“DAMU an aranihon, kondi gutiay an mag-arani. Salit pakimalooy kamo ha Agaron nga magpadara hin mga mag-arani ha iya aranihon.” (Luc. 10:2) Ini nga ginsiring ni Jesus mga 2,000 ka tuig na an naglabay naghuhulagway gud han kahimtang yana ha Myanmar. Kay ano? Ha Myanmar, mga 4,200 la nga magwarali an nagpapasamwak han maopay nga sumat ha 55 ka milyon nga tawo.

Pero ginbantad han “Agaron” han pangani, hi Jehova, an kasingkasing han ginatos nga kabugtoan ha iba-iba nga katunaan, ngan kinanhi hira hini nga nasud ha Sur-este han Asia basi bumulig ha espirituwal nga pangani. Ano an nagpagios ha ira nga bumaya ha ira nasud? Paonan-o hira nabuligan nga bumalhin? Ngan ano nga mga bendisyon an ira napapahimulosan? Kitaon naton.

Mga tuig na an naglabay, hi Kazuhiro, usa nga payunir ha Japan, gin-atake han epilepsi, nadismayo, ngan gindara ha hospital. Gindid-an hiya pagdrayb han doktor ha sulod hin duha ka tuig. Diri makatoo hi Kazuhiro. ‘Paonan-o ako makakapadayon ha buruhaton nga naruruyagan ko​—an pagpayunir?’ an iya pakiana ha iya kalugaringon. Sinsero nga nag-inampo hiya, nga nakikimalooy kan Jehova nga buligan hiya nga makapadayon la gihap ha pagpayunir.

Hi Kazuhiro nagsumat: “Paglabay hin usa ka bulan, hinbaroan han akon sangkay nga nag-aalagad ha Myanmar an akon kahimtang. Tumawag hiya ngan nagsiring: ‘Didi ha Myanmar, bus an nangunguna nga transportasyon. Kon kumadi ka, makakasangyaw ka bisan waray ka awto!’ Ginpakianhan ko an akon doktor kon kakayahon ba han akon kahimtang nga kumadto ha Myanmar. Nahipausa ako kay nagsiring hiya: ‘May espesyalista ha utok tikang ha Myanmar nga aanhi ha Japan yana. Ipapakilala ko ikaw ha iya. Kon atakehon ka ngani utro, hiya na an bahala ha imo.’ An ginsiring han doktor ginhunahuna ko nga baton ni Jehova.”

Nag-e-mail dayon hi Kazuhiro ha sanga nga opisina ha Myanmar ngan nagsumat nga karuyag nira nga mag-asawa nga magpayunir hito nga nasud. Paglabay la hin lima ka adlaw, an sanga nga opisina binaton, “Pakadi kamo, kinahanglan namon hin dugang nga mga payunir!” Iginbaligya ni Kazuhiro ngan han iya asawa, hi Mari, an ira mga awto, nagkuha hin visa, ngan pinalit hin tiket ha eruplano. Yana, malipayon nga nag-aalagad hira kaupod han grupo han sign language ha Mandalay. Hi Kazuhiro nagsiring: “Pinaagi hini nga eksperyensya, inaabat namon nga naparig-on an amon pagtoo ha  saad han Dios nga mababasa ha Salmos 37:5: ‘Itubyan mo kan Jehova an imo agian; sarig liwat ha iya, ngan iya iton pagbubuhaton.’”

Han 2014, an mga Saksi ni Jehova ha Myanmar nakapribilehiyo nga mag-host hin espesyal nga kombensyon didto. Damu nga delegado han iba-iba nga nasud an tinambong. An usa ha ira, hi Monique, nga 34 anyos ngan taga-Estados Unidos, nagsiring: “Pag-uli ko tikang ha kombensyon, nag-ampo ako kan Jehova kon ano an sunod ko nga bubuhaton. Nakiistorya liwat ako ha akon mga kag-anak mahitungod han akon espirituwal nga mga tumong. Nahunahuna namon nga sadang ako bumalik ha Myanmar, pero linabay anay an pipira ka panahon ngan damu nga pag-ampo an akon ginhimo antes ako makadesisyon.” Iginsaysay ni Monique kon kay ano.

“Gin-aghat ni Jesus an iya mga sumurunod nga ‘kwentahon an magagasto.’ Salit ginpakianhan ko an akon kalugaringon: ‘May igo ba ako nga kwarta para bumalhin? Masusuportaran ko ba an akon kalugaringon didto bisan kon diri ako magtrabaho hin damu ka oras?’” Nagsiring hiya: “Tigda nga nasantop ko nga waray ako igo nga kwarta para bumalhin ha iba nga bahin han kalibotan.” Salit paonan-o hiya nakabalhin?​—Luc. 14:28.

Hi Monique nagsumat: “Usa ka adlaw nagsiring an akon boss nga karuyag niya ako makaistorya. Ginkulba ako kay kahuna ko nga tatanggalon ako ha trabaho. Pero ginpasalamatan lugod niya ako tungod han akon maopay nga pagtrabaho. Katapos nagsiring hiya nga tatagan niya ako hin bonus, ngan an kantidad hito amo gud an akon ginkikinahanglan para ha akon mga baraydan!”

Hi Monique nag-aalagad ha Myanmar tikang han Disyembre 2014. Ano an iya inaabat mahitungod han iya pag-alagad ha lugar nga mas daku an panginahanglan? “Malipayon gud ako nga aanhi ako,” siring niya. “Tulo an akon Bible study. An usa ha ira 67 anyos na. Kada ko pag-aabot, nahiyom hiya ngan ginhahangkopan ako. Han iya hinbaroan nga Jehova an ngaran han Dios, nakatangis hiya. Siring niya: ‘Siyahan ko pa gud la ini nga pakabati nga Jehova an ngaran han Dios. Mas manghod ka gud kay ha akon, pero gintutdoan mo ako han pinakaimportante nga butang nga puydi ko mahibaroan.’ Nakatangis liwat ako hito. Tungod han sugad hini nga eksperyensya, nagigin makalilipay gud an pag-alagad ha lugar nga mas daku an panginahanglan.” Hinin bag-o la, nakapribilehiyo hi Monique nga umiskwela ha School for Kingdom Evangelizers.

Usa pa nga nakaaghat ha iba nga kumadto ha Myanmar amo an report ha 2013 Taunang Aklat ng mga Saksi ni Jehova mahitungod hito nga nasud. Hi Li, usa nga sister nga sobra 30 anyos, naukoy na nga daan ha Sur-este han Asia. May-ada hiya full-time nga trabaho, pero an report ha Taunang Aklat nagpagios ha iya nga hunahunaon an pag-alagad ha Myanmar. “Han 2014 han tinambong ako ha espesyal nga kombensyon ha Yangon, may nakilala ako nga mag-asawa nga nagbuboluntaryo ha Myanmar basi sumuporta ha ministeryo ha Chinese nga linggwahe. Tungod kay maaram ako mag-Chinese, nagdesisyon ako nga bumalhin dinhi ha Myanmar basi sumuporta ha Chinese nga grupo dinhi. Nakigsabot ako kan Monique nga kami an magpapartner, ngan binalhin kami ha Mandalay. Ginbendisyonan kami ni Jehova hin part-time nga trabaho sugad nga mga titser ha pariho nga eskwelahan, ngan nakaagi kami hin hirani la nga apartment. Bisan pa han mapaso nga klima ngan han pipira nga makuri nga kahimtang, nag-i-enjoy ako ha akon pag-alagad dinhi. Simple an kinabuhi han mga tawo ha Myanmar, pero matinalahuron hira ngan naghahatag hin panahon ha pagpamati ha maopay nga sumat. Eksayting gud makita kon paonan-o ginpapadagmit ni Jehova an buruhaton. Natoo gud ako nga kaburut-on ni Jehova nga kumanhi ako ha Mandalay.”

Damu nga nagboluntaryo ha lugar nga mas daku an panginahanglan an nakaeksperyensya han gahum han pag-ampo. Tagda hi Jumpei ngan an iya asawa, hi Nao, nga pariho sobra 30 anyos. Nag-aalagad na hira ha usa nga kongregasyon han sign language ha Japan. Kay ano  nga binalhin hira ha Myanmar? Hi Jumpei nagsumat: “Tikang pa hadto, tumong na namon nga mag-asawa nga magboluntaryo ha iba nga nasud nga mas daku an panginahanglan. May kakongregasyon kami ha sign language ha Japan nga binalhin ha Myanmar. Bisan kon gutiay la nga kwarta an amon natirok, han Mayo 2010 binalhin liwat kami. Malipayon nga ginkarawat kami han kabugtoan ha Myanmar!” Ano an iya inaabat mahitungod han pagboluntaryo ha sign language ha Myanmar? “Interesado gud an mga tawo. Kon iginpapakita namon an sign language nga mga video, nabilib gud an ngula nga mga tagbalay. Nalilipay gud kami nga nagdesisyon kami nga mag-alagad kan Jehova dinhi!”

Paonan-o hira Jumpei ngan Nao nakapadayon bisan pa han ira kahimtang ha pinansyal? “Katapos han tulo ka tuig, haros naubos na an amon tinirok ngan waray na kami igo nga kwarta para bayaran an plete ha sunod nga tuig. Kami nga mag-asawa makadamu nga nag-ampo hin sinsero. Diri ginlalaoman nga nakakarawat kami hin surat tikang ha sanga nga opisina nga nag-iimbitar ha amon nga magin temporaryo nga mga espesyal payunir! Sinarig kami kan Jehova, ngan waray niya kami pabay-i. Ginmamangnoan niya kami ha ngatanan nga paagi.” Hinin bag-o la, hira Jumpei ngan Nao ineskwela liwat ha School for Kingdom Evangelizers.

Ano an nagpagios ha brother nga hi Simone, nga 43 anyos ngan tikang ha Italya, ngan ha iya asawa nga hi Anna, nga 37 anyos ngan tikang ha New Zealand, nga bumalhin ha Myanmar? “An report han 2013 Taunang Aklat mahitungod ha Myanmar!” siring ni Anna. Hi Simone nagsiring: “Daku nga pribilehiyo nga aanhi kami ha Myanmar. Mas simple gud an kinabuhi dinhi, ngan mas damu nga panahon an akon naihahatag ha buruhaton ni Jehova. Makalilipay maeksperyensyahan an pagmangno ni Jehova ha aton kon nag-aalagad kita ha lugar nga mas daku an panginahanglan.” (Sal. 121:5) Hi Anna nagsiring: “Mas malipayon gud ako yana. Simple an amon kinabuhi. Mas damu an akon panahon nga kaupod an akon bana, ngan nagin mas duok kami. Nagkaada liwat kami presyoso nga bag-o nga kasangkayan. An mga tawo waray diskriminasyon ha mga Saksi, ngan makatirigamnan an interes nga iginpapakita!” Ha ano nga mga paagi?

Hi Anna nagsumat: “Usa ka adlaw, may nasangyawan ako ha merkado nga usa nga estudyante ha unibersidad ngan nakigsabot ako nga makigkita utro ha iya. Han nagkita kami utro, may upod na hiya nga sangkay. Han sunod namon nga pagkita, nag-upod pa hiya hin iba. Ha urhi, mas damu pa an iya igin-upod. Yana, study ko na an lima ha ira.” Hi Simone nagsiring: “An mga tawo ha teritoryo makisangkayon ngan karuyag mahibaro. Damu an interesado. Kulang la an amon panahon basi atamanon an ira interes.”

Pero ano nga praktikal nga mga pitad an ginkinahanglan basi makadesisyon nga bumalhin ha Myanmar? Hi Mizuho, nga taga-Japan, nagsumat: “Tikang pa hadto, karuyag na namon han akon bana nga hi Sachio nga mag-alagad ha usa nga nasud nga mas daku an panginahanglan​—pero diin? Katapos basahon an report han 2013 Taunang Aklat mahitungod ha Myanmar, nabantad gud kami han makalilipay nga mga eksperyensya  salit ginhunahuna namon kon posible ba kami makag-alagad ha Myanmar.” Hi Sachio nagdugang: “Nagdesisyon kami nga mag-tour hin usa ka semana ha Yangon, an pinakadaku nga syudad ha Myanmar, basi usisahon an teritoryo. Iton halipot nga pagbisita basi makakuha hin impormasyon nakakombinse ha amon nga sadang kami bumalhin dinhi.”

Hi Rodney ngan an iya asawa, hi Jane, nga taga-Australia ngan pariho sobra 50 anyos, upod an ira mga anak nga hira Jordan ngan Danica, nagbuboluntaryo ha Myanmar tikang pa han 2010 basi sumuporta ha ministeryo didto. Hi Rodney nagsiring: “Nabantad gud kami tungod kay an mga tawo gutom ha espirituwal. Irirekomendar ko gud ha iba nga mga pamilya nga sarihan nira an pag-alagad ha lugar nga pariho han Myanmar.” Kay ano? “Daku gud an naibulig hini ha espirituwalidad han amon pamilya! Damu nga batan-on an okupado ha ira mga celfon, awto, trabaho, ngan iba pa. An amon mga anak okupado ha pag-aram hin bag-o nga mga pulong nga magagamit ha ministeryo. Nangangalimbasog hira pag-aram kon paonan-o mangangatadongan ha mga tawo nga diri pamilyar ha Biblia ngan kon paonan-o magkukomento ha mga katirok han kongregasyon, ngan okupado hira ha damu pa nga makalilipay nga espirituwal nga mga buruhaton.”

Hi Oliver, nga 37 anyos ngan taga-Estados Unidos, nagsumat kon kay ano nga iginrirekomendar niya ini nga klase hin pag-alagad: “Damu an kapulsanan han akon pag-alagad kan Jehova ha lugar ngan kahimtang nga diri ako hiara. An pagbaya ha balay nakabulig ha akon nga mas sumarig kan Jehova anoman an akon kahimtang. An pag-alagad upod hadton diri ko mga kilala hadto pero kapariho ko hin mga gintotoohan nakabulig gud ha akon nga masantop nga waray bisan ano dinhi hini nga kalibotan nga sugad kaimportante han Ginhadian han Dios.” Yana, hi Oliver ngan an iya asawa, hi Anna, padayon nga nag-aalagad hin madasigon ha teritoryo nga Chinese an linggwahe.

Hi Trazel, usa nga sister nga 52 anyos ngan taga-Australia, nag-aalagad ha Myanmar tikang pa han 2004. Nagsiring hiya: “Para ha kabugtoan nga igintutugot han ira kahimtang, iginrirekomendar ko gud an pag-alagad ha lugar nga mas daku an panginahanglan. Naeksperyensyahan ko nga kon may hingyap ka nga mag-alagad, bibendisyonan ni Jehova an imo mga pangalimbasog. Waray ko gud mahunahuna nga magigin sugad hini an akon kinabuhi. Ini an pinakamapulsanon ngan pinakamakalilipay nga kinabuhi nga mahihingyap ko.”

Hinaot inin kinasingkasing nga mga pulong han kabugtoan nga nagboluntaryo ha Myanmar makaaghat ha imo nga hunahunaon an pagbulig ha mga tawo nga tangkod an kasingkasing ha mga teritoryo nga waray pa masangyawi. Oo, nananawagan ini nga kabugtoan, “Alayon, kadi ha Myanmar ngan buligi kami!”