1-2. (a) San-o labi nga nahinunumdoman naton an usa naton nga hinigugma nga namatay? (b) Ano an gintikangan ni Jesus han gab-i antes hiya mamatay?

 BISAN kon maiha na nga namatay an usa naton nga hinigugma, diri la gihapon naton hiya nahingangalimtan. Labi nga nahinunumdoman naton hiya ha anibersaryo han iya kamatayon.

² Kada tuig, kaupod kita han minilyon ha bug-os nga kalibotan nga nagkakatirok ha anibersaryo han kamatayon han usa nga hinigugma gud naton​—hi Jesu-Kristo. (1 Ped. 1:8) Nagkakatirok kita basi hinumdoman an usa nga naghatag han iya kinabuhi sugad nga lukat basi matalwas kita tikang ha sala ngan kamatayon. (Mat. 20:28) Ngani, karuyag ni Jesus nga hinumdoman han iya mga sumurunod an iya kamatayon. Ha gab-i antes hiya mamatay, gintikangan niya an usa nga espesyal nga panihapon ngan nagsugo: “Padayon nga buhata niyo ini sugad nga hinumdoman ha akon.”​—Luc. 22:19.

3. Ano an aton hihisgotan hini nga artikulo?

³ An pipira nga natambong han Memoryal han kamatayon han Kristo may-ada langitnon nga paglaom. Pero minilyon nga may tunan-on nga paglaom an natambong liwat. Hini nga artikulo, hihisgotan naton an mga rason kon kay ano nga ito nga duha nga grupo naruruyag gud tumambong ha Memoryal kada tuig. Hihisgotan liwat naton kon paonan-o kita nagpapahimulos ha pagtambong. Tikangan naton pinaagi ha paghisgot han pipira nga rason kon kay ano nga natambong an mga dinihogan.

4. Kay ano nga an mga dinihogan nakaon han tinapay ngan nainom han bino ha Memoryal?

⁴ Kada tuig, ginpapamulat han mga dinihogan an pagtambong ha Memoryal ngan nakikigbahin hira ha mga emblema. Kay ano nga angayan nga nakaon hira han tinapay ngan nainom han bino? Basi mabaton ito, hisgotan naton an nahitabo ha ultimo nga gab-i han kinabuhi ni Jesus dinhi ha tuna. Katapos han panihapon ha Paskua, gintikangan ni Jesus an usa nga panihapon nga nagin kilala nga an Panihapon han Ginoo. Iginpasa niya an tinapay ngan an bino ha iya 11 nga matinumanon nga apostol ngan ginsidngan hira nga kumaon ngan uminom. Gin-unabi ni Jesus ha ira an mahitungod han duha nga kasabotan​—an bag-o nga kasabotan ngan an kasabotan han Ginhadian. * (Luc. 22:19, 20, 28-30) Tungod hito nga mga kasabotan, nagin posible para ha mga apostol ngan ha iba pa nga limitado an kadamu nga magin hadi ngan saserdote ha langit. (Pah. 5:10; 14:1) Adton nabibilin nga mga dinihogan la, * nga kaapi hiton duha nga kasabotan, an mahimo kumaon han tinapay ngan uminom han bino ha Memoryal.

5. Ano an nahibabaroan han mga dinihogan mahitungod han paglaom nga iginhatag ha ira?

⁵ Ini an usa pa nga rason kon kay ano nga an mga dinihogan naruruyag gud tumambong ha Memoryal: Ini nga pagsaurog naghahatag ha ira hin oportunidad nga pamalandungon an ira paglaom. Gintagan hira ni Jehova hin maopay gud nga paglaom​—magkaada imortal ngan diri nadudunot nga kinabuhi ha langit, magmando kaupod han ginbanhaw nga hi Jesu-Kristo ngan han iba pa nga kaapi han 144,000 ngan labaw ha ngatanan, makikita nira mismo hi Jehova nga Dios! (1 Cor. 15:51-53; 1 Juan 3:2) Maaram an mga dinihogan nga gin-imbitar hira nga magpahimulos hito nga mga pribilehiyo ha langit. Pero basi makakadto ha langit, kinahanglan nira magpabilin nga matinumanon tubtob ha ira kamatayon. (2 Tim. 4:7, 8) Nalilipay gud an mga dinihogan nga pamalandungon an ira langitnon nga paglaom. (Tito 2:13) Kumusta man an “iba nga mga karnero”? (Juan 10:16) Ano an pipira nga rason nga natambong hira ha Memoryal?

6. Kay ano nga an iba nga mga karnero natambong ha Memoryal kada tuig?

⁶ An iba nga mga karnero natambong ha Memoryal, diri basi makigbahin ha mga emblema, kondi basi magin paraobserbar. Han 1938, siyahan nga gin-imbitar adton may tunan-on nga paglaom nga tumambong han Memoryal. An Marso 1, 1938 nga The Watchtower, nagsiring: “Magigin husto gud la ngan angayan para ha [iba nga mga karnero] nga tumambong hito nga katirok ngan mag-obserbar han ginbubuhat. . . . Dapat magin makalilipay liwat ito nga panahon para ha ira, ngan ito an ira inaabat.” Pariho hin imbitado nga mga bisita nga nalilipay ha pag-obserbar ha usa nga seremonya han kasal, an iba nga mga karnero nalilipay nga tumambong ha Memoryal sugad nga mga paraobserbar.

7. Kay ano nga ginpapamulat han iba nga mga karnero an pahayag ha Memoryal?

⁷ An iba nga mga karnero liwat namamalandong han ira paglaom. Ginpapamulat nira an pahayag ha Memoryal kay an kadak-an nga bahin hito nakapokus han pagbubuhaton han Kristo ngan han 144,000 nga iya mga igkasi-magmarando para ha matinumanon nga mga tawo durante han Usa ka Yukot ka Tuig nga  Pagmando. Ha pagpanguna han ira Hadi nga hi Jesu-Kristo, iton langitnon nga mga magmarando mabulig nga himoon nga magin paraiso an tuna ngan magin perpekto an mga tawo. Nalilipay gud an minilyon nga nag-oobserbar ha Memoryal ha pag-imadyin han katumanan han mga tagna ha Biblia, sugad han mababasa ha Isaias 35:5, 6; 65:21-23; ngan Pahayag 21:3, 4. Samtang gin-iimadyin nira nga aadto hira hiton bag-o nga kalibotan kaupod an ira mga hinigugma, napaparig-on an ira paglaom para ha tiarabot ngan nagigin mas determinado hira nga magpadayon ha pag-alagad kan Jehova.​—Mat. 24:13; Gal. 6:9.

8. Ano an usa pa nga rason kon kay ano nga natambong ha Memoryal an iba nga mga karnero?

⁸ Tagda an usa pa nga rason kon kay ano nga natambong ha Memoryal an iba nga mga karnero. Karuyag nira ipakita an ira gugma ngan suporta ha mga dinihogan. Igintagna han Pulong han Dios nga magkakaada duok gud nga relasyon an mga dinihogan ngan adton may tunan-on nga paglaom. Paonan-o? Hisgotan naton an pipira nga ehemplo.

9. Paonan-o iginhuhulagway han tagna ha Zacarias 8:23 kon ano an inaabat han iba nga mga karnero mahitungod ha mga dinihogan?

⁹ Basaha an Zacarias 8:23. Makapabantad gud an paghulagway hini nga tagna kon ano an inaabat han iba nga mga karnero mahitungod ha ira dinihogan nga kabugtoan. An mga pulong nga “usa nga Judio” ngan “niyo” nagtutudlok ha pariho nga grupo​—an nabibilin nga mga dinihogan. (Roma 2:28, 29) An “napulo nga lalaki tikang ha ngatanan nga yinaknan han mga nasud” nagrirepresentar ha iba nga mga karnero. ‘Nakapot hira hin maopay’​—maunungon gud hira​—ha mga dinihogan, naupod hira ha putli nga pagsingba. Salit ha gab-i han Memoryal, iginpapakita han iba nga mga karnero nga duok gud hira ha mga dinihogan pinaagi ha pagtambong kaupod nira.

10. Ano an ginbubuhat ni Jehova basi matuman an tagna ha Ezekiel 37:15-19, 24, 25?

¹⁰ Basaha an Ezekiel 37:15-19, 24, 25. Sugad nga katumanan hini nga tagna, ginpahinabo ni Jehova nga an mga dinihogan ngan an iba nga mga karnero magkaada marig-on gud nga pagkahiusa. Ito nga tagna nag-uunabi hin duha nga istik. Adton may langitnon nga paglaom pariho han istik “para ha Juda” (an tribo nga gintikangan han ginpili nga mga hadi han Israel), ngan adton may tunan-on nga paglaom pariho han istik “han Efraim.” * Pagtatampuhon ni Jehova inin duha nga grupo basi magin ‘usa nga istik.’ Nagpapasabot ini nga mag-aalagad hira nga nagkakaurosa ilarom han ira usa nga Hadi, hi Kristo Jesus. Kada tuig, an mga dinihogan ngan an iba nga mga karnero natambong ha Memoryal, diri sugad nga magkabulag nga grupo, kondi sugad nga “usa nga panon” ilarom han “usa nga paraataman.”​—Juan 10:16.

11. Paonan-o labi nga iginpapakita han “mga karnero” nga gin-unabi ha Mateo 25:31-36, 40 an ira suporta ha kabugtoan han Kristo?

¹¹ Basaha an Mateo 25:31-36, 40. An “mga karnero” hini nga parabola nagrirepresentar ha mga magtadong ha panahon han kataposan nga may tunan-on nga paglaom—nga amo an iba nga mga karnero. Maunungon nga ginsusuportaran nira an nabibilin nga kabugtoan han Kristo labi na ha pagbulig ha ira nga matuman an daku gud nga responsabilidad—an bug-os-kalibotan nga pagsangyaw ngan panhimo hin mga disipulo nga buruhaton.—Mat. 24:14; 28:19, 20.

12-13. Ano an dugang pa nga mga paagi nga iginpapakita han iba nga mga karnero nga nasuporta hira ha kabugtoan han Kristo?

¹² Kada tuig ha mga semana antes han Memoryal, iginpapakita han iba nga mga karnero  an ira suporta ha kabugtoan han Kristo pinaagi ha pakigbahin gud ha bug-os-kalibotan nga kampanya ha pag-imbitar ha mga interesado nga tumambong ha Memoryal. (Kitaa an kahon nga “ Nagpaplano Ka ba hin Abanse Para ha Panahon han Memoryal?”) Nabulig liwat hira ha pag-asikaso han mga ginkikinahanglan basi an tagsa nga kongregasyon ha bug-os nga kalibotan makagsaurog han Memoryal, bisan kon an kadam-an hito nga mga kongregasyon waray natambong nga dinihogan. Nalilipay an iba nga mga karnero nga suportaran an kabugtoan han Kristo ha sugad nga mga paagi. Maaram ini nga mga karnero nga para kan Jesus, an ira mga ginbubuhat para ha iya kabugtoan sugad hin ginbubuhat mismo ha iya.​—Mat. 25:37-40.

¹³ Ano an dugang pa nga mga rason kon kay ano nga kita ngatanan natambong ha Memoryal anoman an aton paglaom?

14. Paonan-o iginpakita ni Jehova ngan ni Jesus an ira daku nga gugma ha aton?

¹⁴ Mapasalamaton kita han gugma nga iginpakita ni Jehova ngan ni Jesus para ha aton. Iginpakita ni Jehova an iya gugma ha aton ha damu nga paagi, pero may usa nga nalabaw hito ngatanan. Iginpakita han aton Dios an pinakadaku nga kapahayagan han iya diri makikalugaringon nga gugma pinaagi ha pagsugoa han iya pinaura nga Anak basi mag-antos ngan mamatay para ha aton. (Juan 3:16) Maaram kita nga nagpakita liwat hi Jesus hin daku nga gugma pinaagi ha kinaburut-on nga paghatag han iya kinabuhi para ha aton. (Juan 15:13) Diri gud naton mababaydan an iginpakita nga gugma ni Jehova ngan ni Jesus para ha aton. Pero maipapakita naton an aton pagin mapasalamaton ha paagi han aton pagkinabuhi kada adlaw. (Col. 3:15) Ngan natambong kita ha Memoryal basi hinumdoman naton an ira gugma ha aton ngan maipakita liwat naton an aton gugma para ha ira.

15. Kay ano nga gin-aapresyar gud han mga dinihogan ngan han iba nga mga karnero an regalo nga lukat?

¹⁵ Gin-aapresyar gud naton an regalo nga lukat. (Mat. 20:28) Ginpapabilhan gud han mga dinihogan an lukat, nga tungod hito nagin posible nga magkaada hira makalilipay nga paglaom. Tungod han ira pagtoo ha halad han Kristo, iginpahayag hira ni Jehova nga matadong ngan gin-ampon hira sugad nga iya mga anak. (Roma 5:1; 8:15-17, 23) Mapasalamaton liwat an iba nga mga karnero ha lukat. Tungod han ira pagtoo ha iginpaagay nga dugo han Kristo, nagin limpyo hira ha atubangan han Dios, nakakabuhat hira hin sagrado nga pag-alagad ha iya, ngan may-ada hira paglaom nga ‘makatalwas ha daku nga kasakitan.’ (Pah. 7:13-15) An usa nga paagi nga iginpapakita han mga dinihogan ngan han iba nga mga karnero nga mapasalamaton hira ha lukat amo an ira pagtambong ha Memoryal kada tuig.

16. Ano an usa pa nga rason kon kay ano nga natambong kita ha Memoryal?

¹⁶ An usa pa nga rason kon kay ano nga natambong kita ha Memoryal tungod kay karuyag naton sugton hi Jesus. Anoman an aton paglaom ha tiarabot, karuyag han tagsa ha aton nga sundon an sugo ni Jesus ha gab-i nga gintikangan niya an Memoryal: “Padayon nga buhata niyo ini sugad nga hinumdoman ha akon.”​—1 Cor. 11:23, 24.

17. Paonan-o an Memoryal nabulig ha aton nga magin mas duok kan Jehova?

¹⁷ Nagigin mas duok kita kan Jehova. (San. 4:8) Sugad han aton nahibaroan, an Memoryal naghahatag ha aton hin oportunidad nga hunahunaon an paglaom nga iginhatag ha aton ni Jehova ngan pamalandungon an daku nga  gugma nga iya iginpakita ha aton. (Jer. 29:11; 1 Juan 4:8-10) Kon ginpapamalandong naton an aton sigurado nga paglaom ha tiarabot ngan an diri napapas nga gugma han Dios ha aton, napapahilarom naton an aton gugma kan Jehova ngan napaparig-on an aton relasyon ha iya.​—Roma 8:38, 39.

18. An pagpamalandong han ehemplo ni Jesus nagpapagios ha aton nga buhaton an ano?

¹⁸ Napapagios kita nga subaron an ehemplo ni Jesus. (1 Ped. 2:21) Ha mga adlaw antes han Memoryal, nagpupokus kita ha mga asoy han Biblia mahitungod han ultimo nga semana ni Jesus dinhi ha tuna, han iya kamatayon, ngan han iya pagkabanhaw. Katapos, ha gab-i han Memoryal, an pahayag nagpapahinumdom ha aton han gugma ni Jesus para ha aton. (Efe. 5:2; 1 Juan 3:16) Kon ginbabasa naton an mahitungod han mga sakripisyo ni Jesus ngan ginpapamalandong ito, napapagios kita nga “padayon nga maglakat sugad han paglakat niya.”​—1 Juan 2:6.

19. Paonan-o kita makakapabilin ha gugma han Dios?

¹⁹ Nagigin mas determinado pa gud kita nga magpabilin ha gugma han Dios. (Jud. 20, 21) Nagpapabilin kita ha gugma han Dios kon ginbubuhat naton an ngatanan basi sugton hiya, baraanon an iya ngaran, ngan lipayon an iya kasingkasing. (Prob. 27:11; Mat. 6:9; 1 Juan 5:3) An pagsaurog han Memoryal nagpapagios ha aton nga magin mas determinado nga magkinabuhi kada adlaw ha paagi nga sugad hin nasiring kita kan Jehova, ‘Karuyag ko magpabilin ha imo gugma ha kadayonan!’

20. Ano an aton maopay nga mga rason nga natambong kita ha Memoryal?

²⁰ An aton man paglaom mabuhi hin waray kataposan ha langit o dinhi ha tuna, may-ada kita maopay nga mga rason nga tumambong ha Memoryal. Kada tuig, kon nagkakatirok kita hito nga petsa, nahinunumdoman naton an kamatayon han usa nga hinigugma naton, hi Jesu-Kristo. Labaw ha ngatanan, nahinunumdoman naton an pinakadaku nga kapahayagan han gugma​—an gugma nga iginpakita ni Jehova ha aton pinaagi ha paghatagan han iya Anak sugad nga lukat. Yana nga tuig, isasaurog an Memoryal ha gab-i han Biernes, Abril 15, 2022. Hinigugma naton hi Jehova ngan an iya Anak, salit ha anibersaryo han kamatayon ni Jesus, waray gud magigin mas importante ha aton kay ha pagtambong ha Memoryal.