1. Ano an nagpapakita nga damu nga pamilya yana an waray na kinaiya nga gugma?

IGINTAGNA han Biblia nga ha kataposan nga mga adlaw, an mga tawo mawawad-an han “kinaiya nga gugma.” (2 Tim. 3:1, 3) Nakikita naton nga natutuman na ito yana. Pananglitan, minilyon nga pamilya an nagbuburublag tungod ha diborsyo, ngan an epekto hito, an mga kag-anak nasisina ha usa kag usa ngan an mga anak naman naabat nga diri hira hinigugma. Ngan bisan an mga pamilya nga naukoy ha usa la nga balay, bangin waray duok nga relasyon ha usa kag usa. Pananglitan, usa nga magsaragdon ha pamilya an nagsiring: “An nanay, tatay, ngan mga anak diri na nag-iiristorya, ngan kaurogan na nga nakatutok na la hira ha kompyuter, tablet, celfon, o ha pag-video game. Bisan kon ini nga mga pamilya naukoy ha usa la nga balay, diri na nira kilala hin maopay an usa kag usa.”

2-3. (a) Sumala ha Roma 12:10, hin-o an angay naton pakitaan hin malumo nga pagpalangga? (b) Ano an aton hihisgotan hini nga artikulo?

² Diri naton karuyag magpamolde han pagin diri mahigugmaon han kalibotan. (Roma 12:2) Lugod, kinahanglan kultibaron naton an malumo nga pagpalangga, diri la ha aton mga kapamilya kondi pati ha aton mga igkasi-tumuroo. (Basaha an Roma 12:10.) Ano an malumo nga pagpalangga? Usa ito nga termino nga naghuhulagway han duok ngan mahigugmaon nga relasyon han magkakapamilya. Ito an klase han gugma nga kinahanglan naton kultibaron ha aton espirituwal nga pamilya, an aton Kristiano nga kabugtoan. Kon iginpapakita naton an malumo nga pagpalangga, nabulig kita nga matipigan an pagkaurosa nga importante nga bahin han tinuod nga pagsingba.​—Mic. 2:12.

 ³ Basi mabuligan kita nga makultibar ngan maipakita an malumo nga pagpalangga, kitaon naton kon ano an aton mahibabaroan ha mga ehemplo ha Biblia.

4. Paonan-o an Santiago 5:11 nabulig ha aton nga mahibaroan kon ano kadaku an gugma ni Jehova ha aton?

⁴ Iginsusumat han Biblia an mag-opay nga kalidad ni Jehova. Pananglitan, nasiring ito nga “an Dios gugma.” (1 Juan 4:8) Hito pa la nga diskripsyon, naruruyag na kita nga magin duok ha iya. Pero nasiring liwat an Biblia nga hi Jehova “malumo hinduro magpalangga.” (Basaha an Santiago 5:11.) Maopay gud ini nga diskripsyon han daku nga gugma ni Jehova ha aton!

5. Paonan-o iginpapakita ni Jehova an kalooy, ngan paonan-o naton hiya masusubad?

⁵ Pansina nga ha Santiago 5:11 gin-unabi an malumo nga pagpalangga ni Jehova kaupod han usa pa nga kalidad nga nagpapahirani ha aton ngada ha iya​—an iya kalooy. (Ex. 34:6) An usa nga paagi nga iginpapakita ni Jehova an iya kalooy amo an pagpasaylo ha aton mga sala. (Sal. 51:1) Ha Biblia, an kalooy labaw pa kay ha pagpasaylo la. An kalooy usa nga makusog nga pagbati nga inaabat han usa nga tawo kon may nakikita hiya nga nasasakit, ngan napapagios hiya nga buligan ito nga tawo. Hi Jehova nasiring nga an iya makusog nga hingyap ha pagbulig ha aton mas makusog pa kay ha inaabat han usa nga nanay para ha iya anak. (Isa. 49:15) Kon nasasakit kita, an kalooy ni Jehova nagpapagios ha iya nga buligan kita. (Sal. 37:39; 1 Cor. 10:13) Maipapakita naton an kalooy ha aton kabugtoan pinaagi ha pagpasaylo ha ira ngan diri pagdumot kon napapasubo kita nira. (Efe. 4:32) Pero an usa nga nangunguna nga paagi nga maipapakita naton an kalooy amo an pagbulig ha aton kabugtoan kon may mga problema hira. Kon ginpapagios kita han gugma nga magin maloloy-on ha iba, ginsusubad naton hi Jehova, an pinakamaopay nga susbaranan ha pagpakita hin malumo nga pagpalangga.​—Efe. 5:1.

6. Paonan-o iginpakita nira Jonathan ngan David an ira malumo nga pagpalangga ha usa kag usa?

⁶ May mga rekord ha Biblia mahitungod han diri perpekto nga mga tawo nga nagpakita hin malumo nga pagpalangga. Tagda an ehemplo nira Jonathan ngan David. An Biblia nasiring: “Hi Jonathan ngan hi David nagin duok gud nga magsangkay, ngan hi Jonathan nagtikang mahigugma kan David pariho han iya paghigugma ha iya kalugaringon.” (1 Sam. 18:1) Hi David ginpili ni Jehova nga sumaliwan kan Saul sugad nga hadi. Tikang hito nga takna, nasina gud hi Saul kan David ngan gin-ikaparatay niya hi David. Pero hi Jonathan nga anak ni Saul waray sumuporta ha iya tatay ha pag-ikaparatay kan David. Lugod, hira Jonathan ngan David nagsaad nga magpapabilin hira nga magsangkay ngan pirme magbibinuligay.​—1 Sam. 20:42.

7. Ano an usa nga butang nga mahimo unta makaulang nga magin magsangkay hira Jonathan ngan David?

⁷ Makatirigamnan gud nga hira Jonathan ngan David nakagpakita hin malumo nga pagpalangga ha usa kag usa tungod kay damu nga butang an puydi unta makaulang nga magin magsangkay hira. Pananglitan, hi Jonathan mas magurang kan David hin mga 30 ka tuig. Puydi unta maghunahuna hi Jonathan nga diri niya magigin sangkay an usa nga mas bata gud ha iya ngan waray eksperyensya ha kinabuhi. Pero waray maghunahuna hi Jonathan hin sugad hito; daku gud an iya respeto kan David.

8. Para ha imo, kay ano nga nagin maopay nga sangkay hi Jonathan kan David?

⁸ Puydi unta mangabugho hi Jonathan kan David. Sugad nga anak ni Hadi Saul, mahimo unta mag-insister hi Jonathan nga hiya an may katungod nga magin sunod nga hadi. (1 Sam. 20:31) Pero hi Jonathan mapainubsanon, ngan maunungon hiya kan Jehova. Salit bug-os nga ginsuportaran niya an ginpili ni Jehova sugad nga sunod nga hadi nga amo hi David. Nagin maunungon liwat hiya kan David bisan kon nakapasina gud ini kan Saul.​—1 Sam. 20:32-34.

9. Ginhunahuna ba ni Jonathan hi David sugad nga karibal? Isaysay.

⁹ Hi Jonathan may malumo nga pagpalangga kan David, salit waray niya hunahunaa hi David sugad nga karibal. Hi Jonathan eksperto nga parapamana ngan maisugon nga girriro. Hiya ngan an iya tatay nga hi Saul kilala nga “mas malaksi . . . kay han mga agila” ngan “mas makusog kay han mga leon.” (2 Sam. 1:22, 23) Salit puydi unta ighambog ni Jonathan an iya mga kadaogan ha pakig-away. Pero hi Jonathan waray makigkompetensya o mangabugho kan David. Lugod, binilib hiya ha kan David kaisog ngan pagsarig kan Jehova. Ngani, ginhigugma ni Jonathan hi David sugad han iya paghigugma ha iya kalugaringon katapos patayon ni David hi Goliat. Paonan-o naton maipapakita an sugad nga malumo nga pagpalangga ha aton kabugtoan?

10. Ano an iginpapasabot han ‘higugmaon gud an usa kag usa tikang ha kasingkasing’?

¹⁰ Ginsusugo kita han Biblia nga ‘higugmaon gud an usa kag usa tikang ha kasingkasing.’ (1 Ped. 1:22) Hi Jehova nagpapakita hin susbaranan para ha aton. Daku gud an iya gugma ha aton, salit kon maunungon kita ha iya, waray makakautod hito nga iya gugma. (Roma 8:38, 39) An pulong nga “gud” naghahatag hin ideya nga an usa duro nga nangangalimbasog basi maipakita an gugma. Usahay, diri masayon an pagpakita hin malumo nga pagpalangga ha aton mga igkasi-tumuroo. Kon an iba nakakapasina ha aton, kinahanglan padayon nga ‘mahigugmaon nga magpailob kita ha usa kag usa,  mangalimbasog gud nga matipigan an pagin usa ha espiritu pinaagi han kamurayawan nga nagbubugkos ha aton.’ (Efe. 4:1-3) Kon naniningkamot kita nga tipigan an ‘kamurayawan nga nagbubugkos ha aton,’ diri kita magpupokus ha mga sayop han aton kabugtoan. Mangangalimbasog kita nga kitaon hira sugad han pagkita ha ira ni Jehova.​—1 Sam. 16:7; Sal. 130:3.

11. Kay ano nga usahay makuri an pagkultibar han malumo nga pagpalangga?

¹¹ Usahay, diri masayon an pagpakita hin malumo nga pagpalangga ha kabugtoan labi na kon nakikita naton an ira mga sayop. Naeksperyensyahan ini han pipira nga Kristiano ha siyahan nga siglo. Pananglitan, hira Euodia ngan Sintike waray magkaproblema ha pagbuhat “kaupod [ni Pablo] para ha maopay nga sumat.” Pero tungod ha pipira nga rason, nagkaada hira diri pagkasinabtanay. Salit gin-aghat hira ni Pablo nga “magkaada pariho nga hunahuna sugad nga kahiusa han Ginoo.”​—Fil. 4:2, 3.

12. Paonan-o naton makukultibar an malumo nga pagpalangga para ha aton kabugtoan?

¹² Paonan-o naton makukultibar yana an malumo nga pagpalangga para ha aton kabugtoan? Kon nakikilala naton hin mas maopay an aton kabugtoan, bangin magin mas masayon para ha aton nga masabtan hira ngan maipakita ha ira an aton malumo nga pagpalangga. Diri kinahanglan magin ulang an edad ngan an pamilya nga gintikangan. Hinumdumi, hi Jonathan mas magurang kan David hin mga 30 ka tuig, pero nagin duok hira nga magsangkay. Puydi ka ba makigsangkay ha mas magurang o mas bata ha imo? Kon bubuhaton mo ito, iginpapakita mo nga ‘hinigugma mo an ngatanan nga kabugtoan.’​—1 Ped. 2:17.

13. Kay ano nga bangin mas duok kita ha pipira nga kabugtoan?

¹³ An pagkaada ba malumo nga pagpalangga ha aton mga kabugtoan nagpapasabot nga magkakaada kita duok gud nga pakigsangkay ha ngatanan naton nga kakongregasyon? Diri ito posible. Diri sayop nga magin mas duok kita ha pipira nga kabugtoan nga pariho ha aton an mga karuyag. Gintawag ni Jesus nga “kasangkayan” an ngatanan niya nga apostol, pero nagin duok gud hiya kan Juan. (Juan 13:23; 15:15;  20:2) Pero waray hiya magpakita hin paboritismo ha iya pagtratar kan Juan. Pananglitan, han hi Juan ngan an iya bugto nga hi Santiago naghangyo hin prominente nga posisyon ha Ginhadian han Dios, ginsidngan hira ni Jesus: “An pagpalingkod ha akon too o ha akon wala diri ako an nagbubuot.” (Mar. 10:35-40) Pariho kan Jesus, kinahanglan diri kita magpakita hin paboritismo ha aton pagtratar ha aton duok nga kasangkayan. (San. 2:3, 4) An pagpakita hin paboritismo mag-aaghat hin pagkabahin-bahin, usa nga butang nga diri gud puydi ha Kristiano nga kongregasyon.​—Jud. 17-19.

14. Sumala ha Filipos 2:3, ano an mabulig ha aton nga malikyan an pakigkompetensya?

¹⁴ Kon magpapakita kita hin malumo nga pagpalangga ha usa kag usa, diri kita makikigkompetensya ha aton kabugtoan. Hinumdumi nga waray makigkompetensya hi Jonathan kan David, ngan waray niya hunahunaa nga karibal niya hi David ha pagin hadi. Kita ngatanan mahimo magsubad han ehemplo ni Jonathan. Ayaw pakigkompetensya ha mga nahihimo han imo kabugtoan, ‘lugod may pagkamapainubsanon nga tagda an iba nga labaw ha imo.’ (Basaha an Filipos 2:3.) Hinumdumi nga an tagsa nga bugto may maibubulig ha kongregasyon. Kon magpapabilin kita nga mapainubsanon, makikita naton an mag-opay nga kalidad han aton kabugtoan ngan magpapahimulos kita tikang ha ira susbaranan ha pagin matinumanon.​—1 Cor. 12:21-25.

15. Ano an imo nahibaroan ha eksperyensya ni Tanya ngan han iya pamilya?

¹⁵ Kon naatubang kita hin diri ginlalaoman nga mga problema, ginliliaw kita ni Jehova pinaagi han malumo nga pagpalangga ngan praktikal nga bulig nga aton nakakarawat ha  kabugtoan. Tagda an nahitabo ha usa nga pamilya katapos nira umatender ha Sabado nga programa han 2019 nga “An Gugma Diri Gud Napapakyas!” nga Internasyonal nga Kombensyon ha United States. Hi Tanya nga may tulo nga anak, nagsiring: “Tipauli na kami ha amon hotel han may usa nga awto nga nawad-an hin preno ngan bumunggo ha amon awto. Waray ha amon nasakitan, pero na-shock gud kami ngan hinaw-as ha awto ngan nagtinindog ha kalsada. Ha ligid han kalsada, may nagkampay ha amon ngan ginpapasakay kami ha iya awto. Bugto naton hiya nga tiuli pa la liwat tikang ha kombensyon. Ngan diri la hiya an inundang. May inundang liwat nga lima nga delegado tikang ha Sweden. An mga sister mahigugmaon nga hinangkop ha akon ngan ha akon anak nga babaye, ngan ito gud an amon ginkikinahanglan! Ginsidngan ko hira nga okey la kami, ngan puydi na nira kami bayaan. Pero waray nira kami bayai tubtob nga inabot an medikal nga bulig, ngan ginsiguro nira nga may-ada kami han ngatanan namon nga ginkikinahanglan. Hiton makuri nga sitwasyon, inabat namon an gugma ni Jehova. Tungod hini nga amon naeksperyensyahan, nagrig-on an amon gugma ha kabugtoan ngan naghilarom an amon gugma ngan apresasyon kan Jehova.” May nahinunumdoman ka ba nga panahon nga nanginginahanglan ka gud hin bulig ngan may bugto nga nagpakita ha imo hin malumo nga pagpalangga?

16. Kay ano nga kinahanglan naton ipakita an malumo nga pagpalangga ha usa kag usa?

¹⁶ Hunahunaa an mag-opay nga resulta kon magpapakita kita hin malumo nga pagpalangga ha usa kag usa. Naliliaw naton an kabugtoan ha panahon nga nanginginahanglan hira hin bulig. Napaparig-on naton an pagkaurosa han katawohan han Dios. Napapamatud-an naton nga mga disipulo kita ni Jesus, ngan nakakaaghat ini ha sinsero nga mga tawo nga mag-alagad kan Jehova. Labaw ha ngatanan, napapasidunggan naton hi Jehova, “an Amay han malumo nga kalooy ngan an Dios han ngatanan nga pagliaw.” (2 Cor. 1:3) Hinaot padayon nga kultibaron ngan ipakita naton an malumo nga pagpalangga!