AN MGA Kristiano han siyahan nga siglo nangalimbasog gud nga maisangyaw an “maopay nga sumat han Ginhadian” ha damu nga tawo tubtob nga posible. (Mat. 24:14) Nagbiyahe pa ngani an pipira ha ira ha iba nga nasud. Pananglitan, hi apostol Pablo kumadto ha usa nga rehiyon diin nahimumutang an gintatawag yana nga Turkey ngan nangalimbasog gud ha pagsangyaw didto durante han iya pagbiyahe sugad nga misyonero. * Paglabay hin mga 2,000 ka tuig, han 2014, nagkaada utro daku nga pangalimbasog para hin espesyal nga kampanya ha pagsangyaw ha Turkey. Kay ano nga gin-organisar ito nga kampanya? Hin-o an mga nakigbahin hito?

Sobra 2,800 an magwarali ha Turkey, pero 79 ka milyon an populasyon hito nga nasud. Iginpapakita hini nga an 1 nga magwarali kinahanglan magsangyaw ha haros 28,000 ka tawo. Salit mahahanduraw mo nga gutiay la an nasasangyawan han mga magwarali hini nga nasud. Katuyoan han espesyal nga kampanya nga mas damu an masangyawan tubtob nga mahihimo ha halipot la nga panahon. Mga 550 nga kabugtoan nga nagyayakan hin Turkish an nagbiyahe pakadto ha Turkey ngan nagsangyaw kaupod han lokal nga kabugtoan durante han kampanya. Ano an resulta?

Naghatag ito hin daku nga pamatuod. Usa nga kongregasyon ha Istanbul an nagsurat: “Kon nakikita kami han mga tawo, nagpapakiana hira: ‘May-ada ba espesyal nga kombensyon dinhi? May mga Saksi ni Jehova ha bisan diin!’” Usa nga kongregasyon ha syudad han Izmir an nagsurat: “May lalaki nga nagtatrabaho ha paradahan hin taxi nga dumaop ha usa nga tigurang hito nga lugar ngan nagpakiana, ‘Ano an nahitatabo? Mas aktibo na ba kamo yana?’” Matin-aw nga naobserbaran gud han mga tawo ito nga kampanya.

Nalipay gud an mga taga-iba nga nasud nga nakigbahin ha pagsangyaw. Hi Steffen, nga taga-Denmark, nagsiring: “Kada adlaw, may nasasangyawan ako nga waray pa gud makabati mahitungod kan Jehova. Inabat ko nga naipapasamwak ko gud an ngaran ni Jehova.” Hi Jean-David nga taga-Fransia nagsurat: “Nagsangyaw kami hin pipira ka oras ha usa la nga kalye. Makalilipay gud ito! Kadam-an han mga tawo diri nakilala ha mga Saksi ni Jehova. Haros ha kada purtahan may nakakaistorya kami, nakakagpakita hin video, ngan nakakabilin hin literatura ha tagbalay.”

An 550 nga nakigbahin hito nga kampanya nakapanaltag hin mga 60,000 nga literatura ha sulod hin  duha la ka semana! An kampanya naghatag gud hin daku nga pamatuod.

Mas nagin madasigon an kabugtoan. An espesyal nga kampanya nagkaada daku nga epekto ha lokal nga kabugtoan. Damu an napagios nga hunahunaon an pag-alagad hin bug-os-panahon. Ngani, mas nagdamu hin 24 porsyento an regular payunir ha Turkey ha sulod hin 12 ka bulan katapos han kampanya.

An mga nakigbahin nga taga-iba nga nasud nagsumat kon paonan-o an kampanya nakaapekto ha ira ministeryo bisan han binalik na hira ha ira nasud. An sister nga hi Şirin, nga taga-Alemanya, nagsurat: “Masayon la para ha kabugtoan ha Turkey an pagsangyaw ha diri pormal nga paagi. Naaawod ako pagsangyaw ha diri pormal. Pero nagpapasalamat ako kay an espesyal nga kampanya, an mga ehemplo han lokal nga kabugtoan, ngan an damu nga pag-ampo, nakabulig ha akon nga mahimo an diri ko nahihimo hadto. Nakakagsangyaw ngan nakakapanaltag pa ngani ako hin mga tract ha estasyon han tren ha subway! Yana, diri na ako naaawod pariho hadto.”

“Nahibaro ako hin leksyon nga magagamit ko ha akon ministeryo,” siring ni Johannes nga taga-Alemanya. “Karuyag gud han kabugtoan ha Turkey nga mas damu an masangyawan tubtob nga posible. Ginsasalingabot nira nga makagsangyaw ha tagsa nga higayon. Ito liwat an akon ginhimo han inuli ako ha Alemanya. Yana, nagsasangyaw na gud ako ha mas damu nga tawo.”

Hi Zeynep, nga taga-Fransia, nagsiring: “Daku an nagin epekto hito nga kampanya ha akon ministeryo. Nakabulig ito ha akon nga magin mas maisugon ngan mas sumarig kan Jehova.”

An mga magwarali nagin mas duok ha kada tagsa. An gugma ngan pagkaurosa han kabugtoan tikang ha iba-iba nga nasud nagkaada daku ngan nagpapadayon nga epekto. An gin-unabi kanina nga hi Jean-David nagsiring: “Naeksperyensyahan namon an pagin maabiabihon han kabugtoan.” Hiya dugang nga nagsiring: “Gintratar kami nira sugad nga ira kasangkayan ngan kapamilya. Gin-abiabi kami nira ha ira balay. Maaram ako nga bug-os-kalibotan an aton pagminagburugto; nakadamu ko na ito mabasa ha aton mga literatura. Pero yana, naeksperyensyahan ko mismo ito. Mas nalilipay ako yana nga usa ako han katawohan ni Jehova, ngan nagpapasalamat  gud ako ha iya tungod hinin daku nga pribilehiyo.”

“Diin man kita tikang​—ha Denmark, Fransia, Alemanya, o Turkey—​kita ngatanan uusa la nga pamilya. Sugad hin ginpara han Dios an mga giutan han ngatanan nga nasud,” siring ni Claire nga taga-Fransia.

Hi Stéphanie, nga taga-Fransia dugang nga nagsiring: “An espesyal nga kampanya nagtutdo ha amon nga diri an kultura o linggwahe an naghihiusa ha aton kondi an aton gugma kan Jehova.”

Damu han mga nakigbahin nga taga-iba nga nasud an nagplano nga bumalhin ha Turkey basi bumulig ha daku pa nga buruhaton didto. An pipira ha ira binalhin na. Gin-aapresyar gud ini nga mga nag-aalagad ha lugar nga mas daku an panginahanglan.

Tagda pananglitan an usa nga gutiay nga grupo ha usa nga hirayo nga lugar nga may 25 nga magwarali. Ha sulod hin damu ka tuig, uusa la an ira tigurang. Hunahunaa la an ira kalipay han may unom nga binalhin tikang ha Alemanya ngan Netherlands han 2015 basi magboluntaryo didto!

Ano an masisiring han mga boluntaryo nga binalhin ha Turkey ha sulod hin pipira ka panahon mahitungod han ira kinabuhi didto? Ha pagkamatuod, diri pirme masayon an pag-alagad ha lugar nga mas daku an panginahanglan, pero makalilipay gud ito. Tagda an ginsiring han pipira:

“An pagkaada diri damu nga materyal nga panag-iya nabulig ha akon nga magin andam pirme ngan makapokus ha pinakaimportante nga mga butang,” siring ni Federico, usa nga inasaw-an nga brother nga sobra 40 anyos, nga binalhin tikang ha Espanya. Iginrirekomendar ba niya ini nga klase hin pag-alagad? “Syempre!” siring niya. “Kon nabalhin ka ha iba nga nasud basi buligan an mga tawo nga makilala hi Jehova, ha pagkamatuod, imo iginsasarig an imo kalugaringon ha iya. Mas inaabat mo gud an pagmangno ni Jehova.”

“Nakakapalipay gud ha amon an pag-alagad ha lugar nga mas daku an panginahanglan ngan an pagpasamwak han kamatuoran ha damu gud nga tawo nga waray pa makabati hito hadto,” siring ni Rudy, nga  inasaw-an nga brother nga hirani na mag-60 anyos nga taga-Netherlands. “Makalilipay gud nga makita an kalipay han mga tawo nga nakarawat han kamatuoran.”

Hi Sascha, nga inasaw-an nga brother nga sobra 40 anyos nga taga-Alemanya, nagsiring: “Ha kada ko pagsasangyaw, may nakakaistorya ako nga pakakabati pa la han kamatuoran. An paghatag ha ira hin higayon nga makilala hi Jehova nakakapalipay gud ha akon.”

Hi Atsuko, nga inasaw-an nga sister nga 35 anyos nga taga-Japan, nagsiring: “Hadto, karuyag ko gud nga umabot na an Armagedon. Pero han binalhin ako ha Turkey, nagpapasalamat ako kan Jehova nga padayon hiya nga nagpapailob. Samtang mas nakikita ko kon paonan-o ginigiyahan ni Jehova an pagsangyaw nga buruhaton ha bug-os nga kalibotan, mas naghihilarom an akon hingyap nga magin duok ha iya.”

Hi Alisa, nga sobra 30 anyos nga taga-Rusya, nagsiring: “An pag-alagad kan Jehova hini nga klase hin ministeryo nakabulig ha akon nga maeksperyensyahan an iya pagkamaopay.” (Sal. 34:8) Hiya nagdugang: “Hi Jehova diri la kay akon Amay kondi duok ko liwat nga Sangkay, ngan mas nakikilala ko hiya kon naatubang ako hin iba-iba nga kahimtang. An akon kinabuhi puno hin makalilipay nga mga panhitabo, eksperyensya, ngan mga bendisyon!”

Pinaagi han espesyal nga kampanya ha pagsangyaw ha Turkey, an maopay nga sumat nakaabot ha mas damu pa nga tawo. Pero damu pa nga lugar an waray pa masangyawi. An mga boluntaryo nga binalhin ha Turkey may nakakaistorya nga mga tawo kada adlaw nga waray pa gud makabati mahitungod kan Jehova. Karuyag mo ba mag-alagad ha sugad hito nga teritoryo? Kon oo, gin-aaghat ka namon: “Kitaa . . . an kaumhan, hinog na an aranihon.” (Juan 4:35) Puydi ka ba bumulig ha lugar diin “hinog na an aranihon”? Kon oo, paghimo na hin praktikal nga mga pitad basi makab-ot ito nga tumong. Usa nga butang an sigurado: An paggahin hin mas daku nga panahon ha pagpasamwak han maopay nga sumat “ha pinakahirayo nga lugar ha tuna” maghahatag ha imo hin hura nga bendisyon nga diri mo gud mahahanduraw!—Buh. 1:8.