1-2. Ha ano nga paagi an usa nga Kristiano maipapariho ha usa nga hitaas nga bilding? (1 Corinto 15:58)

 HAN 1978, usa nga 60 ka andana nga bilding an gintukod ha Tokyo, Japan. An mga tawo naghuhunahuna kon paonan-o kakayahon hini nga bilding an agsob nga paglinog hito nga syudad. Ano an sekreto? Gindisenyo han mga engineer nga magin marig-on gud an bilding pero mapauyon-uyon ha mga pagbay-og han tuna. An mga Kristiano pariho hito nga bilding. Ha ano nga paagi?

² An usa nga Kristiano kinahanglan pirme magin balanse ha pagin marig-on ngan pagin mapauyon-uyon. Kinahanglan magin marig-on hiya ngan magin determinado pirme nga sundon an mga balaud ngan mga suruklan ni Jehova. (Basaha an 1 Corinto 15:58.) “Andam [hiya] ha pagsugot” ngan diri nakompromiso. Pero kinahanglan niya magin “makatadunganon” o mapauyon-uyon kon posible o kon ginkikinahanglan. (San. 3:17) An usa nga Kristiano nga may-ada hini nga balanse nga panhunahuna diri magigin sobra kaistrikto ngan diri man liwat konsintidor. Hini nga artikulo, hihisgotan ta kon paonan-o kita mahimo magin marig-on. Mahibabaroan ta liwat an lima nga paagi nga ginagamit ni Satanas basi paluyahon an aton determinasyon ngan kon paonan-o naton maaatohan an iya mga paningkamot.

3. Ano nga mga balaud han Supremo nga Parahatag hin balaud an mababasa ha Buhat 15:28, 29?

³ Sugad nga Supremo nga Parahatag hin balaud, hi Jehova pirme naghahatag hin klaro nga mga balaud ha iya katawohan. (Isa. 33:22) Pananglitan, gin-unabi han siyahan-siglo nga nagmamando nga lawas an tulo nga paagi diin an mga Kristiano kinahanglan magpabilin nga marig-on: (1) pinaagi ha pagsalikway ha idolatriya ngan pagsingba kan Jehova gud la, (2) pinaagi ha pagrespeto ha pagkasagrado han dugo, ngan (3) pinaagi ha pagsunod ha hitaas  nga mga suruklan han Biblia ha moral. (Basaha an Buhat 15:28, 29.) Paonan-o an mga Kristiano yana makakapabilin nga marig-on hini nga tulo nga butang?

4. Paonan-o ta ginhahatag kan Jehova an eksklusibo nga debosyon? (Pahayag 4:11)

⁴ Ginsasalikway naton an idolatriya ngan ginsisingba hi Jehova gud la. Ginsugo niya an mga Israelita nga ihatag ha iya an eksklusibo nga debosyon. (Deut. 5:6-10) Ngan han ginsulay hi Jesus han Yawa, klaro nga ginsiring niya nga hi Jehova gud la an kinahanglan naton singbahon. (Mat. 4:8-10) Salit diri naton ginsisingba an mga imahen. Diri liwat kita nag-iidolo hin mga tawo—mga lider man hira han relihiyon, mga magmarando, o sikat nga mga atleta, artista, o musikero—nga sugad hin mga dios hira. Hi Jehova an aton gindadapigan, ngan an aton gud la ginsisingba “an naglarang han ngatanan nga butang.”—Basaha an Pahayag 4:11.

5. Kay ano nga ginsusunod naton an balaud ni Jehova parte ha pagkasagrado han kinabuhi ngan dugo?

⁵ Ginsusunod naton an balaud ni Jehova parte ha pagkasagrado han kinabuhi ngan dugo. Kay ano? Kay hi Jehova nasiring nga an dugo nagsisimbolo han kinabuhi, usa nga presyoso nga regalo tikang ha iya. (Lev. 17:14) Han siyahan nga gintugotan ni Jehova an mga tawo nga kumaon hin karne han mga hayop, ginsugo niya hira nga diri kaunon an dugo. (Gen. 9:4) Gin-utro niya ini nga sugo han iginhatag niya an Mosaiko nga Balaud ha Israel. (Lev. 17:10) Ngan gin-giyahan niya an siyahan-siglo nga nagmamando nga lawas nga maghatag hin instruksyon ha ngatanan nga Kristiano nga “padayon nga maglikay . . . ha dugo.” (Buh. 15:28, 29) Marig-on nga ginsusunod naton ini nga sugo kon naghihimo kita hin mga desisyon parte ha pagpatambal. b

6. Ano an aton mga ginbubuhat basi masunod an hitaas nga mga suruklan ni Jehova ha moral?

⁶ Ginsusunod gud naton an hitaas nga mga suruklan ni Jehova ha moral. (Heb. 13:4) Gamit an simboliko nga mga pulong, ginsagdonan kita ni apostol Pablo nga ‘patayon’ an mga parte han aton lawas—karuyag sidngon, dapat naton buhaton an ngatanan basi mawara an bisan ano nga sayop nga unudnon nga hingyap. Ginlilikyan ta an pagkinita o pagbuhat hin bisan ano nga magriresulta hin seksuwal nga imoralidad. (Col. 3:5; Job 31:1) Kon naatubang kita hin pagsulay, ginsasalikway dayon naton an paghunahuna o pagbuhat hin bisan ano nga makakadaot han aton pakigsangkay ha Dios.

7. Ano an angay naton magin determinasyon, ngan kay ano?

⁷ Ginlalaoman ni Jehova nga magigin ‘masinugtanon kita hin kinasingkasing.’ (Roma 6:17) An iya mga iginpapabuhat pirme para ha aton kaopayan, ngan diri naton mababag-o an iya mga balaud. (Isa. 48:17, 18; 1 Cor. 6:9, 10) Naniningkamot kita nga lipayon hi Jehova ngan ipakita an disposisyon nga pariho han salmista nga nagsiring: “Nagdesisyon ako nga sugton an imo mga regulasyon ha ngatanan nga panahon, tubtob ha kataposan.” (Sal. 119:112) Pero hi Satanas maniningkamot nga paluyahon an aton determinasyon. Ano nga mga paagi an iya ginagamit?

8. Paonan-o ginagamit ni Satanas an pagtimaraot basi paluyahon an aton determinasyon?

⁸ Pagtimaraot. Ginagamit han Yawa an kamadarahog ngan mga pagpresyur basi paluyahon an aton determinasyon. An iya katuyoan amo an ‘paglamoy’ ha aton, o pagbungkag han aton relasyon kan Jehova. (1 Ped. 5:8) An mga Kristiano ha siyahan nga siglo ginpanarhog, ginpangastigo, ngan ginpamatay tungod han ira determinasyon nga magpabilin nga marig-on.  (Buh. 5:27, 28, 40; 7:54-60) Tubtob yana, ginagamit ni Satanas an pagtimaraot. Nakikita ini ha bayolente nga pagtratar ha aton kabugtoan ha Russia ngan ha iba nga mga nasud ngan ha personal nga mga pag-atake han mga kaaway.

9. Iilustrar kon kay ano nga kinahanglan magbantay ha diri abat nga mga pagpresyur.

⁹ Diri abat nga mga pagpresyur. Labot la han pagtimaraot, ginagamit ni Satanas an “tuso nga mga buhat.” (Efe. 6:11) Pansina an nahitabo ha brother nga hi Bob, nga nahospital kay kinahanglan operahan. Ginsidngan niya an mga doktor nga bisan ano an mahitabo diri gud hiya mapaabuno hin dugo. An doktor nga mag-oopera nagsiring kan Bob nga rirespetuhon an iya desisyon. Pero han gab-i antes han iya operasyon, an anesthesiologist binisita ha iya han inuli na an iya pamilya. Ginsidngan niya hi Bob nga diri nira hiya aabunohan pero mag-aandam la hira hin dugo engkaso pagkinahanglanon ito. Bangin naghuhunahuna an doktor nga magbabag-o hin hunahuna hi Bob kay waray na dida an iya pamilya. Pero hi Bob nagpabilin nga marig-on ngan nagsiring nga diri hiya mapaabuno hin dugo bisan ano an mahitabo.

10. Kay ano nga an tawhanon nga panhunahuna usa nga lit-ag? (1 Corinto 3:19, 20)

¹⁰ Tawhanon nga panhunahuna. Kon kikitaon naton an mga butang ha tawhanon nga panhunahuna, bangin maibalewaray naton hi Jehova ngan an iya mga suruklan. (Basaha an 1 Corinto 3:19, 20.) “An kinaadman hini nga kalibotan” agsob nga nakakaimpluwensya ha mga tawo nga diri sugton an Dios. May mga Kristiano ha Pergamo ngan Tiatira nga naimpluwensyahan han idolatroso ngan imoral nga panhunahuna nga komon hito nga mga syudad. Hi Jesus naghatag hin mapwersa nga sagdon hito nga duha nga kongregasyon tungod han ira pagkonsinter ha seksuwal nga imoralidad. (Pah. 2:14, 20) Yana, naatubang kita hin presyur nga karawaton an sayop nga mga panhunahuna. May mga kapamilya kita ngan kasangkayan nga bangin magsiring ha aton nga sobra kita kaistrikto ngan mag-aghat ha aton nga magkompromiso. Pananglitan, bangin magsiring hira nga diri man importante nga magpabilin nga limpyo ha moral ngan daan na an mga suruklan han Biblia ha moral.

11. Samtang nagpapabilin kita nga marig-on, ano an dapat naton likyan?

¹¹ Usahay, bangin mangatadongan kita nga an mga instruksyon nga iginhahatag ni Jehova diri gud sugad kaklaro. Bangin masulay pa ngani kita nga ‘pasobrahan an mga butang nga nahisurat.’ (1 Cor. 4:6) Ginbuhat ito han mga lider han relihiyon ha panahon ni Jesus. An Balaud ira gindugangan han ira hinimo nga mga surundon nga makuri gud sugton han ordinaryo nga mga tawo. (Mat. 23:4) Hi Jehova naghahatag ha aton hin klaro nga mga instruksyon pinaagi han iya Pulong ngan han iya organisasyon. Waray kita rason nga dugangan an mga instruksyon nga iya iginhahatag. (Prob. 3:5-7) Salit diri kita nagpapasobra ha mga butang nga nahisurat ha Biblia o naghihimo hin mga surundon ha aton kabugtoan parte ha personal nga mga butang.

12. Paonan-o ginagamit ni Satanas an “waray pulos nga panlimbong”?

¹² Panlimbong. Nagamit hi Satanas hin “waray pulos nga panlimbong” ngan hin “basihan nga mga prinsipyo han kalibotan” basi limbongan ngan magkabahin-bahin an mga tawo. (Col. 2:8) Ha siyahan nga siglo, nag-uupod ini han mga pilosopiya nga iginbasar ha tawhanon nga panhunahuna, diri Kasuratanhon nga katutdoan han mga Judio, ngan han katutdoan nga dapat sundon han mga Kristiano an Mosaiko nga Balaud. Ini nga mga ideya naglilimbong ha mga tawo kay ginkukuha hini an atensyon tikang ha tinuod nga gintitikangan han kinaadman, hi Jehova. Yana, ginagamit ni Satanas an media ngan mga social network basi magpasarang hin  waray basihan nga mga impormasyon ngan diri tinuod nga mga balita tikang ha mga lider han politika. Damu an sugad nga buwa nga mga istorya ha panahon han COVID-19 nga pandemya. c An mga Saksi ni Jehova nga namati ha instruksyon nga iginhatag han organisasyon nakalikay ha sobra nga pagkinabaraka nga naeksperyensyahan hadton namati ha buwa nga mga impormasyon.—Mat. 24:45.

13. Kay ano nga dapat kita magbantay nga diri maulang?

¹³ Mga ulang. Kinahanglan magpabilin kita nga pokus ha “mas importante nga mga butang.” (Fil. 1:9, 10) An mga ulang mahimo makakuha hin daku nga panahon ngan kusog nga para unta ha mas mapulsanon nga mga buruhaton. An normal nga mga buruhaton—sugad han pagkaon, pag-inom, pagpahalibway, ngan sekular nga trabaho—mahimo magin ulang kon dida na la kita magpupokus. (Luc. 21:34, 35) Dugang pa, kada adlaw pirme kita nakakabati hin mga balita may kalabotan ha mga protesta ngan mga isyu ha politika. Dapat naton siguruhon nga diri kita maapektohan hini nga mga debate. Kay kon maapektohan kita, bangin may dapigan na kita bisan ha hunahuna la ngan kasingkasing. Ginagamit ni Satanas ini nga gin-unabi na nga mga pamaagi basi paluyahon an aton determinasyon nga buhaton an tama. Hisgotan naton kon paonan-o kita makakaato ha iya mga paningkamot ngan makakapabilin nga marig-on.

14. Ano an makakabulig ha aton nga magpabilin nga marig-on ha pagdapig kan Jehova?

¹⁴ Pamalandonga an imo dedikasyon ngan bawtismo. Ginhimo mo ito nga mga pitad kay karuyag mo dumapig kan Jehova. Hinumdumi kon ano an nakakombinse ha imo nga nabilngan mo na an kamatuoran. Nakilala mo hi Jehova ngan nagkaada ka respeto ngan gugma ha iya sugad nga imo langitnon nga Amay. Nagkaada ka pagtoo ngan napagios nga magbasol. Napagios ka liwat nga bayaan an sayop nga mga buhat ngan magkinabuhi uyon ha kaburut-on han Dios. Naggaan an imo pag-abat han nahibaroan mo nga ginpasaylo ka na han Dios. (Sal. 32:1, 2) Inatender ka ha Kristiano nga mga katirok  ngan nagtikang pagsumat ha iba han mag-opay nga butang nga imo nahibaroan. Sugad nga dedikado ngan bawtismado nga Kristiano, naglalakat ka na yana ha dalan ngadto ha kinabuhi ngan determinado nga magpabilin dida hito.—Mat. 7:13, 14.

15. Kay ano nga mapulsanon an pag-aram ngan pagpamalandong?

¹⁵ Admi an Pulong han Dios ngan pamalandonga ito. Sugad la han kahoy nga makakatindog hin marig-on kon nakagamot hin hilarom, makakapabilin kita nga marig-on kon an aton pagtoo nakagamot hin hilarom ha Pulong han Dios. Samtang natubo an kahoy, an mga gamot hito nagtitikahilarom ngan nagtitikahaluag an pagkanap. Kon nag-aaram kita ngan namamalandong, ginpaparig-on naton an aton pagtoo ngan nagigin mas kombinsido kita nga an mga paagi han Dios an pinakamaopay. (Col. 2:6, 7) Pamalandonga kon paonan-o an kan Jehova instruksyon, giya, ngan proteksyon nakabulig ha iya mga surugoon ha naglabay. Pananglitan, hi Ezekiel namati hin maopay samtang gindidetalye ha iya han anghel an mga sukol han templo ha iya bisyon. Ini nga bisyon nagparig-on kan Ezekiel, ngan naghahatag ito hin praktikal nga mga leksyon kon paonan-o kita magigin masinugtanon ha mga suruklan ni Jehova ha putli nga pagsingba. d (Ezek. 40:1-4; 43:10-12) Kita liwat nagpapahimulos kon naggagahin kita hin panahon ha pag-aram ngan pagpamalandong ha higlarom nga mga butang ha Pulong han Dios.

16. Paonan-o an marig-on nga kasingkasing nagpanalipod kan Bob? (Salmo 112:7)

¹⁶ Kultibara an marig-on nga kasingkasing. Hi Hadi David nagsiring nga diri gud niya wawad-on an iya gugma kan Jehova han hiya nagkanta: “An akon kasingkasing marig-on, O Dios.” (Sal. 57:7) Kita liwat mahimo magkaada marig-on nga kasingkasing nga bug-os nga nasarig kan Jehova. (Basaha an Salmo 112:7.) Pansina kon paonan-o ini nakabulig kan Bob nga gin-unabi kanina. Han ginsumatan hiya nga may iaandam nga dugo engkaso pagkinahanglanon ito, nagsiring dayon hiya nga kon may posibilidad nga abunohan hiya hin dugo mabaya dayon hiya ha hospital. Ha urhi, hi Bob nagsiring: “Waray gud ako mag-alang ngan mabaraka.”

17. Ano an aton mahibabaroan ha eksperyensya ni Bob? (Kitaa liwat an piktyur.)

 ¹⁷ Hi Bob nagin marig-on kay naghimo na hiya hin desisyon nga diri magkompromiso maiha pa antes hiya magpaopera. Siyahan, karuyag niya lipayon hi Jehova. Ikaduha, gin-adman niya hin maopay kon ano an ginsisiring han Biblia ngan han mga publikasyon nga basado ha Biblia parte ha pagkasagrado han kinabuhi ngan dugo. Ikatulo, kombinsido hiya nga an pagsunod ha instruksyon ni Jehova magriresulta hin nagpapadayon nga kapulsanan. Kita liwat mahimo magkaada marig-on nga kasingkasing anoman nga problema an bangin naton atubangon.

18. Paonan-o an ehemplo ni Barak nagtututdo ha aton nga sumarig kan Jehova? (Kitaa an piktyur ha kobre.)

¹⁸ Sarig kan Jehova. Pansina kon paonan-o naglampos hi Barak tungod han pagsarig ha instruksyon ni Jehova. Hito nga panahon, an mga Israelita diri andam pakiggirra. Waray ngani hira mga armas. Pero ginsugo ni Jehova hi Barak nga makiggirra ha armado nga kasundalohan han Canaan ngan han ira lider nga hi Sisera. (Huk. 5:8) Ginsidngan ni propetisa Debora hi Barak nga lumugsad ha kapatagan basi tapoon hi Sisera ngan an iya 900 nga karuwahe. Bisan kon pabor ha mga karuwahe an pakiggirra ha kapatagan, sinugot hi Barak. Samtang nalugsad tikang ha Bukid Tabor an mga sundalo, nagpabunok hi Jehova. An mga karuwahe ni Sisera nanhilubong ha lapok, ngan gintagan ni Jehova hin kadaogan hi Barak. (Huk. 4:1-7, 10, 13-16) Ha pariho nga paagi, tatagan kita ni Jehova hin kadaogan kon sumarig kita ha iya ngan ha instruksyon nga iya iginhahatag pinaagi han iya mga representante.—Deut. 31:6.

19. Kay ano nga karuyag mo magpabilin nga marig-on?

¹⁹ An aton paningkamot nga magpabilin nga marig-on magpapadayon samtang nabubuhi pa kita hini nga sistema han mga butang. (1 Tim. 6:11, 12; 2 Ped. 3:17) Hinaot magin determinado kita nga diri magpaapekto han pagtimaraot, diri abat nga pagpresyur, tawhanon nga panhunahuna, panlimbong, ngan mga ulang. (Efe. 4:14) Lugod, magin marig-on kita ngan pirme higugmaon hi Jehova ngan sundon an iya mga sugo. Pero dapat liwat magin makatadunganon kita. Ha sunod nga artikulo, aton hihisgotan kon paonan-o hi Jehova ngan hi Jesus nagpakita hin perpekto nga ehemplo han pagkamakatadunganon.