Iginpapakita han ebidensya nga hi Jesus nagin Hitaas nga Saserdote han nabawtismohan hiya han 29 C.E. Ano ito nga ebidensya? Ha iya bawtismo, iginpresenta ni Jesus an iya kalugaringon sugad nga halad ha simboliko nga halaran nga nagrirepresentar han “kaburut-on” han Dios. (Gal. 1:4; Heb. 10:5-10) Tungod kay an simboliko nga halaran ineksister tikang han nabawtismohan hi Jesus, an daku nga espirituwal nga templo​—nga nagrirepresentar han kahikayan han putli nga pagsingba kan Jehova nga iginbasar ha lukat—​sigurado nga ineksister liwat hito nga panahon. An halaran usa nga importante nga bahin hito nga espirituwal nga templo.​—Mat. 3:16, 17; Heb. 5:4-6.

Tungod kay may daku nga espirituwal nga templo na, nagkikinahanglan hin hitaas nga saserdote nga magdudumara dida hito. Salit gindihogan ni Jehova hi Jesus “han baraan nga espiritu ngan han gahum” basi magin hitaas nga saserdote. (Buh. 10:37, 38; Mar. 1:9-11) Pero paonan-o kita makakasiguro nga ginpili hi Jesus sugad nga Hitaas nga Saserdote antes han iya kamatayon ngan pagkabanhaw? An ehemplo ni Aaron ngan han hitaas nga mga saserdote nga sinaliwan ha iya mabulig ha aton nga mabaton ito nga pakiana.

Sumala ha Mosaiko nga Balaud, an hitaas nga saserdote la an makakasulod ha Pinakabaraan han tabernakulo, ngan ha urhi, ha Pinakabaraan han templo. An Pinakabaraan nahibubulag tikang ha Baraan pinaagi hin kurtina. Maagi an hitaas nga saserdote hito nga kurtina dida la ha Adlaw han Pagpara han Sala. (Heb. 9:1-3, 6, 7) Hi Aaron ngan an iya mga kasaliwan gindihogan sugad nga hitaas nga mga saserdote antes hira sinulod “ha kurtina” tipakadto ha Pinakabaraan. Salit sigurado nga gindihogan liwat hi Jesus sugad nga Hitaas nga Saserdote antes hiya mamatay ngan umagi “ha kurtina, nga amo an iya unod” ngadto ha kinabuhi ha langit. (Heb. 10:20) Tungod hini, gin-unabi ni apostol Pablo hi Jesus nga maabot “sugad nga hitaas nga saserdote” ngan katapos masulod “ha mas importante ngan mas perpekto nga tolda nga diri hinimo han mga kamot” ngan ngadto ha “langit mismo.”​—Heb. 9:11, 24.

Waray kaibahan kon kakan-o ginparig-on an bag-o nga kasabotan ngan kon kakan-o ito gin-inagurasyonan. Kay ano? Han sinaka hi Jesus ha langit ngan ginpresenta an iya perpekto nga kinabuhi sugad nga tawo para ha aton, ginhimo niya an siyahan ha tulo nga pitad nga magpaparig-on, o magpapalegal, han bag-o nga kasabotan. Pinaagi gihap hito nga mga pitad, gin-inagurasyonan liwat an kasabotan, o gintikangan. Ano ito nga mga pitad?

Siyahan, kinadto hi Jesus ha atubangan ni Jehova. Sunod, iginpresenta ni Jesus an bili han iya halad ngadto kan Jehova. Ngan katapos, ginkarawat ni Jehova an bili han ginpaagay nga dugo ni Jesus. Kon diri hihimoon ini nga mga pitad, diri magana an bag-o nga kasabotan.

Waray magsiring an Biblia kon kakan-o gud ginkarawat ni Jehova an bili han halad ni Jesus. Salit diri kita makakasiring hin espisipiko nga panahon kon kakan-o ginparig-on ngan gintikangan an bag-o nga kasabotan. Pero maaram kita nga sinaka hi Jesus ha langit napulo ka adlaw antes han Pentekostes. (Buh. 1:3) Ha partikular nga takna hito nga halipot nga panahon, iginpresenta niya an bili han iya halad ngadto kan Jehova, nga nagkarawat hito. (Heb. 9:12) Klaro gud nga nakita han Pentekostes 33 C.E. an pamatuod hini. (Buh. 2:1-4, 32, 33) Salit klaro nga naeksister na ngan nagana an bag-o nga kasabotan.

Ha pagsumaryo, an bag-o nga kasabotan ginparig-on ngan gin-inagurasyonan katapos karawaton ni Jehova an bili han ginpaagay nga dugo ni Jesus. Salit naimplementar an kasabotan diin hi Jesus, an Hitaas nga Saserdote, an nagin Tagapamutnga.​—Heb. 7:25; 8:1-3, 6; 9:13-15.