1. Kay ano nga usahay nahahadlok kita?

 KITA ngatanan usahay nahahadlok. Syempre, tungod han aton pag-aram ha Biblia diri na kita nahahadlok ha mga patay, ha magraot nga espiritu, ngan ha tiarabot. Pero nabubuhi la gihapon kita ha panahon nga nakikita an “makaharadlok nga mga kiritaon,” sugad han girra, krimen, ngan sakit. (Luc. 21:11) Bangin mahadlok liwat kita ha mga tawo, sugad han gobyerno nga nagtatalumpigos ha aton o kapamilya pa ngani nga nakontra ha tinuod nga pagsingba. An pipira nababaraka nga diri nira maiilob an presente nga problema o an bangin atubangon nira ha tiarabot.

2. Ihulagway an sitwasyon ni David han nakadto hiya ha Gat.

² Hi David nahadlok. Pananglitan, han ginlalanat hiya ngan gin-ikaparatay ni Hadi Saul, nagdesisyon hi David nga pumalagiw ha Gat nga syudad han Filistia. Nasabtan dayon han hadi han Gat nga hi Akis, nga hi David amo an gindayaw ha kanta nga girriro nga nakapatay hin “tinagnapuplo ka yukot” nga mga Filisteo. “Nahadlok gud” hi David. (1 Sam. 21:​10-12) Nabaraka hiya kon ano an bubuhaton ni Akis ha iya. Paonan-o nadaog ni David an iya kahadlok?

3. Sumala ha Salmo 56:​1-3, 11, paonan-o nadaog ni David an iya kahadlok?

³ Ha Salmo 56, iginpahayag ni David an iya inaabat han nakadto hiya ha Gat. Hito nga salmo iginsaysay ni David kon kay ano nga nahahadlok hiya, pero iginsumat liwat niya kon paonan-o niya nadaog ito nga kahadlok. Han nahadlok hiya, sinarig hiya kan Jehova. (Basaha an Salmo 56:​1-3, 11.) Maopay gud an rason ni David ha pagsarig kan Jehova. Ha bulig ni Jehova, nakahunahuna hi David hin talagsahon pero epektibo nga estratihiya: Nagpakalurong-lurong hiya! Salit ginhunahuna  ni Akis hi David nga nakakaaringit imbes nga tarhog, tungod hito nakapalagiw hi David.—1 Sam. 21:13–22:1.

4. Paonan-o naton mapaparig-on an aton pagsarig kan Jehova? Iilustrar.

⁴ Madadaog ta liwat an kahadlok pinaagi ha pagsarig kan Jehova. Pero paonan-o naton mapaparig-on an aton pagsarig kan Jehova, labi na kon nahahadlok kita? Pansina ini nga ilustrasyon. Kon nahibaroan mo nga may-ada ka sakit, ha siyahan bangin mahadlok ka. Pero mahimo maibanan an imo kahadlok kon masarig ka ha imo doktor. Bangin damu na an iya natambal nga pasyente nga may pariho hito nga sakit. Namamati hiya samtang iginsasaysay mo an imo ginkakahadlokan ngan inaabat mo nga napaid hiya. Ngan bangin magsuhestyon hiya hin paagi han pagtambal nga nakaopay gud ha iba. Ha pariho nga paagi, ginpaparig-on ta an aton pagsarig kan Jehova kon aton huhunahunaon an iya na nahimo, ginhihimo, ngan hihimoon pa para ha aton. Ito an ginbuhat ni David. Samtang aton ginhihisgotan an pipira han iya giniyahan nga mga pulong nga mababasa ha Salmo 56, hunahunaa liwat kon paonan-o mo mapaparig-on an imo pagsarig kan Jehova ngan madadaog an imo kahadlok.

ANO AN NABUHAT NA NI JEHOVA?

5. Basi madaog ni David an iya kahadlok, ano an iya ginpamalandong? (Salmo 56:​12, 13)

⁵ Samtang namimeligro pa an kinabuhi ni David, nagpokus hiya ha kon ano an nabuhat na ni Jehova. (Basaha an Salmo 56:​12, 13.) Ito an ginbubuhat ni David ha iya bug-os nga kinabuhi. Pananglitan, usahay ginpapamalandong niya an mga linarang ni Jehova nga nagpapahinumdom ha iya han gahum ngan gugma ni Jehova ha katawohan. (Sal. 65:​6-9) Ginpamalandong liwat ni David an nabuhat na ni Jehova ha iba. (Sal. 31:19; 37:​25, 26) Ngan labi nga ginpamalandong niya an ginbuhat na ni Jehova para ha iya. Ginsuportaran ngan ginprotektahan ni Jehova hi David tikang pa han iya pagin minasus-an. (Sal. 22:​9, 10) Imadyina kon paonan-o ito nga pagpamalandong nagparig-on gud han pagsarig ni David kan Jehova!

6. Kon nahahadlok kita, ano an makakabulig ha aton nga sumarig kan Jehova?

⁶ Kon nahahadlok ka, pakianhi an imo kalugaringon, ‘Ano an nabuhat na ni Jehova?’  Pamalandonga an iya mga ginlarang. Pananglitan, kon aton ‘gin-oobserbaran hin maopay’ kon paonan-o gin-aataman ni Jehova an mga tamsi ngan mga bukad—nga waray laranga uyon ha iya dagway ngan diri makakagsingba ha iya—mapaparig-on naton an aton pagsarig nga aatamanon liwat kita niya. (Mat. 6:​25-32) Tagda liwat kon ano an ginbuhat na ni Jehova para ha iya mga magsiringba. Mahimo mo pag-adman an karakter ha Biblia nga nagpakita hin marig-on nga pagtoo, o mahimo mo basahon an eksperyensya han magsiringba ni Jehova ha moderno nga panahon. Dugang pa, pamalandonga kon paonan-o ka gin-ataman na ni Jehova. Paonan-o ka niya iginpahirani ha kamatuoran? (Juan 6:44) Paonan-o niya ginbaton an imo mga pag-ampo? (1 Juan 5:14) Paonan-o ka nagpapahimulos kada adlaw tungod han sakripisyo han iya hinigugma nga Anak?—Efe. 1:7; Heb. 4:​14-16.

7. Paonan-o an eksperyensya ni propeta Daniel nakabulig kan Vanessa nga diri hiya mahadlok?

⁷ An sister nga hi Vanessa, nga taga-Haiti, inatubang hin makaharadlok nga sitwasyon. Usa nga lalaki nga taga-didto ha ira lugar an natawag ngan nagmi-message ha iya kada adlaw, ngan ginpipresyur hiya nga makigrelasyon ha iya. Nagdumiri hi Vanessa. Pero an lalaki nagin mas agresibo ngan gintarhog pa ngani hiya. “Nahadlok ako,” siring niya. Ano an ginbuhat ni Vanessa basi diri hiya mahadlok? Naghimo hiya hin praktikal nga mga paagi basi protektaran an iya kalugaringon. Ginbuligan hiya han usa nga tigurang basi makontak an mga awtoridad. Pero nagpokus liwat hiya ha kon paonan-o ginprotektahan ni Jehova an iya mga magsiringba ha naglabay. “An siyahan nga akon nahunahuna amo hi propeta Daniel,” siring ni Vanessa. “Iginlabog hiya ngadto ha lungib nga may gutom nga mga leon bisan kon waray hiya sala. Pero ginprotektahan hiya ni Jehova. Nag-ampo ako kan Jehova nga hiya na la an bahala han akon sitwasyon. Katapos hito, waray na ako mahadlok.”—Dan. 6:​12-22.

ANO AN GINBUBUHAT NI JEHOVA YANA?

8. Ha ano kombinsido hi David? (Salmo 56:8)

⁸ Bisan kon hi David nameligro gud han nakadto hiya ha Gat, waray hiya magpokus ha iya kahadlok. Lugod, naghunahuna hiya kon ano an ginhihimo ni Jehova para ha iya hito nga panahon. Inabat ni David nga gin-gigiyahan ngan ginpuprotektaran hiya ni Jehova ngan nasasabtan Niya an iya mga inaabat. (Basaha an Salmo 56:8.) May-ada liwat hi David maopay nga kasangkayan, sugad kanda Jonathan ngan an hitaas nga saserdote nga hi Ahimelec, nga nagdasig ngan nagbulig ha iya. (1 Sam. 20:​41, 42; 21:​6, 8, 9) Ngan bisan kon gin-ikaparatay hiya ni Hadi Saul, nakakapalagiw hiya. Kombinsido hiya nga maaram gud hi Jehova han iya kakurian ngan kon ano an epekto hito ha iya emosyon.

9. Ano an gin-oobserbahan ni Jehova mahitungod ha tagsa ha aton?

⁹ Kon naatubang ka hin problema nga nakakapahadlok ha imo, hinumdumi nga nakikita ni Jehova ito nga problema ngan kon ano an imo inaabat mahitungod hito. Pananglitan, nakita ni Jehova diri la an pagtalumpigos ha mga Israelita ha Ehipto kondi pati liwat an “mga kaul-ol nga ira [gin-antos].” (Ex. 3:7) Nagkanta hi David nga nakita ni Jehova an iya “pag-antos” ngan “duro nga kasakitan.” (Sal. 31:7) Ngan han nag-antos an katawohan han Dios—bisan tungod han ira kalugaringon nga sayop nga mga desisyon—“nasasakit hiya.” (Isa. 63:9) Kon nahahadlok ka, nasasabtan ni Jehova  an imo inaabat ngan andam hiya bumulig ha imo nga diri ka na mahadlok.

10. Kay ano nga kombinsido ka nga nakikita ka ni Jehova ngan bubuligan ka niya nga malamposan an bisan ano nga problema?

¹⁰ Pero bangin maghunahuna ka kon paonan-o ka ginsusuportahan ni Jehova samtang naatubang hin makaharadlok nga problema. Salit paghangyo ha iya nga makita an iya suporta. (2 Hadi 6:​15-17) Katapos, hunahunaa: Naparig-on ka ba ha usa nga pahayag o komento ha katirok han kongregasyon? Nadasig ka ba han usa nga publikasyon, video, o orihinal nga kanta? May-ada ba ha imo naghatag hin makapadasig nga mensahe o teksto? Posible maibalewaray naton an gugma han aton kabugtoan ngan an espirituwal nga pagkaon nga aton nakakarawat. Pero ekstraordinaryo ito nga mga regalo tikang kan Jehova. (Isa. 65:13; Mar. 10:​29, 30) Nagpapamatuod ito nga nahigugma hiya ha imo. (Isa. 49:​14-16) Ngan nagpapamatuod ito nga angay hiya han imo pagtapod.

11. Ano an nakabulig kan Aida nga malamposan an iya mga kahadlok?

¹¹ Nakita ni Aida nga taga-Senegal kon paonan-o hiya ginsuportahan ni Jehova han naatubang hiya hin problema. Tungod kay hiya an suhag, naglalaom an iya mga kag-anak nga magtatrabaho hiya basi suportahan an iya kalugaringon ngan hira. Pero katapos pasimplihon ni Aida an iya kinabuhi basi makagpayunir, nagkuri hiya ha pinansyal. Nasina an iya pamilya ngan ginpakaraot hiya. “Nahadlok ako nga diri ko na mabubuligan an akon mga kag-anak ngan isasalikway ako nira ngatanan,” nasiring hiya. “Ginbasol ko pa ngani hi Jehova kon kay ano nga gintugotan niya nga magin makuri an kahimtang.” Katapos, nakabati hiya hin pahayag ha katirok. “Ginpahinumdoman kami han speaker nga maaram hi Jehova han bisan ano nga samad ha aton kasingkasing. Tungod han sagdon han mga tigurang ngan han iba, hinay-hinay nga inabat ko utro an gugma ni Jehova. Han nag-inampo ako kan Jehova nagkaada ako hin mas daku nga pagsarig ha iya nga bubuligan niya ako, ngan nagkaada ako hin kamurayawan han nakita ko nga ginbabaton an akon mga pag-ampo.” Inabot an panahon, nakatrabaho hi Aida nga nakabulig ha iya nga masuportahan an iya pagpayunir ngan makahatag liwat hin pinansyal nga bulig ha iya mga kag-anak ngan ha iba. “Nahibaro ako nga bug-os  nga tumapod kan Jehova,” siring niya. “Yana, katatapos ko mag-ampo, agsob nga nawawara an akon mga kahadlok.”

ANO PA AN BUBUHATON NI JEHOVA?

12. Sumala ha Salmo 56:​9, ha ano nasarig hi David?

¹² Basaha an Salmo 56:9. Mababasa hini nga bersikulo an usa pa nga paagi nga nakabulig kan David nga mawara an iya mga kahadlok. Bisan kon namimeligro pa an iya kinabuhi, namalandong hiya kon ano pa an bubuhaton ha iya ni Jehova. Maaram hi David nga tatalwason hiya ni Jehova ha husto nga panahon. Kon huhunahunaon, nagsiring na hi Jehova nga hi David an magigin sunod nga hadi han Israel. (1 Sam. 16:​1, 13) Para kan David, anoman nga iginsaad ni Jehova sigurado nga matutuman.

13. Ano an sigurado kita nga bubuhaton ni Jehova?

¹³ Ano an iginsaad ni Jehova nga bubuhaton para ha imo? Diri kita naglalaom nga puproteksyonan kita niya tikang ha ngatanan nga problema. Pero anoman nga problema an aton gin-aatubang hini nga sistema, wawad-on ito ni Jehova ha maabot nga bag-o nga kalibotan. (Isa. 25:​7-9) An aton Maglalarang may gahum gud ha pagbanhaw han mga patay, ha pagtambal ha aton, ngan ha pagpoo han ngatanan nga nakontra.—1 Juan 4:4.

14. Ano an mahimo naton pamalandungon?

¹⁴ Kon nahahadlok ka, pamalandonga an bubuhaton ni Jehova ha tiarabot. Hunahunaa an imo aabaton kon waray na hi Satanas, kon saliwnan na hin magtadong nga tawo an mga magraot, ngan kon hinay-hinay nga nawawara kada adlaw an pagkadiri-perpekto. Iginpakita ha pasundayag han 2014 nga regional nga kombensyon kon paonan-o mahimo pamalandungon an aton paglaom. Ginhisgotan han usa nga tatay ha iya pamilya kon ano an kakaiba unta nga mababasa ha 2 Timoteo 3:​1-5 kon ito nga mga bersikulo nagtatagna han mahitatabo ha Paraiso. Hiya nagsiring: “Ha bag-o nga kalibotan maieksperyensyahan an pinakamakalilipay gud nga mga panahon. Kay an mga tawo magigin mahigugmaon ha iba, mahigugmaon ha espirituwal nga mga bahandi, diri hambog, mapainubsanon, nagpapasidungog ha Dios, masinugtanon ha mga kag-anak, mapasalamaton, maunungon, may daku nga gugma ha mga kapamilya, naruruyag pakigsabot, pirme nagyayakan hin maopay ha iba, may pagpugong ha kalugaringon, malumo, mahigugmaon ha kaopayan, masasarigan, makatadunganon, mapainubsanon ha hunahuna, mahigugmaon ha Dios imbes nga mahigugmaon ha kalipayan, ginpapagios pinaagi han totoo nga debosyon ha Dios; pakigsangkay gud hini nga mga tawo.” Gin-iiristoryahan ba niyo han iyo pamilya o han iyo igkasi-tumuroo kon ano an magigin kinabuhi ha bag-o nga kalibotan?

15. Bisan kon nahahadlok hi Tanja, ano an nakabulig ha iya nga malamposan ito?

¹⁵ Usa nga sister nga taga-North Macedonia nga hi Tanja an naglampos ha iya mga kahadlok pinaagi ha pagpamalandong han mga bendisyon ha tiarabot. Nakontra gud an iya mga kag-anak ha iya pag-aram han Biblia. Nagsiring hiya: “An iba nga mga butang nga akon ginkakahadlokan nga mahitabo natuman gud. Ginkakastigo ako han akon nanay ha katapos han kada katirok. Gintarhog ako han akon mga kag-anak nga papatayon ako kon magin usa ako han mga Saksi ni Jehova.” Ha kataposan, ginpalayas hi Tanja. Ano an iya reaksyon? Nagsiring hiya: “Nagpokus ako ha akon kalipay nga maieksperyensyahan ha waray kataposan tungod kay ginpili ko nga tipigan an akon integridad. Ginhunahuna ko liwat kon paonan-o ako babalosan ni Jehova ha bag-o nga kalibotan tungod han ngatanan nga bangin ko mawara hini nga sistema ngan kon paonan-o an ngatanan nga  karaotan mangangalimtan na.” Gintipigan gud ni Tanja an iya integridad. Ngan ha bulig ni Jehova, nakabiling hiya hin mauukyan. Yana, nakaasawa hi Tanja hin matinumanon nga brother ngan malipayon nga nag-aalagad hira ha bug-os nga panahon.

PARIG-ONA AN IMO PAGSARIG YANA

16. Ano an mabulig ha aton nga magpabilin nga maisugon kon makita na naton an mga panhitabo nga igintagna ha Lucas 21:​26-28?

¹⁶ Ha daku nga kasakitan, an mga tawo “haros madidismayo tungod han kahadlok.” Pero an katawohan han Dios magpapabilin nga marig-on ngan maisugon. (Basaha an Lucas 21:​26-28.) Kay ano nga magigin maisugon kita? Tungod kay nahibaro na kita ha pagsarig kan Jehova. Hi Tanja, nga gin-unabi kanina, nagsiring nga an iya mga eksperyensya hadto nakabulig ha iya nga maatubang an iba nga magkuri nga sitwasyon. “Nahibaroan ko nga mabubuligan kita ni Jehova nga mailob an bisan ano nga sitwasyon ngan bibendisyonan kita niya,” nagsiring hiya. “Usahay baga hin kontrolado han iba an mga sitwasyon, pero ha pagkamatuod may-ada la hira kontrol tungod han pagtugot ni Jehova. Pero bisan kon makuri an problema, matatapos gihapon ito.”

17. Paonan-o makakabulig an aton 2024 nga tinuig nga teksto? (Kitaa an piktyur ha kobre.)

¹⁷ An kahadlok normal la yana. Pero pariho kan David, puydi kita diri magpakontrol ha kahadlok. An aton 2024 nga tinuig nga teksto amo an pag-ampo ni David kan Jehova: “Kon nahahadlok ako, ha imo ako nasarig.” (Sal. 56:3) Tigamni an siring han usa nga eskolar han Biblia mahitungod hini nga bersikulo, “diri ginhuhunahuna ni David an mga nakakapahadlok ha iya o an iya mga problema, lugod ginhuhunahuna niya an iya paratalwas.” Hunahunaa an aton tinuig nga teksto ha masunod nga mga bulan, labi na kon naatubang ka hin makaharadlok nga mga sitwasyon. Paggahin hin panahon ha pagpamalandong han mga ginbuhat ni Jehova ha naglabay, ha ginbubuhat yana, ngan ha pagbubuhaton ha tiarabot. Katapos, pariho kan David, makakasiring ka: “Ha Dios ako nasarig; diri ako nahahadlok.”—Sal. 56:4.