1, 2. Ano nga pagsari an inaatubang han katawohan han Dios yana? (Kitaa an retrato hini nga pahina.)

DAMU nga doktor ngan nars an may mga pasyente nga may nakakatapon nga sakit. Gin-aataman nira an ira mga pasyente kay karuyag nira nga buligan hira. Pero, kinahanglan liwat nira panalipdan an ira kalugaringon basi diri hira matapnan han sakit nga ira ginpapangalimbasogan nga matambal. Ha pariho nga paagi, damu ha aton an may mga nakakaupod ngan nakakatrabaho nga an panggawi ngan kinaiya iba gud ha diosnon nga kalidad. Mahimo ini magin pagsari ha aton.

² Hinin kataposan nga mga adlaw, ginbabalewaray han mga tawo an suruklan ha moral. Iginhuhulagway ha ikaduha nga surat ni apostol Pablo kan Timoteo an panggawi han mga tawo nga bulag ha Dios, panggawi nga magigin mas kalyap samtang nagtitikahirani an kataposan hini nga sistema. (Basaha an 2 Timoteo 3:1-5, 13.) Bisan kon bangin nasusubo kita tungod han pagin kalyap hito nga mga kalidad, mahimo kita maimpluwensyahan han panggawi ngan kinaiya han mga tawo nga may-ada hito. (Prob. 13:20) Hini nga artikulo, hihisgotan naton kon paonan-o an mga kalidad nga makikita ha mga tawo ha kataposan nga mga adlaw kabaliktaran gud ha mga kalidad han katawohan han Dios. Hibabaroan liwat naton kon paonan-o mapapanalipdan an aton kalugaringon basi diri  matapnan hinin magraot nga kalidad samtang ginbubuligan naton an mga tawo ha espirituwal.

3. Kan kanay naaplikar an mga kalidad nga iginlista ha 2 Timoteo 3:2-5?

³ Hi apostol Pablo nagsurat nga ha “kataposan nga mga adlaw maabot an peligroso gud nga mga panahon nga makuri pakiangayan.” Katapos, iginlista niya an 19 nga maraot nga kinaiya, o kalidad, nga makikita ha mga tawo durante hini nga panahon. Ito nga lista pariho ha mababasa ha Roma 1:29-31, pero an lista ni Pablo ha iya surat kan Timoteo nag-uupod hin mga pulong nga diri naton mababasa ha iba nga bahin han Kristiano Griego nga Kasuratan. Gintikangan ni Pablo an iya lista han magraot nga kalidad pinaagi han mga pulong nga “kay an mga tawo magigin . . .” Pero diri ngatanan nga tawo magkakaada hini nga mga kalidad. Iba gud an mga kalidad han mga Kristiano.—Basaha an Malakias 3:18.

4. Paonan-o mo ihuhulagway adton mga mapahitas-on?

⁴ Katapos ni Pablo magsiring nga damu an magigin mahigugmaon ha ira kalugaringon ngan ha kwarta, hiya nagsurat nga an mga tawo magigin hambog, daku an buot, ngan mapahitas-on, mga kalidad nga agsob nga nagpapakita hin pag-abat nga mas labaw an usa tungod han iya abilidad, hitsura, karikohan, o posisyon. An mga tawo nga may-ada hito nga mga kalidad naghihingyap gud nga dayawon han iba. Ini an iginsurat han usa nga eskolar mahitungod ha mapahitas-on nga indibiduwal: “Ha iya kasingkasing may-ada gutiay nga altar diin naluhod hiya ha iya kalugaringon.” May mga nasiring nga an pagin mapahitas-on diri gud maopay kay bisan an mga tawo nga mapahitas-on nadiri gud nga nagpapahitaas an iba.

5. Paonan-o nagin mapahitas-on bisan an magtinumanon nga surugoon ni Jehova?

⁵ Mangil-ad gud kan Jehova an pagpahitaas. Nangangalas hiya ha “mata nga mapalabilabihon.” (Prob. 6:16, 17) An pagin mapahitas-on nakakaulang ha usa nga magpahirani ha Dios. (Sal. 10:4) Kalidad ito han Yawa. (1 Tim. 3:6) Pero makasurubo, bisan an pipira nga maunungon nga surugoon ni Jehova naimpluwensyahan han pagin mapahitas-on. Pananglitan, hi Hadi Usiya han Juda nagin matinumanon ha sulod hin mga katuigan. “Kondi,” an Biblia nagsiring nga, “han makusug na hiya, an iya kasingkasing inmalsa, nga hiya nagbuhat ha mahugaw, ngan hiya nagtalapas patok kan Jehova nga iya Dios; kay hiya sinmulud ngadto ha templo ni Jehova ha pagsunug hin insienso dida ha halaran han insienso.” Ha urhi, nagin mapahitas-on liwat hi Hadi Hesekia, bisan kon temporaryo la ito nga nahitabo ha iya.—2 Kron. 26:16; 32:25, 26.

6. Ano unta an hinungdan ni David nga magpahitaas, pero kay ano nga waray niya ito buhata?

⁶ Nagigin mapahitas-on an pipira tungod han ira maopay nga hitsura, pagin sikat, talento ha musika, kaabtik ha pisikal, o hitaas nga posisyon. Diri la usa hito an may-ada hi David, may-ada hiya hito ngatanan; pero nagpabilin hiya nga mapainubsanon ha iya bug-os nga kinabuhi. Katapos niya patayon hi Goliat ngan han gintanyagan hiya nga magin asawa an anak ni Hadi Saul, hiya nagsiring: “Hin-o ako, ngan ano an akon kinabuhi, o an kanan akon amay panimalay dinhi ha Israel, nga ako maumagad han hadi?” (1 Sam. 18:18) Ano an nakabulig kan David nga magpabilin nga mapainubsanon? Nagkaada hiya han mga kalidad, abilidad, ngan pribilehiyo kay ‘nagpaubos’ an Dios basi maghatag ha iya hin atensyon. (Sal. 113:5-8) Maaram hi David nga an ngatanan nga maopay nga butang nga may-ada hiya tikang kan Jehova.—Itanding an 1 Corinto 4:7.

7. Ano an mabulig ha aton nga ipakita an pagin mapainubsanon?

⁷ Pariho kan David, an katawohan ni Jehova yana nangangalimbasog nga ipakita an pagin mapainubsanon. Nababantad gud an aton kasingkasing ha paghibaro nga hi Jehova, an pinakaharangdon nga Persona ha uniberso, nagpapakita han makaruruyag nga kalidad nga pagin mapainubsanon. (Sal. 18:35) Nangangalimbasog kita nga iaplikar inin giniyahan nga sagdon: “Isul-ot niyo an pagpalangga nga may kalooy, pagkabuotan, pagpaubos,  pagkamalumo, ngan pagkapasensyoso.” (Col. 3:12) Maaram liwat kita nga an gugma “diri naghahambog, diri nagpapahitaas.” (1 Cor. 13:4) Kon iginpapakita naton an pagin mapainubsanon, mahimo maaghat an mga tawo nga magpahirani kan Jehova. Sugad la nga an bana mahimo makabig bisan kon waray pulong pinaagi ha panggawi han iya asawa, an iba mahimo maaghat nga magpahirani ha Dios pinaagi han pagin mapainubsanon nga iginpapakita han iya katawohan.—1 Ped. 3:1.

8. (a) Ano an panhunahuna han pipira yana may kalabotan ha pagin diri masinugtanon ha mga kag-anak? (b) Ano an iginsusugo han Kasuratan ha mga anak?

⁸ Iginhulagway ni Pablo kon paonan-o tatrataron han mga tawo an kada tagsa ha kataposan nga mga adlaw. Hiya nagsurat nga ha kataposan nga mga adlaw, an mga anak magigin diri-masinugtanon ha mga kag-anak. Bisan kon usahay ginkakarawat na ito nga panggawi ngan igin-aaghat pa ngani ha mga libro, pelikula, ngan programa ha telebisyon yana, an pagin diri masinugtanon nagpapaluya ha pinakaimportante nga yunit han sosiedad—an pamilya. Maiha na nga maaram an mga tawo nga an pagin diri masinugtanon nagpapaluya han pamilya. Makapainteres nga ha kadaan nga Gresya, kon paul-olan ha pisikal han usa nga tawo an iya mga kag-anak, kukuhaon ha iya an ngatanan niya nga katungod sugad nga tuminungnong; ha balaud han Roma, an pisikal nga pagpaul-ol ha usa nga amay seryoso nga sala nga katugbang hin pagpatay. An Hebreo nga Kasuratan ngan an Kristiano Griego nga Kasuratan pariho nagsusugo ha mga anak nga tahuron an ira mga kag-anak.—Eks. 20:12; Efe. 6:1-3.

9. Ano an mabulig ha mga batan-on nga magin masinugtanon ha ira mga kag-anak?

⁹ Mahimo mapanalipdan han mga anak an ira kalugaringon basi diri matapnan han disposisyon nga pagin diri masinugtanon pinaagi ha pagpamalandong han ginhihimo han ira mga kag-anak para ha ira. Mas nagigin maapresyaron an mga anak kon nasasabtan nira nga an pagin masinugtanon ha mga kag-anak ginkikinahanglan han Dios, an Amay naton ngatanan. Pinaagi ha pag-istorya hin mag-opay nga butang mahitungod han ira mga kag-anak, mahimo mabuligan han mga batan-on an ira mga igkasi-batan-on nga magkaada respeto ha ira mismo mga kag-anak. Syempre, kon an mga kag-anak waray gugma ha ira mga anak, bangin makurian an mga anak nga kinasingkasing nga sumugot ha ira. Ha luyo nga bahin, kon inaabat han usa nga batan-on nga hinigugma gud hiya han iya mga kag-anak, mapapagios hiya nga lipayon hira bisan kon nasusulay hiya nga diri sumugot. “Bisan kon agsob ako mamiling hin paagi nga diri sumugot,” siring ni Austin, “an akon mga kag-anak naghimo hin makatadunganon nga mga patakaran, iginsaysay nira an rason hito nga mga surundon, ngan gintipigan nira nga abrido an komunikasyon. Nakabulig ini ha akon nga magin masinugtanon. Nakita ko nga hinigugma nira ako, salit karuyag ko nga lipayon hira.”

10, 11. (a) Ano nga magraot nga kalidad an nagpapakita han kawaray-gugma han mga tawo ha kada tagsa? (b) Mationan-o kadaku an gugma han tinuod nga mga Kristiano ha ira igkasi-tawo?

¹⁰ Iginlista ni Pablo an iba pa nga magraot nga kalidad nga nagpapakita han kawaray-gugma han mga tawo ha kada tagsa. Angayan gud nga an pagin diri mapasalamaton nasunod ha pagin “diri-masinugtanon ha mga kag-anak” kay iginhuhulagway hito an panggawi hadton waray apresasyon han pagkabuotan nga iginpapakita ha ira han iba. An mga tawo liwat magigin diri maunungon. Diri hira maruruyag ha bisan ano nga pakigsabot, nga nagpapakita nga diri hira andam nga makigmurayaw ha iba. Magigin mapasiparahon hira ngan mga traydor, nagyayakan hin nakakasakit ngan nakakadaot nga mga pulong kontra ha mga tawo ngan kontra pa ngani ha Dios. Ngan magkakaada mga parapakaraot, mga tawo nga nagpapasarang hin buwa nga mga istorya basi dauton an maopay nga reputasyon han iba. *

¹¹ Kabaliktaran han kawaray-gugma nga komon nga nakikita ha mga tawo yana, an mga magsiringba  ni Jehova nagpapakita hin tinuod nga gugma ha ira igkasi-tawo. Pirme gud nira ito ginbubuhat. Hi Jesus nagsiring nga an gugma ha igkasi-tawo, usa nga klase hin a·gaʹpe, amo an ikaduha nga pinakaimportante nga sugo ha Mosaiko nga Balaud, ikaduha ha gugma ha Dios. (Mat. 22:38, 39) Nagsiring liwat hi Jesus nga an gugma ha kada tagsa amo an kalidad nga magigin pangirilal-an han tinuod nga mga Kristiano. (Basaha an Juan 13:34, 35.) Hihigugmaon pa ngani han tinuod nga mga Kristiano bisan an ira mga kaaway.—Mat. 5:43, 44.

12. Paonan-o iginpakita ni Jesus an iya gugma ha mga tawo?

¹² Iginpakita ni Jesus an iya daku nga gugma ha mga tawo. Kinadto hiya ha iba-iba nga syudad; ginsumatan niya an mga tawo han maopay nga sumat mahitungod han Ginhadian han Dios. Gintambal niya an mga buta, mga piang, may mga liprosi, ngan an mga bungol. Ginbanhaw niya an mga patay. (Luc. 7:22) Iginhatag pa ngani niya an iya kinabuhi para ha katawohan, bisan kon damu an nangalas ha iya. An gugma ni Jesus perpekto nga nagpapakita han gugma nga iginpapakita han iya Amay. Ha bug-os nga kalibotan, iginpapakita han mga Saksi ni Jehova an diosnon nga gugma ha mga tawo.

13. Paonan-o an gugma nga aton iginpapakita ha mga tawo nabulig ha ira nga magin duok kan Jehova?

¹³ An gugma nga iginpapakita naton ha mga tawo nag-aaghat ha ira nga magpahirani ha aton langitnon nga Amay. Pananglitan, tagda an usa nga lalaki ha Thailand nga nabantad an kasingkasing tungod han gugma nga iginpakita han kabugtoan ha kada tagsa ha usa nga regional nga kombensyon. Pag-uli niya ha ira, naghangyo hiya nga dumarahan hiya hin pag-aram ha Biblia duha ka beses kada semana. Ginsangyawan niya an ngatanan niya nga kapamilya, ngan paglabay la hin unom ka bulan tikang han tinambong hiya han kombensyon, gindumara niya an iya siyahan nga toka ha pagbasa ha Biblia ha Kingdom Hall. Basi hibaroan kon iginpapakita gud ba naton an aton gugma ha iba, mahimo naton pakianhan an aton kalugaringon: ‘Nangangalimbasog ba ako nga buligan an akon mga kapamilya, mga kakongregasyon, ngan mga tawo ha ministeryo? Nangangalimbasog ba ako nga trataron an mga tawo pariho han pagtratar ha ira ni Jehova?’

14, 15. Ano nga hayupnon nga mga kalidad an iginpapakita han damu nga tawo, pero paonan-o nagbag-o an iba ngan nagkaada mag-opay nga kalidad?

¹⁴ An iba pa nga mga kalidad nga iginpapakita  han mga tawo ha kataposan nga mga adlaw naghahatag hin dugang nga mga rason ha mga Kristiano nga magpahirayo ha sugad nga mga indibiduwal. Adton waray kahadlok ha Dios magigin waray gugma ha kaopayan; ini nga mga pulong iginhubad han pipira sugad nga, “nangangalas han maopay” o “nadiri han ngatanan nga maopay.” Mawawad-an hira hin pagpugong ha kalugaringon ngan magigin mapintas. An iba magigin matig-a an ulo, o patigda-tigda ngan diri naghihirot.

¹⁵ Damu nga tawo hadto nga may sugad hito nga hayupnon nga mga kalidad an nagbag-o ngan nagkaada mag-opay nga kalidad. Inin makatirigamnan nga pagbag-o iginhulagway ha usa nga tagna ha Biblia. (Basaha an Isaias 11:6, 7.) Mababasa naton dida hito an mahitungod ha ihalas nga mga hayop, sugad han lobo ngan leon, nga mamurayawon nga nakikig-upod ha inataman nga mga hayop, sugad han nati nga karnero ngan baka. Tigamni nga mahitatabo inin mamurayawon nga kahimtang “kay an tuna mapupuno han hibaro ni Jehova.” (Isa. 11:9) Tungod kay an mga hayop waray abilidad nga mahibaro mahitungod kan Jehova, an simboliko nga katumanan hini nga tagna naaplikar ha mga tawo.

16. Paonan-o an Biblia nabulig ha mga tawo nga mabag-o an ira personalidad?

¹⁶ Damu hadto an mabangis sugad hin lobo pero yana nagkikinabuhi nga mamurayawon kaupod an iba. Mababasa mo an pipira hini nga mga eksperyensya ha serye nga “An Biblia Nakakagbag-o han Kinabuhi” nga makikita ha jw.org. Adton nakilala ngan nag-aalagad kan Jehova iba gud ha mga tawo nga diosnon pagkit-on, pero diri nagkikinabuhi uyon ha gahum hito, nga kunohay nagsisingba ha Dios pero napapamatud-an ha ira buhat nga diri hira nag-aalagad ha iya. Lugod, an mabangis hadto nga mga tawo ‘nagsul-ot han bag-o nga personalidad nga ginhimo uyon ha kaburut-on han Dios, nga iginbasar ha totoo nga pagkamatadong ngan pagkamaunungon.’ (Efe. 4:23, 24) Samtang nahibabaro an mga tawo mahitungod ha Dios, nasasantop nira nga kinahanglan nira sundon an iya mga suruklan. Salit napapagios hira nga maghimo hin mga pagbag-o ha ira mga gintoohan, panhunahuna, ngan panggawi. Diri masayon an paghimo hito nga mga pagbag-o pero mahihimo ito kay bubuligan han espiritu han Dios adton sinsero nga naghihingyap nga buhaton an kaburut-on han Dios.

17. Ano an aton mahihimo basi diri kita maimpluwensyahan han mga tawo nga may magraot nga panggawi?

¹⁷ Padayon nga nagigin mas matin-aw an kaibahan hadton nag-aalagad ha Dios ngan hadton diri. Kita nga nag-aalagad ha Dios kinahanglan mag-ikmat nga diri kita maimpluwensyahan han magraot nga panggawi han mga tawo. Maaramon nga ginsusunod naton an giniyahan nga sagdon nga maglikay ha mga klase hin tawo nga ginhuhulagway ha 2 Timoteo 3:2-5. Syempre, diri kita bug-os nga makakalikay ha mga tawo nga may magraot nga batasan. Bangin makaupod naton hira tungod kay kinahanglan kita magtrabaho, umiskwela, o umukoy ha uusa nga urukyan. Pero may mahihimo kita basi diri maimpluwensyahan han ira panhunahuna ngan diri masubad an ira panggawi. Ano ito? An pagparig-on han aton espirituwalidad pinaagi ha pag-aram han Biblia ngan duok nga pakig-upod ha mga tawo nga determinado nga mag-alagad kan Jehova.

18. Paonan-o mahimo magpahimulos an iba ha espirituwal pinaagi han aton panyakan ngan panggawi?

¹⁸ Sadang liwat kita mangalimbasog nga buligan an mga tawo ha espirituwal. Pamiling hin higayon nga makagsangyaw ka ngan pag-ampo kan Jehova nga buligan ka nga maiyakan an husto nga mga pulong ha husto nga panahon. Sadang naton sumatan an iba nga Saksi ni Jehova kita. Hito nga paagi, an aton maopay nga panggawi magpapasidungog ha Dios, diri ha aton kalugaringon. Ginbabansay kita nga “isalikway an pagin diri-diosnon ngan an kalibotanon nga mga hingyap, ngan magkinabuhi nga may maopay nga panhunahuna ngan pagkamatadong ngan debosyon ha Dios samtang adi kita hini nga sistema.” (Tito 2:11-14) Kon ipapakita naton an diosnon nga panggawi, maoobserbaran ito han iba, ngan bangin magsiring pa ngani an pipira: “Kami maupud ha iyo, kay kami nakabati nga an Dios aada kaupud niyo.”—Sak. 8:23.