1-2. Ano nga mga kakurian an posible nga gin-aatubang han matinumanon nga mga surugoon ni Jehova?

 AN MGA trahedya mahimo tigda makagbag-o han aton kinabuhi. Pananglitan, an matinumanon nga brother nga hi Luis a nadayagnos nga may grabe nga sakit nga kanser. An doktor nasiring nga mabubuhi hiya hin pipira na la ka bulan. Hi Monika ngan an iya bana busy ha espirituwal nga mga buruhaton. Pero usa ka adlaw, nahibaroan ni Monika nga an iya bana, usa nga tigurang, sekreto nga nagbibinuhat hin sala hin maiha na nga panahon. An solo nga sister nga hi Olivia, napiritan pag-ebakwit kay may tiabot nga makusog nga bagyo. Pagbalik niya, nakita niya nga an iya balay naruba han bagyo. Ha usa la kadali, an kinabuhi hini nga kabugtoan tigda nga nagbag-o. May nahitabo na ba ha iyo nga trahedya nga tigda nga nakagbag-o han iyo kinabuhi?

² Sugad nga matinumanon nga mga surugoon ni Jehova, naatubang kita hin mga kakurian ngan sakit nga komon ha ngatanan. Posible liwat mag-antos kita hin pagkontra o pagtimaraot tikang hadton nangangalas ha katawohan han Dios. Bisan kon diri kita ginpuproteksyonan ni Jehova tikang ha sugad nga mga kakurian, nagsasaad hiya nga mabulig hiya ha aton. (Isa. 41:10) Ha bulig niya, makakapabilin kita nga malipayon, makakahimo hin mag-opay nga desisyon, ngan makakapabilin nga maunungon ha iya bisan ha pinakamakuri nga mga sitwasyon. Hini nga artikulo, aadman naton an upat nga paagi nga hi Jehova nabulig ha aton kon may nahitatabo ha aton nga mga trahedya. Hihisgotan ta liwat kon ano an dapat naton buhaton basi makapahimulos ha bulig nga iya ginhahatag.

BABANTAYAN KA NI JEHOVA

3. Kon nakakaeksperyensya kita hin trahedya ano an bangin makuri naton buhaton?

³ An problema. Kon nakakaeksperyensya kita hin trahedya,  bangin makurian kita ha paghunahuna hin maopay ngan ha paghimo hin mga desisyon. Kay ano? An aton kasingkasing bangin duro gud an kasakit. An aton hunahuna bangin sobra nga nababaraka tungod han problema. Posible naton abaton nga baga hin aada kita ha butnga han mga burong, ngan diri kita maaram kon ano an aton hihimoon. Pansina kon ano an gin-abat han duha nga sister nga gin-unabi na ha ira mga problema. Siring ni Olivia: “Katapos maguba han bagyo an akon balay, diri ako maaram han akon bubuhaton ngan nabaraka gud.” Nagsiring hi Monika may kalabotan ha pagin diri maunungon han iya bana: “Nasubo gud ako. Inabat ko nga ginsamad an akon kasingkasing. Nakurian ako nga himoon bisan an simple nga buruhaton ha adlaw-adlaw. Diri gud ako makatoo nga mahitatabo ito ha akon.” Ano nga bulig an iginsaad ni Jehova ha aton kon nasusubo gud kita?

4. Sumala ha Filipos 4:​6, 7, ano an saad ni Jehova ha aton?

⁴ An ginbubuhat ni Jehova. Nagsasaad hiya nga tatagan kita han gintatawag ha Biblia nga “kamurayawan han Dios.” (Basaha an Filipos 4:​6, 7.) Ini nga kamurayawan nagtutudlok ha pagin kalmado ngan pagin murayaw han hunahuna ngan kasingkasing nga resulta han aton presyoso nga relasyon ha iya. Ini nga kamurayawan “labaw ha ngatanan nga pagsabot”; mas maopay kay han aton maiimadyin. Inabat ka na ba hin pagin kalmado katapos maniguro pag-ampo kan Jehova? Ito nga pag-abat amo “an kamurayawan han Dios.”

5. Paonan-o an kamurayawan han Dios nagbabantay han aton hunahuna ngan kasingkasing?

⁵ Ito nga teksto nasiring liwat nga an kamurayawan han Dios “magbabantay,” o magpuprotektar, “han iyo kasingkasing ngan han iyo panhunahuna.” An orihinal nga pulong para ha ‘pagbantay’ usa nga pulong nga panmilitar ngan nagpapasabot ito hin mga sundalo nga nagbabantay ha syudad basi magin talwas tikang ha pag-atake. An mga residente ha gwardyado nga syudad nakaturog hin murayaw, kay maaram hira nga may mga sundalo nga nagbabantay ha mga ganghaan. Ha pariho nga paagi, kon an kamurayawan han Dios nagbabantay han aton mga kasingkasing ngan hunahuna, nagigin kalmado kita, kay maaram nga talwas kita. (Sal. 4:8) Sugad han kahimtang ni Hana, bisan kon an aton sitwasyon diri dayon magbag-o, magkakaada la gihapon kita kamurayawan. (1 Sam. 1:​16-18) Ngan kon kalmado kita, agsob nga mas masayon para ha aton nga makapanhunahuna hin maopay ngan makahimo hin maaramon nga mga desisyon.

6. Ano an mahimo naton buhaton basi magpahimulos ha kamurayawan han Dios? (Kitaa liwat an piktyur.)

⁶ Kon ano an dapat naton buhaton. Kon may problema ka, tawaga an bantay, siring pa. Paonan-o? Pag-ampo tubtob nga maabat mo an  kamurayawan han Dios. (Luc. 11:9; 1 Tes. 5:17) Hi Luis nga gin-unabi kanina, nagsaysay kon paonan-o hiya ngan an iya asawa nga hi Ana, nakalampos han nahibaroan nira nga mabubuhi hiya hin pipira na la ka bulan. Hiya nagsiring: “Ha sugad hini nga takna, makuri gud an pagdesisyon mahitungod ha pagpatambal ngan ha iba pa nga butang. Pero an pag-ampo amo gud la an naghahatag ha aton hin kamurayawan ha sugad hini nga kahimtang.” Hi Luis ngan an iya asawa nagsiring nga naniguro ngan pauroutro hira nga nag-ampo nga tagan hira ni Jehova hin kamurayawan ha hunahuna, kalmado nga kasingkasing, ngan kinaadman basi makahimo hin mag-opay nga desisyon. Ngan naabat nira an iya bulig. Kon naatubang ka hin krisis, padayon nga mag-ampo, ngan maieksperyensyahan mo an kamurayawan ni Jehova kay nagbabantay ito ha imo kasingkasing ngan hunahuna.—Roma 12:12.

PARIRIG-UNON KA NI JEHOVA

7. Ano an bangin naton abaton kon nakakaeksperyensya kita hin makuri nga problema?

⁷ An problema. Kon naatubang kita hin makuri nga problema, an aton mga inaabat, panhunahuna, ngan reaksyon bangin magin diri balanse o normal. Mahimo naton abaton an iba-iba nga emosyon. Hi Ana nga gin-unabi na, nagsiring nga inabat hiya hin iba-iba nga emosyon han namatay hi Luis. Hiya nagsiring: “Kon nadidepres ako, nagtitikang ako umabat hin kalooy ha akon kalugaringon. Nasisina liwat ako han iya kawara.” Hi Ana inabat liwat hin kamingaw ngan kaaringit ha paghimo hin mga desisyon nga hadto masayon la himoon ni Luis. Usahay, naabat hiya nga aadto hiya ha dagat ngan ginbabagyo. Paonan-o hi Jehova nabulig ha aton kon baga hin nalulumos kita ha aton mga emosyon?

8. Sumala ha Isaias 33:​6, ano an pasarig ni Jehova ha aton?

⁸ An ginbubuhat ni Jehova. Ginpapasarig kita niya nga iya kita paririg-unon. (Basaha an Isaias 33:6.) Kon may bagyo ha dagat, an usa nga barko mahimo magkiling-kiling ngan delikado ito. Basi diri duro nga magin makiwa, damu nga barko an may panbalanse ha kada ligid hito ha ilarom han tubig. Ini nga mga panbalanse nakakaiban han duro nga pagkiling-kiling han barko, basi magin talwas ngan komportable an pagbiyahe han mga pasahero. Pero damu hini nga sistema han panbalanse an nagagamitan gud hin maopay kon padayon nga nagbibiyahe an barko. Ha pariho nga paagi, bubuligan kita ni Jehova nga magin balanse o magin marig-on kon padayon kita nga magpabilin nga matinumanon ha mga panahon han problema.

9. Paonan-o an aton tools ha pag-research nakakabulig ha aton nga makapabilin kita nga balanse? (Kitaa liwat an piktyur.)

⁹ Kon ano an dapat naton buhaton. Kon naabat  ka hin iba-iba nga negatibo nga emosyon, himoa an imo pinakamaopay basi maipadayon an imo espirituwal nga rutina. Syempre, bangin diri mo na nahihimo an imo nahihimo hadto, pero hinumdumi nga hi Jehova makatadunganon. (Ikompara an Lucas 21:​1-4.) Sugad nga parte han imo espirituwal nga rutina, paggahin hin panahon ha imo personal nga pag-aram ngan pagpamalandong. Kay ano? Pinaagi han iya organisasyon, hi Jehova nagtatagana hin mag-opay gud nga impormasyon tikang ha Kasuratan nga nakakabulig ha aton nga magpabilin nga balanse. Para makita mo an imo kinahanglan, mahimo mo gamiton an tools ha pag-research nga may-ada ha iyo linggwahe, sugad han JW Library^® app, Watch Tower Publications Index, ngan Research Guide for Jehovah’s Witnesses. Hi Monika nga gin-unabi na, nagsiring nga kon naabat hiya hin negatibo nga emosyon ginagamit niya an tools ha pag-research basi makakuha hin sagdon. Pananglitan, gin-search niya an pulong nga “kasina.” Ha iba nga mga panahon, gin-search niya an “paglimbong” o “pagin maunungon.” Ngan ginbabasa niya ito tubtob nga mag-opay-opay an iya inaabat. Hiya nagsiring: “Han nagtikang ako pag-research nalilisang ako. Pero samtang iginpapadayon ko an pagbasa, inabat ko an hangkop ni Jehova. Nasantop ko nga nasasabtan ni Jehova an ngatanan ko nga magkalain-lain nga inaabat, ngan nabulig hiya ha akon.” An sugad nga bulig ni Jehova nakakapabilin ha imo nga balanse tubtob nga makaabot ka ha mas kalmado nga tubig, siring pa.—Sal. 119:​143, 144.

BUBULIGAN KA NI JEHOVA

10. Ano an bangin naton abaton katapos hin makasurubo gud nga panhitabo?

¹⁰ An problema. Katapos hin makasurubo gud nga panhitabo, bangin may mga adlaw nga maluya kita ha pisikal ngan nadidepres. Bangin abaton naton nga baga kita hin atleta nga may injury nga hadto malaksi dumalagan pero yana nagkikiang ha paglakat. Bangin nakukurian kita ha mga buruhaton nga hadto masayon ta la himoon, o bangin waray na kita interes ha mga buruhaton nga hadto nag-i-enjoy kita. Pariho kan Elias, bangin makurian kita pagbuhát. Karuyag naton magkinaturog na la. (1 Hadi 19:​5-7) Ano an iginsaad ni Jehova nga bubuhaton kon nanluluya kita?

11. Ano an usa pa nga paagi nga nabulig hi Jehova ha aton? (Salmo 94:18)

¹¹ An ginbubuhat ni Jehova. Nagsasaad hiya nga bubuligan kita. (Basaha an Salmo 94:18.) Sugad la nga an atleta nga may injury nagkikinahanglan hin bulig basi makagios-gios, bangin kinahanglan naton hin bulig basi magpabilin  nga aktibo ha pag-alagad kan Jehova. Hito nga mga kahimtang, hi Jehova nagpapasarig ha aton: “Ako, hi Jehova nga imo Dios, an nakapot ha imo too nga kamot, an nasiring ha imo, ‘Ayaw kahadlok. Bubuligan ko ikaw.’” (Isa. 41:13) Naeksperyensyahan ini ni Hadi David. Han may-ada hiya mga problema ngan kaaway, nagsiring hiya kan Jehova: “An imo too nga kamot nabulig ha akon.” (Sal. 18:35) Pero paonan-o nabulig hi Jehova?

12. Hin-o an mahimo gamiton ni Jehova basi buligan kita kon nanluluya kita?

¹² Agsob nga ginbubuligan kita ni Jehova pinaagi ha pagpagios ha iba nga buligan kita. Pananglitan, han hi David nanluya, ginbisita hiya han iya sangkay nga hi Jonathan basi parig-unon ngan dasigon hiya. (1 Sam. 23:​16, 17) Sugad man, ginpili ni Jehova hi Eliseo nga maghatag hin praktikal nga bulig kan Elias. (1 Hadi 19:​16, 21; 2 Hadi 2:2) Yana, mahimo gamiton ni Jehova an pamilya, kasangkayan, o mga tigurang basi buligan kita. Pero kon nadidepres kita, bangin karuyag naton magpahirayo ha iba. Karuyag la naton mag-usahan. Normal la ito nga reaksyon. Pero para mabuligan kita ni Jehova, ano an mahimo naton buhaton?

13. Ano an kinahanglan naton buhaton basi mapahimulsan an bulig ni Jehova? (Kitaa liwat an piktyur.)

¹³ Kon ano an dapat naton buhaton. Paningkamuti nga diri ibulag an imo kalugaringon. Kon iginbubulag naton an aton kalugaringon, an aton pokus nagigin haligot, salit an aton ginhuhunahuna na la amo an aton kalugaringon ngan an aton mga problema. Ngan tungod hito, bangin diri kita makahimo hin mag-opay nga desisyon. (Prob. 18:1) Syempre, usahay kinahanglan naton mag-usahan, labi na kon naatubang kita hin maraot gud nga mga sitwasyon. Pero kon iginbubulag naton an aton kalugaringon hin maiha nga panahon, naisasalikway naton an paagi mismo ni Jehova ha pagbulig ha aton. Salit bisan kon makuri ito buhaton, karawata an bulig han imo pamilya, kasangkayan, ngan mga tigurang. Tratara hira sugad nga paagi ni Jehova ha pagbulig ha imo.—Prob. 17:17; Isa. 32:​1, 2.

LILIAWON KA NI JEHOVA

14. Ano an makaharadlok nga mga sitwasyon nga bangin naton atubangon?

¹⁴ An problema. Bangin umatubang kita hin mga sitwasyon nga makakapahadlok ha aton. Ha Biblia, may matinumanon nga mga surugoon han Dios nga nag-unabi hin mga panahon nga duro an ira kabaraka ngan pangurog tungod han ira mga kaaway o iba nga mga problema. (Sal. 18:4; 55:​1, 5) Mahimo liwat kita umatubang hin pagkontra ha eskwelahan, ha  trabaho, ha aton pamilya, o ha gobyerno. Mahimo pa ngani kita mahadlok nga mamatay tungod han sakit. Hito nga mga sitwasyon, bangin abaton naton nga sugad kita hin bata nga waray mahihimo. Paonan-o hi Jehova nabulig ha aton ha sugad hini nga mga sitwasyon?

15. Ano an iginpapasarig han Salmo 94:19?

¹⁵ An ginbubuhat ni Jehova. Ginliliaw kita ngan ginpapakalma niya. (Basaha an Salmo 94:19.) Hini nga salmo mahimo naton mahunahuna an bata nga babaye nga nahahadlok ngan diri nahingangaturog tungod han makusog nga mga dalugdog. Maiimadyin naton nga an iya tatay nadaop, kakaptan hiya, ngan hahangkopan hiya tubtob nga mahingaturog. Bisan kon padayon nga nagdidinalugdog, tungod kay ginhahangkopan hiya han iya tatay naabat hiya nga talwas hiya. Kon naatubang kita hin makaharadlok nga mga problema, bangin kinahanglan nga simboliko nga hangkopan kita han aton langitnon nga Amay tubtob nga kumalma kita. Paonan-o kita makakakarawat han sugad nga pagliaw ni Jehova?

16. Ano an mahimo naton buhaton basi makarawat an pagliaw ni Jehova? (Kitaa liwat an piktyur.)

¹⁶ Kon ano an dapat naton buhaton. Regular nga makig-upod kan Jehova—pag-ampo ha iya ngan pagbasa han iya Pulong. (Sal. 77:​1, 12-14) Kon ini an imo ginbubuhat, posible nga an imo siyahan nga bubuhaton kon naiistres ka amo an pangaro hin bulig ha imo langitnon nga Amay. Isumat kan Jehova an imo mga ginkakahadlokan ngan ginkakabarak-an. Tuguti hiya nga magyakan ngan magliaw ha imo pinaagi han Kasuratan. (Sal. 119:28) May espisipiko nga mga bahin an Biblia nga mahimo gud makaliaw kon nahahadlok ka. Pananglitan, may mababasa ka nga pagparig-on ha mga libro han Job, Salmo, ngan Proberbios, pati liwat ha ginsiring ni Jesus ha Mateo kapitulo 6. Samtang nag-aampo ka kan Jehova ngan nagbabasa han iya Pulong, aabaton mo an iya pagliaw.

17. Ha ano kita makakasarig?

¹⁷ Makakasarig kita nga bubuligan kita ni Jehova ha pinakamakuri nga mga sitwasyon ha aton kinabuhi. Diri gud kita mag-uusahan. (Sal. 23:4; 94:14) Hi Jehova nagsasaad nga babantayan, paririg-unon, bubuligan, ngan liliawon kita. Mahitungod kan Jehova, an Isaias 26:3 nasiring: “Imo papanalipdan an mga nasarig ha imo hin bug-os; tatagan mo hira hin nagpapadayon nga kamurayawan, kay ha imo hira nasarig.” Salit sarig kan Jehova, ngan pahimulsi an paagi nga iya ginagamit basi buligan ka. Kon bubuhaton mo ito, magkakaada ka utro kusog bisan ha makuri nga mga panahon.