Karuyag gud ni Jehova nga an duha nga tawo nga nag-aasawa magin malipayon ngan magkaada nagpapadayon nga duok nga relasyon ha usa kag usa. (Mat. 19:4-6) Kon karuyag mo mag-asawa, paonan-o ka makakabiling hin maopay nga maarasawa? Sugad nga aton Maglalarang, maaram hi Jehova kon ano an kinahanglan naton buhaton basi maglampos an aton pakig-uyab ngan pag-asawa. Salit kon iaaplikar mo an mga prinsipyo nga iginhatag niya ha aton, magigin malipayon ka gud. Tagda an pipira hito nga mga prinsipyo.

Siyahan, kinahanglan masabtan naton ini nga kamatuoran mahitungod ha aton kalugaringon: “An kasingkasing mas malimbong kay ha bisan ano nga butang ngan peligroso.” (Jer. 17:9) Kon an duha nga tawo nga naruruyag mag-asawa nagkakakilala ngan nagtitikang pag-date, mahimo dayon magkaada hira makusog nga mga pagbati ha usa kag usa. Kon mahitabo ito, makukurian hira paghimo hin maaramon nga mga desisyon. Kon magdesisyon hira pag-asawa tungod la han ira mga gin-aabat ha usa kag usa, bangin ha urhi masakitan la hira. (Prob. 28:26) Salit diri maaramon nga an duha nga tawo magpahayag han ira hilarom nga inaabat o magsaad ha kada tagsa samtang diri pa nira kilala hin maopay an usa kag usa.

An Proberbios 22:3 nasiring: “An maaramon nga tawo nakakakita han peligro ngan natago, pero an mga waray eksperyensya nagpapadayon la ngan nag-aantos han mga resulta.” Ano an kadelikadohan han paggamit hin mga dating website? Makasurubo, an iba nagkaada masakit nga eksperyensya tungod kay gin-uyagan la an ira emosyon han ira naka-date nga nakilala nira online. May maglimbong liwat nga mga tawo nga naghihimo hin peke nga mga account basi uwaton an inosente nga mga tawo ngan kawaton an ira kwarta. Usahay, ito nga maglimbong nga mga tawo nagpapakilala nga mga Saksi hira.

Tagda an usa pa nga kadelikadohan. May mga dating website nga nagamit hin mga computer program nga nabulig kuno nga mahibaroan kon hin-o an magkaangay ha usa kag usa. Pero waray ebidensya nga epektibo gud ito nga pamaagi. Magigin maaramon ba an pagsarig ha usa nga computer program nga hinimo la han tawo basi makahimo hin maaramon nga desisyon mahitungod ha usa nga importante nga butang sugad han pagpili hin maarasawa? Diri gud matutupngan han mga computer program an pagkamasasarigan han mga prinsipyo han Biblia!​—Prob. 1:7; 3:5-7.

An prinsipyo nga mababasa ha Proberbios 14:15  nasiring: “An tawo nga waray eksperyensya natoo ha tagsa nga pulong, pero an maaramon nga tawo naghuhunahuna hin maopay han iya tagsa nga pitad.” Antes ka magdesisyon kon an usa ba magigin maopay nga asawa, kinahanglan kilalahon mo anay hiya hin maopay. Kondi magigin makuri ito buhaton kon magkikita la kamo online. Bisan kon makikita niyo an impormasyon mahitungod han tagsa ha iyo ngan daku nga panahon an iyo ginagamit pag-inistorya online, masisiring mo gud ba nga kilala mo na ito nga tawo? An iba nga naghunahuna nga nabilngan na nira an ira karuyag mapangasawa na-shock ha ira mga nahibaroan han nakilala na nira ha personal ito nga tawo.

An salmista nagsiring: “Diri ako nakikig-upod ha maglimbong nga mga tawo, ngan ginlilikyan ko an mga nagpapakunokuno.” (Sal. 26:4) Damu an naghuhunahuna nga normal la an pagbutang hin buwa nga mga impormasyon ha ira profile ha mga dating website basi la magin mas makaruruyag hira pagkit-on. Bangin itago nira an ira tinuod nga personalidad o diri ipakita an ira maraot nga mga batasan kon nakikiistorya hira online. Bisan kon an iba nagpapakilala nga mga Saksi ni Jehova hira, bawtismado gud ba hira nga mga Kristiano? Hamtong ba hira ha espirituwal? Duok ba an ira relasyon kan Jehova? Maopay ba an ira reputasyon ha kongregasyon? O bangin diri hira maopay nga ehemplo o bangin pa ngani “magraot [hira] nga mga kaupod”? (1 Cor. 15:33; 2 Tim. 2:20, 21) Ngan may kagawasan ba hira ha pag-asawa sumala ha mga prinsipyo ha Biblia? Kinahanglan mo mahibaroan an baton hito nga mga pakiana, pero magigin makuri ito kon diri ka magpapakiana ha iba nga Saksi nga nakilala gud hito nga tawo. (Prob. 15:22) Ngan syempre, diri bubuhaton han maunungon nga surugoon ni Jehova bisan an paghunahuna nga ‘pas-anon hin diri pantay an yugo’ upod han usa nga diri tumuroo.—2 Cor. 6:14; 1 Cor. 7:39.

Tungod kay delikado an paggamit hin mga dating website, may-ada mas maopay nga mga paagi basi makabiling hin maarasawa ngan makilala hiya hin maopay. Diin ka makakabiling hin maopay nga maarasawa? Kon diri igindidiri an pagkatitirok, an mga Saksi ni Jehova may makikilala nga kabugtoan ha personal kon naatender hira ha mga katirok han kongregasyon, asembleya, kombensyon, ngan iba pa nga pagturotarampo.

Kon diri posible an pagkatitirok, sugad ha panahon han COVID-19 nga pandemya, ginagamit naton an elektroniko nga mga garamiton basi umatender ha mga katirok han kongregasyon, diin may oportunidad kita nga makilala an solo nga mga Saksi. Maoobserbaran mo kon paonan-o hira nakikigbahin ha mga katirok ngan mababatian mo an kapahayagan han ira pagtoo kon nagkukomento hira. (1 Tim. 6:11, 12) Katapos han mga katirok, posible mo liwat makaistorya ha breakout room an imo naruruyagan. Pinaagi han virtual nga pagturotarampo kaupod han kabugtoan, maoobserbaran mo kon paonan-o gintatratar han imo naruruyagan an iba nga tawo. Pinaagi hito, mahibabaroan mo an iya personalidad. (1 Ped. 3:4) Samtang mas nakikilala mo hiya, mahibabaroan mo kon pariho ba an iyo mga tumong ngan mga prinsipyo ha kinabuhi ngan kon magigin maopay ba kamo nga mag-asawa.

Kon an mga solo nagbibiling hin maarasawa ha paagi nga uyon ha mga prinsipyo han Biblia, posible gud nga maeksperyensyahan nira an pagin totoo hini nga proberbio: “An tawo nga nakaagi hin maopay nga asawa [o bana] nakaagi hin maopay nga butang, ngan nakakarawat niya an pag-uyon ni Jehova.”​—Prob. 18:22.