1. Ano nga makuri nga sitwasyon an naeksperyensyahan ni David?

 HI David napalagiw kay namimilegro an iya kinabuhi. Gin-iikaparatay gud hiya han gamhanan nga hadi han Israel nga hi Saul. Han nanginahanglan hi David hin pagkaon, inundang hiya ha syudad han Nob, diin nangaro hiya hin lima la nga tinapay. (1 Sam. 21:1, 3) Ha urhi, hiya ngan an iya mga tawo nagtago ha usa nga lungib. (1 Sam. 22:1) Paonan-o nahingada hito nga sitwasyon hi David?

2. Paonan-o iginbutang ni Saul an iya kalugaringon ha peligro? (1 Samuel 23:16, 17)

² Nangangabugho gud hi Saul kan David tungod han pagin popular ni David ngan han iya mga kadaogan ha pakig-away. Maaram liwat hi Saul nga tungod han iya pagin diri masinugtanon, ginsalikway hiya ni Jehova sugad nga hadi han Israel ngan ginpili ni Jehova hi David para magin hadi. (Basaha an 1 Samuel 23:16, 17.) Pero tungod kay hi Saul la gihapon an hadi han Israel, may-ada hiya damu nga kasundalohan ngan damu nga taga-suporta, salit kinahanglan pumalagiw hi David basi matalwas hiya. Naghunahuna gud ba hi Saul nga kaya niya kontrahon an katuyoan han Dios para kan David? (Isa. 55:11) Waray ginsisiring an Biblia, pero makakasiguro kita hini: Iginbubutang ni Saul an iya kalugaringon ha peligro. Adton mga nakontra ha Dios pirme gud napipirde!

3. Ano an inabat ni David bisan pa han iya kahimtang?

³ Hi David diri ambisyoso. Diri hiya an nagbuot nga magin hadi hiya han Israel. Hi Jehova an nagpili ha iya. (1 Sam. 16:1, 12, 13) Gintratar ni Saul hi David sugad nga mortal nga kaaway. Pero waray basola ni David hi Jehova ha iya delikado nga kahimtang; waray liwat hiya magreklamo nga gutiay la an iya pagkaon ngan kinahanglan niya magtago ha usa nga lungib. Lugod, posible nga  samtang nagtatago hiya hito nga lungib, ginkomposo niya an maopay nga kanta han pagdayaw nga kaapi hito an mga pulong han aton tema nga teksto: “An mga namimiling kan Jehova diri makukulangan hin bisan ano nga maopay.”​—Sal. 34:10.

4. Ano nga mga pakiana an aton babatunon, ngan kay ano nga importante ito?

⁴ Yana, damu han mga surugoon ni Jehova an nagkukulang hin pagkaon ngan han iba pa nira nga mga panginahanglan. * Nahitatabo gud ini labi na durante han pandemya. Ngan samtang nagtitikahirani an “daku nga kasakitan,” mas magigin makuri pa gud an aton panahon. (Mat. 24:21) Salit makakapahimulos kita kon babatunon naton inin upat nga pakiana: Ha ano nga paagi hi David waray ‘magkulang hin bisan ano nga maopay’? Kay ano nga kinahanglan kita mahibaro nga magin kontento? Kay ano nga makakasarig kita nga aatamanon kita ni Jehova? Ngan paonan-o kita makakapangandam yana para ha tiarabot?

5-6. Paonan-o an Salmo 23:1-6 nabulig ha aton nga masabtan kon ano an karuyag sidngon ni David han nagsiring hiya nga an mga surugoon ni Jehova “diri makukulangan hin bisan ano nga maopay”?

⁵ Ano an iginpapasabot ni David han nagsiring hiya nga an mga surugoon ni Jehova “diri makukulangan hin bisan ano nga maopay”? Makakakuha kita hin ideya pinaagi ha pagkonsiderar han puropariho nga mga pulong nga mababasa ha Salmo 23. (Basaha an Salmo 23:1-6.) Gintikangan ni David ini nga salmo pinaagi hini nga mga pulong: “Hi Jehova an akon Paraataman. Diri ako makukulangan hin bisan ano.” Ha iba pa nga bahin hini nga salmo, gin-unabi ni David an mga butang nga importante gud​—an hura nga espirituwal nga bendisyon nga iya napapahimulosan tungod kay ginkarawat niya hi Jehova sugad nga iya Paraataman. Gintutugwayan hiya ni Jehova “ha mga dalan han katadongan,” ngan maunungon nga ginsusuportaran hiya ni Jehova ha mag-opay nga mga panahon ngan ha magraot nga mga panahon. Maaram hi David nga an iya kinabuhi ha “magrabong nga mga panabsaban”  ni Jehova diri kay magigin waray mga problema. Usahay, bangin manluya hiya nga sugad hin naglalakat hiya “ha walog nga duro an kasirom,” ngan magkakaada hiya mga kaaway. Pero tungod kay hi Jehova an Paraataman ni David, ‘diri hiya mahahadlok ha peligro.’

⁶ Salit ini an baton hini nga pakiana: Ha ano nga paagi hi David waray ‘magkulang hin bisan ano nga maopay’? May-ada hi David han ngatanan niya nga ginkikinahanglan basi magpabilin nga duok kan Jehova. An iya kalipay diri nakadepende ha materyal nga mga butang. Kontento hi David ha kon ano an igintatagana ni Jehova. An pinakaimportante ha iya amo an bendisyon ngan proteksyon han iya Dios.

7. Sumala ha Lucas 21:20-24, ano nga makuri nga sitwasyon an naeksperyensyahan han siyahan-siglo nga mga Kristiano ha Judea?

⁷ Mahibabaroan naton ha ginsiring ni David nga importante gud nga magkaada kita husto nga panhunahuna ha materyal nga mga butang. Mahimo gud naton mapahimulosan an materyal nga mga butang nga may-ada kita, pero kinahanglan diri ito an magin pinakaimportante ha aton kinabuhi. Ito an usa nga importante nga kamatuoran nga nasabtan han siyahan-siglo nga mga Kristiano nga naukoy ha Judea. (Basaha an Lucas 21:20-24.) Ginpahamangnoan hira ni Jesus nga maabot an panahon nga an syudad han Jerusalem ‘papalibotan han nagkakampo nga mga kasundalohan.’ Kon mahitabo ito, kinahanglan nira “magtikang na pagpalagiw ngadto ha kabukiran.” Kon bubuhaton nira ito, matatalwas hira, pero damu nga butang an kinahanglan nira isakripisyo. Mga pipira na ka tuig an naglabay, ini an ginsiring han An Barantayan: “Binayaan nira an mga kaumhan ngan mga balay, waray ngani tiroka an ira mga panag-iya tikang ha ira mga balay. Tungod kay nasarig ha panalipod ngan suporta ni Jehova, inuna nira an pagsingba ha iya ha ngatanan nga butang nga bangin importante.”

8. Ano nga importante nga leksyon an aton mahibabaroan ha nahitabo ha siyahan-siglo nga mga Kristiano nga naukoy ha Judea?

⁸ Ano nga importante nga leksyon an aton mahibabaroan ha nahitabo ha siyahan-siglo nga mga Kristiano nga naukoy ha Judea? An Barantayan nga gin-unabi pa la nagsiring: “Bangin may-ada mga pagsari ha unhan kon mationan-o naton ginhuhunahuna an materyal nga mga butang; ito ba an pinakaimportante, o an kaluwasan nga maabot ha ngatanan nga nadapig ha Dios an mas importante? Oo, an aton pagpalagiw bangin mag-upod hin pipira nga mga kakurian ngan sakripisyo. Kinahanglan magin andam kita ha pagbuhat anoman an pagkinahanglanon, sugad han ginbuhat han aton kapariho siyahan-siglo nga mga Kristiano nga nanmalagiw tikang ha Judea.” *

9. Paonan-o ka napaparig-on han sagdon ni apostol Pablo ha mga Hebreo?

⁹ Naiimadyin mo ba kon ano kakuri para hito nga mga Kristiano nga bayaan an haros ngatanan nga may-ada hira ngan magtikang magkinabuhi ha bag-o nga lugar? Kinahanglan nira hin pagtoo basi sumarig nga itatagana ni Jehova an ira nangunguna nga mga panginahanglan. Pero may usa nga butang nga makakabulig ha ira. Lima ka tuig antes palibotan han mga Romano an Jerusalem, hi apostol Pablo naghatag ha mga Hebreo hin maopay nga sagdon: “Mahigawas ha paghigugma ha kwarta an iyo pagkinabuhi, samtang kontento na kamo ha mga butang nga aada. Kay hiya nagsiring: ‘Diri ko gud ikaw babayaan, ngan diri ko gud ikaw papabay-an.’ Basi magin maisugon gud kita ngan makasiring: ‘Hi Jehova an akon parabulig; diri ako mahahadlok. Ano an mahihimo ha akon han tawo?’” (Heb. 13:5, 6) An mga nag-aplikar han sagdon ni Pablo antes sumulong an mga Romano sigurado nga waray makurii ha pagpahiuyon ha mas simple nga pagkinabuhi ha ira bag-o nga urukyan. Sigurado  hira nga itatagana ni Jehova an ira nangunguna nga mga panginahanglan. An ginsiring ni Pablo nagpapasarig liwat ha aton nga itatagana ni Jehova an aton mga panginahanglan.

10. Ano nga “sekreto” an iginsumat ha aton ni Pablo?

¹⁰ Hi Pablo naghatag hin puropariho nga sagdon kan Timoteo, ngan aplikado liwat ito ha aton. Hiya nagsurat: “Salit kon may-ada kita pagkaon ngan bado, magin kontento kita hini nga mga butang.” (1 Tim. 6:8) Iginpapasabot ba hini nga diri kita puydi kumaon hin marasa nga pagkaon, magkaada maopay nga balay, o pumalit hin bag-o nga bado ha panapanahon? Diri ito an karuyag sidngon ni Pablo. Hiya nasiring nga kinahanglan magin kontento kita ha anoman nga materyal nga butang nga may-ada kita. (Fil. 4:12) Ito an “sekreto” ni Pablo. An aton pinakapresyoso nga panag-iya amo an aton relasyon ha aton Dios, diri an bisan ano nga materyal nga butang nga may-ada kita.​—Hab. 3:17, 18.

11. Ano nga leksyon mahitungod ha pagin kontento an aton mahibabaroan ha ginsiring ni Moises ha mga Israelita?

¹¹ Bangin may kaibahan an aton panhunahuna ngan an panhunahuna ni Jehova may kalabotan ha kon ano an aton ginkikinahanglan. Tagda an ginsiring ni Moises ha mga Israelita katapos han ira 40 ka tuig ha kamingawan: “Hi Jehova nga imo Dios nagbendisyon ha imo ha ngatanan nga imo ginbuhat. Maaram gud hiya han imo pagbinaktas hini nga haluag nga kamingawan. Ha sulod hin 40 ka tuig kaupod mo hi Jehova nga imo Dios, ngan waray ka magkulang hin bisan ano.” (Deut. 2:7) Hiton 40 ka tuig, gintaganahan ni Jehova an mga Israelita hin manna nga  makakaon. An ira bado nga ira mismo sul-ot tikang han binaya hira ha Ehipto, waray gud madaan. (Deut. 8:3, 4) Bisan kon para ha iba kulang ito nga mga probisyon, ginpahinumdoman ni Moises an mga Israelita nga may-ada hira han ngatanan nga ira ginkikinahanglan. Malilipay gud hi Jehova kon mahibabaro kita nga magin kontento​—apresyaron bisan an simple nga tagana nga iya iginhahatag ha aton, ngan hunahunaon ito sugad nga bendisyon ngan magpasalamat tungod hito.

12. Ano an nagpapakita nga kan Jehova nasarig hi David, diri ha iya kalugaringon?

¹² Maaram hi David nga hi Jehova maunungon ngan nahigugma gud hadton mga nahigugma ha iya. Bisan kon naninelikado an kinabuhi ni David han ginkomposo niya an Salmo 34, tungod han iya mga mata han pagtoo, nakita niya “an anghel ni Jehova” nga nagkakampo ha “palibot” niya. (Sal. 34:7) Posible nga iginpariho ni David an anghel ni Jehova ha usa nga sundalo nga nagkakampo ha uma, pirme alerto ha mga kaaway. Bisan kon hi David usa nga maisugon nga sundalo ngan ginsaaran hiya ni Jehova nga magigin hadi hiya, waray hiya sumarig ha iya abilidad ha pagpalabyog hin bato o ha paggamit hin espada basi pirdihon an kaaway. (1 Sam. 16:13; 24:12) Sinarig hi David ha Dios; may kompyansa hiya nga an anghel ni Jehova ‘magtatalwas ha mga nahahadlok ha Iya.’ Syempre, diri kita naglalaom hin milagroso nga proteksyon yana. Pero maaram kita nga an mga nasarig kan Jehova diri gud makakaeksperyensya hin nagpapadayon nga kadaot.

13. Kon umatake na an Gog han Magog, kay ano nga baga hin magigin masayon la kita mapirde, pero kay ano nga diri kita angay mahadlok? (Kitaa an retrato ha kobre.)

¹³ Diri na mag-iiha, masasarihan an aton pagsarig nga kaya kita proteksyonan ni Jehova. Kon an Gog han Magog, usa nga alyansa han mga nasud, umatake na ha katawohan han Dios, bangin hunahunaon naton nga naninelikado an aton kinabuhi. Kinahanglan makombinse kita nga kaya kita talwason ni Jehova ngan bubuhaton niya ito. Para ha mga nasud, baga kita hin mga karnero nga waray mahihimo ngan waray proteksyon. (Ezek. 38:10-12) Diri kita magkakaada armas, ngan diri kita babansayon ha pakig-away. Huhunahunaon han mga nasud nga masayon la kita mapirde. Diri nira makikita an nakikita han aton mga mata han pagtoo—an damu gud nga anghel nga nagkakampo ha palibot han katawohan han Dios, nga andam pagdepensa ha aton. Syempre, an mga nasud diri gud makakakita ha ira. Waray hira pagtoo ha Dios. Kakalasan gud hira kon umabot na an langitnon nga mga hugpo basi makig-away para ha aton!​—Pah. 19:11, 14, 15.

14. Ano an mahimo naton buhaton yana basi makapangandam para ha tiarabot?

¹⁴ Ano an mahimo naton buhaton yana basi makapangandam para ha tiarabot? Siyahan ha ngatanan, kinahanglan magkaada kita husto nga panhunahuna ha materyal nga mga butang, kay maabot an adlaw nga kinahanglan naton bayaan an anoman nga butang nga may-ada kita. Kinahanglan liwat kita magin kontento ngan magkaada daku gud nga kalipay ha aton relasyon kan Jehova. Samtang mas nakikilala naton an aton Dios, mas magigin kombinsido kita nga kaya kita niya proteksyonan kon umatake na an Gog han Magog.

15. Ano an mga naeksperyensyahan ni David han batan-on pa hiya nga nagtutdo ha iya nga pirme gud hiya bubuligan ni Jehova?

¹⁵ Tagda kon ano pa an nakabulig kan David ngan makakabulig ha aton nga makapangandam para ha mga pagsari. Hi David nagsiring: “Tilawi ngan kitaa nga hi Jehova maopay; malipayon an tawo nga naayop ha iya.” (Sal. 34:8) Ito nga mga pulong nagsasaysay kon kay ano nga maaram hi David nga makakasarig hiya ha bulig ni Jehova.  Hi David pauroutro nga sinarig kan Jehova, ngan pirme gud hiya ginbubuligan han iya Dios. Han batan-on hi David, nakig-away hiya ha higante nga Filisteo nga hi Goliat, ngan ginsidngan niya iton mapintas nga girriro: “Hini mismo nga adlaw ihahatag ka ni Jehova ha akon kamot.” (1 Sam. 17:46) Ha urhi, hi David nagserbi kan Hadi Saul, nga damu ka beses nga naniguro nga patayon hiya. Pero “hi Jehova kaupod” ni David. (1 Sam. 18:12) Tungod kay naeksperyensyahan ni David an bulig ni Jehova han naglabay, maaram hiya nga makakasarig hiya nga bubuligan hiya ni Jehova ha mga problema nga iya naieksperyensyahan.

16. Ano an praktikal nga mga paagi nga ‘matitilawan’ naton an pagkamaopay ni Jehova?

¹⁶ Samtang mas nasarig kita ha giya ni Jehova yana, mas masarig kita nga kaya kita niya talwason ha tiarabot. Kinahanglan naton hin pagtoo ngan magin andam nga sumarig kan Jehova basi maghangyo ha aton agaron nga mag-leave ha trabaho basi makatambong kita ha asembleya o kombensyon o maghangyo nga bag-uhon an eskedyol han aton trabaho basi makatambong kita ha ngatanan naton nga katirok ngan magkaada dugang nga panahon ha ministeryo. Sidngon naton nga waray maruyag an aton agaron ha aton hangyo ngan natanggal kita ha trabaho. May pagtoo ba kita nga diri kita babayaan o papabay-an ni Jehova ngan pirme kita niya tataganahan han aton nangunguna nga mga panginahanglan? (Heb. 13:5) Damu nga nag-aalagad hin bug-os-panahon an makakagsumat hin mga eksperyensya kon paonan-o hira ginbuligan ni Jehova ha panahon nga ginkikinahanglan gud nira hiya. Masasarigan gud hi Jehova.

17. Ano an tinuig nga teksto para ha 2022, ngan kay ano nga angayan ito?

¹⁷ Kon kaupod naton hi Jehova, waray kita rason nga mahadlok ha mahitatabo ha tiarabot. Diri gud kita papabay-an han aton Dios basta unahon naton ha aton kinabuhi an iya Ginhadian. Basi pahinumdoman kita nga kinahanglan naton mangandam yana para ha magkuri nga mahitatabo ha tiarabot ngan sumarig nga diri gud kita papabay-an ni Jehova, ginpili han Nagmamando nga Lawas an Salmo 34:10 sugad nga aton tinuig nga teksto para ha 2022: “An mga namimiling kan Jehova diri makukulangan hin bisan ano nga maopay.”