1. Ano an ginbuhat ni Jehova para ha imo?

PAONAN-O ka nagin Saksi ni Jehova? Siyahan, nahibaroan mo an “maopay nga sumat”​—bangin pinaagi han imo mga kag-anak, katrabaho o kaeskwela, o pinaagi han pagsangyaw ha balay-balay. (Mar. 13:10) Katapos, may naggahin hin daku nga panahon ngan pangalimbasog basi mag-Bible study ha imo. Ha imo pag-aram, nahibaro ka paghigugma kan Jehova ngan nahibaroan mo liwat nga hinigugma ka niya. Iginpahirani ka ni Jehova ha kamatuoran, ngan yana sugad nga disipulo ni Jesu-Kristo, may paglaom ka nga mabuhi ha waray kataposan. (Juan 6:44) Sigurado nga mapasalamaton ka gud kan Jehova nga may ginpagios hiya nga magtutdo ha imo han kamatuoran ngan ginkarawat ka niya sugad nga usa han iya mga surugoon.

2. Ano an aton hihisgotan hini nga artikulo?

² Yana nga maaram na kita han kamatuoran, may pribilehiyo kita nga buligan an iba nga umupod ha aton ha paglakat ha dalan ngadto ha kinabuhi. Bangin komportable kita pagsangyaw ha balay-balay, pero bangin nakukurian kita pagtanyag ngan pagdumara hin pag-aram ha Biblia. Ito ba an imo inaabat? Kon oo, bangin mabuligan ka han mga suhestyon hini nga artikulo. Hihisgotan naton kon ano an nagpapagios ha aton nga bumulig ha panhimo hin disipulo. Hihisgotan liwat naton kon paonan-o naton malalamposan an mga problema nga mahimo magin hinungdan nga mag-alang kita ha pagdumara hin pag-aram ha Biblia. Siyahan, hisgotan naton kon kay ano nga kinahanglan diri la kita magin parasangyaw kondi magturutdo liwat han maopay nga sumat.

3. Kay ano nga nagsasangyaw kita?

³ Han nakanhi hi Jesus ha tuna, gintagan niya an iya mga sumurunod hin duha nga sugo. Siyahan, ginsugo niya hira nga  magsangyaw han maopay nga sumat han Ginhadian, ngan iya iginpakita kon paonan-o ito bubuhaton. (Mat. 10:7; Luc. 8:1) Pananglitan, igin-andam ni Jesus an iya mga disipulo kon ano an ira bubuhaton kon diri kumarawat ngan kon kumarawat an mga tawo han mensahe han Ginhadian. (Luc. 9:2-5) Igintagna liwat niya an magigin lukop han ira pagsangyaw; nagsiring hiya nga an iya mga sumurunod maghahatag hin “pamatuod ha ngatanan nga nasud.” (Mat. 24:14; Buh. 1:8) Karawaton man han mga tawo an mensahe o diri, kinahanglan sumatan hira han mga disipulo mahitungod han Ginhadian han Dios ngan kon ano an bubuhaton hito.

4. Sumala ha Mateo 28:18-20, ano an kinahanglan naton buhaton labot pa han pagsangyaw han Ginhadian?

⁴ Ano an ikaduha nga iginsugo ni Jesus? Ginsugo niya an iya mga sumurunod nga tutdoan adton potensyal nga magin mga disipulo nga tumanon an ngatanan nga iya iginsugo. Pero an mga Kristiano la ba ha siyahan nga siglo an ginsugo ni Jesus nga magsangyaw ngan magtutdo sugad han bangin ginsisiring han iba? Diri. Iginpakita ni Jesus nga inin importante gud nga buruhaton magpapadayon tubtob ha aton panahon, “tubtob ha ikatarapos han sistema han mga butang.” (Basaha an Mateo 28:18-20.) Posible nga iginhatag ni Jesus ito nga sugo han nagpakita hiya ha sobra 500 nga iya disipulo. (1 Cor. 15:6) Ngan ha pahayag nga iya iginhatag kan Juan, klaro nga iginpakita ni Jesus nga karuyag niya nga an ngatanan niya nga disipulo bumulig ha iba nga mahibaro mahitungod kan Jehova.​—Pah. 22:17.

5. Sumala ha 1 Corinto 3:6-9, paonan-o igin-ilustrar ni Pablo an koneksyon han pagsangyaw ngan pagtutdo?

⁵ Iginpariho ni apostol Pablo an panhimo hin disipulo ha pagkultibar hin tanom, diin iginpakita niya nga diri la tubtob ha pagtanom hin mga binhi an kinahanglan buhaton. Ginpahinumdoman niya an mga taga-Corinto: “Ako an nagtanom, hi Apolos an nagsaribo . . . Kamo an uma han Dios nga iya ginkukultibar.” (Basaha an 1 Corinto 3:6-9.) Sugad nga magburuhat ha “uma han Dios,” diri la kay nagtatanom kita hin mga binhi, kondi ginsasaribohan liwat naton ito ngan regular nga ginpapanginano an pagtubo han aton mga tanom. (Juan 4:35) Pero ginkikilala naton nga an Dios an nagpapatubo han mga binhi.

6. Ano an nahiuupod ha aton buruhaton sugad nga magturutdo?

⁶ Ginbibiling naton adton “may husto nga disposisyon basi magkaada kinabuhi nga waray kataposan.” (Buh. 13:48) Basi magin mga disipulo ito nga mga indibiduwal, kinahanglan buligan naton hira nga (1) masabtan, (2) karawaton, ngan (3) iaplikar an ira mga nahibabaroan ha Biblia. (Juan 17:3; Col. 2:6, 7; 1 Tes. 2:13) An ngatanan ha kongregasyon makakabulig ha mga estudyante ha Biblia pinaagi han ira maopay nga susbaranan ha pagpakita hin gugma hini nga mga bag-ohan ngan ha pag-abiabi ha ira kon naatender hira ha mga katirok. (Juan 13:35) An nagba-Bible study bangin kinahanglan liwat maggahin hin daku nga panahon ngan kusog basi buligan an usa nga estudyante nga bayaan an mga gintotoohan o mga buhat nga “marig-on an pagkatindog.” (2 Cor. 10:4, 5) Mahimo umabot hin damu ka bulan an pagbulig ha usa nga indibiduwal nga mahimo niya ito nga mga pagbag-o tubtob nga magin kwalipikado na hiya para ha bawtismo. Pero diri gud karag an mga pangalimbasog.

7. Kay ano nga nagsasangyaw ngan nanhihimo kita hin disipulo?

⁷ Kay ano nga nagsasangyaw ngan nanhihimo kita hin disipulo? Siyahan, tungod kay hinigugma naton hi Jehova. Kon ginbubuhat mo an imo pinakamaopay ha pagsunod han sugo nga magsangyaw ngan manhimo hin disipulo, iginpapakita mo nga hinigugma mo an Dios. (1 Juan 5:3) Hunahunaa ini: An imo gugma kan Jehova  nagpagios na ha imo nga magsangyaw ha balay-balay. Masayon ba sundon ito nga sugo? Posible nga diri. Han siyahan nga inupod ka pagsangyaw, ginkulba ka ba ha primero nga balay nga imo ginsangyawan? Sigurado nga ito an imo gin-abat! Pero maaram ka nga ini an buruhaton nga karuyag ni Jesus nga buhaton mo, ngan ginsunod mo an iya sugo. Ngan samtang nalabay an panahon, posible nga nagtitikasayon para ha imo an pagsangyaw. Pero kumusta man an pagdumara hin pag-aram ha Biblia? Bangin ginkukulba ka kon nahuhunahuna mo ito. Pero kon mangangaro ka kan Jehova hin bulig nga malamposan an imo kulba ngan magkaada kaisog ha pagtanyag hin pag-aram ha Biblia, bubuligan ka niya nga mapakusog an imo hingyap nga manhimo hin disipulo.

8. Sumala ha Marcos 6:34, ano pa an nagpapagios ha aton nga magtutdo ha iba?

⁸ Ikaduha, an gugma ha aton mga igkasi-tawo nagpapagios ha aton nga tutdoan hira han kamatuoran. Makausa, kapoy gud hi Jesus ngan an iya mga disipulo tungod han ira pagsinangyaw. Kinahanglan nira hin mapapahuwayan, pero nakita hira han damu nga tawo. Tungod han kalooy, gintutdoan hira ni Jesus hin “damu nga butang.” (Basaha an Marcos 6:34.) Nanutdo la gihapon hiya bisan kon kapoy hiya. Kay ano? Ginhunahuna niya nga hiya mismo an nakakaeksperyensya han sitwasyon hito nga mga tawo. Nakita niya nga nag-aantos gud hira​—kinahanglan gud nira hin paglaom—​ngan karuyag niya nga buligan hira. An mga tawo yana may mga problema liwat ngan kinahanglan nira hin paglaom, bisan kon ha aton pagkita baga hin malipayon na hira ngan kontento. Pariho hira hin mga karnero nga nawawara; waray hira paraataman nga naggigiya ha ira. Hi apostol Pablo nagsiring nga an mga tawo nga sugad hito diri nakilala ha Dios ngan waray paglaom. (Efe. 2:12) Aada hira ha “dalan tipakadto ha kabungkagan”! (Mat. 7:13) Kon ginhuhunahuna naton an espirituwal nga kahimtang han mga tawo ha aton teritoryo, napapagios kita han gugma ngan pagpaid nga buligan hira. Ngan an pinakamaopay nga paagi ha pagbulig ha ira amo an pagtanyag ha ira hin pag-aram ha Biblia.

9. Sumala ha Filipos 2:13, paonan-o ka mabubuligan ni Jehova?

⁹ Bangin nag-aalang ka nga magtanyag hin pag-aram ha Biblia kay maaram ka nga daku gud nga panahon an ginkikinahanglan ha pagdumara hin pag-aram. Kon ito an imo inaabat, isumat ito kan Jehova. Paghangyo ha iya nga buligan ka nga makultibar an hingyap nga makabiling hin Bible study. (Basaha an Filipos 2:13.) Hi apostol Juan nagpasarig ha aton nga babatunon han Dios an mga pag-ampo nga uyon ha Iya kaburut-on. (1 Juan 5:14, 15) Salit makakasiguro ka nga bubuligan ka ni Jehova nga makultibar an hingyap nga makigbahin ha panhimo hin disipulo.

10-11. Kay ano nga bangin mag-alang kita ha pagdumara hin pag-aram ha Biblia?

¹⁰ Ginsiseryoso naton an sugo nga manutdo, pero tungod han mga problema bangin diri sugad kadaku an aton nahihimo ha buruhaton nga panhimo hin disipulo. Hisgotan naton an pipira hito nga mga problema ngan kon paonan-o naton ito malalamposan.

¹¹ Bangin inaabat naton nga gutiay la an aton nahihimo tungod han aton kahimtang. Pananglitan, an iba nga magwarali edaran na o may sakit. Sugad ba hito an imo sitwasyon? Kon oo, tagda an usa nga leksyon nga aton nahibaroan ha COVID-19 nga pandemya. Nahibaroan naton nga makakagdumara kita hin epektibo nga mga pag-aram ha Biblia pinaagi ha telepono o iba pa nga gadyet! Salit mahimo ka makagtikang ngan makagdumara hin pag-aram ha imo mismo balay ngan mas kombinyente ito. Ngan may usa pa nga bentaha. An iba karuyag mag-aram han Biblia, pero diri hira puydi ha panahon nga kasagaran  na nga nagsasangyaw an aton kabugtoan. Pero bangin puydi hira ha maagahon o ha gab-i. Puydi ka ba mag-Bible study hito nga mga oras? Gintutdoan ni Jesus hi Nicodemo ha gab-i, an panahon nga mas karuyag ni Nicodemo.—​Juan 3:1, 2.

12. Ano an makakabulig ha aton nga magkaada kompyansa nga mahimo kita magin epektibo nga magturutdo?

¹² Bangin naghuhunahuna kita nga diri naton kaya magdumara hin pag-aram ha Biblia. Bangin inaabat naton nga kinahanglan magkaada kita dugang nga kahibaro o magin maopay gud nga magturutdo antes kita magdumara hin Bible study. Kon ito an imo inaabat, tagda an tulo nga butang nga makakabulig ha imo nga magkaada kompyansa. Siyahan, para kan Jehova kwalipikado ka magtutdo ha iba. (2 Cor. 3:5) Ikaduha, hi Jesus, nga may-ada han “ngatanan nga awtoridad ha langit ngan ha tuna,” an naghatag ha imo hin awtorisasyon nga magtutdo. (Mat. 28:18) Ngan ikatulo, makakasarig ka ha bulig han iba. Hi Jesus sinarig ha igintutdo ha iya han iya Amay mahitungod han iya iyayakan, ngan makakasarig ka liwat ha Iya. (Juan 8:28; 12:49) Mahimo ka liwat maghangyo ha paramangno han iyo grupo ha pagsangyaw, ha usa nga kwalipikado nga payunir, o ha usa nga eksperyensyado nga magwarali nga buligan ka nga makagtikang ngan makagdumara hin Bible study. Mabubuligan ka nga madugangan an imo kompyansa kon maupod ka ha usa hini nga mga magwarali ha ira pag-Bible study.

13. Kay ano nga kinahanglan magin andam kita ha pag-adjust ha bag-o nga mga pamaagi ha pagtutdo?

¹³ Bangin nakukurian kita magpahiuyon ha bag-o nga mga pamaagi ngan mga garamiton. Nagbag-o na an paagi han aton pagdumara hin mga pag-aram ha Biblia. Ha aton pagdumara hin pag-aram gamit an aton nangunguna nga publikasyon nga Mabuhi hin Malipayon ha Waray Kataposan!, kinahanglan mangandam kita antes han pag-aram. Ngan an paagi han aton pagdumara hito iba kay han aton ginbubuhat ha naglabay. Mas gutiay na la nga mga parapo an aton ginbabasa ngan mas damu na an aton pakig-istorya ha estudyante. Kon nagtututdo kita, mas damu nga video ngan elektroniko nga mga garamiton sugad han JW Library^® an aton gin-gagamit. Kon diri ka maaram gumamit hito nga mga garamiton, pagpatutdo ha iba nga maaram hito. Mas komportable kita nga buhaton an aton mga nahiaraan, salit nakukurian kita pag-adjust ha bag-o nga mga paagi ha pagbuhat han mga butang. Pero ha bulig ni Jehova ngan han iba, magigin mas masayon ha imo an pag-adjust ngan mas mag-i-enjoy ka pa ngani ha pag-Bible study ha mga tawo. Sugad han siring han usa nga payunir, “nag-i-enjoy an estudyante ngan an magturutdo” hini nga paagi han pag-aram.

14. Ano an angay naton hinumdoman kon nagsasangyaw kita ha teritoryo diin diri damu an namamati ha aton, ngan paonan-o nakakadasig ha aton an 1 Corinto 3:6, 7?

¹⁴ Bangin naukoy kita ha teritoryo diin makuri makagtikang hin mga pag-aram ha Biblia. An mga tawo bangin diri interesado ha aton mensahe o nakontra pa ngani hito. Ano an makakabulig ha aton nga magpabilin nga positibo? Hinumdumi nga an kahimtang han mga tawo mahimo tigda nga magbag-o hinin masamok nga kalibotan, ngan adton diri interesado hadto bangin makapanhunahuna ha urhi nga kinahanglan nira an giya han Dios. (Mat. 5:3) An iba nga diri pirme nakarawat hadto han aton literatura nagpa-Bible study na. Maaram liwat kita nga hi Jehova an Agaron han pangani. (Mat. 9:38) Karuyag niya nga padayon kita nga magtanom ngan magsaribo, pero hiya an responsable han pagpatubo. (1 Cor. 3:6, 7) Ngan makapadasig gud hinumdoman nga bisan kon waray kita yana ginba-Bible study, ginbabalosan kita ni Jehova tungod han aton mga pangalimbasog, diri tungod han mga resulta hito! *

15. Ano an inaabat ni Jehova kon nagpapa-Bible study an usa ngan nag-aaplikar han iya mga nahibabaroan?

¹⁵ Nalilipay hi Jehova kon ginkakarawat han usa an kamatuoran ha Biblia ngan iginsusumat ito ha iba. (Prob. 23:15, 16) Sigurado nga daku gud an kalipay ni Jehova kon nakikita niya an nahitatabo yana! Pananglitan, bisan pa han bug-os-kalibotan nga pandemya ha 2020 nga tuig han pag-alagad, 7,705,765 nga Bible study an gindumara ngan 241,994 an nabuligan nga magdedikar han ira kalugaringon kan Jehova ngan magpabawtismo. Ini nga bag-o nga mga disipulo magdudumara liwat hin mga pag-aram ha Biblia ngan manhihimo hin mga disipulo. (Luc. 6:40) Waray ruhaduha, napapalipay naton hi Jehova kon nakikigbahin kita ha panhimo hin disipulo.

16. Ano an usa nga tumong nga maopay himoon?

¹⁶ Diri masayon an panhimo hin disipulo, pero ha bulig ni Jehova, makakapartisipar kita ha pagtutdo ha mga interesado nga higugmaon an aton langitnon nga Amay. Mahimo ba naton himoon nga tumong nga magkaada hin bisan usa la nga Bible study? Bangin mahipausa kita han magigin resulta kon sasalingabuton naton an tagsa nga higayon nga magtanyag hin pag-aram ha Biblia ha ngatanan nga aton nasasangyawan. Makakasiguro kita nga bibendisyonan ni Jehova an aton mga pangalimbasog.

17. Ano an aton aabaton kon makakagdumara kita hin pag-aram ha Biblia?

¹⁷ Daku gud nga pribilehiyo an pagsangyaw ngan pagtutdo han kamatuoran! Ini nga buruhaton naghahatag gud ha aton hin tinuod nga kalipay. Damu an nabuligan ni apostol Pablo ha Tesalonica nga magin mga disipulo. Ginsumat niya an iya gin-abat: “Ano ba an amon paglaom o kalipay o korona han duro nga pagrayhak ha atubangan han aton Ginoo nga hi Jesus ha iya presensya? Ha pagkamatuod, diri ba kamo? Kamo gud an amon himaya ngan kalipay.” (1 Tes. 2:19, 20; Buh. 17:1-4) Sugad liwat hito an inaabat han damu yana. An sister nga hi Stéphanie, kaupod an iya asawa, damu an nabuligan nga magpabawtismo. Hiya nagsiring, “Waray na gud mas makakapalipay pa kay han pagbulig ha mga tawo nga magdedikar han ira kalugaringon kan Jehova.”