1. Paonan-o naton mahimo makaupod hi Jehova?

 NALILIPAY gud kita ha paggahin hin panahon nga makaupod an mga tawo nga aton hinigugma. An usa nga malipayon nga mag-asawa naruruyag gud nga maggahin hin panahon nga makaupod nira an usa kag usa. An mga batan-on nag-i-enjoy gud nga makaupod an ira duok nga kasangkayan. Ngan ginpapabilhan naton ngatanan an panahon nga aton igin-gagahin basi makaupod an aton mga igkasi-tumuroo. Pero labaw ha ngatanan, nalilipay gud kita ha paggahin hin panahon nga makaupod an aton Dios. Mahihimo naton ini pinaagi ha pag-ampo ha iya, pagbasa han iya Pulong, ngan pagpamalandong han iya katuyoan ngan mag-opay nga mga kalidad. Presyoso gud an panahon nga aton igin-gagahin para kan Jehova!​—Sal. 139:17.

2. Kay ano nga diri pirme masayon an paggahin hin panahon nga makaupod hi Jehova?

² Bisan kon nalilipay gud kita ha paggahin hin panahon nga makaupod hi Jehova, diri ito pirme masayon. Busy gud kita, salit mahimo kita makurian ha pag-eskedyol hin panahon para ha espirituwal nga mga buruhaton. An sekular nga trabaho, mga responsabilidad ha pamilya, ngan iba pa nga importante nga buruhaton mahimo makakuha han kadak-an han aton panahon, salit bangin abaton naton nga waray na kita panahon para ha pag-ampo, pag-aram, o pagpamalandong.

3. Ano an usa pa nga butang nga makakaubos han aton panahon?

³ May usa pa nga butang nga diri abat nga makakaubos han aton panahon. Kon diri kita maghihirot, an mga buruhaton nga diri man maraot mahimo makakuha han panahon nga magagamit unta naton basi magin mas duok kita kan Jehova. Pananglitan, tagda an pagpahalibway. Importante nga magkaada kita panahon  para hito. Pero bisan kon maopay man an pagpahalibway nga aton ginpipili, kon daku gud nga panahon an aton igin-gagahin hito, mawawad-an na kita panahon para ha espirituwal nga mga buruhaton. Kinahanglan hinumdoman naton nga an pagpahalibway diri amo an pinakaimportante.​—Prob. 25:27; 1 Tim. 4:8.

4. Ano an aton yana hihisgotan?

⁴ Hini nga artikulo, hihisgotan naton kon kay ano nga kinahanglan maghimo kita hin tama nga mga prayoridad. Hihisgotan liwat naton kon paonan-o naton magagamit ha pinakamaopay nga paagi an aton panahon kaupod hi Jehova ngan kon paonan-o kita makakapahimulos ha maaramon nga paggamit han aton panahon.

5. Paonan-o an sagdon ha Efeso 5:15-17 makakabulig ha usa nga batan-on nga mapili niya an pinakamaopay nga pagkinabuhi?

⁵ Pilia an pinakamaopay nga pagkinabuhi. An mga batan-on kaurogan na nga interesado gud kon paonan-o nira magagamit an ira kinabuhi ha pinakamaopay nga paagi. Ha usa nga bahin, an ira mga titser ngan mga kapamilya nga diri Saksi bangin mag-aghat ha ira nga mag-eskwela ha kolehiyo basi magkaada hira maopay nga trabaho ngan damu nga kwarta. Ito nga klase hin edukasyon posible makakuha han ira daku nga panahon. Ha luyo nga bahin, an mga kag-anak ngan mga kabugtoan ha kongregasyon bangin magdasig ha mga batan-on nga gamiton an ira kinabuhi ha pag-alagad kan Jehova. Ano an makakabulig ha usa nga batan-on nga nahigugma kan Jehova basi makahimo hiya han pinakamaopay nga desisyon? Magpapahimulos hiya pinaagi ha pagbasa han Efeso 5:15-17 ngan pagpamalandong hito. (Basaha.) Katapos basahon ini nga mga bersikulo, mahimo pakianhan han usa nga batan-on an iya kalugaringon: ‘Ano “an kaburut-on ni Jehova”? Ano nga desisyon an makakapalipay ha iya? Ano nga desisyon an makakabulig ha akon nga magamit ko ha pinakamaopay nga paagi an akon panahon?’ Hinumdumi nga “an mga adlaw magraot,” ngan ini nga kalibotan nga ginmamandoan ni Satanas hirani na matapos. Maaramon gud kon gagamiton naton an aton kinabuhi ha paagi nga makakapalipay kan Jehova.

6. Ano an ginpili ni Maria, ngan kay ano nga maaramon ito?

⁶ Magkaada tama nga mga prayoridad. Usahay, basi magamit naton ha pinakamaopay nga paagi an aton panahon bangin kinahanglan naton pumili butnga ha duha nga buruhaton nga diri man maraot. Ginpapabug-atan ito nga punto ha pamilyar nga asoy mahitungod ha pagbisita ni Jesus ha balay nira Maria ngan Marta. Sigurado nga nalipay an maabiabihon nga hi Marta nga binisita ha ira hi Jesus, salit nag-andam hiya hin damu nga pagkaon. Pero ginsalingabot han iya bugto nga hi Maria ito nga pagbisita ni Jesus; liningkod hiya hirani ha iya Ginoo ngan namati ha iya mga igintutdo. Bisan kon maopay gud an intensyon ni Marta, “ginpili [ni Maria] an pinakamaopay nga bahin.” (Luc. 10:38-42, ftn.) Ha urhi, bangin nakalimtan ni Maria kon ano an ira pagkaon hito nga okasyon, pero makakasiguro kita nga waray gud niya hingalimti an iya nahibaroan tikang kan Jesus. Sugad la nga ginpabilhan ni Maria an limitado nga panahon kaupod hi Jesus, ginpapabilhan liwat naton an aton panahon kaupod hi Jehova. Paonan-o naton magagamit ha pinakamaopay nga paagi ito nga panahon?

7. Kay ano nga importante gud an pag-ampo, pag-aram, ngan pagpamalandong?

⁷ Kinahanglan masabtan naton nga an pag-ampo, pag-aram, ngan pagpamalandong bahin han aton pagsingba. Kon nag-aampo kita, nakikig-istorya kita ha aton langitnon nga Amay, nga nahigugma gud ha aton. (Sal. 5:7) Kon nag-aaram kita han Biblia, nagkukuha kita han  “kahibaro mahitungod ha Dios,” nga amo an gintitikangan han ngatanan nga kinaadman. (Prob. 2:1-5) Kon namamalandong kita, ginhuhunahuna naton an makaruruyag nga personalidad ni Jehova pati an iya urusahon gud nga katuyoan para ha aton ngan ha ngatanan nga tawo. Waray na gud mas maopay nga paagi nga magagamit mo an imo panahon! Pero paonan-o naton bug-os nga mapapahimulsan an aton limitado nga panahon?

8. Ano nga leksyon an aton mahibabaroan ha paagi han paggamit ni Jesus han iya panahon ha kamingawan?

⁸ Kon posible, pamiling hin mamingaw nga lugar. Tagda an ehemplo ni Jesus. Antes niya tikangan an iya ministeryo dinhi ha tuna, naggahin hiya hin 40 ka adlaw ha kamingawan. (Luc. 4:1, 2) Hiton mamingaw nga lugar, nakag-ampo hi Jesus kan Jehova ngan napamalandong niya an kaburut-on han iya Amay para ha iya. Tungod hito, nabuligan hi Jesus nga magin andam ha mga pagsari nga hirani na niya maeksperyensyahan. Paonan-o ka makakapahimulos ha ehemplo ni Jesus? Kon daku an iyo pamilya, bangin diri pirme masayon para ha imo nga makabiling hin mamingaw nga dapit ha iyo balay. Hito nga kahimtang, mahimo ka mamiling hin mamingaw nga lugar ha gawas. Ito an ginbubuhat ni Julie kon karuyag niya mag-ampo kan Jehova. Hira nga mag-asawa naukoy ha gutiay nga apartment ha France, ngan makuri hiya makabiling hin higayon nga mag-usahan la ngan waray makadisturbo ha iya. “Salit napakadto ako ha park kada adlaw,” siring ni Julie. “Didto puydi ako mag-usahan, makapokus, ngan makiistorya kan Jehova.”

9. Bisan pa han busy nga eskedyol ni Jesus, paonan-o niya iginpakita nga importante gud ha iya an iya relasyon kan Jehova?

⁹ Busy gud hi Jesus. Durante han iya ministeryo dinhi ha tuna, nagsinunod ha iya ngadto ha iba-iba nga lugar an damu nga tawo ngan karuyag nira ngatanan nga tagan niya hira hin panahon. Makausa, “an ngatanan nga tawo ha syudad nagtirirok dida mismo ha purtahan” basi makita hiya. Bisan pa hito, ginsiguro ni Jesus nga maataman an iya relasyon kan Jehova. Antes sumirang an adlaw, kinadto hiya ha “usa nga lugar nga nahibubulag” diin mahimo hiya maggahin hin panahon nga nag-uusahan la hiya kaupod an iya Amay.​—Mar. 1:32-35.

10-11. Sumala ha Mateo 26:40, 41, ano nga napapanahon nga sagdon an iginhatag ni Jesus ha iya mga disipulo ha garden han Getsemani, pero ano an nahitabo?

¹⁰ Ha ultimo nga gab-i han kinabuhi ni Jesus dinhi ha tuna, han hirani na matapos an iya ministeryo, namiling hiya utro hin mamingaw nga lugar diin makakapamalandong ngan makakag-ampo hiya. Nabilngan niya ito ha garden han Getsemani. (Mat. 26:36) Hito nga higayon, naghatag hi Jesus ha iya mga disipulo hin napapanahon nga sagdon mahitungod ha pag-ampo.

¹¹ Tagda an nahitabo. Pag-abot nira ha garden han Getsemani, hilarom na an kagab-ihon, posible nga lahos na ha katutnga. Ginsidngan ni  Jesus an iya mga apostol nga “padayon kamo nga magbantay,” ngan linarga hiya basi mag-ampo. (Mat. 26:37-39) Pero samtang nag-aampo hiya, nahingaturog hira. Han naabtan niya nga nangangaturog hira, gin-aghat niya utro hira nga “padayon . . . nga magbantay ngan mag-ampo.” (Basaha an Mateo 26:40, 41.) Maaram hiya nga naiistres gud hira ngan kapoy. Mapinairon nga nagsiring hi Jesus nga “an unod maluya.” Bisan pa hito, duha ka beses pa hiya nga linarga basi mag-ampo, ngan han pagbalik niya, naabtan niya an iya mga disipulo nga nangangaturog imbes nga mag-ampo.​—Mat. 26:42-45.

12. Ano an mahimo naton buhaton kon usahay inaabat naton nga istres gud kita o kapoy gud salit waray na kita kusog para mag-ampo?

¹² Pagpili han tama nga panahon. Usahay, bangin istres gud kita o kapoy gud salit waray na kita kusog para mag-ampo. Kon naeksperyensyahan mo na ito, diri ka nag-uusahan. Ano an mahimo mo buhaton? An pipira nga nahiara mag-ampo kan Jehova ha kataposan han adlaw, nakita nira nga nakakabulig ha ira kon nag-aampo hira mas temprano han gab-i diin diri pa hira sobra nga kinakapoy. Nakita naman han iba nga mas nakakapokus hira kon nag-aampo hira ha partikular nga posisyon. Pero paonan-o kon sobra ka nga nababaraka o nasusubo gud salit waray ka na kusog para mag-ampo? Isumat kan Jehova an imo inaabat. Makakasiguro ka nga maiintindihan ka han aton maloloy-on nga Amay.​—Sal. 139:4.

13. Paonan-o mahimo makadisturbo ha aton an mga gadyet kon nag-aampo kita, nag-aaram, o natambong ha mga katirok?

¹³ Ayaw pagpadisturbo kon nag-aaram ka. An pag-ampo diri la amo an paagi basi maparig-on an aton relasyon kan Jehova. An pag-aram han Pulong han Dios ngan an pagtambong ha mga katirok ha kongregasyon makakabulig liwat nga magin mas duok kita ha Dios. May mahihimo ka ba basi magamit mo ha pinakamaopay nga paagi an imo panahon para ha pag-aram ngan ha pagtambong ha mga katirok? Pakianhi an imo kalugaringon, ‘Ano an kaurogan na nga nakakagwara han akon pokus kon aadto ako ha mga katirok o kon nag-aaram ako?’ An imo ba nakakarawat nga mga tawag, email, o text ha imo celfon o ha iba pa nga gadyet? Yana, binilyon nga tawo an may-ada hinin mapulsanon nga mga garamiton. An iba nga researcher nasiring nga kon nangangalimbasog kita nga magpokus, mahimo kita madisturbo kon hirani ha aton an aton celfon. “Diri ka makakapokus ha imo ginbubuhat,”  siring han usa nga propesor han psychology. “An imo hunahuna magpapatlaag.” Antes magtikang an mga asembleya ngan kombensyon, kaurogan na nga ginsisidngan kita nga i-adjust an aton mga gadyet ha silent mode basi diri ito makadisturbo ha iba. Puydi ba liwat naton ito himoon kon nag-uusahan la kita basi an aton mga gadyet diri makadisturbo ha aton ngan makaulang han aton panahon kaupod hi Jehova?

14. Sumala ha Filipos 4:6, 7, paonan-o kita bubuligan ni Jehova nga makapokus?

¹⁴ Paghangyo kan Jehova nga buligan ka nga makapokus. Kon napapansin mo nga nagpapatlaag an imo hunahuna ha panahon nga nag-aaram ka o natambong ka ha katirok, paghangyo kan Jehova nga buligan ka. Kon may mga ginkakabarak-an ka, bangin diri masayon nga diri la anay ito hunahunaon ngan magpokus ha espirituwal nga mga butang, pero importante gud nga buhaton mo ito. Pag-ampo para han kamurayawan nga magbabantay diri la han imo kasingkasing kondi pati han imo “panhunahuna.”​—Basaha an Filipos 4:6, 7.

15. Ano an usa nga kapulsanan han paggahin hin panahon kaupod hi Jehova?

¹⁵ Kon naggagahin ka hin panahon basi makiistorya kan Jehova, mamati ha iya, ngan hunahunaon an mahitungod ha iya, magpapahimulos ka gud. Paonan-o? Siyahan, makakahimo ka hin mas maopay nga mga desisyon. An Biblia nagpapasarig ha aton nga “an tawo nga naglalakat upod han mga maaramon magigin maaramon.” (Prob. 13:20) Salit samtang naggagahin ka hin panahon kaupod an gintitikangan han kinaadman nga hi Jehova, magigin mas maaramon ka. Masasabtan mo hin mas maopay kon paonan-o hiya mapapalipay ngan kon paonan-o malilikyan nga makahimo hin mga desisyon nga makakapasubo ha iya.

16. Kay ano nga nagigin mas maopay kita nga magturutdo kon naggagahin kita hin panahon kaupod hi Jehova?

¹⁶ Ikaduha, magigin mas maopay ka nga magturutdo. Kon may gindudumarahan kita nga pag-aram ha Biblia, usa han aton pinakaimportante nga mga tumong amo an pagbulig ha aton estudyante nga magin duok kan Jehova. Samtang mas nakikigkomunikar kita ha aton langitnon nga Amay, mas magtutubo an aton gugma ha iya ngan magigin mas may kapas kita ha pagtutdo ha aton estudyante nga higugmaon hiya. Ito an ginbuhat ni Jesus. Iginhulagway niya hi Jehova sugad nga buotan ngan mahigugmaon nga Amay, salit nabuligan niya an iya matinumanon nga mga sumurunod nga higugmaon liwat hi Jehova.​—Juan 17:25, 26.

17. Kay ano nga an pag-ampo ngan pag-aram nakakabulig nga maparig-on an aton pagtoo?

¹⁷ Ikatulo, magigin mas marig-on an imo pagtoo. Tagda kon ano an nahitatabo kon nangangaro ka ha Dios hin giya, pagliaw, o bulig. Ha kada panahon nga ginbabaton ni Jehova an imo  mga pag-ampo, nagririg-on an imo pagtoo ha iya. (1 Juan 5:15) Ano pa an makakabulig basi magrig-on an imo pagtoo? An personal nga pag-aram. Hinumdumi nga “nagkakaada la hin pagtoo katapos mabatian an butang.” (Roma 10:17) Pero basi magkaada marig-on nga pagtoo, labaw pa kay ha pagkuha la hin kahibaro an ginkikinahanglan. Ano pa an kinahanglan naton buhaton?

18. Paghatag hin ehemplo kon kay ano nga kinahanglan naton mamalandong.

¹⁸ Kinahanglan pamalandungon naton an aton mga nahibabaroan. Tagda an eksperyensya han parasurat han Salmo 77. Nasakit gud hiya tungod kay inabat niya nga diri na hiya gin-uuyonan ni Jehova pati an iya mga igkasi-Israelita. Tungod han iya sobra nga kabaraka, diri hiya nahingangaturog ha gab-i. (Bersikulo 2-8) Ano an iya ginbuhat? Nagsiring hiya kan Jehova: “Akon papamalandungon an ngatanan nga imo ginbubuhat ngan huhunahunaon ko an imo mga buhat.” (Bersikulo 12) Syempre, maaram gud an salmista han mga ginbuhat hadto ni Jehova para ha Iya katawohan, pero nababaraka nga nagpakiana hiya: “Nahingalimot ba an Dios ha pagpakita han iya pagkabuotan, o tungod ba han iya kasina nawara na an iya kalooy?” (Bersikulo 9) Ginpamalandong han salmista an mga ginbuhat ni Jehova ngan an kalooy ngan pagpaid nga Iya iginpakita hadto. (Bersikulo 11) Ano an resulta? Nagin kombinsido an salmista nga diri gud papabay-an ni Jehova an Iya katawohan. (Bersikulo 15) Sugad man, nagigin mas marig-on an imo pagtoo samtang ginpapamalandong mo an mga ginbuhat na ni Jehova para ha iya katawohan ngan an iya ginbubuhat para ha imo.

19. Ano pa an aton mapapahimulsan kon naggagahin kita hin panahon kaupod hi Jehova?

¹⁹ Ikaupat, ngan an pinakaimportante, maghihilarom an imo gugma kan Jehova. An gugma nga labaw kay ha bisan ano nga kalidad, magpapagios ha imo nga sugton hi Jehova, maghimo hin mga sakripisyo basi mapalipay hiya, ngan magpailob ha bisan ano nga pagsari. (Mat. 22:37-39; 1 Cor. 13:4, 7; 1 Juan 5:3) Waray gud bisan ano nga mas presyoso kay han duok ngan mahigugmaon nga pakigsangkay kan Jehova!​—Sal. 63:1-8.

20. Paonan-o mo masisiguro nga may panahon ka kaupod hi Jehova?

²⁰ Hinumdumi nga an pag-ampo, pag-aram, ngan pagpamalandong bahin han aton pagsingba. Pariho kan Jesus, pamiling hin mamingaw nga lugar diin makakagahin ka hin panahon kaupod hi Jehova. Ayaw pagpadisturbo. Paghangyo kan Jehova nga buligan ka nga makapokus kon nakikigbahin ka ha espirituwal nga mga buruhaton. Kon ginagamit mo ha pinakamaopay nga paagi an imo panahon yana, babalosan ka ni Jehova hin kinabuhi nga waray kataposan ha bag-o nga kalibotan han Dios.​—Mar. 4:24.