makigbahin ha paghatag?

¹⁸ Ginpapasidunggan kita ni Jehova pinaagi ha paghatag ha aton hin higayon nga makigbahin ha daku nga buruhaton nga ginhihimo yana. Nagpapasarig hiya nga bibendisyonan kita niya kon naghahatag kita sugad nga pagsuporta ha Ginhadian. (Mal. 3:10) Nagsasaad hi Jehova nga maghihingaopay an usa kon magigin mahinatagon hiya. (Basaha an Proberbios 11:24, 25.) An paghatag nakakapalipay liwat ha aton, kay “mas makalilipay an paghatag kay ha pagkarawat.” (Buh. 20:35) Pinaagi han aton pulong ngan buhat, pribilehiyo naton nga matutdoan an aton mga anak ngan an mga bag-ohan kon paonan-o hira makikigbahin ha paghatag, nga tungod hito makakarawat nira an hura nga bendisyon.

19. Paonan-o ini nga artikulo nakadasig ha imo?

¹⁹ An ngatanan nga aton gintatag-iya tikang kan Jehova. An aton paghatag ha iya gamit an mga butang nga iya iginhatag ha aton nagpapakita nga hinigugma naton hiya ngan mapasalamaton kita han ngatanan nga iya ginbubuhat para ha aton. (1 Kron. 29:17) Han nagdonar an katawohan han Dios para ha pagtukod han templo, hira “nagrayhak . . . tungod hini nga mga upa nga tinikang ha mag-upay nga mga kaburut-on ngan kinasingkasing gud nga ipinan-amot para han Ginoo.” (1 Cron. 29:9, Baraan nga Biblia) Hinaot padayon liwat kita nga magin malipayon ha paghatag kan Jehova gamit an mga butang nga iya iginhatag ha aton.