1. Ano an kapulsanan kon naatender kita ha tinuig nga Memoryal han kamatayon han Kristo?

 SIGURADO nga mauyon ka nga presyoso gud nga regalo an lukat! (2 Cor. 9:15) Tungod kay iginhalad ni Jesus an iya kinabuhi sugad nga tawo, puydi ka magkaada duok nga pakigsangkay kan Jehova nga Dios. Mahimo ka liwat magkaada han paglaom nga kinabuhi nga waray kataposan. Angay gud la nga ipakita naton an pagin mapasalamaton ha lukat ngan kan Jehova nga tungod han iya gugma igintagana ito! (Roma 5:8) Basi buligan kita nga magpabilin nga mapasalamaton ngan diri gud igbalewaray an lukat, ginsugo kita ni Jesus nga umatender ha tinuig nga Memoryal han iya kamatayon.​—Luc. 22:​19, 20.

2. Ano an hihisgotan hini nga artikulo?

² Yana nga tuig, an Memoryal paghihimoon ha Sabado, Abril 12, 2025. Sigurado nga nagpaplano kita ngatanan nga umatender. Daku an aton mapapahimulsan kon maggagahin kita hin panahon ha pagpamalandong a ha panahon han Memoryal kon ano an ginhimo ni Jehova ngan han iya Anak para ha aton. Hini nga artikulo, hihisgotan naton kon ano an igintututdo ha aton han lukat mahitungod kan Jehova ngan ha iya Anak. Ha sunod nga artikulo, mabubuligan kita nga masabtan kon paonan-o kita magpapahimulos ha lukat ngan kon paonan-o naton maipapakita an aton pagin mapasalamaton.

AN IGINTUTUTDO HA ATON HAN LUKAT MAHITUNGOD KAN JEHOVA

3. Paonan-o an kamatayon han usa nga tawo nagtubos ha minilyon nga tawo? (Kitaa liwat an piktyur.)

³ An lukat nagtututdo ha aton mahitungod han hustisya ni Jehova. (Deut. 32:4) Paonan-o? Hunahunaa ini: Tungod han pagtalapas ni Adan, napanunod naton an sala nga nagresulta  hin kamatayon. (Roma 5:12) Basi kita magkaada kagawasan ha sala ngan kamatayon, ginpadara ni Jehova hi Jesus basi itagana an lukat. Pero paonan-o an halad han usa nga perpekto nga tawo makakatubos ha minilyon nga tawo? Hi apostol Pablo nagsaysay: “Sugad la nga pinaagi han pagkadiri-masinugtanon han usa nga tawo [hi Adan] damu an nagin makasasala, sugad man liwat pinaagi han pagkamasinugtanon han usa nga tawo [hi Jesus] damu an magigin matadong.” (Roma 5:19; 1 Tim. 2:6) Ha iba nga pagkayakan, tungod han pagin diri masinugtanon han usa nga perpekto nga tawo nagin uripon kita han sala ngan kamatayon. Salit kinahanglan hin usa nga masinugtanon nga perpekto nga tawo basi magkaada kita kagawasan.

4. Kay ano nga waray na la ni Jehova pabay-i nga mabuhi ha waray kataposan an mga anak ni Adan nga tangkod an kasingkasing?

⁴ Kinahanglan gud ba ni Jesus mamatay basi matalwas kita? Kay ano nga waray na la pabay-i ni Jehova nga mabuhi ha waray kataposan an mga anak ni Adan nga tangkod an kasingkasing? Para ha diri perpekto nga mga tawo, baga hin ito an maopay ngan makatadunganon nga himoon. Pero diri ito nagpapakita han perpekto nga hustisya ni Jehova. Tungod kay matadong hi Jehova, diri gud niya igbabalewaray an seryoso nga pagtalapas ni Adan.

5. Kay ano nga makakasiguro kita nga pirme ni Jehova bubuhaton an tama?

⁵ Pero ano man kon waray itagana ni Jehova an lukat ngan ginbalewaray niya an hustisya ngan ginpabay-an na la niya an diri perpekto nga mga anak ni Adan nga mabuhi ha waray kataposan? Posible gud nga maghunahuna an mga tawo nga bangin igbalewaray liwat ni Jehova an hustisya ha iba nga mga butang. Bangin magruhaduha an mga tawo kon tutumanon ba ni Jehova an ngatanan nga iya saad. Diri kita dapat mabaraka kay diri ito mahitatabo. An pagpadapat ni Jehova han hustisya bisan kon daku an iya ginsakripisyo—an paghalad han iya hinigugma nga Anak—nagpapasarig ha aton nga pirme niya bubuhaton an tama.

6. Ano an usa nga paagi nga iginpapakita han lukat an gugma ni Jehova? (1 Juan 4:​9, 10)

⁶ Bisan kon nabulig ha aton an lukat nga mahibaroan nga matadong hi Jehova, labi nga nabulig ito ha aton nga masabtan an kahilarom han iya gugma. (Juan 3:16; basaha an 1 Juan 4:​9, 10.) An katutdoan mahitungod ha lukat, nagpapakita nga diri la basta karuyag ni Jehova nga magkaada kita kinabuhi nga waray kataposan, kondi karuyag liwat niya nga magin kaapi kita han iya pamilya. Hunahunaa ini: Han nakasala hi Adan, diri na hiya kaapi ha pamilya ni Jehova. Salit kita ngatanan,  natawo nga diri kaapi ha pamilya han Dios. Pero tungod han lukat, ginpapasaylo ni Jehova an aton mga sala ngan ha urhi nagigin kaapi ha iya pamilya an ngatanan nga tawo nga nagpapakita hin pagtoo ngan pagkamasinugtanon. Bisan yana, puydi kita magkaada duok nga relasyon kan Jehova ngan ha aton mga igkasi-magsiringba. Oo, hinigugma gud kita ni Jehova!—Roma 5:​10, 11.

7. Paonan-o an pag-antos ni Jesus nabulig ha aton nga masabtan kon ano kadaku an gugma ni Jehova ha aton?

⁷ Mas masasabtan naton kon ano kadaku an gugma ni Jehova ha aton kon huhunahunaon naton an kasakit nga iya gin-abat han nakita niya nga nag-aantos an iya Anak. Siring ni Satanas nga waray alagad han Dios nga magpapabilin nga maunungon ha iya kon makuri an pagbuhat hito. Basi mapamatud-an nga buwa ito nga akusasyon, gintugotan ni Jehova nga mag-antos hi Jesus antes hiya mamatay. (Job 2:​1-5; 1 Ped. 2:21) Nakita ni Jehova nga gintamay hi Jesus han relihiyoso nga mga parakontra, ginkastigo han mga sundalo, ngan ginraysang ha kahoy. Katapos, nakita ni Jehova an iya hinigugma nga Anak nga namatay ha masakit gud nga paagi. (Mat. 27:​28-31, 39) May gahum hi Jehova nga pugngan nga mahitabo ito ngatanan. Pananglitan, han nagsiring an mga parakontra: “Yana talwason unta [han Dios] hiya kon nalilipay Hiya ha iya.” (Mat. 27:​42, 43) Pero kon nanginlabot an Dios, waray unta lukat nga naibayad ngan waray unta kita paglaom. Salit ginpabay-an ni Jehova nga mag-antos an iya anak tubtob nga mamatay.

8. Nasakitan ba hi Jehova han nakita niya nga nag-aantos an iya Anak? Isaysay. (Kitaa liwat an piktyur.)

⁸ Diri kita dapat maghunahuna nga tungod kay makagarahum-ha-ngatanan an Dios, waray hiya mga pag-abat. May abilidad kita ha pag-abat kay ginlarang kita uyon ha iya dagway. Salit karuyag sidngon, may mga pag-abat hi Jehova. Mababasa ta ha Biblia nga “ginpasubo hiya” ngan “ginbido.” (Sal. 78:​40, 41) Pansina liwat an rekord mahitungod kan Abraham ngan Isaac. Ginsugo ni Jehova hi Abraham nga ihalad an iya bugtong nga Anak. (Gen. 22:​9-12; Heb. 11:​17-19) Hunahunaa la an magkalain-lain nga emosyon nga gin-abat ni Abraham samtang nangangandam hiya ha pagbuno ha iya anak nga hi Isaac gamit an kutsilyo. Labi na nga nasubo gud hi Jehova nga makita an iya Anak nga ginkakastigo ngan ginpapakurian han diri diosnon nga mga tawo tubtob nga mamatay!—Kitaa ha jw.org an video nga Subara an Ira Pagtoo—Abraham, Bahin 2.

9. Ano an aton mahibabaroan tikang ha Roma 8:​32, 38, 39 mahitungod han kahilarom han gugma ni Jehova ha imo ngan ha imo mga igkasi-magsiringba?

⁹ Iginpapakita han lukat nga mas daku gud an gugma ni Jehova ha aton kay han gugma han aton pinakaduok nga paryente o sangkay.  (Basaha an Roma 8:​32, 38, 39.) Sigurado nga mas daku an gugma ni Jehova ha aton kay han gugma naton ha aton kalugaringon. Karuyag mo ba mabuhi hin waray kataposan? Mas karuyag gud ni Jehova nga mabuhi ka hin waray kataposan. Karuyag mo ba nga pasayloon an imo mga sala? Mas karuyag gud ni Jehova nga pasayloon an imo mga sala. An gusto la niya nga buhaton naton amo an karawaton naton an iya presyoso nga regalo nga lukat, pinaagi ha pagpakita hin pagtoo ngan pagin masinugtanon. An lukat usa gud nga kapahayagan han gugma han Dios. Ngan ha bag-o nga kalibotan, mas damu pa an aton mahibabaroan mahitungod han gugma ni Jehova.​—Ecles. 3:11.

AN IGINTUTUTDO HA ATON HAN LUKAT MAHITUNGOD KAN JESUS

10. (a) Ano an labi nga nakabido kan Jesus mahitungod ha pagpatay ha iya? (b) Ha ano nga mga paagi ginbaraan ni Jesus an ngaran ni Jehova? (Kitaa liwat an kahon nga “ An Integridad ni Jesus Nagbaraan han Ngaran ni Jehova.”)

¹⁰ Importante gud kan Jesus an reputasyon han iya Amay. (Juan 14:31) Nabido hi Jesus nga gin-akusaran hiya nga nag-aaghat ha mga tawo nga magrebelde ha gobyerno ngan hin pagpasipara ha Dios kay makakaraot ito ha reputasyon han iya Amay. Salit nag-ampo hiya: “Amay ko, kon posible, palabya ha akon ini nga kopa.” (Mat. 26:39) Pinaagi han pagtipig ni Jesus han iya integridad ha iya Amay tubtob ha kamatayon, bug-os nga ginpamatud-an niya nga buwa an mga akusasyon ni Satanas ha iya Amay.

11. Paonan-o iginpakita ni Jesus nga interesado gud hiya ha kaopayan han mga tawo? (Juan 13:1)

¹¹ Iginpapakita han lukat nga interesado gud hi Jesus ha kaopayan han mga tawo, labi na han iya mga disipulo. (Prob. 8:31; basaha an Juan 13:1.) Pananglitan, maaram hi Jesus  nga magigin makuri gud an pipira nga bahin han iya pagministeryo ha tuna, labi na gud an iya masakit nga kamatayon. Pero ginbuhat ni Jesus ito ngatanan, diri la tungod kay ginsugo hiya ni Jehova, kondi tungod kay hinigugma gud niya an mga tawo. Ginpakita niya ito nga gugma pinaagi ha pagsangyaw, pagtutdo, ngan pagbulig ha ira. Bisan han gab-i antes hiya arestuhon ngan patayon, ginhimsawan ni Jesus an iya mga apostol, ginliaw hira, ngan damu an iya gintugon ha ira. (Juan 13:​12-15) Katapos, samtang nakaraysang hi Jesus ha kahoy, naggahin hiya hin panahon basi tagan hin paglaom an tikamatay na nga kriminal, ngan gintugon niya hi Juan nga panginanoon an iya nanay. (Luc. 23:​42, 43; Juan 19:​26, 27) Salit iginpakita ni Jesus an iya hilarom nga gugma diri la pinaagi han iya kamatayon kondi pati liwat han iya bug-os nga kinabuhi dinhi ha tuna.

12. Ha ano nga paagi padayon nga naghihimo hi Jesus hin mga sakripisyo para ha aton?

¹² Bisan kon “makausa gud la” mamatay an Kristo, naghihimo la gihapon hiya hin mga sakripisyo para ha aton. (Roma 6:10) Paonan-o? Padayon hiya nga may ginbubuhat nga mag-opay para ha aton nga nagin posible tungod han lukat. Hunahunaa an iya damu nga ginbubuhat. Hiya an aton Hadi, Hitaas nga Saserdote, ngan ulo han kongregasyon. (1 Cor. 15:25; Efe. 5:23; Heb. 2:17) Hiya an gintaporan ha pagtirok han mga dinihogan ngan han daku nga grupo, usa nga buruhaton nga mahuhuman antes an daku nga kasakitan. b (Mat. 25:32; Mar. 13:27) Ginsisiguro liwat niya nga an iya matinumanon nga mga surugoon makakaon hin maopay ha espirituwal hinin kataposan nga mga adlaw. (Mat. 24:45) Ngan ha iya bug-os nga Usa ka Yukot ka Tuig nga Pagmando padayon hiya nga magbubuhat hin mag-opay para ha aton. Ginhatag gud ni Jehova an iya Anak para ha aton!

PADAYON GUD NGA MAHIBARO

13. Paonan-o an pagpamalandong makakabulig ha imo nga mahibaro mahitungod han gugma nga iginpakita ha aton han Dios ngan han Kristo?

¹³ Padayon ka nga mahibabaro mahitungod ha gugma ha aton ni Jehova nga Dios ngan ni Kristo Jesus kon padayon mo ito nga papamalandungon. Ha mga semana antes ngan katapos han Memoryal hini nga tuig, puydi mo basahon hin maopay an usa han mga Ebanghelyo o sobra pa. Ha kada mo pagbabasa, ayaw pagbasa  hin sobra kadamu nga kapitulo. Lugod, hinay-hinay la ngan pamiling hin iba pa nga mga rason kon kay ano nga dapat naton higugmaon hi Jehova ngan hi Jesus. Ngan isumat gud ha iba an imo nahibaroan.

14. Uyon ha Salmo 119:97 ngan ha footnote, paonan-o an pag-research makakabulig ha aton nga padayon nga mahibaro mahitungod ha lukat ngan pati na ha iba pa nga mga katutdoan? (Kitaa liwat an piktyur.)

¹⁴ Kon maiha ka na ha kamatuoran, bangin maghunahuna ka kon posible pa ba makadiskobre hin bag-o nga hilarom nga mga pagsabot ha pamilyar nga mga topiko sugad han hustisya han Dios, iya gugma, ngan han lukat. Ha pagkamatuod, waray kataposan an aton paghibaro mahitungod hini ngan ha iba pa nga mga topiko. Salit ano an puydi mo buhaton? Pahimulsi an damu gud nga impormasyon nga makikita ha aton mga publikasyon. Kon may mabasa ka ha Biblia nga diri mo bug-os nga nasasabtan, ig-research ito. Katapos, ha bug-os nga adlaw, pamalandonga an imo nadiskobrehan ngan an igintututdo hito mahitungod kan Jehova, ha iya Anak, ngan an ira gugma para ha imo.​—Basaha an Salmo 119:97 ngan footnote.

15. Kay ano nga dapat kita padayon nga mamiling hin mga hiyas ha Biblia?

¹⁵ Ayaw panluya kon waray ka nakikita nga bag-o o makapainteres nga butang ha kada mo pagbabasa o pagri-research. Pariho ka hin tawo nga nagpipinamiling hin bulawan. An mga tawo nga nagpipinamiling hin bulawan mapailubon nga naggagahin hin mga oras o mga adlaw antes hira makaagi bisan la han gutiay gud nga tipik han bulawan. Pero nagpapadayon hira kay importante ha ira an kada tipik han bulawan. Labi na gud nga mas importante an kada hiyas han kamatuoran ha Biblia! (Sal. 119:127; Prob. 8:10) Salit magin pasensyoso ngan sunda an imo eskedyol ha pagbasa ha Biblia.​—Sal. 1:2.

16. Paonan-o naton masusubad hi Jehova ngan hi Jesus?

¹⁶ Samtang nag-aaram ka, hunahunaa kon paonan-o mo maiaaplikar an imo nahibaroan. Pananglitan, subara an hustisya ni Jehova pinaagi ha pagtratar ha iba nga waray ginpapaurog. Subara an gugma ni Jesus ha iya Amay ngan ha iba pinaagi ha pagin andam nga mag-antos para ha ngaran ni Jehova ngan ha pagbulig ha imo mga igkasi-Kristiano. Subara liwat hi Jesus pinaagi ha pagsangyaw ha iba basi magkaada hira oportunidad nga karawaton an presyoso gud nga regalo ni Jehova.

17. Ano an aton hihisgotan ha sunod nga artikulo?

¹⁷ Kon mas nasasabtan naton ngan gin-aapresyar an lukat, mas hihigugmaon naton hi Jehova ngan an iya Anak. Salit mas hihigugmaon liwat kita nira. (Juan 14:21; San. 4:8) Gamiton naton an mga tagana ni Jehova basi padayon nga mahibaro mahitungod ha lukat. Hihisgotan ha sunod nga artikulo an pipira nga paagi nga mahimo kita magpahimulos ha lukat ngan kon paonan-o naton maipapakita an aton pagin mapasalamaton ha gugma ni Jehova.