1. Ha ano nakapokus an damu nga tawo yana?

 NAPAPANSIN mo ba nga damu yana an baga hin nakapokus la ha ira kalugaringon? Pananglitan, daku nga panahon an gin-gagamit han iba ha social media basi makakuha hin atensyon ngan ipakita an ira mga nahimo. Pero gutiay la yana an naghahatag hin himaya kan Jehova nga Dios. Hini nga artikulo, hihisgotan naton kon ano an karuyag sidngon han paghatag hin himaya kan Jehova ngan kon ano an dapat magpagios ha aton ha pagbuhat hito. Aton liwat mahibabaroan kon paonan-o kita makakahatag ha Dios hin himaya nga dapat gud ihatag ha iya ngan kon paonan-o niya hihimayaon an iya ngaran ha diri na maiha.

ANO AN KARUYAG SIDNGON HAN PAGHATAG HIN HIMAYA KAN JEHOVA?

2. Paonan-o iginpakita ni Jehova an iya himaya ha Bukid Sinai? (Kitaa liwat an piktyur.)

² Ano an himaya? Ha Biblia, an pulong nga “himaya” puydi magpasabot hin bisan ano nga butang nga tungod hito an usa nakakaimpres ha iba. Hi Jehova naghimo hin nakakaimpres nga pagpakita han iya himaya paggawas gud la han nasud han Israel tikang ha pagkabihag ha Ehipto. Imadyina ini: Minilyon nga Israelita an nakada ha ubos han Bukid Sinai nga nagkakatirok basi mamati ha isisiring han ira Dios. Naputos hin madakmol nga dampog an bukid. Tigda nga nagkaada makusog nga linog—posible tungod liwat han bulkan—samtang nakidlat, nadalugdog, ngan may makusog nga tunog han sungay. (Ex. 19:​16-18; 24:17; Sal. 68:8) Sigurado nga naimpres gud an mga Israelita han iginpakita ni Jehova an iya himaya ha gamhanan nga paagi.

3. Ano an karuyag sidngon han paghatag kan Jehova hin himaya?

³ Pero kumusta man an mga tawo? Makakahatag gud ba kita  kan Jehova hin himaya? Oo, kaya naton. An usa nga paagi nga maihahatag naton kan Jehova an himaya amo an pagsumat ha iba mahitungod han iya urusahon nga gahum ngan han iya magpakaruruyag nga kalidad. Nahihimaya liwat naton an Dios kon iginhahatag naton ha iya an kadayawan ha aton mga nahihimo tungod han iya bulig. (Isa. 26:12) Hi Hadi David usa nga maopay gud nga ehemplo ha paghatag hin himaya kan Jehova. Ha iya pag-ampo ha atubangan han kongregasyon ha Israel, nagsiring hiya ha Dios: “Ikaw, O Jehova, harangdon ngan gamhanan ngan maanyag ngan dungganon ngan mahimayaon, kay ikaw an tag-iya han ngatanan nga butang ha langit ngan ha tuna.” Han gintapos ni David an iya pag-ampo, “an bug-os nga kongregasyon nagdayaw kan Jehova.”​—1 Cron. 29:​11, 20.

4. Paonan-o ginhimaya ni Jesus hi Jehova?

⁴ Han hi Jesus nakanhi ha tuna, ginhimaya niya hi Jehova nga iya Amay pinaagi ha pagkilala nga Hiya an gintitikangan han iya mga milagro. (Mar. 5:​18-20) Ginhimaya liwat ni Jesus hi Jehova pinaagi ha pakiistorya ha iba mahitungod ha iya Amay ngan ha iya paagi han pagtratar ha iba. Ha usa nga higayon, nagtutdo hi Jesus ha usa nga sinagoga. An usa han mga namamati ha iya amo an babaye nga ginsaniban hin demonyo ha sulod hin 18 ka tuig na. Tungod han demonyo nakaob an iya lawas salit diri na hiya nakakatindog hin tadong. Makalolooy gud hiya! Tungod kay pinaid hi Jesus, gindaop niya an babaye ngan may pagkabuotan nga gintawag hiya, nga nagsiring: “Babaye, nakagawas ka na ha imo panluya.” Ngan igintungbaw niya an iya mga kamot ha iya ngan nakatindog dayon hiya hin tadong ngan “nagtikang paghimaya ha Dios,” an iya kahimsog ngan dignidad bug-os nga naibalik! (Luc. 13:​10-13) Ito nga babaye may maopay nga rason nga dayawon hi Jehova ngan kita liwat.

ANO AN NAGPAPAGIOS HA ATON NGA MAGHATAG HIN HIMAYA KAN JEHOVA?

5. Ano an mga rason nga angay naton respetuhon hi Jehova?

⁵ Ginhihimaya naton hi Jehova kay ginrirespeto gud naton hiya. Damu an aton rason nga respetuhon hiya. Hi Jehova makagarahum-ha-ngatanan ngan waray tubtoban an iya gahum. (Sal. 96:​4-7) An iya daku nga kinaadman nakikita gud ha mga butang nga iya ginhimo. Hiya an naghatag ha aton hin kinabuhi ngan han ngatanan nga aton kinahanglan basi padayon nga mabuhi. (Pah. 4:11) Maunungon hiya. (Pah. 15:4) Naglalampos an ngatanan niya nga ginbubuhat ngan pirme niya gintutuman an iya mga saad. (Jos. 23:14) Ito an rason nga hi propeta Jeremias nagsiring mahitungod kan Jehova: “Ha ngatanan nga maaramon nga tawo han mga nasud ngan ha ngatanan nira nga ginhadian, waray gud bisan usa nga pariho ha imo”! (Jer. 10:​6, 7) Sigurado nga may-ada kita mag-opay nga rason nga respetuhon an aton Amay ha langit. Pero labaw pa ha pagrespeto an angay naton ihatag kan Jehova—dapat naton hiya higugmaon.

6. Kay ano nga hinigugma naton hi Jehova?

⁶ Ginhihimaya naton hi Jehova kay hinigugma gud naton hiya. Hunahunaa la an pipira nga kalidad ni Jehova nga tungod hito hinigugma naton hiya. Maloloy-on hiya ngan mapinairon. (Sal. 103:13; Isa. 49:15) May empatiya hiya; kon nasasakitan kita, nasasakitan liwat hiya. (Zac. 2:8) Ginhihimo niya nga masayon an paghirani ha iya basi magin Sangkay naton hiya. (Sal. 25:14; Buh. 17:27) Ngan mapainubsanon hiya; “natamod hiya basi kitaon an langit ngan an tuna, ginbabangon an ubos tikang ha tapotapo.” (Sal. 113:​6, 7) Salit may-ada ba diri maruruyag nga himayaon an aton harangdon nga Dios?​—Sal. 86:12.

7. Ano an aton espesyal nga oportunidad?

 ⁷ Ginhihimaya naton hi Jehova kay karuyag naton nga makilala hiya han iba. Damu an diri maaram han kamatuoran mahitungod kan Jehova. Kay ano? Kay ginbuta ni Satanas an ira mga panhunahuna pinaagi ha pagpasarang hin grabe nga kabuwaan mahitungod ha iya. (2 Cor. 4:4) Ginkukombinse ni Satanas an mga tawo nga hi Jehova mahilig bumulos, diri interesado ha aton kaopayan, ngan hiya an hinungdan han duro nga pag-antos han kalibotan. Pero maaram kita han kamatuoran mahitungod ha aton Dios! May oportunidad kita nga isumat ha iba kon ano gud hiya nga klase hin Dios ngan tungod hito mahihimaya hiya. (Isa. 43:10) An Salmo 96 nakapokus ha paghatag hin himaya kan Jehova. Samtang aton ginhihisgotan an pipira nga giniyahan nga pulong hini nga salmo, hunahunaa an mga paagi nga maihahatag mo kan Jehova an himaya nga dapat gud ihatag ha iya.

PAONAN-O NATON MAIHAHATAG KAN JEHOVA AN HIMAYA NGA ANGAY HA IYA?

8. Ano an usa nga paagi nga mahihimaya naton hi Jehova? (Salmo 96:​1-3)

⁸ Basaha an Salmo 96:​1-3. Mahihimaya naton hi Jehova pinaagi ha aton ginyayakan mahitungod ha iya. Hini nga mga bersikulo, an katawohan ni Jehova gin-aaghat nga ‘magkanta kan Jehova,’ ‘dayawon an iya ngaran,’ “ipasamwak an maopay nga sumat han iya pagtalwas,” ngan “ipahayag an iya himaya ha mga nasud.” Ito ngatanan, mga paagi nga mahihimaya naton an aton Amay ha langit. An magtinumanon nga Judio ngan an siyahan-siglo nga Kristiano waray mag-alang nga isumat ha iba an mahitungod ha ngatanan nga mag-opay nga butang nga ginbuhat ni Jehova para ha ira ngan ha pagdepensa ha Iya reputasyon. (Dan. 3:​16-18; Buh. 4:29) Paonan-o ta liwat ito mahihimo?

9-10. Ano an imo nahibaroan ha eksperyensya ni Angelena? (Kitaa liwat an piktyur.)

⁹ Pansina an eksperyensya ni Angelena, a usa nga sister nga taga-United States. Maisugon nga gindepensahan niya an reputasyon ni Jehova ha kompanya nga iya gintatrabahoan. Sugad nga bag-o nga empleyado, gin-imbitar hi Angelena ha usa nga miting diin an bag-o pa la nga nagtatrabaho ha ira kompanya gintagan hin higayon nga magsumat ha ira mga katrabaho mahitungod ha ira background. Nag-andam hi Angelena hin mga piktyur nga nagpapakita nga malipayon hiya sugad  nga usa han mga Saksi ni Jehova. Pero antes gud la hiya magyakan, usa nga katrabaho an nagpakilala nga nagdaku hiya ha Saksi nga pamilya. Nagyakan hiya hin maraot ha aton mga gintotoohan. Nagsiring hi Angelena: “Ginkinulba gud ako. Pero ginsidngan ko an akon kalugaringon: ‘Papabay-an ko la ba nga may magyakan hin buwa mahitungod kan Jehova? O maninindogan ako para ha iya?’”

¹⁰ Han natapos magyakan an iya katrabaho, nag-ampo hi Angelena hin hilom ngan halipot. Katapos, may pagkabuotan nga ginsidngan niya hiya: “Pariho an aton background. Ginpadaku liwat ako nga usa han mga Saksi ni Jehova, ngan tubtob yana nagpapadayon ako.” Bisan kon tensyonado an kahimtang, nagpabilin nga kalmado hi Angelena. Iginpakita niya ha iya mga katrabaho an iya mga piktyur kaupod an iya kasangkayan nga nagpapakita han iya malipayon nga pag-alagad kan Jehova ngan may respeto nga iginsaysay niya an iya mga gintotoohan. (1 Ped. 3:15) Ano an resulta? Han natapos na an presentasyon ni Angelena, nagkalma ito nga iya katrabaho. Ngan gin-unabi pa ngani niya an iya makalilipay nga mga eksperyensya han bata pa hiya kaupod an mga Saksi ni Jehova. Nagsiring hi Angelena: “Angay la nga depensahan hi Jehova. Usa nga dungog nga magyakan hin kamatuoran mahitungod ha iya.” Mapapasidunggan liwat naton hi Jehova pinaagi ha pagdayaw ha iya ngan paghimaya bisan pa kon diri hiya ginpapasidunggan han iba.

11. Paonan-o ginsusunod han tinuod nga mga magsiringba ha bug-os nga kasaysayan an prinsipyo nga mababasa ha Salmo 96:8?

¹¹ Basaha an Salmo 96:8. Mahihimaya naton hi Jehova pinaagi han aton mga panag-iya. Pirme ginpapasidunggan han tinuod nga mga magsiringba hi Jehova hito nga paagi. (Prob. 3:9) Pananglitan, nagdonar an mga Israelita para ha pagtukod ngan ha pagmintinar han templo. (2 Hadi 12:​4, 5; 1 Cron. 29:​3-9) An mga disipulo han Kristo nag-asikaso ha iya ngan ha iya mga apostol gamit an “ira mga panag-iya.” (Luc. 8:​1-3) An mga Kristiano ha siyahan nga siglo naghatag liwat hin ayuda para ha ira espirituwal nga kabugtoan. (Buh. 11:​27-29) Yana, mahihimaya liwat naton hi Jehova pinaagi han aton boluntaryo nga mga donasyon.

12. Paonan-o an aton mga donasyon naghihimaya kan Jehova? (Kitaa liwat an piktyur.)

¹² Pansina an usa nga eksperyensya nga nagpapakita nga an aton mga donasyon naghihimaya kan Jehova. Iginsumat han usa nga report han 2020 an epekto han maiha nga huraw ha Zimbabwe. Minilyon nga tawo an naninelikado nga mamatay tungod han gutom, upod  na an sister nga hi Prisca. Bisan pa han huraw, nagpadayon hi Prisca ha iya rutina ha pagsangyaw kada Mierkoles ngan Biernes, bisan pa kon panahon ito han pangandam han tuna para ha pananom. Gintinawaan hiya han iya mga amyaw kay nagawas hiya basi magministeryo imbes nga magtrabaho ha iya uma, nga nasiring, “Gugutumon ka.” May kompyansa nga nagsiring hi Prisca, “Diri gud ginpapabay-an ni Jehova an iya mga surugoon.” Waray pag-iha katapos hito, nakakarawat hiya hin relief tikang ha aton organisasyon. Tungod han aton mga donasyon nagkaada sugad hito nga mga relief. Naimpres an iya mga amyaw, ngan ginsidngan hiya, “Waray ka gud pabay-i han Dios, salit karuyag namon mahibaro pa mahitungod ha Iya.” Pito han iya mga amyaw an nagtikang umatender ha mga katirok han kongregasyon.

13. Paonan-o an aton panggawi naghihimaya kan Jehova? (Salmo 96:9)

¹³ Basaha an Salmo 96:9. Mahihimaya naton hi Jehova pinaagi han aton panggawi. An mga saserdote nga nag-alagad kan Jehova ha templo dapat magin limpyo ha pisikal. (Ex. 40:​30-32) Pero mas importante an pagin limpyo ha panggawi kay ha pagin limpyo ha pisikal. (Sal. 24:​3, 4; 1 Ped. 1:​15, 16) Kinahanglan naton maningkamot nga hukason an “daan nga personalidad”—mahugaw nga mga panggawi ngan mga buhat—ngan isul-ot an “bag-o nga personalidad”—usa nga paagi han panhunahuna ngan buhat nga nagpapakita han mahimayaon nga mga kalidad ni Jehova. (Col. 3:​9, 10) Ha bulig ni Jehova, bisan an pinakaimoral ngan pinakabayolente nga tawo puydi magbag-o ngan magsul-ot han bag-o nga personalidad.

14. Ano an imo nahibaroan ha eksperyensya ni Jack? (Kitaa liwat an piktyur.)

¹⁴ Pansina an eksperyensya ni Jack, usa nga bayolente ngan delikado nga tawo nga gintawag nga An Demonyo. Tungod han iya nahimo nga mga krimen, ginsentensyahan hiya hin kamatayon. Pero samtang naghuhulat hiya nga patayon, nagpa-Bible study hiya ha usa nga brother nga nabisita ha prisohan. Bisan pa han maraot nga pagkatawo hadto ni Jack, ginhukas niya an iya daan nga personalidad, ngan nagin kwalipikado ha bawtismo. Daku gud an iginbag-o ni Jack. Ha adlaw nga papatayon na hiya, an pipira nga gwardya han prisohan nagtangis samtang nakikiistorya ha iya. Usa nga sarhento nga nagtatrabaho hito nga prisohan an nagsiring: “Hadto, hi Jack an pinakamaraot nga priso dinhi. Yana, usa na hiya han pinakabuotan.” Han sumunod nga semana katapos patayon hi Jack, an kabugtoan nga binalik  ha prisohan basi magdumara hin sinemana nga katirok may nakilala nga priso nga first time pa la nga makaatender. Ano an nagpagios ha iya nga umatender? Naimpres hiya ha pagbag-o ni Jack ngan karuyag niya mahibaroan kon ano an dapat buhaton basi masingba hi Jehova. Klaro nga an aton panggawi nakakahatag hin himaya ha aton Amay ha langit!—1 Ped. 2:12.

PAONAN-O HIHIMAYAON NI JEHOVA AN IYA NGARAN HA DIRI NA MAIHA?

15. Paonan-o ni Jehova bug-os nga hihimayaon an iya ngaran ha diri na maiha? (Salmo 96:​10-13)

¹⁵ Basaha an Salmo 96:​10-13. Iginpapakita han ultimo nga mga bersikulo han Salmo 96 nga hi Jehova matadong nga Hukom ngan Hadi. Paonan-o ni Jehova hihimayaon an iya ngaran ha diri na maiha? Pinaagi han iya mga paghukom. Diri na maiha, bubungkagon niya an Babilonya nga Gamhanan tungod han pagpasipara ha iya baraan nga ngaran. (Pah. 17:​5, 16; 19:​1, 2) An pipira nga makakakita han kabungkagan han Babilonya nga Gamhanan posible nga umupod ha aton ha tinuod nga pagsingba. Ha urhi, ha Armagedon, bubungkagon ni Jehova an bug-os nga sistema ni Satanas, tungod hito mawawara an ngatanan nga nakontra ha iya ngan an nagpapasipara ha iya ngaran. Pero tatalwason an ngatanan nga nasugot ngan nahigugma ha iya ngan an mga nalilipay ha paghatag ha iya hin himaya. (Mar. 8:38; 2 Tes. 1:​6-10) Katapos han ultimo nga pagsari nga mahitatabo katapos han Usa ka Yukot ka Tuig nga Pagmando han Kristo, bug-os na nga nabaraan ni Jehova an iya ngaran. (Pah. 20:​7-10) Hito nga panahon, “an tuna mapupuno han kahibaro mahitungod han himaya ni Jehova sugad la nga an dagat nalulukop hin katubigan.”​—Hab. 2:14.

16. Ano an imo determinasyon? (Kitaa liwat an piktyur.)

¹⁶ Eksayted gud kita nga makita nga an ngatanan nga buhi maghahatag hin himaya kan Jehova nga angay ha iya ngaran! Pero tubtob nga diri pa naabot ito nga panahon, puydi naton tumanon an aton papel pinaagi ha paghimaya ha aton Dios ha tagsa nga oportunidad. Basi pabug-atan inin importante nga responsabilidad, ginpili han Nagmamando nga Lawas an Salmo 96:8 nga amo an aton magin tinuig nga teksto para ha 2025: “Ihatag kan Jehova an himaya nga angay ha iya ngaran.”