1. Ano an angay naton magin panhunahuna ha oportunidad nga makag-ampo kan Jehova?

 GINTAGAN kita hin daku gud nga pribilehiyo—an makadaop ha naghimo han langit ngan tuna ha pag-ampo. Hunahunaa la: Maisusumat naton kan Jehova an aada ha aton kasingkasing bisan san-o ngan ha bisan ano nga linggwahe, nga diri nagkikinahanglan hin appointment. Makakag-ampo kita ha iya bisan aada kita ha ospital o ha prisohan, kay nasarig kita nga papamatian kita han aton mahigugmaon nga Amay. Diri naton iginbabalewaray ini nga pribilehiyo.

2. Paonan-o iginpakita ni Hadi David nga gin-aapresyar niya an pribilehiyo nga mag-ampo?

² Gin-apresyar ni Hadi David an pribilehiyo nga mag-ampo. Nagkanta hiya kan Jehova: “Hinaot an akon pag-ampo magin sugad hin insenso nga gin-andam ha imo atubangan.” (Sal. 141:1, 2) Ha panahon ni David, an sagrado nga insenso nga ginagamit han mga saserdote ha tinuod nga pagsingba igin-aandam hin maopay. (Ex. 30:34, 35) An pag-unabi ni David hin insenso nagpapakita nga karuyag niya hunahunaon hin maopay an iya isisiring ha iya Amay ha langit. Hingyap gud liwat naton ito. Karuyag naton nga malipay hi Jehova ha aton mga pag-ampo.

3. Ano an dapat naton magin disposisyon kon nadaop kita kan Jehova ha pag-ampo, ngan kay ano?

³ Kon nag-aampo kita kan Jehova, angay naton likyan an pagin sobra kapamilyar. Lugod, nag-aampo kita nga may hilarom nga respeto. Hunahunaa an urusahon nga mga bisyon nga nakarawat nira Isaias, Ezekiel, Daniel, ngan Juan. Iba-iba ito nga mga bisyon, pero may ginkakaparihoan ito. Iginhuhulagway hito ngatanan nga hi Jehova harangdon nga Hadi. “Nakita [ni Isaias] hi Jehova nga nalingkod ha hitaas nga trono.” (Isa. 6:1-3) Nakita ni Ezekiel hi Jehova nga nalingkod ha iya langitnon nga karuwahe, nga napapalibotan hin “kalamrag nga pariho  han kalamrag han balangaw.” (Ezek. 1:26-28) Nakita ni Daniel “an Kadaan han mga Adlaw” nga nakasul-ot hin busag nga bado, nga may mga laga han kalayo tikang ha Iya trono. (Dan. 7:9, 10) Ngan nakita ni Juan hi Jehova nga nalingkod ha usa nga trono nga may nakapalibot nga sugad hin mahusay nga balangaw nga pariho pagkit-on hin berde nga esmeralda. (Pah. 4:2-4) Samtang aton ginpapamalandong an waray kapariho nga himaya ni Jehova, napapahinumdoman kita han daku gud nga pribilehiyo nga makag-ampo ha iya ngan han pagkaimportante han pagbuhat hito nga may daku nga respeto. Pero paonan-o kita dapat mag-ampo?

4. Ano an aton mahibabaroan ha tinikangan han modelo nga pag-ampo nga mababasa ha Mateo 6:9, 10?

⁴ Basaha an Mateo 6:9, 10. Ha Sermon ha Bukid, gintutdoan ni Jesus an iya mga disipulo kon paonan-o mag-aampo ha paagi nga nakakapalipay ha Dios. Katapos magsiring nga “pag-ampo kamo ha sugad hini nga paagi,” siyahan nga gin-unabi ni Jesus an importante nga mga butang nga direkta nga may kalabotan ha katuyoan ni Jehova: an pagbaraan han Iya ngaran; an pag-abot han Ginhadian, nga magbubungkag han ngatanan nga nakontra ha Dios; ngan an mga bendisyon ha tiarabot nga Iya hihimoon para ha tuna ngan ha mga tawo. Kon igin-uupod naton ito ha aton mga pag-ampo, iginpapakita naton nga importante ha aton an kaburut-on han Dios.

5. Angayan ba ig-ampo an personal nga mga butang?

⁵ Ha sunod nga bahin han pag-ampo, iginpakita ni Jesus nga angayan ig-ampo an personal nga mga butang. Puydi ta hangyoon hi Jehova nga tagan kita hin pagkaon para ha usa nga adlaw, pasayloon an aton mga sala, protektaran kita tikang ha pagsulay, ngan talwason kita tikang ha usa nga maraot. (Mat. 6:11-13) Kon naghahangyo kita kan Jehova hini nga mga butang, gin-aamin naton nga nakadepende kita ha iya ngan iginpapahayag an aton hingyap nga makarawat an iya pag-uyon.

6. An mga butang ba nga puydi naton ig-ampo adton espisipiko la nga gin-unabi ha modelo nga pag-ampo? Isaysay.

⁶ Diri karuyag ni Jesus nga basta la susundon han iya mga sumurunod an mga pulong ha modelo nga pag-ampo. Ha iba niya nga mga  pag-ampo, nag-unabi hiya hin iba-iba nga butang nga importante ha iya hito nga panahon. (Mat. 26:39, 42; Juan 17:1-26) Ha pariho nga paagi, puydi ta ig-ampo an bisan ano nga importante ha aton. Kon magdidesisyon kita, mahimo kita mag-ampo para hin kinaadman ngan pagsabot. (Sal. 119:33, 34) Kon may titikangan kita nga makuri nga toka, puydi kita mag-ampo para hin hilarom nga pagsabot ngan husto nga pagturotimbang. (Prob. 2:6) Mahimo ig-ampo han mga kag-anak an ira mga anak, mahimo ig-ampo han mga anak an ira mga kag-anak, ngan mahimo ngan angay naton ngatanan ig-ampo an aton mga Bible study ngan adton ginsasangyawan ta. Syempre, an aton mga pag-ampo diri la dapat pangaro kan Jehova hin bulig.

7. Kay ano nga angay naton dayawon hi Jehova ha pag-ampo?

⁷ Angay ta hinumdoman nga dayawon hi Jehova ha aton mga pag-ampo. An aton Dios gud la an angayan kumarawat han pinakalabaw nga pagdayaw. “Maopay [hiya] ngan andam magpasaylo.” “Maloloy-on [liwat hiya] ngan mapinairon, diri madagmit masina ngan hura han maunungon nga gugma ngan pagkamatinumanon.” (Sal. 86:5, 15) May maopay gud kita nga rason nga dayawon hi Jehova tungod ha kon hin-o hiya ngan kon ano an iya ginbubuhat.

8. Ano an pipira nga butang nga puydi naton igpasalamat kan Jehova? (Salmo 104:12-15, 24)

⁸ Labot la han pagdayaw kan Jehova ha aton mga pag-ampo, napapagios liwat kita nga pasalamatan hiya han mag-opay nga butang nga iya igintatagana. Pananglitan, puydi naton hiya pasalamatan han makaruruyag nga mga kolor han mga bukad, han damu gud kalain nga magrasa nga pagkaon, ngan han kalipay ha pagkaada duok nga kasangkayan. Ini ngan an damu pa iginhahatag han aton mahigugmaon nga Amay, basi la kita malipay. (Basaha an Salmo 104:12-15, 24.) Labaw ha ngatanan, nagpapasalamat kita kan Jehova han hura nga espirituwal nga pagkaon nga iya igintatagana ngan han aton makalilipay nga paglaom ha tiarabot.

9. Ano an makakabulig ha aton nga mahinumdom nga pasalamatan hi Jehova? (1 Tesalonica 5:17, 18)

⁹ Masayon gud la mangalimtan nga pasalamatan hi Jehova han ngatanan nga iya ginbubuhat para ha aton. Ano an makakabulig ha imo nga mahinumdom? Puydi ka maghimo hin lista han  espisipiko nga mga butang nga imo igin-ampo ngan kitaon ito ha pana-panahon basi hibaroan kon paonan-o ito ginbaton ni Jehova. Katapos, pag-ampo basi pasalamatan hiya han iya bulig. (Basaha an 1 Tesalonica 5:17, 18.) Hunahunaa ini: Nalilipay kita ngan naabat nga hinigugma kita kon an iba nagpapasalamat ha aton. Ha pariho nga paagi, kon nahinunumdom kita nga magpasalamat kan Jehova ha pagbaton ha aton mga pag-ampo, nalilipay hiya. (Col. 3:15) Pero ano an usa pa nga importante nga rason nga pasalamatan an aton Dios?

10. Sumala ha 1 Pedro 2:21, kay ano nga may rason kita nga pasalamatan hi Jehova ha pagsugo kan Jesus ha tuna?

¹⁰ Basaha an 1 Pedro 2:21. Angay naton pasalamatan hi Jehova ha pagsugo ha iya hinigugma nga Anak nga tutdoan kita. Damu gud an aton mahibabaroan parte kan Jehova ngan kon paonan-o hiya mapapalipay pinaagi ha pag-aram han kinabuhi ni Jesus. Kon magpapakita kita hin pagtoo ha halad han Kristo, mahimo naton magin duok nga sangkay hi Jehova nga Dios ngan magkaada murayaw nga relasyon ha Iya.—Roma 5:1.

11. Ano an papel ni Jesus ha aton mga pag-ampo kan Jehova?

¹¹ Nagpapasalamat kita kan Jehova nga makakag-ampo kita ha iya pinaagi han iya Anak. Hi Jesus an ginagamit ni Jehova basi ihatag an aton mga hangyo. Ginpapamatian ngan ginbabaton ni Jehova an mga pag-ampo ha ngaran ni Jesus. Siring ni Jesus: “Anoman an aroon niyo ha akon ngaran, ihahatag ko ito, basi mahimaya an Amay pinaagi han Anak.”—Juan 14:13, 14.

12. Ano an usa pa nga rason nga pasalamatan hi Jehova ha paghatag han iya Anak?

¹² Ginpapasaylo ni Jehova an aton mga sala tungod han halad-lukat ni Jesus. Iginhuhulagway han Kasuratan hi Jesus sugad nga aton ‘hitaas nga saserdote nga nalingkod ha too han trono han Harangdon ha langit.’ (Heb. 8:1) Hi Jesus an aton ‘parabulig nga kaupod han Amay.’ (1 Juan 2:1) Mapasalamaton gud kita kan Jehova ha paghatag ha aton hin mapinairon nga Hitaas nga Saserdote nga nakakasabot han aton mga kaluyahan ngan “nakikimalooy para ha aton”! (Roma 8:34; Heb. 4:15) Diri kita perpekto, salit kon waray an halad ni Jesus, diri kita makakadaop kan Jehova ha pag-ampo. Sigurado nga mauyon ka nga diri naton bug-os nga maipapahayag an aton pagpasalamat kan Jehova ha presyoso nga regalo nga iya iginhatag ha aton—an iya hinigugma nga Anak!

13. Ha gab-i antes mamatay hi Jesus, paonan-o niya iginpakita nga hinigugma niya an iya mga disipulo?

¹³ Ha gab-i antes mamatay hi Jesus, igin-ampo niya hin maiha an iya mga disipulo ngan ginhangyo an iya Amay nga ‘bantayan hira tungod han usa nga maraot.’ (Juan 17:15) Mahigugmaon gud hi Jesus! Bisan kon maaram hiya nga hirani na hiya mag-antos hinduro, nabaraka la gihapon hiya ha kaopayan han iya mga apostol.

14. Paonan-o naton maipapakita nga hinigugma naton an aton kabugtoan?

¹⁴ Sugad nga pagsubad kan Jesus, diri kita nagpupokus ha aton la kalugaringon nga panginahanglan. Lugod, regular naton nga igin-aampo an aton kabugtoan. Kon ginbubuhat ta ito, ginsusunod naton an sugo ni Jesus nga higugmaon an usa kag usa ngan iginpapakita kan Jehova nga hinigugma gud naton an aton mga igkasi-tumuroo. (Juan 13:34) Diri pagkarag hin panahon an pag-ampo para ha aton kabugtoan. An Pulong han Dios nagsusumat ha aton nga “an pangamuyo han tawo nga matadong may daku gud nga epekto.”—San. 5:16.

15. Kay ano nga kinahanglan han aton mga igkasi-magsiringba an aton mga pag-ampo?

 ¹⁵ Kinahanglan han aton mga igkasi-magsiringba an aton mga pag-ampo kay naatubang hira hin damu nga problema. Puydi kita maghangyo kan Jehova nga buligan hira nga mailob an sakit, kalamidad, girra, pagtimaraot, o iba pa nga kakurian. Puydi ta liwat ig-ampo an kabugtoan nga maduruto nga nabulig ha mga nanginginahanglan. Bangin ikaw mismo may mga kilala nga naatubang hin sugad nga mga pagsari. Kay ano nga diri unabihon an ira ngaran ha imo personal nga mga pag-ampo? Iginpapakita naton an tinuod nga gugma ha aton kabugtoan pinaagi ha paghangyo kan Jehova nga buligan hira nga makailob.

16. Kay ano nga angay naton ig-ampo an mga nangunguna ha aton?

¹⁶ Gin-aapresyar gud han mga nangunguna ha kongregasyon an aton mga pag-ampo ngan nakakabulig ito ha ira. Ito an inabat ni apostol Pablo. Hiya nagsurat: “Pag-ampo liwat kamo para ha akon, nga ihatag unta ha akon an mga pulong kon akon abrihon an akon baba, basi makayakan ako nga maisugon ha pagpahibaro han sagrado nga tinago han maopay nga sumat.” (Efe. 6:19) Yana liwat, damu an maduruto nga mga brother nga nangunguna ha aton. Iginpapakita naton nga hinigugma ta hira kon ginhahangyo naton hi Jehova nga bendisyonan an ira ginbubuhat.

17-18. Ha ano nga mga higayon bangin hangyoon kita nga manguna ha pag-ampo, ngan ano an angay naton hinumdoman?

¹⁷ Usahay, ginhahangyo kita nga manguna ha pag-ampo. Pananglitan, bangin hangyoon han usa nga sister nga nagdudumara hin pag-aram ha Biblia an sister nga kaupod niya nga manguna ha pag-ampo. An partner nga sister bangin diri masyado nakilala ha estudyante, salit bangin maruyag hiya nga ha kataposan na han pag-aram hiya manguna ha pag-ampo. Hito nga paagi, mas maipapahiuyon niya an iya pag-ampo ha panginahanglan han estudyante.

¹⁸ Bangin hangyoon an usa nga brother nga manguna ha pag-ampo ha katirok para ha pagsangyaw o ha katirok han kongregasyon. Angay hinumdoman han mga brother nga may-ada hito nga pribilehiyo kon ano an katuyoan han katirok. An pag-ampo diri dapat gamiton ha pagsagdon ha kongregasyon o ha  paghimo hin mga pahibaro. Ha kadam-an nga katirok, lima ka minuto an igin-gagahin para ha pagkanta ngan pag-ampo, salit an brother nga nangunguna ha pag-ampo diri kinahanglan gumamit hin “damu nga pulong,” labi na ha tinikangan han katirok.—Mat. 6:7.

19. Ano an mabulig ha aton nga magin andam para ha adlaw han paghukom ni Jehova?

¹⁹ Kinahanglan mas iprayoridad pa gud naton ha aton kinabuhi an pag-ampo samtang nagtitikahirani an adlaw han paghukom ni Jehova. Mahitungod hini, hi Jesus nagsiring: “Salit padayon nga magmata, nga nangangamuyo ha ngatanan nga panahon nga maglampos kamo ha pagpalagiw hini ngatanan nga butang nga kinahanglan mahitabo.” (Luc. 21:36) Oo, an padayon nga pag-ampo mabulig ha aton nga makapabilin nga nagmamata ha espirituwal basi diri kita maabtan nga diri andam pag-abot han adlaw han Dios.

20. Paonan-o an aton mga pag-ampo mahimo magin sugad hin mahamot nga insenso?

²⁰ Ano an aton nahisgotan? Gin-aapresyar gud naton an aton pribilehiyo nga mag-ampo. An angay magin nangunguna nga pokus han aton mga pag-ampo amo an mga butang nga direkta nga may kalabotan ha katuyoan ni Jehova. Iginpapasalamat ta liwat an Anak han Dios ngan an iya pagmando ha Ginhadian, ngan igin-aampo ta an aton mga igkasi-magsiringba. Ngan syempre, puydi naton ig-ampo an aton pisikal ngan espirituwal nga panginahanglan. Kon ginhuhunahuna naton hin maopay an aton iyayakan ha aton mga pag-ampo, aton iginpapakita nga gin-aapresyar naton inin daku gud nga pribilehiyo. An aton mga pulong magigin sugad hin mahamot nga insenso kan Jehova—“nakakapalipay ha Iya.”—Prob. 15:8.