1-2. (a) Ano an bangin abaton ta kon aton ginpapamalandong an kinabuhi ngan ministeryo ni Jesus? (b) Ano an aton hihisgotan hini nga artikulo?

 KON namatay an usa naton nga hinigugma, namimingaw gud kita ha iya. Ha siyahan, bangin puro la kasakit an aton abaton kon nahinunumdoman ta an mga adlaw antes hiya mamatay, labi na kon nag-antos an aton hinigugma antes mamatay. Pero paglabay han panahon, nagtitikang na liwat kita umabat hin kalipay kon aton nahuhunahuna an iya igintutdo ha aton o an iya ginbuhat o ginsiring nga nakapadasig o nakapahiyom ha aton.

² Ha pariho nga paagi, nasusubo kita kon aton nababasa an pag-antos ngan kamatayon ni Jesus. Ha panahon han Memoryal, labi nga gintatagan ta hin panahon an pagpamalandong ha pagkaimportante han iya halad-lukat. (1 Cor. 11:24, 25) Pero nalilipay gud kita kon aton ginpapamalandong an tanan nga ginsiring ngan ginbuhat ni Jesus han nakanhi hiya ha tuna. Nadadasig liwat kita kon aton ginhuhunahuna an iya ginbubuhat yana ngan an iya bubuhaton para ha aton ha tiarabot. An pagpamalandong hini nga mga butang ngan ha iya gugma para ha aton makakapagios ha aton nga ipakita an aton apresasyon ha praktikal nga mga paagi, sugad han aton mahibabaroan hini nga artikulo.

3. Ano an mga rason nga angay kita magin mapasalamaton ha lukat?

³ Mapasalamaton kita kon aton ginpapamalandong an kinabuhi ngan kamatayon ni Jesus. Ha bug-os niya nga ministeryo ha tuna, iya gintutdoan an mga tawo mahitungod ha mga bendisyon nga ihahatag han Ginhadian han Dios. Gin-aapresyar ta gud ini nga mga kamatuoran mahitungod ha Ginhadian. Mapasalamaton kita ha lukat kay naghahatag ito ha aton hin higayon nga magin duok nga sangkay ni Jehova ngan ni Jesus. Adton nagpapakita hin pagtoo  kan Jesus may paglaom liwat nga mabuhi ha waray kataposan ngan makita utro an ira namatay nga mga hinigugma. (Juan 5:28, 29; Roma 6:23) Waray kita ginbuhat nga bisan ano basi magin angayan hini nga mga bendisyon; ngan bisan san-o diri naton mababaydan an Dios ngan an Kristo han ira ginbuhat para ha aton. (Roma 5:8, 20, 21) Pero maipapakita naton ha ira nga mapasalamaton gud kita. Paonan-o?

4. Paonan-o iginpakita ni Maria Magdalena an iya pagin mapasalamaton ha ginbuhat ni Jesus para ha iya? (Kitaa an piktyur.)

⁴ Pansina an ehemplo han Judio nga babaye nga hi Maria Magdalena. Nag-aantos gud hiya, kay ginpapasakitan hiya hin pito nga demonyo. Sigurado nga inabat hiya nga waray makakabulig ha iya. Salit hunahunaa la kon ano hiya kamapasalamaton han gintagan hiya ni Jesus hin kagawasan tikang ha impluwensya hito nga mga demonyo! An iya apresasyon nagpagios ha iya nga magin sumurunod ni Jesus ngan gamiton an iya panahon, kusog, ngan mga panag-iya basi suportahan hi Jesus ha ministeryo. (Luc. 8:1-3) Bisan kon gin-aapresyar gud ni Maria an ginbuhat ni Jesus para ha iya mismo, posible nga diri hiya maaram nga ha tiarabot pa ihahatag ni Jesus an iya pinakadaku nga regalo. Iya ihahatag an iya kinabuhi para ha mga tawo, “basi an bisan hin-o nga nagpapakita hin pagtoo ha iya” puydi magkaada kinabuhi nga waray kataposan. (Juan 3:16) Bisan pa hito, iginpakita ni Maria an iya apresasyon kan Jesus pinaagi ha pagin maunungon. Samtang nag-aantos hi Jesus ha pasakitan nga kahoy, natindog hi Maria ha hirani ngan naghahatag hin emosyonal nga suporta ha iya ngan ha iba. (Juan 19:25) Kamatay ni Jesus, hi Maria ngan an duha pa nga babaye nagdara hin mahamot nga mga herba ha lubnganan para ha iya lubong. (Mar. 16:1, 2) Ginbalosan gud an pagkamaunungon ni Maria. Naeksperyensyahan niya an kalipay nga makita ngan makaistorya an binanhaw nga hi Jesus—usa nga pribilehiyo nga waray maeksperyensyahi han kadam-an nga disipulo.—Juan 20:11-18.

5. Paonan-o ta maipapakita an aton pagin mapasalamaton ha ngatanan nga ginbuhat ni Jehova ngan ni Jesus para ha aton?

⁵ Kita liwat puydi magpakita han aton pagin  mapasalamaton ha ngatanan nga ginbuhat ni Jehova ngan ni Jesus para ha aton pinaagi ha paggamit han aton panahon, kusog, ngan materyal nga mga panag-iya basi suportahan an buruhaton han Ginhadian. Pananglitan, puydi kita bumulig ha pagtukod ngan pagmintinar han mga pasilidad nga ginagamit ha putli nga pagsingba.

6. Kay ano nga masisiring naton nga an lukat usa nga regalo ha aton mismo?

⁶ Kon ginhuhunahuna naton kon ano kadaku an gugma ni Jehova ngan ni Jesus ha aton, napapagios kita nga higugmaon liwat hira. (1 Juan 4:10, 19) Mas ginhihigugma ta hira kon aton nasasabtan nga hi Jesus namatay para ha aton mismo. Ginkarawat ini ni apostol Pablo ngan iginpahayag an iya apresasyon ha iya surat ha mga taga-Galacia, nga nasiring: “[An] Anak han Dios . . . nahigugma ha akon ngan nagtubyan han iya kalugaringon para ha akon.” (Gal. 2:20) Pinaagi han lukat, iginpahirani ka ni Jehova ha iya basi puydi ka niya magin sangkay. (Juan 6:44) Diri ba nababantad an imo kasingkasing kay nahibaroan mo nga may-ada hi Jehova nakita ha imo nga maopay ngan iginbayad niya an pinakadaku nga kantidad basi puydi ka niya magin sangkay? Diri ba nagpaparig-on ito han imo gugma kan Jehova ngan kan Jesus? Maopay nga pakianhan ta an aton kalugaringon, ‘Ano an akon bubuhaton tungod hito nga gugma?’

7. Sugad han makikita ha piktyur, paonan-o naton ngatanan maipapakita an aton gugma kan Jehova ngan kan Jesus? (2 Corinto 5:14, 15; 6:1, 2)

⁷ An aton gugma ha Dios ngan ha Kristo nagpapagios ha aton nga magpakita hin gugma ha iba. (Basaha an 2 Corinto 5:14, 15; 6:1, 2.) Usa nga paagi nga iginpapakita ta an aton gugma amo an madasigon nga pakigbahin ha pagsangyaw nga buruhaton. Nakikiistorya kita ha ngatanan nga aton nakikilala. Diri naton ginlilikayan an bisan hin-o tungod la han iya lahi, tribo,  estado han kinabuhi, o nakab-ot nga edukasyon. Hini nga paagi, nagbubuhat kita uyon ha katuyoan ni Jehova nga “matalwas an ngatanan nga klase hin tawo ngan makadangat ha husto nga kahibaro han kamatuoran.”—1 Tim. 2:4.

8. Paonan-o naton maipapakita an gugma ha aton kabugtoan?

⁸ Ginpapamatud-an ta liwat nga hinigugma naton an Dios ngan an Kristo pinaagi ha pagpakita hin gugma ha aton kabugtoan. (1 Juan 4:21) Nagpapakita kita hin interes ha ira ngan nabulig ha ira kon may problema hira. Ginliliaw naton hira kon namatayan hira hin hinigugma, ginbibisita hira kon may sakit hira, ngan ginbubuhat an aton pinakamaopay nga parig-unon hira kon nanluluya hira. (2 Cor. 1:3-7; 1 Tes. 5:11, 14) Padayon naton nga igin-aampo hira, kay maaram kita nga “an pangamuyo han tawo nga matadong may daku gud nga epekto.”—San. 5:16.

9. Ano an usa pa nga paagi nga maipapakita naton an gugma ha aton kabugtoan?

⁹ Iginpapakita liwat naton an gugma ha aton kabugtoan pinaagi ha paningkamot nga matipigan an murayaw nga relasyon ha ira. Nangangalimbasog kita nga subaron an ehemplo ni Jehova ha pagin mapinasayloon. Kon andam hi Jehova nga tugotan nga mamatay an iya Anak para ha aton mga sala, diri ba dapat liwat kita magin andam nga pasayloon an aton kabugtoan kon nakakasala hira ha aton? Diri naton karuyag magin pariho ha maraot nga uripon nga gin-unabi ha usa han mga parabola ni Jesus. Bisan kon ginkansela na han iya agaron an iya daku hinduro nga utang, waray niya pasayloa an gutiay nga utang han iya igkasi-uripon. (Mat. 18:23-35) Kon nagkaada kamo diri pagkasinabtanay han usa mo nga kakongregasyon, puydi ka ba mag-una ha pakigmurayaw antes umatender ha Memoryal? (Mat. 5:23, 24) Kon bubuhaton mo ito, ginpapamatud-an mo nga hinigugma mo gud hi Jehova ngan hi Jesus.

10-11. Paonan-o maipapakita han mga tigurang an ira gugma kan Jehova ngan kan Jesus? (1 Pedro 5:1, 2)

¹⁰ Paonan-o maipapakita han mga tigurang nga hinigugma nira hi Jehova ngan hi Jesus? Usa nga importante nga paagi amo an paghatag han panginahanglan han mga karnero ni Jesus. (Basaha an 1 Pedro 5:1, 2.) Ginklaro ni Jesus kan apostol Pedro ito nga punto. Kahuman niya ignigar hi Jesus hin tulo ka beses, posible nga karuyag gud niya pamatud-an nga hinigugma niya hi Jesus. Katapos mabanhaw hi Jesus, nagpakiana hiya kan Pedro: “Simon nga anak ni Juan, hinigugma mo ba ako?” Sigurado nga bubuhaton ni Pedro an ngatanan basi pamatud-an nga hinigugma niya an iya Agaron. Hi Jesus nagsiring kan Pedro: “Atamana an akon gudtiay nga mga karnero.” (Juan 21:15-17) Ngan tubtob ha kamatay ni Pedro, mahigugmaon nga gin-ataman niya an mga karnero han Ginoo, nga nagpapamatuod nga hinigugma niya hi Jesus.

¹¹ Mga tigurang, ha panahon han Memoryal, paonan-o niyo maipapakita nga importante ha iyo an mga pulong ni Jesus kan Pedro? Maipapakita niyo kon ano kadaku an iyo gugma kan Jehova ngan kan Jesus pinaagi han regular nga pag-shepherding ha kabugtoan ngan pinaagi ha pangalimbasog gud nga buligan an mga diri aktibo nga makabalik kan Jehova. (Ezek. 34:11, 12) Maipapakita liwat niyo an interes ha mga nag-aaram ha Biblia ngan ha mga bag-ohan nga naatender ha Memoryal pinaagi ha pagbuhat han tanan niyo nga mahihimo basi maipaabat ngada hinin potensyal nga mga disipulo nga kinakarawat hira.

12. Kay ano nga naghahatag ha aton hin kaisog an pagpamalandong ha ginsiring ni Jesus ha gab-i antes hiya mamatay? (Juan 16:32, 33)

¹² Ha gab-i antes mamatay hi Jesus, hiya nagsiring ha iya mga disipulo: “Ha kalibotan magkakaada kamo kasakitan, pero magmaisugon  kamo! Gindaog ko an kalibotan.” (Basaha an Juan 16:32, 33.) Ano an nakabulig kan Jesus nga magin maisugon ha pag-atubang ha iya mga kaaway ngan magpabilin nga matinumanon tubtob ha kamatayon? Sinarig hiya kan Jehova. Maaram hi Jesus nga an iya mga sumurunod maatubang hin puropariho nga mga pagsari, salit naghangyo hiya kan Jehova nga bantayan hira. (Juan 17:11) Kay ano nga naghahatag ini ha aton hin kaisog? Kay hi Jehova mas makusog ha bisan hin-o nga aton kaaway. (1 Juan 4:4) Nakikita niya an ngatanan. Kombinsido kita nga kon masarig kita kan Jehova, malalamposan ta an aton mga kahadlok ngan maipapakita an kaisog.

13. Paonan-o nagpakita hin kaisog hi Jose nga taga-Arimatea?

¹³ Pansina an ehemplo ni Jose nga taga-Arimatea. Ginrirespeto gud hiya han mga Judio. Membro hiya han Sanhedrin, an korte suprema han mga Judio. Pero ha panahon han ministeryo ni Jesus ha tuna, hi Jose diri maisugon. Nagsiring hi Juan nga hi Jose “disipulo ni Jesus pero patago la tungod han iya kahadlok ha mga Judio.” (Juan 19:38) Bisan kon interesado hi Jose ha mensahe mahitungod han Ginhadian, waray niya isumat ha iba nga may pagtoo hiya kan Jesus. Sigurado nga nahahadlok hiya nga mawad-an han iya prominente nga posisyon ha komunidad. Pero an Biblia nagsusumat ha aton nga kamatay ni Jesus, “nagin maisugon [hi Jose] ngan kinadto ha atubangan ni Pilato ngan gin-aro an lawas ni Jesus.” (Mar. 15:42, 43) Diri na patago an pagsuporta ni Jose kan Jesus.

14. Ano an dapat mo buhaton kon nahahadlok ka ha mga tawo?

¹⁴ Pariho ka ba kan Jose nga nahahadlok ha mga tawo? Usahay ba naaawod ka pagsumat ha eskwelahan o ha trabaho nga usa ka han mga Saksi ni Jehova? Nag-aalang ka ba nga magin magwarali o magpabawtismo kay nababaraka ka ha bangin hunahunaon ha imo han iba? Ayaw tuguti nga an sugad nga mga pagbati magpugong ha imo nga buhaton an maaram ka nga tama. Pag-ampo hin sinsero kan Jehova. Hangyoa hiya nga tagan ka hin kaisog nga buhaton an iya kaburut-on. Samtang nakikita mo kon paonan-o ginbabaton ni Jehova an imo mga pag-ampo, magigin mas marig-on ka ngan mas maisugon.—Isa. 41:10, 13.

15. Katapos magpakita ni Jesus ha iya mga disipulo, ano an ira ginbuhat tungod han ira kalipay? (Lucas 24:52, 53)

¹⁵ Masurub-on gud an mga disipulo han namatay hi Jesus. Imadyina an imo kalugaringon ha ira sitwasyon. Diri la kay namatayan hira han ira hinigugma nga sangkay kondi inabat liwat nira nga nawara na an ira paglaom. (Luc. 24:17-21) Pero han nagpakita hi Jesus ha ira, naghatag hiya hin panahon nga buligan hira nga masabtan  an iya papel ha pagtuman han mga tagna ha Biblia. Iya liwat hira gintagan hin importante nga buruhaton. (Luc. 24:26, 27, 45-48) Pagsaka ni Jesus ha langit paglabay hin 40 ka adlaw, an kasubo han mga disipulo nasaliwnan na hin daku nga kalipay. Malipayon hira kay maaram hira nga an ira Agaron buhi ngan andam bumulig ha ira nga matuman an ira bag-o nga toka. An ira kalipay nagpagios ha ira nga padayon nga dayawon hi Jehova.—Basaha an Lucas 24:52, 53; Buh. 5:42.

16. Paonan-o naton masusubad an mga disipulo ni Jesus?

¹⁶ Paonan-o naton masusubad an mga disipulo ni Jesus? Puydi kita magin malipayon ha pagsingba kan Jehova diri la ha panahon han Memoryal kondi ha bug-os nga tuig. Ginkikinahanglan hini nga unahon ta ha aton kinabuhi an Ginhadian han Dios. Pananglitan, damu an nagbag-o han ira eskedyol ha pagtrabaho basi makigbahin ha ministeryo, makaatender ha mga katirok, ngan magkaada regular nga pagsingba han pamilya. An iba nagdesisyon pa ngani nga diri kumuha hin materyal nga mga panag-iya nga ginhuhunahuna han iba nga kinahanglanon basi mas makabulig hira ha kongregasyon o makag-alagad ha lugar nga mas daku an panginahanglan hin mga magwarali han Ginhadian. Nagkikinahanglan kita hin pagpailob basi padayon nga makag-alagad kan Jehova, pero nagsasaad hiya nga hura kita niya nga bibendisyonan kon uunahon ta ha aton kinabuhi an mga buruhaton han Ginhadian.—Prob. 10:22; Mat. 6:32, 33.

17. Ano an imo determinasyon hini nga panahon han Memoryal? (Kitaa an piktyur.)

¹⁷ Ginpapamulat naton nga isaurog an Memoryal ha Martes, Abril 4. Pero ayaw hulata nga dida mo pa la papamalandungon an kinabuhi ngan kamatayon ni Jesus ngan an gugma nga iginpakita niya ngan ni Jehova para ha aton. Salingabota an tagsa nga oportunidad ha pagbuhat hito ha bug-os nga panahon han Memoryal. Pananglitan, paghatag hin panahon ha pagbasa ngan pagpamalandong han mga panhitabo nga nakabutang ha tsart nga “Ultimo nga Semana ni Jesus ha Tuna,” nga mababasa ha Apendise B12 han Bag-o nga Kalibotan nga Hubad. Samtang ginbubuhat mo ito, pamiling hin mga teksto ha Biblia nga magpaparig-on han imo pagin mapasalamaton, gugma, kaisog, ngan kalipay. Katapos, paghunahuna hin espisipiko nga mga paagi nga maipapakita mo an imo kinasingkasing nga apresasyon. Makakasiguro ka nga papabilhan ni Jesus an ngatanan nga imo ginbubuhat basi hinumdumon hiya hini nga panahon han Memoryal.—Pah. 2:19.