1. Ano an aton mahihimo basi mapalipay hi Jehova?

 IMADYINA nga naghatag ka ha usa nga imo hinigugma hin espesyal nga regalo nga maopay ngan magagamit gud niya. Masusubo ka gud kon itago la ito niya ha kabinet ngan diri na panginanoon! Pero sigurado nga malilipay ka gud kon magpasalamat hiya ha imo ngan gamiton niya ito hin maopay. Ano an aton mahibabaroan hini nga ilustrasyon? Ginhatag ni Jehova an iya Anak basi mamatay para ha aton. Sigurado nga malipayon gud hi Jehova kon mapasalamaton kita hito nga presyoso nga regalo ngan ha iya gugma, nga nagpagios ha iya nga itagana an lukat!—Juan 3:16; Roma 5:​7, 8.

2. Ano an aton hihisgotan hini nga artikulo?

² Pero ha paglabay han panahon, posible nga hinay-hinay nga mawara an aton apresasyon ha lukat. Maipapariho ito ha pagtago han regalo han Dios ha kabinet. Malipayon kita nga nagkaada hito, pero iginbutang naton ito ha lugar nga diri nakikita. Basi diri ito mahitabo dapat pirme naton hunahunaon an aton pagin mapasalamaton ha ginbuhat ha aton han Dios ngan han Kristo. Makakabulig ha aton ini nga artikulo kon paonan-o ito bubuhaton. Hihisgotan naton kon paonan-o kita nagpapahimulos yana ha lukat ngan kon paonan-o kita makakapahimulos hito ha tiarabot. Hihisgotan liwat naton kon paonan-o naton maipapakita nga mapasalamaton kita ha gugma ni Jehova, labi na ha panahon han Memoryal.

KON PAONAN-O KITA NAGPAPAHIMULOS YANA

3. Ano an usa nga paagi nga nagpapahimulos kita yana han lukat?

³ Nagpapahimulos na kita ha halad-lukat han Kristo. Pananglitan, tungod han lukat ginpapasaylo ni Jehova an aton mga sala. Diri hiya obligado nga buhaton ito, pero karuyag niya. An  mapasalamaton nga salmista nagkanta: “Kay ikaw, O Jehova, maopay ngan andam magpasaylo.”​—Sal. 86:5; 103:​3, 10-13.

4. Kan kanay igintagana ni Jehova an lukat? (Lucas 5:32; 1 Timoteo 1:15)

⁴ Bangin inaabat han iba nga diri hira takos han pagpasaylo ni Jehova. Ha totoo la, kita ngatanan diri angay, o takos, hito. Inabat ni apostol Pablo nga “diri [hiya] takos tawagon nga apostol.” Pero nagsiring pa hiya: “Pinaagi han diri matupngan nga pagkabuotan han Dios nagin sugad ako hini.” (1 Cor. 15:​9, 10) Kon nagbabasol kita han aton mga sala, ginpapasaylo kita ni Jehova. Kay ano? Diri tungod kay angay kita hito kumarawat, kondi tungod kay hinigugma kita niya. Kon naabat ka nga diri ka takos, hinumdumi nga igintagana ni Jehova an lukat, diri para ha mga tawo nga waray sala, kondi para ha mabinasulon nga magpakasasala.​—Basaha an Lucas 5:32; 1 Timoteo 1:15.

5. Dapat ba umabat an bisan hin-o ha aton nga may obligasyon hi Jehova nga kaloy-an kita? Isaysay.

⁵ Waray bisan hin-o ha aton an dapat umabat nga may obligasyon hi Jehova nga kaloy-an kita bisan kon damu ka tuig na kita nga nag-aalagad ha iya. Syempre, gin-aapresyar ni Jehova an ngatanan nga ginhimo naton para ha iya. (Heb. 6:10) Iginhatag niya an iya Anak para ha aton sugad nga regalo nga waray bayad, diri sugad nga bayad ha aton pag-alagad. Kon masiring kita nga dapat kita kaloy-an o obligasyon ni Jehova nga buhaton ito tungod han aton damu nga nabuhat para ha Iya, baga hin nasiring liwat kita, nga namatay an Kristo hin waray kapulsanan.​—Ikompara an Galacia 2:21.

6. Kay ano nga nangalimbasog hi Pablo ha pag-alagad kan Jehova?

⁶ Maaram hi Pablo nga bisan kon damu an iya ginbuhat para kan Jehova, diri la gihapon obligado hi Jehova nga pasayloon hiya. Pero kay ano man nga nangalimbasog gud hiya ha pag-alagad kan Jehova? Diri para pamatud-an nga angay hiya pasayloon, kondi para ipakita an apresasyon ha diri matupngan nga pagkabuotan ni Jehova. (Efe. 3:7) Pariho kan Pablo, padayon kita nga nag-aalagad nga madasigon, diri para magkaada obligasyon hi Jehova nga kalooyan kita, kondi para ipakita an aton apresasyon.

7. Ano an usa nga paagi nga nagpapahimulos kita yana han lukat? (Roma 5:1; Santiago 2:23)

⁷ An usa nga paagi nga nagpapahimulos kita yana han lukat amo an oportunidad nga magkaada duok, nga personal nga relasyon kan Jehova. a Sugad han gin-unabi han nauna nga artikulo, han natawo kita, waray kita relasyon ha Dios. Pero tungod han lukat, puydi kita ‘makigmurayaw ha Dios.’ Salit mahimo kita magin duok ha iya.​—Basaha an Roma 5:1; Santiago 2:23.

8. Kay ano nga dapat kita magin mapasalamaton kan Jehova tungod han pribilehiyo nga pag-ampo?

⁸ Pansina an usa la nga bahin han aton relasyon kan Jehova—an pribilehiyo nga pag-ampo. Labot la nga namamati hi Jehova ha mga pag-ampo ha publiko han iya katawohan kon nagkakatirok hira, namamati liwat hiya ha pribado nga mga pag-ampo han kada tagsa ha aton. An pag-ampo nakakapakalma han aton kasingkasing ngan naghahatag ha aton hin kamurayawan ha hunahuna, pero may-ada pa ito mas daku nga kapulsanan. Nakakaparig-on ito han aton pakigsangkay ha Dios. (Sal. 65:2; San. 4:8; 1 Juan 5:14) Han nakanhi hi Jesus ha tuna, pirme hiya nag-aampo kay maaram hiya nga namamati hi Jehova ha iya ngan maaram hiya nga an pag-ampo nabulig nga matipigan nga marig-on an iya relasyon ha iya Amay. (Luc. 5:16) Mapasalamaton gud kita nga tungod han halad ni  Jesus mahimo kita magin sangkay ni Jehova ngan makaistorya pa ngani hiya ha pag-ampo!

KON PAONAN-O KITA MAKAKAPAHIMULOS HA TIARABOT

9. Ha tiarabot, paonan-o magpapahimulos ha lukat an matinumanon nga mga magsiringba?

⁹ Ha tiarabot, paonan-o magpapahimulos ha lukat an matinumanon nga mga magsiringba ni Jehova? Tatagan hira hin kinabuhi nga waray kataposan. Damu nga tawo an naghuhunahuna nga imposible ito, kay yinukot ka tuig na nga namamatay an mga tawo. Pero an orihinal nga katuyoan ni Jehova para ha mga tawo amo an mabuhi hin waray kataposan. Kon waray makasala hi Adan, waray unta maghuhunahuna nga imposible nga mahitabo an kinabuhi nga waray kataposan. Ngan bisan kon makuri maimadyin yana nga mabubuhi kita hin waray kataposan, makakatoo kita nga mahitatabo ito, kay maaram kita nga iginbayad ni Jehova an pinakadaku nga kantidad, an kinabuhi han iya kalugaringon nga Anak, basi magin posible ito.​—Roma 8:32.

10. Ano an ginpapamulat han mga dinihogan ngan han iba nga mga karnero?

¹⁰ Bisan kon an kinabuhi nga waray kataposan ha tiarabot pa mapapahimulsan, karuyag ni Jehova nga pamulaton naton ito yana. Ginpapamulat han mga dinihogan an may katuyoan nga kinabuhi ha langit kon mandoan na nira an tuna kaupod an Kristo. (Pah. 20:6) Ginpapamulat naman han iba nga mga karnero an pag-ukoy ha paraiso nga tuna nga waray na kasakit ngan kasubo. (Pah. 21:​3, 4) Usa ka ba han iba nga mga karnero nga may paglaom nga kinabuhi nga waray kataposan ha tuna? Ito nga premyo diri kay mas minos kay han kinabuhi ha langit. Gindisenyo kita nga mabuhi ha tuna salit an kinabuhi nga waray kataposan ha tuna makalilipay gud para ha aton!

11-12. Ano nga mga bendisyon ha Paraiso an puydi naton pamulaton? (Kitaa liwat an mga piktyur.)

¹¹ Imadyina kon ano an imo magigin kinabuhi ha Paraiso nga tuna. Diri ka na mababaraka mahitungod ha sakit o kamatayon. (Isa. 25:8; 33:24) Bug-os nga ihahatag ni Jehova an ngatanan nga mag-opay nga butang nga  imo ginhihingyap. Ano an karuyag mo pag-adman? Karuyag mo ba mag-aram mahitungod ha mga hayop, mahibaro pagtokar hin mga instrumento, o mahibaro pagdrowing? Ha paraiso, pagkikinahanglanon didto an mga arkitekto, mga panday, ngan mga parag-uma. Sigurado nga pagkikinahanglanon liwat didto an pagburublig ngan an pagmintinar, sugad han pag-andam han pagkaon, paghimo hin mga garamiton, ngan an pag-ataman han mahusay nga landscape. (Isa. 35:1; 65:21) Tungod kay mabubuhi ka na hin waray kataposan, magkakaada ka panahon nga adman an bisan ano nga skill nga imo mahuhunahuna.

¹² Makalilipay gud nga tapoon an mga binanhaw! (Buh. 24:15) Imadyina liwat an imo kalipay nga mas mahibaro mahitungod kan Jehova pinaagi ha pag-usisa han iya damu nga linarang. (Sal. 104:24; Isa. 11:9) Labaw ha ngatanan, makalilipay gud nga magsingba kan Jehova nga waray na bisan gutiay nga pag-abat hin kakonsensya! Igbabalyo mo ba ini nga mga bendisyon ha tiarabot ha “temporaryo nga kalipayan han sala”? (Heb. 11:25) Diri gud! Ini nga mga bendisyon sulit gud ha bisan ano nga sakripisyo nga imo hihimoon yana. Hinumdumi, an Paraiso nga tuna diri la kay pirme paglaom ha tiarabot. Maabot an panahon nga ito na gud an aton magigin kinabuhi kada adlaw. Nagin posible ito ngatanan kay daku gud an gugma ni Jehova ha aton, nga iginhatag niya an iya Anak sugad nga regalo!

IPAKITA AN PAGIN MAPASALAMATON HA GUGMA NI JEHOVA

13. Paonan-o naton maipapakita nga mapasalamaton kita ha gugma ni Jehova? (2 Corinto 6:1)

¹³ Paonan-o naton maipapakita nga mapasalamaton kita kan Jehova tungod kay igintagana niya an lukat? Pinaagi ha pag-una han iya buruhaton ha aton kinabuhi. (Mat. 6:33) Kay kon huhunahunaon, namatay hi Jesus “basi an mga buhi diri na mabuhi para ha ira kalugaringon, kondi para ha iya nga namatay para ha ira ngan ginbuhi.” (2 Cor. 5:15) Diri gud naton karuyag nga karagan an katuyoan han diri matupngan nga pagkabuotan ni Jehova.​—Basaha an 2 Corinto 6:1.

14. Paonan-o naton maipapakita nga may pagtoo kita ha giya ni Jehova?

¹⁴ Maipapakita liwat naton nga gin-aapresyar naton an gugma ni Jehova pinaagi ha pagpakita hin pagtoo ha iya giya. Paonan-o? Kon kinahanglan naton maghimo hin desisyon, sugad han kon tubtob ano an aton ieskwelahan o ano nga klase hin trabaho an aton dapat karawaton, dapat naton ikonsiderar kon ano an iginpapabuhat ha aton ni Jehova. (1 Cor. 10:31; 2 Cor. 5:7) Kon iginpapakita naton an aton pagtoo pinaagi ha buhat, may maopay nga nahitatabo—an aton pagtoo ngan an aton pakigsangkay kan Jehova nagigin mas marig-on. Ngan an aton paglaom nga mabuhi ha waray kataposan, nagigin mas sigurado ha aton.​—Roma 5:​3-5; San. 2:​21, 22.

15. Paonan-o naton maipapakita an aton apresasyon ha mga semana antes ngan katapos han Memoryal?

 ¹⁵ May iba pa nga paagi nga maipapakita naton an aton apresasyon ha gugma ni Jehova. Amo ito an pagbuhat han ngatanan naton nga mahihimo ha mga semana antes ngan katapos han Memoryal basi ipakita kan Jehova nga mapasalamaton gud kita ha lukat. Labot pa ha pagplano nga makaatender ha Memoryal, puydi naton imbitaron an iba nga makaatender. (1 Tim. 2:4) Isaysay ha imo mga gin-imbitar kon ano an hihimoon ha Memoryal. Makikita mo nga makakabulig ha ira an pagpakita han mga video ha jw.org nga Kay Ano nga Namatay hi Jesus? ngan Hinumdumi an Kamatayon ni Jesus. Dapat siguruhon han mga tigurang nga maimbitar an mga diri aktibo. Imadyina la an kalipay ha langit ngan ha tuna kon an mga nawara nga karnero ni Jehova, napapagios nga bumalik ha iya panon! (Luc. 15:​4-7) Ha Memoryal, abiabihon naton an usa kag usa ngan labi na adton bag-ohan ngan maiha na nga waray makaatender. Karuyag naton nga umabat hira nga welcome hira!—Roma 12:13.

16. Kay ano nga dapat naton ikonsiderar nga dugangan pa an aton panahon han ministeryo ha mga semana antes ngan katapos han Memoryal?

¹⁶ Puydi mo ba dugangan an imo panahon ha espirituwal nga mga buruhaton ha mga semana antes ngan katapos han Memoryal? Kon bubuhaton naton ito, usa ito nga maopay nga paagi ha pagpakita han aton apresasyon ha ngatanan nga ginbuhat han Dios ngan han Kristo para ha aton. Kon mas nakikigbahin kita ha pag-alagad kan Jehova, mas maieksperyensyahan naton an iya bulig, ngan sugad nga resulta, an aton pagsarig ha iya mas magririg-on. (1 Cor. 3:9) Siguroha liwat nga mabasa an nakaeskedyol nga pagbasa ha Biblia ha Memoryal nga aada ha Pag-usisa han Kasuratan Adlaw-adlaw o ha tsart nga makikita ha workbook han midweek nga katirok. Puydi mo pa ngani gamiton ito nga mga teksto ha Biblia para ha proyekto ha pag-aram.

17. Ano an nakakapalipay kan Jehova? (Kitaa liwat an kahon nga “ Mga Paagi Basi Maipakita an Apresasyon ha Gugma ni Jehova.”)

¹⁷ Syempre, bangin diri igtugot han imo kahimtang nga buhaton an ngatanan nga iginsusuhestyon hini nga artikulo. Pero hinumdumi, nga diri iginkukompara ni Jehova ha iba an imo mga nahihimo; nakikita niya an imo kasingkasing. Nalilipay hiya kon nakikita niya nga mapasalamaton ka gud ha iya presyoso nga regalo, an lukat.​—1 Sam. 16:7; Mar. 12:​41-44.

18. Kay ano nga mapasalamaton kita kan Jehova nga Dios ngan kan Jesu-Kristo?

¹⁸ Tungod la han lukat nagin posible nga mapasaylo an aton mga sala, magin sangkay ni Jehova, ngan magkaada paglaom nga mabuhi hin waray kataposan. Hinaot pirme naton ipakita an aton pagin mapasalamaton ha gugma ni Jehova, nga nagpagios ha iya nga ihatag ha aton ini nga mga bendisyon. (1 Juan 4:19) Ngan hinaot ipakita liwat naton an aton apresasyon kan Jesus, nga nahigugma gud ha aton salit iginhatag niya an iya tawhanon nga kinabuhi para ha aton!—Juan 15:13.