1. Ano nga problema an gin-aatubang naton ngatanan?

 KADA adlaw kinahanglan naton maghimo hin mga desisyon. An iba bangin masayon la, sugad han kon ano an ipapamahaw o kon san-o makaturog. An iba naman mas makuri desisyonan. Bangin makaapekto ito ha aton kahimsog, kalipay, mga hinigugma, o pagsingba. Karuyag naton nga magpahimulos kita ngan an aton pamilya ha aton mga desisyon. Labaw ha ngatanan, naglalaom kita nga an aton mga desisyon magpapalipay kan Jehova.​—Roma 12:​1, 2.

2. Ano an mga mabulig ha imo nga makahimo hin maaramon nga mga desisyon?

² Posible gud nga makahimo ka hin maaramon nga desisyon kon imo (1) uusisahon an tama nga mga impormasyon, (2) ikukonsiderar an panhunahuna ni Jehova ha partikular nga butang, ngan (3) tuturotimbangon an mga opsyon. Hihisgotan hini nga artikulo ito nga tulo nga butang, ngan mabulig liwat ini ha aton nga mahibaroan kon paonan-o naton mati-train an aton abilidad ha husto nga pagturotimbang.​—Prob. 2:11.

USISAHA AN TAMA NGA MGA IMPORMASYON

3. Iilustrar kon kay ano nga dapat mo usisahon an tama nga mga impormasyon antes ka magdesisyon.

³ An siyahan nga dapat himoon basi makahimo hin maopay nga desisyon amo an pag-usisa han tama nga mga impormasyon. Kay ano nga importante ito? Imadyina nga an usa nga pasyente nagpapa-check-up ha doktor han iya grabe nga sakit. Magdidesisyon ba dayon an doktor kon ano nga klase hin pagtambal an hihimoon nga diri anay gin-ieksamin an pasyente o ginpapakianhan? Syempre diri. Makakahimo ka liwat hin mas maopay nga  mga desisyon kon imo anay uusisahon an tama nga mga impormasyon nga nakakaapekto ha imo sitwasyon. Paonan-o mo ito bubuhaton?

4. Sumala ha Proberbios 18:​13, paonan-o mo masisiguro nga maaram ka han tama nga mga impormasyon? (Kitaa liwat an piktyur.)

⁴ Agsob nga makakakuha ka hin tama nga mga impormasyon pinaagi ha pagpakiana. Pananglitan, gin-imbitar ka ha usa nga party. Maatender ka ba? Kon diri mo kilala an nag-iimbitar o diri ka maaram han iya mga plano hito nga party, kinahanglan ipakiana mo ini ha iya: “Diin ngan san-o ini hihimoon? Damu ba an maatender? Hin-o an manginginano hito? Hin-o an mga maatender? Ano nga mga activity an nakaplano himoon? May makahurubog ba nga irimnon nga isiserbi?” An mga baton hini nga mga pakiana mabulig ha imo nga makahimo hin maaramon nga desisyon.​—Basaha an Proberbios 18:13.

5. Ano an dapat mo himoon kon nahibaroan mo na an tama nga mga impormasyon?

⁵ Sunod, katapos mo mahibaroan an tama nga mga impormasyon, hunahunaa hin maopay an bug-os nga sitwasyon. Pananglitan, ano man kon nahibaroan mo nga may mga maatender nga waray mga prinsipyo uyon ha Biblia o may makahurubog nga irimnon nga isiserbi ngan waray manginginano? Nakikita mo ba nga ito nga party posible magin karisyohan nga waray kontrol? (1 Ped. 4:3) Ha luyo nga bahin, ano naman kon ito nga party nahituman ha eskedyol han katirok o pagsangyaw? Kon nasabtan mo na an ngatanan nga mahitatabo, mas masayon an paghimo hin maopay nga desisyon. Pero may dapat ka pa himoon.  Yana, maaram ka na han posible mahitabo, pero ano daw la an panhunahuna ni Jehova mahitungod hito?​—Prob. 2:6.

IKONSIDERAR AN PANHUNAHUNA NI JEHOVA

6. Sumala ha Santiago 1:​5, kay ano nga dapat kita mangaro hin bulig kan Jehova?

⁶ Paghangyo kan Jehova nga buligan ka nga masabtan an iya panhunahuna. Nagsasaad hi Jehova nga tatagan kita han kinaadman basi mahibaroan kon an usa ba nga desisyon makakapalipay ha iya. “Hura nga nahatag hiya [han sugad nga kinaadman] ha ngatanan ngan diri nasisina.”​—Basaha an Santiago 1:5.

7. Paonan-o mo mahibabaroan an panhunahuna ni Jehova? Iilustrar.

⁷ Kon nag-ampo ka na kan Jehova nga giyahan ka, tagi hin maopay nga atensyon an iya baton. Ha pag-ilustrar: Kon nawawara ka samtang nagbibiyahe, puydi ka magpakiana ha usa nga residente hito nga lugar. Pero mabaya ka ba dayon nga diri pa nababatian an iya baton? Syempre diri. Mamamati ka hin maopay ha iya instruksyon. Ha pariho nga paagi, kon nangaro ka na kan Jehova han kinaadman, paningkamot nga mahibaroan an iya baton pinaagi ha pagbiling kon ano nga mga balaud ngan mga prinsipyo ha Biblia an naaplikar ha imo sitwasyon. Pananglitan, kon nagdidesisyon kon maatender ba ha gin-unabi na nga party, puydi mo ikonsiderar an ginsisiring han Biblia mahitungod ha karisyohan nga waray kontrol, maraot nga mga kaupod, ngan an pag-una han mga buruhaton han Ginhadian kay han imo  personal nga mga karuyag.​—Mat. 6:33; Roma 13:13; 1 Cor. 15:33.

8. Ano an puydi mo himoon kon kinahanglan mo hin bulig ha pagbiling han impormasyon nga imo kinahanglan? (Kitaa liwat an piktyur.)

⁸ May mga panahon nga bangin kinahanglan mo hin bulig basi mabilngan an impormasyon nga imo kinahanglan. Posible nga makakuha ka hin suhestyon tikang ha usa nga eksperyensyado nga brother o sister. Pero mabulig liwat an imo pag-research. May damu gud nga impormasyon ha aton mga tool ha pag-aram, sugad han Giya ha Pagsaliksik Para ha Mga Saksi ni Jehova ngan Prinsipyo Para ha Kristiano nga Pagkinabuhi. Hinumdumi an imo goal: paghimo hin desisyon nga nagpapalipay kan Jehova.

9. Paonan-o naton masisiguro nga malilipay hi Jehova ha aton desisyon? (Efeso 5:17)

⁹ Paonan-o naton masisiguro nga malilipay hi Jehova ha aton desisyon? Siyahan ha ngatanan, dapat makilala naton hiya hin maopay. An Biblia nasiring, “an kahibaro mahitungod ha Pinakabaraan nga Dios amo an pagsabot.” (Prob. 9:10) Oo, an totoo nga pagsabot resulta han paghibaro han mga kalidad ni Jehova, han iya katuyoan, ngan han iya mga naruruyagan o ginkakangalasan. Pakianhi an imo kalugaringon, ‘Basado ha akon pagkakilala kan Jehova, ano nga desisyon an puydi ko himoon nga magpapalipay ha iya?’—Basaha an Efeso 5:17.

10. Kay ano nga an mga prinsipyo ha Biblia mas importante kay ha tradisyon han pamilya o kultura?

¹⁰ Danay, basi mapalipay hi Jehova kinahanglan naton maghimo hin desisyon nga makakapasubo ha aton kapamilya o kasangkayan. Pananglitan, bangin ipirit han mga kag-anak nga may maopay nga intensyon para ha ira adulto nga anak nga babaye nga mag-asawa hin riko—o ha usa nga makakabayad hin daku nga bugay—bisan kon diri maopay an espirituwalidad han lalaki. Oo, karuyag nira nga magin komportable an kinabuhi han ira anak, pero hin-o an mabulig ha iya nga mag-uswag ha espirituwal? Ano an panhunahuna ni Jehova mahitungod hito? Makikita naton an baton ha Mateo 6:33. Gindadasig hito nga teksto an mga Kristiano nga ‘unahon an pagpamiling han Ginhadian.’ Bisan kon ginpapasidunggan naton an aton mga kag-anak ngan ginrirespeto an mga tawo ha aton komunidad, an pinakaimportante ha aton amo an lipayon hi Jehova.

TUROTIMBANGA AN MGA OPSYON

11. Ano nga kalidad an ginhihisgotan ha Filipos 1:​9, 10 nga mabulig ha imo nga maturotimbang an imo mga opsyon?

¹¹ Kon nahibaroan mo na an mga prinsipyo ha Biblia nga makakaapekto ha imo paghimo hin desisyon, dapat mo turotimbangon an imo mga opsyon. (Basaha an Filipos 1:​9, 10; kitaa an study note nga “malalim na unawa.”) An kalidad nga pagsabot mabulig ha imo nga makita an posible nga resulta han tagsa nga opsyon. Usahay, masayon la an pagdesisyon pero diri ngatanan nga desisyon masayon himoon. An pagsabot mabulig ha imo ha paghimo hin maaramon nga mga desisyon bisan ha komplikado nga mga sitwasyon.

12-13. Paonan-o an pagsabot makakabulig ha imo ha paghimo hin maaramon nga desisyon kon nagpipili hin trabaho?

¹² Imadyina ini nga sitwasyon. Nagbibiling ka hin trabaho basi masuportaran an imo pamilya. May duha nga trabaho nga puydi mo sudlan. Katapos, ginkonsiderar mo an ngatanan nga impormasyon, sugad han klase han trabaho, eskedyol, kahirayo, ngan iba pa. Ito nga duha nga trabaho pariho waray natatalapas nga mga prinsipyo ha Biblia. Bangin pilion mo an usa nga trabaho kay karuyag mo ito o tungod kay mas daku an sweldo. Pero may iba pa nga butang nga angay ikonsiderar antes magdesisyon.

¹³ Pananglitan, hain hito nga trabaho an makakaulang han imo pag-atender ha mga  katirok han kongregasyon? Hain hito nga trabaho an makakaiban han panahon nga imo kinahanglan basi an imo pamilya maataman ha emosyon ngan espirituwal? An paghunahuna hito nga mga pakiana mabulig ha imo nga unahon “an mas importante nga mga butang”—an imo pagsingba ngan an mga panginahanglan han imo pamilya—imbes nga an pagkaada damu nga kwarta. Katapos, makakahimo ka hin desisyon nga bibendisyonan ni Jehova.

14. Paonan-o an pagsabot ngan an pagpakita hin gugma mabulig ha aton nga diri makapakdol ha iba?

¹⁴ An pagsabot magpapagios liwat ha aton nga hunahunaon hin maopay kon paonan-o posible nga makaapekto ha iba an aton desisyon, basi diri kita “makapakdol ha iba.” (Fil. 1:10) Importante ini kon naghihimo kita hin personal nga mga desisyon, sugad han pamado ngan pag-ayos. Pananglitan, bangin may karuyag kita nga estilo han bado o pag-ayos. Pero ano man kon may kabugtoan o mga diri Saksi nga nalalainan han imo pamado o pag-ayos? An pagsabot mabulig ha aton nga respetuhon an ira mga inaabat. An gugma naman magpapagios ha aton nga unahon an kaopayan han “iba nga tawo” ngan magkaada kasadangan o magin  desente. (1 Cor. 10:​23, 24, 32; 1 Tim. 2:​9, 10) Salit magdidesisyon kita nga nagpapakita han aton gugma ngan respeto ha iba.

15. Ano an dapat mo planuhon antes mo buhaton an imo daku nga desisyon?

¹⁵ Kon naghihimo ka hin daku nga desisyon, hunahunaa kon ano an kinahanglan basi mabuhat ito. Gintutdoan kita ni Jesus nga ‘kwentahon an magagasto.’ (Luc. 14:28) Salit hunahunaa an magagamit nga kadamu han panahon, an magagasto, ngan an pangalimbasog nga kinahanglan para maglampos an desisyon. Ha pipira nga sitwasyon, puydi mo konsultahon an imo pamilya basi mahibaroan kon ano an dapat nira buhaton para masuportaran an desisyon. Kay ano nga importante ini nga klase han pagplano? Bangin makabulig ito nga makita mo nga may dapat ka himoon nga pipira nga pagbag-o ha imo desisyon o mas praktikal an iba nga opsyon. Kon ginpapabulig mo an imo kapamilya ngan ginpapamatian an ira mga suhestyon, magigin mas andam hira ha pagkooperar ha imo para maglampos an desisyon.​—Prob. 15:22.

PAGHIMO HIN DESISYON NGA MAGLALAMPOS

16. Ano an mga mabulig ha imo basi makahimo hin malampuson nga desisyon? (Kitaa liwat an kahon nga “ Kon Paonan-o Maghihimo hin Maaramon nga mga Desisyon.”)

¹⁶ Kon ginbuhat mo na an tulo nga butang nga gin-unabi, andam ka na ha paghimo hin maaramon nga desisyon. May-ada ka na han tama nga mga impormasyon ngan gin-usisa mo na an mga prinsipyo nga mabulig ha imo nga makahimo hin desisyon nga nakakapalipay kan Jehova. Yana, puydi ka na maghangyo kan Jehova nga buligan ka nga maglampos an imo desisyon.

17. Ano an nangunguna nga butang nga mabulig ha imo nga makahimo hin maopay nga mga desisyon?

¹⁷ Bisan kon nakahimo ka na hin damu nga malampuson nga desisyon ha naglabay, hinumdumi nga an nangunguna nga butang nga mabulig ha imo ha paghimo hin maopay nga mga desisyon amo an pagsarig ha kinaadman nga tikang kan Jehova, diri ha imo kalugaringon nga pagsabot o eksperyensya. Hiya la an makakahatag ha imo han ngatanan nga importante nga bahin han kinaadman, nga amo an tinuod nga kahibaro, pagsabot, ngan husto nga pagturotimbang. (Prob. 2:​1-5) Mabubuligan ka ni Jehova nga makahimo hin mga desisyon nga magpapalipay ha iya.​—Sal. 23:​2, 3.