Natawo ako ha St. Paul, Minnesota, U.S.A., han 1954 ha pamilya nga Katoliko ngan may kaya. Ikaduha ako ha lima nga anak. Nag-eskwela ako ha Katoliko nga elementary school ngan usa ako nga altar boy. Pero gutiay la an akon nahibabaroan ha Biblia. Bisan kon natoo ako nga may Dios nga naghimo han ngatanan, diri ako natoo nga an Katoliko nga Singbahan makakabulig ha akon nga makagsingba ha iya.

Ha siyahan ko nga tuig ha William Mitchell College of Law, may binisita ha amon balay nga mga Saksi ni Jehova. Busy ako hadto ha paglinaba salit an mag-asawa nagsiring nga mabalik na la hira. Pagbalik nira, may duha nga iginpakiana ako ha ira: “Kay ano nga an magraot nga tawo nagigin mas malampuson kay han mag-opay nga tawo?” ngan “Paonan-o magigin malipayon gud an mga tawo?” Ginkarawat ko an libro nga The Truth That Leads to Eternal Life ngan an New World Translation of the Holy Scriptures, nga an kobre malamrag an kaberde. Nagpa-Bible study liwat ako. Tungod hito, damu nga bag-o nga mga butang an  akon nahibaroan. Nalipay gud ako nga mahibaroan nga an Ginhadian han Dios an gobyerno nga magmamando ha tuna. Nakita ko nga an pagmando han tawo pakyas gud, ngan tungod hito an kalibotan puno hin kasakit, pag-antos, inhustisya, ngan trahedya.

Temprano han 1982, igindedikar ko an akon kalugaringon kan Jehova, ngan hito gihap nga tuig nagpabawtismo ako ha “Kingdom Truth” nga Kombensyon nga ginhimo ha St. Paul Civic Center. Han sumunod nga semana, binalik ako hito nga pasilidad basi mag-eksam para ha pagkaabogado. Temprano han Oktubre, nahibaroan ko nga nakapasar ako. Tungod hito, nagin kwalipikado ako nga magtrabaho sugad nga abogado.

Hito nga “Kingdom Truth” nga Kombensyon, nakilala ko hi Mike Richardson, usa nga Bethelite ha Brooklyn, nga nagsiring nga may gin-establisar nga legal office ha headquarters. Nahinumdoman ko an ginsiring han yunuko nga taga-Etiopia ha Buhat 8:36 ngan ginpakianhan ko an akon kalugaringon, ‘Ano an nakakaulang ha akon ha pagtrabaho ha Legal Office?’ Salit nag-aplay ako ha Bethel.

Waray malipay an akon mga kag-anak han nagin usa ako han mga Saksi ni Jehova. Ginpakianhan ako ni Tatay kon ano an kapulsanan han akon pagtrabaho ha Watchtower ha akon propesyon sugad nga abogado. Nagsiring ako ha ira nga boluntaryo an akon trabaho didto, ngan tatagan ako hin $75 kada bulan, nga amo an binulan nga reimbursement para ha mga Bethelite.

Tungod kay nagtatrabaho na ako ha usa nga korte, waray ako dayon makakadto ha Bethel, salit nakagtikang ako han akon pag-alagad ha Bethel ha Brooklyn, New York, han 1984. Igintoka ako ha Legal Office. An eksperyensya nga akon nakuha ha pagtrabaho ha korte nag-andam ha akon ha sunod nga mga nahitabo.

An Stanley Theater ha Jersey City, New Jersey, ginpalit han Nobyembre 1983. An mga brother nag-aplay hin mga permit ha pag-renovate han linya han koryente ngan mga tubo han bilding. Han nakigkita hira ha lokal nga mga opisyal, iginsaysay nira ha ira nga gagamiton an Stanley Theater sugad nga convention hall han mga Saksi ni Jehova. Nagin problema ito. May balaud an syudad nga an mga pasilidad para ha pagsingba kinahanglan aadto la ha residensyal nga mga lugar. An Stanley Theater aada ha komersyal nga lugar, salit waray maghatag hin permit an mga opisyal. Nag-apela an mga brother, pero waray ito karawta.

Ha siyahan ko nga semana ha Bethel, nagpasaka hin kaso ha federal district court an organisasyon basi kwestyunon an diri paghatag hin permit.  Tungod kay nagtrabaho pa la ako hin duha ka tuig ha federal district court ha St. Paul, Minnesota, pamilyar gud ako ha sugad hito nga mga kaso. Usa han aton mga abogado an nangatadongan nga an Stanley Theater ginagamit hadto ha iba-iba nga panpubliko nga mga okasyon, sugad han pagpasalida hin mga pelikula ngan mga concert. Salit kay ano nga magigin ilegal kon gagamiton ito ha relihiyoso nga okasyon? Ginkonsiderar han korte an isyu ngan nagdesisyon nga waray respetoha han Jersey City an aton kagawasan ha relihiyon. Ginsugo han korte an syudad nga ihatag an ginkikinahanglan nga mga permit, ngan nakita ko kon paonan-o ginbendisyonan ni Jehova an iya organisasyon ha paggamit hin legal nga mga pamaagi basi mapauswag an iya buruhaton. Nalipay gud ako nga nagkaada ako bahin hito.

Gintikangan han kabugtoan an usa nga daku nga proyekto ha pag-renovate, ngan waray mag-usa ka tuig tikang hito, ginhimo ha Jersey City Assembly Hall an graduation han ika-79 nga klase han Gilead han Septyembre 8, 1985. Sugad nga bahin han legal team, pribilehiyo gud para ha akon nga makabulig hini nga buruhaton para kan Jehova, ngan mas nakapalipay gud ito ha akon kay han nagtatrabaho pa ako sugad nga abogado antes ako kumanhi ha Bethel. Hito nga panahon, waray ako ideya nga gagamiton pa ngay-an ako ni Jehova ha mas damu pa nga pribilehiyo nga sugad hito.

Ha dekada han 1980, kaurogan na nga diri ginrirespeto han mga doktor ngan hospital an hangyo han usa nga adulto nga Saksi nga magpatambal nga diri nagamit hin dugo. Mas makuri gud an sitwasyon han burod nga kababayin-an, kay kaurogan nga ginhuhunahuna han mga huwes nga waray hira katungod nga magdumiri ha pagpaabuno hin dugo. Nasiring an mga huwes nga kon diri magpapaabuno an nanay, mahimo hiya mamatay ngan an bata magtutubo nga waray nanay.

Han Disyembre 29, 1988, damu nga dugo an nawara kan Sister Denise Nicoleau katapos niya manganak. An iya hemoglobin nagin mas hamubo ha 5.0, ngan karuyag han iya doktor nga magpaabuno hiya hin dugo. Pero diniri hi Sister Nicoleau. Kinabuwasan han aga, an hospital nangaro hin permiso ha huwes nga abunohan hiya hin dugo. An huwes naghatag hin awtorisasyon ha hospital nga abunohan hiya, bisan kon waray ginhimo nga pagbista o waray ngani pahibaroa hi Sister Nicoleau o an iya asawa.

Han Biernes, Disyembre 30, gin-abunohan han hospital hi Sister Nicoleau bisan pa kon nadiri gud an iya asawa ngan iba pa nga kapamilya nga nakada kaupod niya. Han gab-i, gin-aresto an pipira niya nga kapamilya ngan an usa o duha nga tigurang tungod han akusasyon nga gin-uulang nira  an agian ngadto ha higdaan ni Sister Nicoleau basi diri hiya maabunohan. Han Sabado nga aga, Disyembre 31, iginbalita ha dyaryo, TV, ngan radyo ha bug-os nga New York City an pag-aresto.

Han Lunes nga aga, nakiistorya ako ha huwes han mas hitaas nga korte nga hi Milton Mollen. Ginsaysay ko ha iya an mga detalye han kaso ngan ginpabug-atan ko nga ginpirmahan han usa nga huwes an sugo ha pag-abuno bisan kon waray ginhimo nga pagbista. Ginpakadto ako ni Justice Mollen ha iya opisina han kulop basi hisgotan an mga impormasyon ngan an mga balaud nga aplikado ha kaso. Gin-updan ako han akon overseer nga hi Philip Brumley ngadto ha opisina ni Justice Mollen hito nga gab-i. Gin-imbitar liwat han huwes an abogado han hospital nga kumadto. Nagin mapaso an amon iristorya. Makausa, may ginsurat hi Brother Brumley ha iya notepad diin ginsisidngan niya ako nga “kalma la.” Maopay gud adto nga sagdon kay nasisina na ako ha pagpinaniguro nga mapamatud-an nga sayop an abogado han hospital.

Katapos hin mga usa ka oras, nagsiring hi Justice Mollen nga an kaso amo an siyahan nga bibistahon kinabuwasan. Samtang nabaya kami ha iya opisina, nagsiring hiya nga may “makuri nga trabaho buwas” an abogado han hospital. Karuyag sidngon, makukurian an abogado nga depensahan an ginbuhat han hospital. Inabat ko nga ginpapasarig kami ni Jehova nga magdadaog an amon kaso. Urusahon gud nga makita nga gin-gagamit kami ni Jehova basi matuman an iya kaburut-on.

Han gab-i, nag-agma kami basi maiandam an amon mga argumento para buwas nga aga. Hirani la an korte ha Brooklyn Bethel, salit kadam-an han natrabaho ha amon gutiay nga Legal Office nagbaktas la ngadto. Katapos mapamatian han upat nga huwes an amon mga argumento, ginkansela nira an sugo ha pag-abuno. An hitaas nga korte nagdesisyon pabor kan Sister Nicoleau ngan nagsiring nga pagtalapas ha katungod pantawo an pagpirma hin sugo nga diri anay ginpapamatian an igsisiring han pasyente.

Waray pag-iha katapos hito, ginkompirma han pinakahitaas nga korte han New York nga may katungod hi Sister Nicoleau nga tambalon nga waray gamit nga dugo. Ito an siyahan ha upat nga desisyon may kalabotan ha dugo nga ginhimo han hitaas nga mga korte ha iba-iba nga estado han United States diin nakapribilehiyo ako nga makigbahin. (Kitaa an kahon nga “ Mga Kadaogan ha Korte  Suprema han Estado.”) Nakaupod liwat ako ha iba nga mga abogado ha Bethel ha mga kaso may kalabotan ha kustodiya ha bata, pagdiborsyo, ngan ha mga balaud mahitungod ha paggamit han tuna ngan mga bilding.

Han nakilala ko an akon nagin asawa nga hi Dawn, diborsyada hiya ngan may tulo nga anak. May trabaho hiya ngan payunir liwat. Nagin makuri gud an iya kinabuhi salit naimpres gud ako han iya determinasyon nga mag-alagad kan Jehova. Han 1992, inatender kami ha “Light Bearers” District Convention ha New York City, ngan nagpakiana ako ha iya kon puydi ko ba hiya panguyaban. Paglabay hin usa ka tuig, nagpakasal kami. Regalo gud tikang kan Jehova an pagkaada asawa nga mahunahunaon ha espirituwal ngan mahilig magpatawa. Ginpalipay gud ako ni Dawn ha ngatanan nga adlaw nga magkaupod kami.​—Prob. 31:12.

Han nag-asawa kami, 11, 13, ngan 16 anyos na an mga bata. Karuyag ko magin maopay nga tatay ha ira salit ginbasa ko hin maopay ngan gin-aplikar an ngatanan nga akon nabasa ha aton mga publikasyon mahitungod ha pagin stepparent. Nakaeksperyensya kami hin mga problema pero nalilipay ako nga ginkarawat ako han mga bata sugad nga ira matataporan nga sangkay ngan mahigugmaon nga tatay. Welcome pirme ha amon balay an kasangkayan han amon mga anak, ngan nalilipay gud kami nga makaupod inin energetic nga mga tin-edyer.

Han 2013, binalhin kami ni Dawn ha Wisconsin basi bumulig ha pag-ataman han amon lagas na nga mga kag-anak. Nasurprisa ako kay gintugotan la gihapon ako nga makag-alagad ha Bethel. Gin-imbitar ako nga padayon nga bumulig ha mga kaso han aton organisasyon sugad nga temporary volunteer.

Han Septyembre 2018, napansin ko nga pirme may plema an akon tutunlan. Gin-check-up ako han doktor ha amon lugar pero waray niya mahibaroi kon ano an hinungdan. Ha urhi, iginsuhestyon han usa pa nga doktor nga magpakonsulta ako ha usa nga neurologist. Han Enero 2019, nagsiring an neurologist nga posible nga may-ada ako hin talagsahon nga sakit nga gintatawag nga progressive supranuclear palsy (PSP).

Paglabay hin tulo ka adlaw, samtang nag-a-ice skating ako, nabari an akon too nga kamot. Maiha na gud ako nga nag-a-ice skating ngan eksperto na ako hito, salit maaram ako nga nawawara na an akon abilidad ha pagkontrol han akon mga pagkiwa. Nahipausa gud ako nga malaksi nga naggrabe an akon sakit. Mas nagtikakuri para ha akon an pagyakan, paggios, ngan pagtulon.

Nalilipay gud ako nga nagamit ko an akon eksperyensya sugad nga abogado basi makabulig ha pagpauswag han mga buruhaton han Ginhadian. Ngan nakapribilehiyo ako nga magsurat hin damu nga artikulo ha mga magasin nga para ha mga doktor, abogado, ngan huwes. Naghatag liwat ako hin mga speech ha mga seminar ha bug-os nga kalibotan basi depensahan an katungod han katawohan ni Jehova ha pagpili hin paagi ha pag-opera ngan pagtambal nga diri gin-aabunohan hin dugo. Bisan pa hito, pariho han ginsiring han parasurat han Biblia ha Lucas 17:10: ‘Waray ako pulos nga uripon. Ginbuhat ko la an angay ko buhaton.’