1. Ano nga mga kamatuoran an imo nahibaroan han nagtikang ka pag-aram han Biblia?

 NAHINUNUMDOMAN mo ba han nagtitikang ka pa la ha pag-aram han Biblia? Bangin nahipausa ka han nahibaroan mo nga may ngaran an Dios. Bangin nawara an imo kahadlok han nahibaroan mo nga diri ngay-an ginpapasakitan han Dios an mga tawo ha impyerno. Ngan posible nga nalipay ka han paglaom nga makita utro an imo mga hinigugma nga namatay na ngan mabuhi upod nira ha paraiso nga tuna.

2. Labot la han imo nahibaroan nga mga kamatuoran ha Biblia, ano pa nga pag-uswag an imo ginhimo? (Efeso 5:1, 2)

² Han padayon ka nga nag-aram ha Pulong han Dios, mas naghilarom an imo gugma kan Jehova. Ito nga gugma nagpagios ha imo nga iaplikar an imo nahibaroan. Nakahimo ka hin mas maopay nga mga desisyon nga basado ha mga prinsipyo han Biblia. Nahibaro ka ha paghunahuna ngan pagbuhat han tama nga butang kay karuyag mo nga mapalipay an Dios. Pariho han bata nga nagsusubad han iya mahigugmaon nga kag-anak, ginsusubad mo an imo langitnon nga Amay.—Basaha an Efeso 5:1, 2.

3. Ano an mahimo ta igpakiana ha aton kalugaringon?

³ Mahimo ta pakianhan an aton kalugaringon: ‘Mas hinigugma ko ba hi Jehova yana kay han bag-o pa la ako nga Kristiano? Tikang han nabawtismohan ako, an akon ba panhunahuna ngan panggawi mas nagin pariho han kan Jehova—labi na an akon pagpakita hin gugma ha kabugtoan?’ Kon “an imo gugma ha tinikangan” nagtugnaw, ayaw panluya. May puropariho nga nahitabo ha siyahan-siglo nga mga Kristiano. Waray hira isalikway ni Jesus, ngan diri liwat kita niya isasalikway. (Pah. 2:4, 7) Maaram hiya nga maibabalik ta an gugma nga aton inabat han bag-o pa la kita nga nahibaro han kamatuoran.

4. Ano an aton hihisgotan hini nga artikulo?

 ⁴ Hihisgotan hini nga artikulo kon paonan-o ta padayon nga mapapatubo an aton gugma kan Jehova ngan ha iba. Katapos, mahibabaroan ta an pipira nga bendisyon nga mapapahimulsan naton ngan han iba kon paririg-unon ta an aton gugma.

5-6. Ano nga mga problema an gin-atubang ni apostol Pablo ha iya ministeryo, pero ano an nagpagios ha iya nga padayon nga mag-alagad kan Jehova?

⁵ Napahimulsan ni apostol Pablo an malipayon nga kinabuhi ha pag-alagad kan Jehova, pero damu an iya gin-atubang nga problema. Kasagaran nga higrayo an mga ginbibiyahe ni Pablo, ngan diri gud masayon an pagbiyahe hadto nga panahon. Ha iya mga pagbiyahe, nakaeksperyensya hiya hin “mga peligro ha mga salog” ngan hin “mga peligro ha mga tulisan.” May mga panahon liwat nga ginkastigo hiya han mga nakontra ha iya. (2 Cor. 11:23-27) Ngan may mga panahon nga waray apresyara han Kristiano nga kabugtoan ni Pablo an iya sinsero nga paningkamot ha pagbulig ha ira.—2 Cor. 10:10; Fil. 4:15.

⁶ Ano an nakabulig kan Pablo nga padayon nga mag-alagad kan Jehova? Hi Pablo nahibaro gud parte ha personalidad ni Jehova tikang ha Kasuratan ngan ha iya mga eksperyensya. Kombinsido hi Pablo nga hinigugma hiya ni Jehova nga Dios. (Roma 8:38, 39; Efe. 2:4, 5) Ngan ginhigugma gud niya hi Jehova. Ginpakita niya an iya gugma kan Jehova “pinaagi ha pagserbi ngan padayon nga pagserbi ha mga baraan.”—Heb. 6:10.

7. Ano an usa nga paagi nga mapapatubo ta an aton gugma kan Jehova?

⁷ Mapapatubo ta an aton gugma ha Dios pinaagi ha maduruto nga pag-aram han iya Pulong. Samtang ginbabasa mo an Biblia, hunahunaa kon ano an iginpapakita han tagsa nga teksto mahitungod kan Jehova. Pakianhi an imo kalugaringon: ‘Paonan-o ini nga rekord nagpapakita nga hinigugma ako ni Jehova? Ano nga mga rason an iginhahatag hini ha akon basi higugmaon hi Jehova?’

8. Kay ano nga an pag-ampo makakabulig ha aton nga mapatubo an aton gugma ha Dios?

⁸ An usa pa nga paagi nga mapapatubo ta an aton gugma kan Jehova amo an regular nga pag-ampo ngan pagsumat ha iya han aton inaabat. (Sal. 25:4, 5) Ngan hi Jehova naman mabaton ha aton mga pag-ampo. (1 Juan 3:21, 22) Hi Khanh, usa nga sister ha Asia, nagsiring: “Ha siyahan, an akon gugma kan Jehova nakabase ha kahibaro, pero naghilarom ito han nakita ko kon paonan-o niya ginbabaton an akon mga pag-ampo. Nagpagios ini ha akon nga buhaton an mga butang nga nakakapalipay ha iya.” b

9. Paonan-o iginpakita ni Timoteo nga nag-uuswag hiya ha pagpakita hin gugma?

⁹ Paglabay hin pipira ka tuig katapos ni Pablo magin Kristiano, nakilala niya an maopay nga batan-on nga hi Timoteo. Hinigugma ni Timoteo hi Jehova ngan an mga tawo. Ginsidngan ni Pablo an mga taga-Filipos: “Waray ako iba nga masusugo nga pariho [kan Timoteo] an disposisyon, nga tinuod nga manginginano han iyo mga panginahanglan.” (Fil. 2:20) Waray dinhi magkomento hi Pablo mahitungod han abilidad ni Timoteo ha pag-organisar o sugad nga mamumulong ha publiko, pero sigurado nga naimpres hi Pablo han gugma ni Timoteo ha kabugtoan. Sigurado nga ginpapamulat gud han mga kongregasyon an mga pagbisita ni Timoteo.—1 Cor. 4:17.

10. Paonan-o iginpakita ni Anna ngan han iya bana an ira gugma ha kabugtoan?

¹⁰ Kita liwat namimiling hin mga paagi nga mabuligan an aton Kristiano nga kabugtoan.  (Heb. 13:16) Pansina an eksperyensya ni Anna, nga gin-unabi ha naglabay nga artikulo. Kahuman han makusog nga bagyo, ginbisita niya ngan han iya bana an usa nga Saksi nga pamilya ngan nakita nira nga an atop han balay han pamilya naruba. Salit an pamilya waray maisusul-ot nga malimpyo nga bado. Hi Anna nagsiring: “Ginkuha namon an ira mga bado, ginlabhan, ngan iginbalik ha ira nga nakaplantsa na ngan nakapilo. Para ha amon waray la adto, pero nagresulta ito hin duok nga pagkamagsarangkay nga nagpapabilin nga marig-on tubtob yana.” An gugma ni Anna ngan han iya bana ha kabugtoan nagpagios ha ira nga maghatag hin praktikal nga bulig.—1 Juan 3:17, 18.

11. (a) Ano an agsob abaton han iba kon ginpapakita naton nga hinigugma ta hira? (b) Sumala ha Proberbios 19:17, ano an ginbubuhat ni Jehova kon nagpapakita kita hin gugma?

¹¹ Kon ginpapakita naton an gugma ngan pagkabuotan ha iba, agsob nga nakikita nira an aton mga paningkamot nga masubad an kan Jehova panhunahuna ngan buhat. Ngan bangin apresyaron nira an aton pagkabuotan labaw pa han aton ginlalaoman. Nahinunumdoman ni Khanh, nga gin-unabi kanina, an mga binulig ha iya. Hiya nagsiring: “Mapasalamaton gud ako ha tanan nga mahigugmaon nga sister nga igin-upod ako ha pagsangyaw. Ginkukuha nira ako, gin-iimbitar nga mag-isnak o maniudto, ngan gindudul-ong ha balay. Yana nasantop ko nga daku ngay-an adto nga paningkamot. Ngan ginbuhat nira ito nga may gugma.” Syempre, diri ngatanan nga aton ginbubuligan magpapasalamat. Hi Khanh may ginsiring parte ha mga binulig ha iya: “Karuyag ko unta balosan an ira pagkabuotan, pero diri ako maaram kon diin hira naukoy. Kondi hi Jehova maaram, ngan gin-aampo ko nga balosan niya hira para ha akon.” Tama hi Khanh. Nakikita gud ni Jehova bisan an pinakaguti nga buhat han pagkabuotan nga aton iginpapakita ha iba. Ginhuhunahuna  niya ito sugad nga presyoso nga halad ngan sugad nga utang nga iya gud babaydan.—Basaha an Proberbios 19:17.

12. Paonan-o maipapakita han mga brother an ira gugma ha kongregasyon? (Kitaa liwat an mga piktyur.)

¹² Kon usa ka nga brother, paonan-o ka makakapakita hin gugma ha iba ngan makakabulig ha ira? An batan-on nga brother nga hi Jordan nagpakiana ha tigurang kon ano pa an iya mahihimo para makabulig ha kongregasyon. Ginkumendasyonan hiya han tigurang han pag-uswag nga iya na nahimo ngan ginsidngan hiya kon ano pa an iya mahihimo. Pananglitan, ginsagdonan niya hi Jordan nga umabot hin temprano ha Kingdom Hall ngan abiabihon an iba, magkomento ha katirok, regular nga magsangyaw kaupod an iya grupo, ngan mamiling hin praktikal nga mga paagi nga buligan an iba. Han gin-aplikar ni Jordan ini nga sagdon, diri la kay nahibaro hiya hin bag-o nga mga skill kondi napatubo liwat niya an iya gugma ha iya kabugtoan. Nahibaroan ni Jordan nga kon nagigin ministeryal nga surugoon an usa nga brother, diri kay dida pa la hiya magtitikang pagbulig ha iba; lugod, padayon niya hira nga ginbubuligan.—1 Tim. 3:8-10, 13.

13. Paonan-o an gugma nagpagios kan Christian nga magin kwalipikado utro nga tigurang?

¹³ Ano man kon usa ka nga ministeryal nga surugoon o tigurang hadto? Nahinunumdoman ni Jehova an imo mga ginhimo han naglabay ngan an gugma nga nagpagios ha imo nga buhaton ito. (1 Cor. 15:58) Nakikita liwat niya an gugma nga padayon mo nga ginpapakita. An brother nga hi Christian nasubo han gintanggal hiya sugad nga tigurang. Pero hiya nagsiring: “Nagdesisyon ako nga buhaton an ngatanan nga akon mahihimo ha pag-alagad kan Jehova tungod han gugma—may mga pribilehiyo man o waray.” Ha urhi, nabalik hiya sugad nga tigurang. Hi Christian nagsiring: “Nababaraka ako nga magin tigurang utro. Pero nahunahuna ko  nga kon karuyag ni Jehova nga magin tigurang ako utro, tutumanon ko ito tungod han akon gugma ha iya ngan ha akon kabugtoan.”

14. Ano an imo nahibaroan ha ginsiring han sister nga taga-Georgia?

¹⁴ An mga surugoon ni Jehova nagpapakita liwat hin gugma ha ira mga igkasi-tawo. (Mat. 22:37-39) Pananglitan, hi Elena, usa nga sister ha nasud han Georgia, nagsiring: “Ha siyahan, an nagpapagios la ha akon nga magsangyaw amo an akon gugma kan Jehova. Pero samtang nagtutubo an akon gugma ha akon langitnon nga Amay, nagtutubo liwat an akon gugma ha mga tawo. Naningkamot ako nga hunahunaon kon ano nga mga problema an ira gin-aatubang ngan kon ano nga topiko an mahimo makabantad ha ira kasingkasing. Samtang mas ginhuhunahuna ko an mahitungod ha ira hini nga paagi, mas karuyag ko nga buligan hira.”—Roma 10:13-15.

15-16. Sugad han iginpapakita han mga piktyur, ano nga mga bendisyon an aton mapapahimulsan kon iginpapakita naton an gugma ha iba?

¹⁵ Kon iginpapakita naton an gugma ha aton kabugtoan, diri la hira an nagpapahimulos. Han nagtikang an COVID-19 nga pandemya, ginbuligan han brother nga hi Paolo ngan han iya asawa an damu nga edaran nga sister ha paggamit han ira gadyet para makasangyaw. An usa nga sister nga nakurian anay ha paggamit han iya gadyet, ha urhi nahibaro gihap. Nagamit niya ito ha pag-imbitar han iya mga paryente ha Memoryal. Saisenta ha ira an umatender  pinaagi hin videoconference! An sister ngan an iya mga paryente nagpahimulos tungod han mga pangalimbasog ni Paolo ngan han iya asawa. Ha urhi, nagsurat an sister kan Paolo: “Salamat ha pagtutdo ha amon nga mga edaran. Diri ko gud mangangalimtan an kan Jehova gugma ngan an imo paningkamot ha pagbulig.”

¹⁶ An mga eksperyensya nga pariho hini nagtutdo kan Paolo hin importante nga leksyon. Napahinumdoman hiya nga an gugma mas importante kay han kahibaro o abilidad. Nahinumdoman niya: “Hadto, usa ako nga paramangno han sirkito. Yana, nasantop ko nga bisan kon nakalimtan na han kabugtoan an akon mga pahayag, nahinunumdoman la gihap nira an akon praktikal nga bulig ha ira.”

17. Hin-o pa an magpapahimulos kon nagpapakita kita hin gugma?

¹⁷ Kon nagpapakita kita hin gugma ha iba, nagpapahimulos kita ha diri ginlalaoman nga mga paagi. Napamatud-an ini ni Jonathan nga taga-New Zealand. Ha usa nga mapaso nga kulop han Sabado, nakita niya an usa nga payunir nga nagsasangyaw ha ligid han kalsada. Nagdesisyon hi Jonathan nga updan an payunir ha pagsangyaw ha kada Sabado han kulop. Waray niya mahunahuna kon ano kadaku an magigin epekto ha iya hini nga buhat han pagkabuotan. “Hito nga takna han akon kinabuhi,” siring ni Jonathan, “diri ako nag-i-enjoy ha pagsangyaw. Pero samtang ginpapamatian ko an paagi han pagsangyaw han payunir ngan han nakita ko kon ano kamabungahon an iya ministeryo, nagtikang na ako mag-enjoy hini nga buruhaton. Nagkaada liwat ako maopay nga sangkay nga binulig ha akon nga magtubo ha espirituwal, ma-enjoy an ministeryo, ngan mas magin duok pa kan Jehova.”

18. Ano an karuyag ni Jehova nga himoon naton?

¹⁸ Karuyag ni Jehova nga magtubo an aton gugma ha iya ngan ha iba. Sugad han aton nahibaroan, mapaparig-on ta an aton gugma kan Jehova pinaagi han pagbasa ha iya Pulong ngan pagpamalandong hito ngan pinaagi han pirme pakiistorya ha iya ha pag-ampo. Mapapatubo ta an aton gugma ha kabugtoan pinaagi ha pagbulig ha ira ha praktikal nga mga paagi. Samtang nagtutubo an aton gugma, mas magigin duok kita kan Jehova ngan ha aton espirituwal nga pamilya. Ngan mai-enjoy ta ito nga pagkamagsarangkay ha waray kataposan!