1. Ano an ginhimo ni Jehova kahuman gud la makasala nira Adan ngan Eva? (Genesis 3:15)

 KAHUMAN gud la makasala nira Adan ngan Eva, hi Jehova naghatag hin paglaom ha ira mga tulin pinaagi hin importante nga tagna. An iya ginyakan nakarekord ha Genesis 3:15.—Basaha.

2. Kay ano nga importante ini nga tagna?

² Ito nga tagna mababasa ha siyahan nga libro han Biblia. Pero ha magkalain-lain nga paagi, an ngatanan nga iba pa nga libro han Biblia konektado hito. Sugad la nga an spine han inimprinta nga libro nagtuturugkop han ngatanan nga pahina hito, an mga pulong nga nakarekord ha Genesis 3:15 nagtuturugkop, siring pa, han sulod han tagsa nga libro han Biblia basi magin uusa an mensahe hito—nga may susugoon nga Paratalwas basi bungkagon an Yawa ngan an ngatanan niya nga magraot nga sumurunod. * Magigin bendisyon gud ito ha mga nahigugma kan Jehova!

3. Ano an aton hihisgotan hini nga artikulo?

³ Hini nga artikulo, babatunon naton an masunod nga mga pakiana mahitungod ha tagna han Genesis 3:15: Hin-o an mga karakter nga gin-uunabi dida hito? Paonan-o natutuman ini nga tagna? Ngan paonan-o kita nakakabenepisyo hito?

4. Hin-o an “halas,” ngan paonan-o kita nahibaro hito?

⁴ An mga karakter nga nakarekord ha Genesis 3:14, 15 amo an usa nga “halas,” an “tulin” han halas, usa nga “babaye,”  ngan an “tulin” han babaye. An Biblia nabulig ha aton nga makilala an tagsa ha ira. * Tikangan ta ha “halas.” An literal nga halas diri makakaintindi ha ginsiring ni Jehova ha garden han Eden. Salit sigurado nga an ginhuhukman ni Jehova usa nga intelihente nga linarang. Hin-o man? Iginpapatin-aw han Pahayag 12:9 kon hin-o ito. Klaro nga iginpapakilala dida hito nga “an orihinal nga halas” amo hi Satanas nga Yawa. Pero hin-o an tulin han halas?

5. Hin-o an tulin han halas?

⁵ Kon an Biblia naghihisgot hin tulin ha simboliko nga paagi, nagtutudlok ito ha mga naghuhunahuna ngan nagbubuhat pariho han ira simboliko nga amay. Salit an tulin han halas amo an espiritu nga mga linarang ngan mga tawo, nga pariho kan Satanas, naato kan Jehova nga Dios ngan nakontra ha iya katawohan. Upod hito an mga anghel nga bumaya ha ira mga toka ha langit ha panahon ni Noe pati an magraot nga tawo nga nagawi pariho han ira amay nga Yawa.—Gen. 6:1, 2; Juan 8:44; 1 Juan 5:19; Jud. 6.

6. Kay ano nga imposible nga hi Eva an “babaye”?

⁶ Sunod, kilalahon ta an “babaye.” Imposible nga hi Eva ito. Kay ano? Pansina an usa la nga rason. An tagna nasiring nga “dudugmukon” han tulin han babaye an ulo han halas. Aton pa la nahisgotan nga an halas amo an espiritu nga linarang nga hi Satanas, ngan waray diri perpekto nga tawhanon nga tulin ni Eva an makakadugmok ha iya. Salit paonan-o hiya mabubungkag?

7. Sugad han iginpapakita ha Pahayag 12:1, 2, 5, 10, hin-o an babaye nga gin-uunabi ha Genesis 3:15?

⁷ Iginsusumat han kataposan nga libro han Biblia kon hin-o an babaye nga gin-uunabi ha  Genesis 3:15. (Basaha an Pahayag 12:1, 2, 5, 10.) Diri ini ordinaryo nga babaye! An bulan aada ha iya mga tiil ngan ha iya ulo may korona nga 12 nga bitoon. Nag-anak hiya hin kakaiba gud nga bata—an Ginhadian han Dios. An Ginhadian langitnon, salit sigurado nga an babaye langitnon liwat. Ginsisimbolohan niya an langitnon nga bahin han organisasyon ni Jehova nga ginkukompwesto han Iya matinumanon nga espiritu nga mga linarang.—Gal. 4:26.

8. Hin-o an nangunguna nga bahin han tulin han babaye, ngan kakan-o hiya nagin sugad hito? (Genesis 22:15-18)

⁸ Ginbubuligan liwat kita han Pulong han Dios nga makilala an nangunguna nga bahin han tulin han babaye. Ini nga tulin kinahanglan tulin ni Abraham. (Basaha an Genesis 22:15-18.) Sugad han ginsiring han tagna, hi Jesus tulin hiton matinumanon nga patriarka. (Luc. 3:23, 34) Pero an tulin kinahanglan mas gamhanan ha tawo kay bubungkagon niya hi Satanas nga Yawa. Salit han mga 30 anyos hi Jesus, gindihogan hiya han baraan nga espiritu. Han gindihogan hi Jesus, nagin nangunguna hiya nga bahin han tulin han babaye. (Gal. 3:16) Katapos han kamatay ngan kabanhaw ni Jesus, ‘ginkoronahan hiya han Dios hin himaya ngan dungog’ ngan gintagan han “ngatanan nga awtoridad ha langit ngan ha tuna,” upod na an awtoridad nga “wad-on an mga buhat han Yawa.”—Heb. 2:7; Mat. 28:18; 1 Juan 3:8.

9-10. (a) Hira hin-o pa an bahin han tulin han babaye, ngan san-o hira nagigin sugad hito? (b) Ano an sunod naton nga rirepasuhon?

⁹ Pero magkakaada ikaduha nga bahin han tulin. Iginpakilala ni apostol Pablo ini nga bahin han tulin han ginsidngan niya an Judio ngan Hentil nga dinihogan nga mga Kristiano: “Kon kamo kanan Kristo, tulin gud kamo ni Abraham, mga manurunod may kalabotan ha usa nga saad.” (Gal. 3:28, 29) Kon gindidihogan ni Jehova an usa nga Kristiano han baraan nga espiritu, ito nga tawo nagigin bahin han tulin han babaye. Salit an tulin ginkukompwesto ni Jesu-Kristo ngan han 144,000 nga iya igkasi-magmarando. (Pah. 14:1) Ginsusubad nira ngatanan an personalidad han ira Amay nga hi Jehova nga Dios.

¹⁰ Yana nga nakilala na naton an mga karakter nga gin-uunabi ha Genesis 3:15, repasuhon ta hin madaliay kon paonan-o hinay-hinay nga gintutuman ni Jehova ini nga tagna ngan kon paonan-o kita nakakabenepisyo.

11. Ano an iginpapasabot han pagsamari ha “tikod” han tulin han babaye?

¹¹ Sumala ha tagna han Genesis 3:15, sasamaran han halas an “tikod” han tulin han babaye. Natuman ito han gin-gamit ni Satanas an mga Judio ngan mga Romano basi patayon an Anak han Dios. (Luc. 23:13, 20-24) Sugad la nga an usa nga may literal nga samad ha tikod temporaryo nga makukurian paglakat, hi Jesus temporaryo liwat nga waray nahimo han patay hiya ha lubnganan ha sulod hin mga tulo ka adlaw.—Mat. 16:21.

12. Paonan-o ngan san-o dudugmukon an ulo han halas?

¹² Para matuman an tagna han Genesis 3:15, hi Jesus diri puydi magpabilin ha lubnganan. Kay ano? Kay sumala ha tagna, dudugmukon han tulin an ulo han halas. Karuyag sidngon, kinahanglan mag-opay an samad ni Jesus ha tikod. Ngan ito gud an nahitabo! Ha ikatulo ka adlaw katapos mamatay hi Jesus, ginbanhaw hiya sugad nga imortal nga espiritu nga linarang. Ha itinanda nga panahon han Dios, bubungkagon ni Jesus hi Satanas. (Heb. 2:14) An mga magmamando kaupod  han Kristo mabulig ha pagbungkag ha ngatanan nga kaaway han Dios—an tulin han halas.—Pah. 17:14; 20:4, 10. *

13. Paonan-o kita nakakabenepisyo ha katumanan hini nga tagna?

¹³ Kon usa ka nga dedikado nga surugoon han Dios, nakakabenepisyo ka ha katumanan hini nga tagna. Hi Jesus kinanhi ha tuna sugad nga tawo. Perpekto nga ginsusubad niya an personalidad han iya Amay. (Juan 14:9) Salit pinaagi ha iya, nakilala naton ngan ginhihigugma hi Jehova nga Dios. Nakakabenepisyo liwat kita ha mga katutdoan ni Jesus ngan ha iya paggiya samtang iya ginpapangunahan an Kristiano nga kongregasyon yana. Gintutdoan kita niya kon paonan-o magkikinabuhi ha paagi nga mabulig ha aton nga makarawat an pag-uyon ni Jehova. Ngan kita ngatanan makakabenepisyo ha kamatayon ni Jesus—an pagsamad han iya tikod. Paonan-o? Han ginbanhaw hi Jesus, iya iginhatag an bili han iya dugo sugad nga perpekto nga halad nga “naglilimpyo ha aton ha ngatanan nga sala.”—1 Juan 1:7.

14. Kay ano nga makakasiring kita nga an igintagna ni Jehova ha Eden waray dayon matuman? Isaysay.

¹⁴ Iginpakita ha ginsiring ni Jehova ha Eden nga malabay anay an panahon antes matuman hin bug-os an tagna. Magkikinahanglan hin panahon nga ig-anak han babaye an iginsaad nga tulin, tirukon han Yawa an iya mga sumurunod, ngan magkaada away (o, kangalas) butnga han duha nga grupo. Nakakabenepisyo kita ha paghibaro mahitungod han tagna kay nagpapahamangno ito ha aton nga an kalibotan nga kontrolado ni Satanas mangangalas ha mga nagsisingba kan Jehova. Ha urhi, gintagan ni Jesus an iya mga disipulo hin puropariho nga pahamangno. (Mar. 13:13; Juan 17:14) Nakita gud naton an katumanan hito nga bahin han tagna, labi na ha naglabay nga 100 ka tuig. Paonan-o?

15. Kay ano nga mas nangangalas pa gud yana an kalibotan ha tulin han babaye, pero kay ano nga waray kita rason nga mahadlok kan Satanas?

¹⁵ Waray pag-iha katapos hi Jesus magin Mesianiko nga Hadi han 1914, hi Satanas ginpaiwas ha langit. Yana, dinhi na la dapit ha tuna an iya gin-gigiosan, ngan naghuhulat hiya han iya kabungkagan. (Pah. 12:9, 12) Pero diri hiya naghuhulat nga waray ginhihimo. Hi Satanas desperado ngan nasisina gud, ngan gin-aatake niya an katawohan han Dios. (Pah. 12:13, 17) Tungod hito, mas nangangalas na gud an kalibotan ha katawohan han Dios. Pero waray kita rason nga mahadlok kan Satanas ngan ha iya mga sumurunod. Lugod, mahimo kita magkaada han pagsarig nga pariho han gin-abat ni apostol Pablo nga nagsurat: “Kon an Dios dapig ha aton, hin-o an makontra ha aton?” (Roma 8:31) Bug-os kita nga makakasarig kan Jehova, kay sugad han aton nahibaroan, natuman na an kadak-an han tagna nga nakarekord ha Genesis 3:15.

16-18. Paonan-o hira Curtis, Ursula, ngan Jessica nakabenepisyo kay nasabtan nira an Genesis 3:15?

¹⁶ An saad ni Jehova ha Genesis 3:15 makakabulig ha aton nga makaya an anoman nga problema nga aton gin-aatubang. Hi Curtis, usa nga misyonero ha Guam, nagsiring: “May mga panahon nga inatubang ako hin magkuri nga sitwasyon nga nagsari han akon debosyon kan Jehova. Pero an pagpamalandong ha tagna ha Genesis 3:15 nakabulig ha akon nga matipigan an akon pagsarig ha akon langitnon nga Amay.” Eksayted hi Curtis ha pag-abot  han adlaw nga tatapuson na ni Jehova an ngatanan nga aton problema.

¹⁷ Hi Ursula, usa nga sister ha Bavaria, nagsiring nga an pakasabot ha Genesis 3:15 nakabulig ha pagkombinse ha iya nga an Biblia giniyahan han Dios. Nakita niya nga an ngatanan nga iba pa nga tagna konektado hini nga tagna, ngan naimpres gud hiya hito. Nagsiring liwat hiya: “Mas ginhigugma ko gud hi Jehova han nahibaroan ko nga may ginbuhat dayon hiya basi mahatagan hin paglaom an katawohan.”

¹⁸ Hi Jessica, nga taga-Micronesia, nagsiring: “Nahinunumdoman ko pa an akon inabat han siyahan ko nga nahibaroan nga nabilngan ko na an kamatuoran! Natutuman na an tagna nga nakarekord ha Genesis 3:15. Nakabulig ito ha akon nga mahinumdoman nga an aton naieksperyensyahan yana diri amo an tinuod nga kinabuhi. Ini nga tagna nagparig-on liwat ha akon pagtoo nga an pag-alagad kan Jehova nagriresulta ha pinakamaopay nga kinabuhi nga akon maieksperyensyahan yana ngan ha mas maopay pa gud nga kinabuhi ha tiarabot.”

19. Kay ano nga makakasarig kita nga matutuman an ultimo nga bahin han tagna?

¹⁹ Sugad han aton nahibaroan, an Genesis 3:15 natutuman na yana. An tulin han babaye ngan an tulin han halas klaro nga iginpakilala. Hi Jesus, an nangunguna nga bahin han tulin han babaye, nag-opay ha iya samad ha tikod ngan yana usa na nga mahimayaon ngan imortal nga Hadi. Hirani na matapos an pagpili han mga nagkukompwesto han ikaduha nga bahin han tulin. Tungod kay natuman na an siyahan nga bahin han tagna, damu gud an aton rason nga sumarig nga matutuman liwat an ultimo nga bahin, an pagdugmok ha ulo han halas. Makakapahuway na gud an matinumanon nga katawohan kon bungkagon na hi Satanas! Samtang diri pa ito naabot, ayaw pag-undang. Masasarigan an aton Dios. Pinaagi han tulin han babaye, maghahatag hiya hin damu gud nga bendisyon ha “ngatanan nga nasud ha tuna.”—Gen. 22:18.