Hi Tatay usa nga elder ha United Church of Canada ha amon lugar, salit kada semana gindudul-ong niya kami han akon manghod nga babaye ha amon Sunday school. Katapos hito, naupod kami ha iya ha alas-11 han aga para magsingba. Ha kulop, naupod kami kan Nanay ha Kingdom Hall. Salit nakikita gud namon an kaibahan hinin duha nga relihiyon.

Iginsumat ni Nanay an iya bag-o nga mga gintotoohan ha iya maiha na nga mga sangkay nga hira Bob ngan Marion Hutcheson, nga kinarawat liwat han kamatuoran. Han 1958, igin-upod ako han mag-asawa nga Hutcheson kaupod an ira tulo nga anak nga lalaki ha walo ka adlaw nga Divine Will International Assembly ha New York City. Kon ginhihinumdom ko adto, nahuhunahuna ko nga diri masayon para ha ira nga ig-upod ako, pero ito nga asembleya usa han pinakamaopay ko nga eksperyensya.

Han tin-edyer ako, nag-ukoy kami ha uma, diin nalilipay ako pag-ataman hin mga hayop. Karuyag ko mag-eskwela ha pagin beterinaryo. Iginsumat ini ni Nanay ha usa nga tigurang han kongregasyon. May pagkabuotan nga ginpahinumdoman niya ako nga nagkikinabuhi na kita ha “kataposan nga mga adlaw” ngan ginpakianhan ako kon ano daw la an magigin epekto han akon pag-eskwela ha unibersidad hin damu ka tuig ha akon relasyon kan Jehova.  (2 Tim. 3:1) Sugad nga resulta, nagdesisyon ako nga diri na umiskwela ha unibersidad.

Naghunahuna la gihapon ako kon ano an akon bubuhaton paggradwar ko ha hayskul. Bisan kon nagsasangyaw ako kada weekend, diri ako nag-i-enjoy ha ministeryo ngan diri ko nakikita an akon kalugaringon sugad nga payunir. Hito nga takna, an akon diri Saksi nga tatay ngan uncle nag-aghat ha akon nga magtrabaho hin bug-os-panahon ha usa nga daku nga insurance company ha Toronto. Hitaas an posisyon ni Uncle didto salit ginkarawat ko an trabaho.

Ha Toronto, pirme ako nag-o-overtime ha trabaho ngan nakakaupod ko an mga diri Saksi. Salit diri ako regular nga nakakaatender ha mga katirok ngan nakakasangyaw. Ha siyahan, naukoy ako ha akon diri Saksi nga lolo, pero kamatay niya kinahanglan ko mamiling hin iba nga mauukyan.

An mag-asawa nga Hutcheson, nga nag-upod ha akon han 1958 nga kombensyon, sugad hin mga kag-anak ko na. Ginpaukoy nira ako ha ira balay ngan ginbuligan nga mag-uswag ha espirituwal. Han 1960, nabawtismohan ako kaupod an ira anak nga hi John. Nagpayunir hi John ngan nakaaghat ito ha akon nga dugangan pa an akon panahon ha ministeryo. Nakita han mga brother an akon pag-uswag ha espirituwal ngan ha urhi gintokahan ako sugad nga Theocratic Ministry School servant. a

Han 1966, ginkasal kami ni Randi Berge, usa nga madasigon nga payunir nga karuyag gud mag-alagad diin mas daku an panginahanglan. An amon nagbibiyahe nga paramangno nagpakita hin personal nga interes ha amon ngan gin-aghat kami nga buligan an kongregasyon ha Orillia, Ontario. Salit nag-impake kami ngan binalhin dayon.

Pag-abot gud namon ha Orillia, nagregular payunir ako basi updan hi Randi. Nakakatapon gud an iya kadasig. Han payunir na ako, naeksperyensyahan ko an kalipay nga magamit an Biblia ngan makita an mga tawo nga nasasabtan ito. Makalilipay gud makabulig ha buotan nga mag-asawa ha Orillia nga maghimo hin mga pagbag-o ha ira kinabuhi ngan magin mga alagad ni Jehova.

Pagbisita ko ha Toronto, nakilala ko hi Arnold MacNamara, nga usa han mga nangunguna ha Bethel. Nagpakiana hiya kon karuyag namon magin espesyal payunir. Binaton dayon ako: “Oo! Basta diri la ha Quebec!” An kabugtoan ha Canada nga nagyayakan hin Ingles may negatibo nga panhunahuna ha kabugtoan nga nagyayakan hin French ha probinsya han Quebec. Ngan naimpluwensyahan ako hito. Hito nga panahon, an mga tawo nagpuprotesta kontra ha gobyerno ngan karuyag nira nga an probinsya han Quebec magin bulag ha Canada.

Hi Arnold nagsiring, “An Quebec la yana an ginpapadad-an han branch hin mga espesyal payunir.” Inuyon dayon ako nga kumadto. Maaram ako nga karuyag ni Randi mag-alagad didto. Ha urhi, nasantop ko nga ini an usa han pinakamaopay namon nga desisyon!

Katapos namon mag-eskwela hin lima ka semana nga French class, kami ni Randi ngan an usa pa nga mag-asawa kinadto ha Rimouski, nga mga 540 ka kilometro ha norte-este han Montreal. Damu pa an kinahanglan namon mahibaroan, ngan napamatud-an namon ito ha usa nga katirok han nagbasa ako hin mga pahibaro. Nagsiring ako nga ha tiarabot namon nga kombensyon, damu an amon “delegado nga ostrich” imbes nga “delegado nga Austrian.”

Ha Rimouski, kami nga upat gin-uupdan han upat nga madasigon nga sister ngan han mag-asawa nga Huberdeau pati na han ira duha nga anak. An mag-asawa nga Huberdeau nagplete hin daku nga balay nga may pito nga kwarto ngan an ngatanan nga payunir nag-aaragmot pagbayad hito. Gintawag namon ito nga White House kay busag an pintura hito ngan han mga harigi. Mga 12 tubtob 14 an naukoy dida hito. Sugad nga mga espesyal payunir, kami ni Randi nagsasangyaw ha aga, ha kulop, ngan ha gab-i. Salit mapasalamaton kami kay pirme may naupod ha amon ha pagsangyaw bisan kon gab-i nga winter.

Nagin duok gud kami hiton magtinumanon nga payunir ngan sugad hin mga kapamilya na namon hira. Usahay, nangangalingkod kami ha palibot han campfire o nag-ieskedyol hin adlaw para maghimo hin mga dumpling nga iba-iba an palaman. An usa nga brother musikero, salit kon Sabado nga gab-i agsob kami magkaranta ngan magsarayaw.

An teritoryo ha Rimouski nagin mabungahon! Ha sulod hin lima ka tuig, nalipay kami nga makita an damu nga Bible study nga nag-uswag ngadto ha pagpabawtismo. Ngan an kongregasyon nagkaada mga 35 nga magwarali.

Ha Quebec, nabansay gud kami hin maopay sugad nga mga ebanghelisador. Naeksperyensyahan namon an pagbulig ha amon ni Jehova ha ministeryo ngan ha amon materyal nga panginahanglan. Dugang pa, nahibaroan namon nga higugmaon an mga tawo nga nagyayakan hin French, an ira linggwahe ngan an ira kultura—ngan nakabulig ito nga higugmaon namon an iba pa nga mga kultura.—2 Cor. 6:13.

Waray namon laumi nga hahangyoon kami han branch nga bumalhin ngadto ha bungto han Tracadie ha este nga baybayon ha New Brunswick. Medyo makuri adto kay bag-o pa la kami nga nakapirma hin kontrata ha pagplete hin apartment ngan may-ada liwat ako kontrata ha akon part-time nga trabaho sugad nga titser ha usa nga eskwelahan. Dugang pa, an pipira han amon mga Bible study bag-o pa la nga mga magwarali ngan hirani na kami matukoran hin bag-o nga Kingdom Hall.

Bug-os nga weekend namon nga igin-ampo an amon pagbalhin ngan ginbisita namon an Tracadie nga iba gud ha Rimouski. Pero nagdesisyon kami nga kumadto kay ito an karuyag ni Jehova. Ginsarihan namon hi Jehova ngan nakita namon kon  paonan-o niya gintanggal an tagsa nga ulang. (Mal. 3:10) Tungod kay hi Randi may marig-on nga espirituwalidad, andam magsakripisyo, ngan mahilig magpatawa, nagin mas masayon an amon pagbalhin.

Usa la an tigurang ha amon bag-o nga kongregasyon, hi Robert Ross. Didto hira nagpapayunir han iya asawa nga hi Linda, ngan nagpabilin la gihap hira didto katapos matawo an ira suhag. Bisan kon may gin-aataman nga bata, nadasig gud kami han ira pagin maabiabihon, determinasyon, ngan pagin madasigon ha ministeryo.

Katapos namon magpayunir ha Tracadie hin duha ka tuig, nakakarawat na liwat kami hin diri ginlalaoman nga surprisa—an imbitasyon nga mag-alagad ha pagbiyahe nga buruhaton. Nag-alagad kami ha Ingles nga sirkito hin pito ka tuig, katapos iginbalhin kami ha French nga sirkito ha Quebec. Ginkukumendasyonan ako ha akon pahayag han amon paramangno han distrito ha Quebec, nga hi Léonce Crépeault. Pero ha kada paghahatag niya ha akon hin kumendasyon napakiana hiya, “Paonan-o an imo pahayag magigin mas praktikal?” b Ini nga personal nga interes nakabulig ha akon nga magpokus kon paonan-o ko hihimoon nga mas espisipiko ngan simple an akon pagtutdo.

Han 1978 nga “Victorious Faith” International Convention ha Montreal nakakarawat ako hin asaynment nga diri ko gud mahingangalimtan. Igintoka ako ha Food Service. Mga 80,000 ka tawo an amon ginlalaoman ngan may bag-o nga kahikayan ha pagpakaon ha ira. Bag-o an ngatanan, an mga garamiton, an menu, ngan an mga paagi ha pag-andam han pagkaon. May-ada kami mga 20 nga dagku nga refrigerator, pero danay diri ito nagana. Antes magtikang an siyahan nga adlaw, diri pa kami puydi sumulod ha stadium tubtob ha katutnga han gab-i basi mangandam kay may-ada pa nagamit hito. Ngan kinahanglan namon paandaron an mga oven antes magpawa para makaluto hin pamahaw! Makapoy gud adto, pero nahibaro ako tikang ha pagin maduruto, hamtong, ngan pagpatawa han akon mga igkasi-boluntaryo. Tungod hito, an amon pagkamagsarangkay nagpapadayon tubtob yana. Makalilipay gud nga maeksperyensyahan inin makasaysayan nga kombensyon ha Quebec, an probinsya diin may duro nga pagtimaraot han dekada han 1940 ngan 1950!

Damu gud an akon nahibaroan tikang ha akon mga igkasi-paramangno ha dagku nga mga kombensyon ha Montreal. May-ada tuig hadto nga hi David  Splane, nga membro na yana han Nagmamando nga Lawas, an amon convention overseer. Ngan ha urourhi nga kombensyon, han igintoka ha akon ito nga asaynment, sinuporta gud hi David.

Han 2011, katapos namon mag-alagad hin 36 ka tuig ha pagbiyahe nga buruhaton, gintokahan ako nga magin instruktor ha School for Congregation Elders. Kinaturog kami ni Randi ha 75 nga iba-iba nga higdaan ha sulod hin duha ka tuig. Pero sulit gud an amon mga sakripisyo. Ha kataposan han tagsa nga semana, mapasalamaton gud an mga tigurang kay inabat nira nga interesado gud an Nagmamando nga Lawas ha ira espirituwalidad.

Ha urhi, nagin instruktor ako ha School for Kingdom Evangelizers. An mga estudyante agsob nga kapoy gud ngan nababaraka tungod han ira busy nga eskedyol. Nagliliningkod hira ha klase hin pito ka oras kada adlaw, naghihimo hin homework hin tulo ka oras kada gab-i, ngan nagpipresenta hin upat o lima nga asaynment kada semana. Kami han usa pa nga instruktor, nagsiring ha ira nga diri nira ito mahihimo kon waray han bulig ni Jehova. Pirme ko nahinunumdoman nga an mga estudyante diri makatoo nga nahimo nira an mas labaw pa kay han ira ginhuhunahuna ha bulig ni Jehova.

An personal nga interes ni Nanay ha iba nakabulig ha iya mga Bible study nga mag-uswag ngan pati kan Tatay nga magbag-o an iya disposisyon ha kamatuoran. Tulo ka adlaw katapos mamatay ni Nanay, nakalasan kami kay inatender hi Tatay ha public talk ha Kingdom Hall ngan nagpadayon hiya ha pag-atender ha mga katirok ha sumunod nga 26 ka tuig. Bisan kon waray mabawtismuhi hi Tatay, ginsumatan ako han mga tigurang nga pirme hiya an siyahan nga naabot ha Kingdom Hall kada semana.

Hi Nanay maopay gud nga ehemplo ha amon nga magburugto. An tanan ko nga tulo nga bugto ngan an ira mga bana matinumanon nga nag-aalagad kan Jehova. An duha ha ira nag-aalagad ha mga branch office—an usa ha Portugal ngan an usa pa ha Haiti.

Yana, nag-aalagad kami ni Randi sugad nga mga espesyal payunir ha Hamilton, Ontario. Han nag-aalagad pa kami ha pagbiyahe nga buruhaton, nalilipay kami nga updan an iba ha ira mga pagbalik-bisita ngan mga Bible study. Pero yana nalilipay kami nga makita an amon mismo mga Bible study nga nag-uuswag ha espirituwal. Ngan han nagin mga sangkay namon an kabugtoan ha amon bag-o nga kongregasyon, nadadasig kami nga makita kon paonan-o hira ginbubuligan ni Jehova ha mag-opay ngan ha magkuri nga kahimtang.

Kon ginhihinumdom namon an naglabay, mapasalamaton gud kami kay damu an nagpapakita ha amon hin personal nga interes. Salit naningkamot kami nga ipahayag an amon sinsero nga kabaraka ha iba ngan gin-aaghat hira nga ighatag kan Jehova an ira pinakamaopay. (2 Cor. 7:6, 7) Pananglitan, may usa nga pamilya nga an asawa, anak nga lalaki, ngan anak nga babaye, aada ha bug-os-panahon nga pag-alagad. Ginpakianhan ko an bana kon nahuhunahuna ba liwat niya nga magpayunir, nagsiring hiya nga hiya an nasuporta ha tulo nga payunir. Salit nagpakiana ako, “Mas labaw ba an maihahatag mo ha ira kay han maihahatag ni Jehova?” Gin-aghat ko hiya nga testingan an pagpayunir. Paglabay hin unom ka bulan nagpayunir hiya.

Padayon nga isusumat namon ni Randi ha “sunod nga henerasyon” an “urusahon nga mga buhat” ni Jehova, ngan naglalaom kami nga mai-enjoy nira an pag-alagad kan Jehova pariho ha amon.—Sal. 71:17, 18.