1. Ha ano kita makakasiguro, ngan kay ano?

 KON ginkikita mo an mga kahimtang ha kalibotan yana, nakukurian ka ba nga makapabilin nga positibo? Nagtitikawara na an gugma butnga han mga magkapamilya. An kadam-an nga tawo nagigin mas bayolente, makikalugaringon, ngan agresibo. Damu an nakukurian pagtapod ha mga may awtoridad. Pero ini mismo nga mga panhitabo makakakombinse ha imo nga magtitikaopay an mga kahimtang. Kay ano? Kay an ginbubuhat han mga tawo amo gud an ginsiring ha urusahon nga tagna mahitungod ha “kataposan nga mga adlaw.” (2 Tim. 3:1-5) An katumanan hini nga tagna, nga diri gud maninigaran han bisan hin-o nga sinsero nga tawo, nagpapamatuod nga hi Kristo Jesus nagtikang na pagmando sugad nga Hadi han Ginhadian han Dios. Pero usa la ini han damu nga tagna mahitungod ha Ginhadian. Magpaparig-on han aton pagtoo an pagrepaso han iba nga tagna nga natuman hinin naglabay pa la nga mga tuig.

2. Ano an aton hihisgotan hini nga artikulo, ngan kay ano? (Komentuhi an piktyur ha kobre.)

² Hini nga artikulo, aton hihisgotan (1) an usa nga tagna nga nabulig ha aton nga masabtan kon kakan-o naestablisar an Ginhadian, (2) an mga tagna nga nabulig ha aton nga masabtan nga hi Jesus nagin Hadi na han Ginhadian han Dios ha langit, ngan (3) an mga tagna nga nagpapakita kon paonan-o mabubungkag an mga kaaway han Ginhadian han Dios. Masasabtan naton nga ini nga mga tagna konektado ha usa kag usa pariho han ginturugkop nga mga parte han jigsaw puzzle basi makita naton kon ano an hirani na mahitabo uyon ha katuyoan ni Jehova.

3. Ano an iginpapasarig ha aton han tagna ha Daniel 7:13, 14 may kalabotan ha Hadi han Ginhadian han Dios?

³ Ginpapasarig kita han tagna ha Daniel 7:13, 14 nga hi Kristo Jesus an magigin pinakamaopay nga Magmarando han Ginhadian han Dios. An mga tawo tikang ha ngatanan nga nasud malipayon nga ‘mag-aalagad ha iya,’ ngan diri gud hiya sasaliwnan sugad nga Magmarando. May usa pa nga tagna ha libro han Daniel nga nagsusumat nga makakarawat ni Jesus an iya Ginhadian ha kataposan han peryodo nga gintatawag nga pito ka panahon. Posible ba hibaroan kon kakan-o iton makalilipay nga panhitabo?

4. Isaysay kon paonan-o an Daniel 4:10-17 nabulig ha aton nga mahibaroan kon ano nga tuig magigin Hadi an Kristo. (Kitaa liwat an footnote.)

⁴ Basaha an Daniel 4:10-17. An “pito ka panahon” nagrirepresentar ha usa nga peryodo nga 2,520 ka tuig. Nagtikang ito han 607 B.C.E. han gintanggal han mga taga-Babilonya an ultimo nga hadi ha trono ni Jehova ha Jerusalem. Natapos ito han 1914 C.E. han hi Jesus—“an may legal nga katungod”—ginhimo ni Jehova nga magin Hadi han Ginhadian han Dios. *—Ezek. 21:25-27.

5. Ano an usa nga paagi nga makakapahimulos kita ha tagna mahitungod han “pito ka panahon”?

⁵ Paonan-o kita makakapahimulos hini nga tagna? An paghibaro mahitungod han “pito ka panahon” nagpapasarig ha aton nga gintutuman ni Jehova an iya mga saad ha tama nga panahon. Sugad la nga nagtanda hiya hin panahon para ha pag-establisar han iya Ginhadian, sisiguruhon liwat niya nga an ngatanan nga iba pa nga tagna matutuman ha iya itinanda nga panahon. Oo, an adlaw ni Jehova ‘diri maaatrasado!’—Hab. 2:3.

6. (a) Ano an aton nakikita nga ebidensya nga nagmamando na an Kristo ha langit? (b) Paonan-o ini nga ebidensya ginpapamatud-an han tagna ha Pahayag 6:2-8?

⁶ Ha ikatarapos han ministeryo ni Jesus dinhi ha tuna, nagtagna hiya nga may mga panhitabo ha kalibotan nga mabulig ha iya mga sumurunod nga mahibaroan nga nagtikang na hiya pagmando ha langit. Pananglitan, nag-unabi hiya hin mga girra, gutom, ngan linog. Igintagna liwat niya nga magkakaada mga epidemya, o mga sakit, “ha iba-iba nga mga lugar”—ngan usa nga ehemplo hito amo an COVID-19 nga pandemya hinin bag-o la. Ini nga mga panhitabo bahin han gintatawag han Biblia nga “tigaman” han presensya han Kristo. (Mat. 24:3, 7; Luc. 21:7, 10, 11) Sobra 60 ka tuig tikang han namatay ngan binalik ha langit hi Jesus, naghatag hiya kan apostol Juan hin dugang nga pamatuod nga mahitatabo ini nga mga butang. (Basaha an Pahayag 6:2-8.) Ini ngatanan nahitabo tikang han nagin Hadi hi Jesus han 1914.

7. Kay ano nga kairo han tuna han nagin Hadi hi Jesus?

⁷ Kay ano nga nagtikaraot an mga kahimtang ha kalibotan han nagin Hadi hi Jesus? An Pahayag 6:2 naghahatag hin importante nga detalye—an siyahan nga ginbuhat ni Jesus han nagin Hadi hiya amo an makiggirra. Kan kanay? Ha Yawa ngan ha iya mga demonyo. Sumala ha Pahayag kapitulo 12, hito nga girra napirde hi Satanas, ngan hiya ngan an iya mga demonyo iginlabog ha tuna. Tungod han kapungot ni Satanas, nagin puntirya han iya kasina an mga tawo, salit “kairo han tuna.”—Pah. 12:7-12.

8. Paonan-o kita makakapahimulos kon nakikita naton nga natutuman an mga tagna mahitungod ha Ginhadian?

 ⁸ Paonan-o kita makakapahimulos hini nga mga tagna? An mga panhitabo ha kalibotan ngan an klaro nga pagbag-o ha batasan han mga tawo mabulig ha aton nga masabtan nga nagin Hadi na hi Jesus. Salit imbes nga masina kon nakikita naton nga an mga tawo nagigin makikalugaringon ngan waray kalooy, nahinunumdoman naton nga an ira mga buhat katumanan han tagna ha Biblia. Nagmamando na an Ginhadian! (Sal. 37:1) Ngan makakalaom kita nga magtitikagrabe pa an kahimtang ha kalibotan samtang nagtitikahirani an Armagedon. (Mar. 13:8; 2 Tim. 3:13) Mapasalamaton gud kita ha aton mahigugmaon nga Amay ha langit kay ginbubuligan niya kita nga masabtan kon kay ano nga masamok an aton panahon.

9. Paonan-o iginhuhulagway han tagna nga nakarekord ha Daniel 2:28, 31-35 an ultimo nga gahum ha kalibotan, ngan kakan-o ito nagtikang pagmando?

⁹ Basaha an Daniel 2:28, 31-35. Nakikita naton nga natutuman ini nga tagna yana. Iginpakita han inop ni Nabucodonosor an mahitatabo “ha ultimo nga bahin han mga adlaw,” katapos magtikang an pagmando han Kristo. Upod ha magigin mga kaaway ni Jesus dinhi ha tuna amo an ultimo nga gahum ha kalibotan nga igintagna ha Biblia, adton ginsisimbolohan han “puthaw ngan lapok nga mga tiil.” Nagmamando na ini nga gahum ha kalibotan. Inulpot ito ha panahon han Girra ha Kalibotan I han nagin magkaalyado an Britain ngan United States—an gintatawag nga Anglo-Amerikano nga alyansa. Ha inop ni Nabucodonosor mahitungod han  estatwa, may igintagna liwat nga diri maminos duha nga butang parte hini nga gahum ha kalibotan nga magigin iba kay ha nauna nga mga ginhadian.

10. (a) Ano an aton nakikita ha Anglo-Amerikano nga gahum ha kalibotan yana nga igintagna ni Daniel? (b) Ano nga peligro an dapat naton likayan? (Kitaa an kahon nga “ Pag-ikmat ha Lapok!”)

¹⁰ Siyahan, diri pariho han nauna nga mga gahum ha kalibotan nga gin-unabi ha bisyon, an Anglo-Amerikano nga alyansa ginsisimbolohan, diri han puro nga metal sugad han bulawan o silber, kondi han ginhalo nga puthaw ngan lapok. An lapok nagsisimbolo ha “tulin han katawohan,” o ha ordinaryo nga mga tawo. (Dan. 2:43, ftn.) Yana, klaro nga makikita naton nga an ira impluwensya ha mga eleksyon, mga kampanya para ha mga katungod han mga tuminungnong, mga protesta, ngan mga unyon nakakapaluya ha abilidad hini nga gahum ha kalibotan nga ipatuman an mga patakaran hito.

11. Paonan-o an pagmando han Anglo-Amerikano nga Gahum ha Kalibotan nagpaparig-on han aton pagsarig nga nabubuhi na kita ha panahon han kataposan?

¹¹ Ikaduha, sugad han ginsisimbolohan han mga tiil han daku hinduro nga estatwa, an Anglo-Amerika an ultimo nga gahum ha kalibotan nga igintagna ha Biblia. Waray na iba pa nga gobyerno han tawo nga masaliwan hito. Lugod, madagmit nga maabot an kataposan hito ha Armagedon kon bungkagon na ito han Ginhadian han Dios upod han ngatanan nga iba pa nga gobyerno han tawo. *—Pah. 16:13, 14, 16; 19:19, 20.

12. Ano nga dugang nga ebidensya an iginhahatag han tagna ni Daniel nga naghahatag ha aton hin pagliaw ngan paglaom?

¹² Paonan-o kita makakapahimulos hini nga tagna? An tagna ni Daniel naghahatag hin dugang nga ebidensya nga nabubuhi na kita ha panahon han kataposan. Sobra 2,500 ka tuig na an naglabay, igintagna ni Daniel nga katapos han Babilonya, upat pa nga gahum ha kalibotan an magkakaada daku gud nga epekto ha katawohan han Dios. Dugang pa, iginsumat niya nga an Anglo-Amerikano nga Gahum ha Kalibotan an magigin ultimo hito. Naghahatag ini ha aton hin pagliaw ngan paglaom nga diri na maiha, bubungkagon han Ginhadian han Dios an ngatanan nga gobyerno han tawo ngan mamandoan an bug-os nga tuna.—Dan. 2:44.

13. Ano an ginsisimbolohan han “ikawalo nga hadi” ngan han “napulo nga hadi,” nga gin-uunabi ha Pahayag 17:9-12, ngan paonan-o natuman ini nga tagna?

¹³ Basaha an Pahayag 17:9-12. Tungod han daku nga distroso nga resulta han Girra ha Kalibotan I, may nahitabo nga nagtuman han usa pa nga tagna ha Biblia mahitungod ha kataposan nga mga adlaw. Karuyag siguruhon han mga lider ha kalibotan nga magkakaada kamurayawan ha kalibotan. Salit han Enero 1920, gin-establisar nira an League of Nations, nga ginsaliwnan han United Nations han Oktubre 1945. Ini nga organisasyon gintatawag nga “ikawalo nga hadi.” Pero diri ito usa nga gahum ha kalibotan. An pwersa ngan impluwensya hito nakadepende ha mga gobyerno nga nasuporta hito. Ito nga mga gobyerno simboliko nga gintatawag han Biblia nga “napulo nga hadi.”

14-15. (a) Ano an iginsusumat han Pahayag 17:3-5 mahitungod ha “Babilonya nga Gamhanan”? (b) Ano an nahitatabo ha suporta para ha buwa nga relihiyon?

¹⁴ Basaha an Pahayag 17:3-5. Ha usa nga bisyon tikang ha Dios, nakita ni apostol Juan an usa nga hostes, an “Babilonya nga Gamhanan,” nga nagsisimbolo ha imperyo han buwa nga relihiyon ha kalibotan. Paonan-o  natuman ito nga bisyon? An buwa nga mga relihiyon maiha na nga nakikigkooperar ha mga gobyerno ha kalibotan ngan nasuporta hito. Pero diri na maiha, ibubutang ni Jehova ha kasingkasing han mga gobyerno nga “buhaton an iya panhunahuna.” Ano an magigin resulta? Aatakehon hito nga mga gobyerno, han “napulo nga hadi,” an buwa nga mga relihiyon ngan bubungkagon ito.—Pah. 17:1, 2, 16, 17.

¹⁵ Kay ano nga makakasiring kita nga hirani na an kataposan han Babilonya nga Gamhanan? Basi mabaton ito nga pakiana, makakabulig an paghinumdom nga usa nga nakaprotektar han kadaan nga syudad han Babilonya amo an katubigan han daku nga Salog Eufrates. An minilyon nga nasuporta ha Babilonya nga Gamhanan iginpapariho han libro han Pahayag ha nagpuprotektar nga “katubigan.” (Pah. 17:15) Pero iginsusumat liwat hito nga an katubigan ‘mahubas,’ nga nagpapakita nga an imperyo han buwa nga relihiyon ha kalibotan mawawad-an hin damu nga nasuporta hito. (Pah. 16:12) Sugad nga katumanan hito nga tagna, damu nga tawo yana an binaya na ha buwa nga relihiyon ngan ha  iba na hira namimiling hin mga solusyon ha ira mga problema.

16. Paonan-o kita makakapahimulos ha pagsabot han mga tagna mahitungod han kaestablisar han United Nations ngan han kataposan han Babilonya nga Gamhanan?

¹⁶ Paonan-o kita makakapahimulos hini nga mga tagna? An kaestablisar han United Nations ngan an pagtikawara han suporta ha buwa nga relihiyon dugang nga ebidensya nga nabubuhi na kita ha kataposan nga mga adlaw. Bisan kon nahubas an simboliko nga katubigan nga nasuporta ha Babilonya nga Gamhanan, an kataposan han buwa nga mga relihiyon maabot ha iba nga paagi. Sugad han gin-unabi na, ibubutang ni Jehova ha kasingkasing han “napulo nga hadi”—an mga gobyerno nga nasuporta ha United Nations—nga “buhaton an iya panhunahuna.” Tigda nga bubungkagon hito nga mga nasud an buwa nga mga relihiyon, salit makakalasan an kalibotan. * (Pah. 18:8-10) An kabungkag han Babilonya nga Gamhanan makakaapekto gud ha bug-os nga kalibotan ngan mahimo magresulta hin mga kakurian, pero an katawohan han Dios magkakaada diri maminos duha nga rason para magrayhak. Mawawara ha kadayonan inin maiha na nga kaaway ni Jehova nga Dios, ngan hirani na an aton katalwasan tikang hinin maraot nga sistema han mga butang!—Luc. 21:28.

17-18. (a) Paonan-o naton padayon nga mapaparig-on an aton pagtoo? (b) Ano an aton hihisgotan ha sunod nga artikulo?

¹⁷ Igintagna ni Daniel nga “magigin hura an tinuod nga kahibaro.” Ngan nahitabo gud ito! Nasasabtan na naton yana an mga tagna mahitungod ha aton panahon. (Dan. 12:4, 9, 10) Natuman gud ini nga mga tagna salit mas ginrirespeto naton hi Jehova ngan an iya giniyahan nga Pulong. (Isa. 46:10; 55:11) Salit padayon nga parig-ona an imo pagtoo pinaagi han maduruto nga pag-aram han Kasuratan ngan pagbulig ha iba nga magkaada duok nga relasyon kan Jehova. Iya papanalipdan an mga nasarig ha iya hin bug-os, ngan tatagan niya hira hin “nagpapadayon nga kamurayawan.”—Isa. 26:3.

¹⁸ Ha sunod nga artikulo, hihisgotan naton an mga tagna mahitungod ha Kristiano nga kongregasyon ha panahon han kataposan. Sugad han aton mahibabaroan, ito nga mga tagna nagpapamatuod liwat nga nabubuhi na kita ha kataposan nga mga adlaw. Makikita naton an dugang nga ebidensya nga hi Jesus—an aton nagmamando nga Hadi—aktibo nga nangunguna ha iya maunungon nga mga sumurunod.