1. Pariho kan Hadi David, ano an bangin igpakiana han pipira ha aton?

KITA ngatanan naruruyag magkaada hin kalmado ngan murayaw nga kinabuhi. Waray naruruyag ha aton nga magkinabaraka. Pero usahay, bangin naabat kita hin mga kabaraka. Ngani, an pipira nga surugoon ni Jehova bangin magpakiana pariho han iginpakiana ni Hadi David kan Jehova: “Tubtob san-o ako magkikinabaraka, nga an akon kasingkasing masurub-on kada adlaw?”​—Sal. 13:2.

2. Ano an hihisgotan naton hini nga artikulo?

² Bisan kon diri naton bug-os nga malilikyan an pag-abat hin kabaraka, may mahihimo kita basi makontrol ito. Hini nga artikulo, hihisgotan anay naton an pipira nga butang nga mahimo makapabaraka ha aton. Katapos, hihisgotan naton an unom nga praktikal nga paagi nga mabulig ha aton nga makapabilin nga kalmado kon naatubang kita hin mga problema.

3. Ano nga mga problema an aton gin-aatubang, ngan kontrolado ba naton ito?

³ Bangin gutiay la an aton mahihimo o diri naton kontrolado an pipira nga butang nga nakakapabaraka ha aton. Pananglitan, diri naton makukontrol an pag-umento kada tuig han presyo han pagkaon, bado, ngan urukyan; diri liwat naton makukontrol kon ano kaagsob kita susulayon han aton mga katrabaho o kaklase nga magin diri tangkod o magbuhat hin imoral. Ngan diri naton mapupugngan an mga krimen nga nahitatabo ha aton lugar. Naieksperyensyahan naton ini ngatanan kay aanhi kita ha  kalibotan diin an kadam-an nga tawo diri nagkikinabuhi uyon ha mga prinsipyo ha Biblia. Maaram hi Satanas, an dios hini nga kalibotan, nga tutugotan han pipira nga tawo “an kabaraka hini nga sistema han mga butang” nga makaulang ha ira ha pag-alagad kan Jehova. (Mat. 13:22; 1 Juan 5:19) Diri urusahon nga ini nga kalibotan puno hin nakakapabaraka nga mga problema!

4. Ano an mahimo mahitabo kon sobra kita nga nagkikinabaraka ha aton mga problema?

⁴ Bangin sobra kita nga magkinabaraka ha aton mga problema, nga ito na la an aton paghinunahunaon. Pananglitan, bangin mabaraka kita nga an aton kità diri umeksakto ha aton mga panginahanglan o nga magkasakit kita ngan diri makasulod ha trabaho o mawad-an pa ngani hin trabaho. Bangin mabaraka liwat kita nga bangin diri kita magin matinumanon kon sulayon kita nga talapason an balaud han Dios. Diri na mag-iiha, pagigiuson ni Satanas adton kontrolado niya nga atakehon an katawohan han Dios, salit bangin nababaraka kita kon ano an aton magigin reaksyon hito nga pag-atake. Bangin maghunahuna kita, ‘Sayop ba nga nababaraka ako mahitungod hito nga mga butang?’

5. Ano an iginpapasabot ni Jesus han nagsiring hiya: “Ayaw na kamo pagkinabaraka”?

⁵ Maaram kita nga ginsidngan ni Jesus an iya mga disipulo: “Ayaw na kamo pagkinabaraka.” (Mat. 6:25) Nagpapasabot ba ini nga naglalaom hiya nga diri kita mababaraka ha bisan ano nga butang? Diri! Ngani, may maunungon nga mga surugoon hi Jehova ha naglabay nga inabat hin kabaraka, pero waray mawara ha ira an pag-uyon ni Jehova. * (1 Hadi 19:4; Sal. 6:3) Karuyag la ni Jesus nga pasarigon kita. Nadiri hiya nga sobra kita nga magkinabaraka ha aton mga panginahanglan tubtob ha punto nga maapektohan na an aton pag-alagad ha Dios. Kon sugad, paonan-o naton makukontrol an aton mga kabaraka?​—Kitaa an kahon nga “ Kon Paonan-o Ito Bubuhaton.”

6. Sumala ha Filipos 4:6, 7, ano an mabulig ha aton nga magin kalmado kon nababaraka kita?

⁶ (1) Pag-ampo pirme. An mga Kristiano nga naatubang hin mga problema nabubuligan gud kon sinsero nga nag-aampo hira kan Jehova. (1 Ped. 5:7) Mahimo batunon an imo mga pag-ampo pinaagi ha paghatag ha imo han “kamurayawan han Dios nga labaw ha ngatanan nga pagsabot” han tawo. (Basaha an Filipos 4:6, 7.) Kon nababaraka kita, pakakalmahon kita ni Jehova pinaagi han iya gamhanan nga baraan nga espiritu.​—Gal. 5:22.

7. Ano an angay naton hinumdoman kon nag-aampo kita?

⁷ Kon nag-aampo ka kan Jehova, isumat ha iya an tanan nga aada ha imo kasingkasing. Magin espisipiko. Isumat ha iya an problema ngan an imo inaabat mahitungod hito. Kon posible ito masolusyonan, pangaro ha iya hin kinaadman basi mahibaroan mo an imo bubuhaton ngan hin kusog basi mabuhat ito. Kon diri mo kaya solusyonan an imo problema, pangaro kan Jehova hin bulig basi diri ka sobra nga magkinabaraka hito. Kon espisipiko an imo mga pag-ampo, magigin mas klaro ha imo kon paonan-o ito ginbabaton ni Jehova. Kon diri mo dayon nakakarawat an baton han imo igin-iinampo, padayon la ito nga ig-ampo. Labot la ha pagin espisipiko ha imo mga pag-ampo, karuyag liwat ni Jehova nga padayon mo ito nga buhaton.​—Luc. 11:8-10.

8. Ano an angay naton ig-upod ha aton mga pag-ampo?

⁸ Kon iginsusumat mo kan Jehova ha pag-ampo an imo mga kabaraka, updi ito hin mga  pagpasalamat. Makakaopay ha aton kon huhunahunaon naton an mga bendisyon nga aton nakakarawat bisan kon makuri gud an aton kahimtang. Kon nakukurian ka kon paonan-o isusumat kan Jehova an imo gud inaabat, hinumdumi nga ginbabaton niya an aton mga pag-ampo bisan kon an aton la nayayakan, ‘Alayon buligi ako!’​—2 Cron. 18:31; Roma 8:26.

9. Paonan-o an usa magkakaada tinuod nga seguridad?

⁹ (2) Sarig ha kinaadman ni Jehova, diri ha imo kalugaringon. Han ikawalo ka siglo B.C.E., an mga tawo ha Juda nahadlok gud nga atakehon hira han mga Asiryano. Tungod kay nadiri gud hira nga masakop han mga Asiryano, nangaro hira hin bulig ha pagano nga mga Ehiptohanon. (Isa. 30:1, 2) Ginpahamangnoan hira ni Jehova nga iton ira maraot nga ginbuhat magriresulta hin kadaot. (Isa. 30:7, 12, 13) Pinaagi kan Isaias, ginsidngan hira ni Jehova kon paonan-o hira magkakaada tinuod nga seguridad. Hiya nagsiring: “Magigin makusog kamo kon magpapabilin kamo nga kalmado ngan masarig kamo” kan Jehova.​—Isa. 30:15b.

10. Ha ano nga mga kahimtang maipapakita naton nga nasarig kita kan Jehova?

¹⁰ Paonan-o naton maipapakita nga nasarig kita kan Jehova? Tagda ini nga mga ehemplo. Sidngon ta nga gintanyagan ka hin trabaho nga daku an sweldo pero nagkikinahanglan ito han imo daku nga panahon salit makakaulang ito han imo pag-alagad kan Jehova. O pananglitan, may katrabaho ka nga nagsiring nga naruruyag hiya ha imo pero diri hiya bawtismado nga surugoon han Dios. O sidngon ta nga may usa ka nga hinigugma nga kapamilya nga nagsiring ha imo: “Kinahanglan mo pumili, ako o an imo Dios?” Ha tagsa hini nga mga sitwasyon makuri gud an pagdesisyon, pero ihahatag ni Jehova an giya nga imo ginkikinahanglan. (Mat. 6:33; 10:37; 1 Cor. 7:39) Pero an pakiana, Masarig ka ba kan Jehova ngan susundon an iya giya?

11. Ano nga mga asoy ha Biblia an mahimo naton pag-adman basi makapabilin kita nga kalmado bisan pa ha pagkontra?

¹¹ (3) Mahibaro tikang ha maopay ngan maraot nga mga ehemplo. Damu an aton mababasa ha Biblia nga nagpapakita nga importante an pagpabilin nga kalmado ngan pagsarig kan Jehova. Samtang gin-aadman mo ini nga mga asoy, pansina kon ano an nakabulig ha mga surugoon han Dios nga magpabilin nga kalmado bisan pa han duro nga pagkontra. Pananglitan, han gindid-an han korte suprema han mga Judio an mga apostol nga magsangyaw, waray hira mahadlok. Lugod, maisugon nga nagsiring hira: “Kinahanglan sugton namon an Dios sugad nga magmarando imbes nga an mga tawo.” (Buh. 5:29) Bisan han ginkastigo an mga apostol, waray hira magpanik. Kay ano? Kay maaram hira nga ginbubuligan hira ni Jehova. Nalilipay hiya ha ira. Salit padayon nira nga iginsangyaw an maopay nga sumat. (Buh. 5:40-42) Sugad man, han hirani na patayon an disipulo nga hi Esteban, nagpabilin hiya nga murayaw ngan kalmado salit an iya nawong nagin sugad pagkit-on han “nawong hin anghel.” (Buh. 6:12-15) Kay ano? Kay sigurado hiya nga gin-uuyonan hiya ni Jehova.

12. Sumala ha 1 Pedro 3:14 ngan 4:14, kay ano nga mahimo kita magin malipayon bisan kon gintitimaraot kita?

¹² An mga apostol may klaro nga ebidensya nga kaupod nira hi Jehova. Gintagan niya hira hin gahum basi makahimo hin mga milagro. (Buh. 5:12-16; 6:8) Yana, diri kita niya gintatagan hin sugad nga gahum. Pero, mahigugmaon nga ginpapasarig kita niya pinaagi han iya Pulong nga kon nag-aantos kita tungod han katadongan, nalilipay hiya ha aton ngan aadi ha aton an iya espiritu. (Basaha an 1 Pedro 3:14; 4:14.) Salit imbes nga paghinunahunaon kon ano an aton bubuhaton kon duro nga pagtimarauton kita ha tiarabot, kinahanglan magpokus kita yana ha pagparig-on han aton pagsarig nga  kaya kita buligan ngan talwason ni Jehova. Pariho hiton mga disipulo ha siyahan nga siglo, kinahanglan sumarig kita ha saad ni Jesus: “Tatagan ko kamo hin mga pulong ngan kinaadman nga diri makukontra o maririwa han mga nakontra ha iyo bisan pa han ira urosa nga pangalimbasog.” Nagpapasarig hiya: “Pinaagi han iyo pagpailob matitipigan niyo an iyo kinabuhi.” (Luc. 21:12-19) Ngan hinumdumi pirme nga diri gud ginkakalimtan ni Jehova an pinakaguti nga mga detalye mahitungod hadton namatay nga matinumanon ha iya. Babanhawon niya hira nga may-ada la gihap hito nga mga detalye.

13. Ano an aton mapapahimulosan kon pag-aadman naton an mga asoy mahitungod hadton waray makapabilin nga kalmado ngan waray sumarig kan Jehova?

¹³ May mahibabaroan liwat kita tikang ha mga eksperyensya hadton waray makapabilin nga kalmado ngan waray sumarig kan Jehova. An pag-aram han ira maraot nga ehemplo mabulig ha aton nga malikyan an pakabuhat hin sala nga pariho han ira nahimo. Pananglitan, ha tinikangan han pagmando ni Hadi Asa han Juda, sinarig hiya kan Jehova han gin-atake hira hin damu nga kasundalohan, ngan ginbuligan hira ni Jehova nga magdaog. (2 Cron. 14:9-12) Pero ha urhi, han ginsulong hira han mas gutiay nga kasundalohan ni Hadi Baasa han Israel, ginbaydan ni Asa an kasundalohan han Sirya basi buligan hira imbes nga sumarig kan Jehova para talwason hira, sugad han iya ginbuhat hadto. (2 Cron. 16:1-3) Ngan han hirani na hiya mamatay, han nagkaada hiya grabe nga sakit, waray hiya sumarig ha bulig ni Jehova.​—2 Cron. 16:12.

14. Ano an aton mahibabaroan tikang ha mga sayop ni Asa?

¹⁴ Ha tinikangan, sinarig hi Asa kan Jehova han inatubang hiya hin mga problema. Pero ha urhi, waray na hiya magpabulig ha Dios; ginsulbad niya an iya mga problema ha iya la kalugaringon nga paagi. Ha siyahan nga pagkita, baga hin praktikal gud an plano ni Asa nga magpabulig ha mga Siryano kontra ha iya pakig-away ha Israel. Pero temporaryo la an iya kalamposan. Ginsidngan hiya ni Jehova pinaagi hin propeta: “Tungod kay sinarig ka ha hadi han Sirya ngan waray ka sumarig kan Jehova nga imo Dios, an kasundalohan han hadi han Sirya nakapalagiw tikang ha imo.” (2 Cron. 16:7) Kinahanglan magbantay kita nga diri sobra nga sumarig ha aton kalugaringon, nga naghuhunahuna nga kaya naton sulbaron an aton mga problema nga diri nagpapagiya kan Jehova pinaagi han iya Pulong. Bisan kon aada kita ha sitwasyon diin kinahanglan naton magdesisyon dayon, dapat kalmado kita nga sumarig kan Jehova, ngan iya kita bubuligan nga maglampos.

15. Ano an mahimo naton buhaton kon nagbabasa kita han Biblia?

¹⁵ (4) Pagmemorya hin mga teksto ha Biblia. Kon may nababasa ka nga teksto nga nagpapakita nga mapaparig-on kita pinaagi ha pagpabilin nga kalmado ngan pagsarig kan Jehova, memoryaha ito. Bangin makabulig ha imo kon babasahon mo ito ha daku nga tingog o isusurat ito ngan rirepasuhon ha panapanahon. Ginsugo hi Josue nga regular nga basahon an libro han Balaud ngan pamalandungon ito basi magin maaramon hiya ha iya mga bubuhaton. Ito nga mga pahinumdom mabulig liwat ha iya nga maatohan an kahadlok nga posible unta niya abaton ha iya sitwasyon. (Jos. 1:8, 9) Damu an teksto ha Pulong han Dios nga makakabulig ha imo nga magkaada murayaw nga hunahuna ngan kasingkasing ha mga sitwasyon nga kaurogan na nga nakakapabaraka o nakakapahadlok ha imo.​—Sal. 27:1-3; Prob. 3:25, 26.

16. Paonan-o ginagamit ni Jehova an kabugtoan basi makapabilin kita nga kalmado ngan sumarig ha iya?

¹⁶ (5) Pakig-upod ha katawohan han Dios. Gin-gagamit ni Jehova an aton kabugtoan basi buligan kita nga makapabilin nga kalmado  ngan sumarig ha iya. Ha aton mga katirok, nagpapahimulos kita ha iginpipresenta nga mga bahin, ha mga komento, ngan ha aton makaparig-on nga pakiistorya ha kabugtoan. (Heb. 10:24, 25) Mapaparig-on gud liwat kita kon igsusumat naton ha masasarigan nga kasangkayan ha kongregasyon an aton mga ginkakabarak-an. “An maopay nga pulong” tikang ha usa nga sangkay daku gud an maibubulig basi maibanan an aton kabaraka.​—Prob. 12:25.

17. Sumala ha Hebreo 6:19, paonan-o an aton paglaom ha Ginhadian makakabulig ha aton nga magin marig-on bisan pa ha makuri nga mga sitwasyon?

¹⁷ (6) Tipigi nga marig-on an imo paglaom. An aton paglaom ha Ginhadian “sugad hin angkla para han kalag” nga nabulig ha aton nga magin marig-on bisan pa ha makuri o nakakapabaraka nga mga kahimtang. (Basaha an Hebreo 6:19.) Pamalandonga an iginsasaad ni Jehova nga kabubuwason, diin waray na kita angay kabarak-an. (Isa. 65:17) Imadyina nga aadto ka na ha murayaw nga bag-o nga kalibotan, diin waray na an nakakaistres nga mga sitwasyon. (Mic. 4:4) Mapaparig-on mo liwat an imo paglaom kon isusumat mo ito ha iba. Buhata an bug-os mo nga mahihimo ha pagsangyaw ngan panhimo hin disipulo. Kon bubuhaton mo ito, magkakaada ka “bug-os nga kasiguradohan han paglaom tubtob ha kataposan.”​—Heb. 6:11.

18. Ano nga mga problema an mahimo naton maeksperyensyahan ha tiarabot, ngan paonan-o naton ito makakaya?

¹⁸ Samtang nagtitikahirani an kataposan hini nga sistema, makakaeksperyensya kita hin mas damu pa nga problema nga makakapabaraka ha aton. An aton tinuig nga teksto para ha 2021 makakabulig ha aton nga atubangon ito nga mga problema ngan magpabilin nga kalmado, diri pinaagi han aton kalugaringon nga kusog, kondi pinaagi han aton pagsarig kan Jehova. Hini nga tuig, ipakita naton pinaagi ha aton mga buhat nga natoo kita ha saad ni Jehova: “Magigin makusog kamo kon magpapabilin kamo nga kalmado ngan masarig kamo.”​—Isa. 30:15.