1. Ha ano nga paagi an mga Kristiano pariho hin kahoy? (Kitaa liwat piktyur.)

 “DIRI mababari han hangin an kahoy nga nagpapauyon-uyon.” Ini nga puplunganon nagpapakita han usa nga importante nga kalidad nga nabulig ha pipira nga mga kahoy nga padayon nga tumindog: an pagin mapauyon-uyon. Basi magpabilin nga malipayon ha pag-alagad kan Jehova, an mga Kristiano dapat magin mapauyon-uyon. Paonan-o? Kinahanglan magin makatadunganon kita pinaagi ha pagin mapauyon-uyon kon nagbabag-o an aton kahimtang ngan pinaagi ha pagrespeto ha panhunahuna ngan desisyon han iba.

2. Ano nga mga kalidad an mabulig ha aton nga makapahiuyon kon nagbabag-o an kahimtang, ngan ano an aton hihisgotan hini nga artikulo?

² Sugad nga mga surugoon ni Jehova, karuyag naton nga magin makatadunganon. Karuyag liwat naton magin mapainubsanon ngan mapinairon. Hini nga artikulo, hibabaroan naton kon paonan-o ini nga mga kalidad nakabulig ha pipira nga Kristiano nga makapahiuyon ha mga pagbag-o han kahimtang. Hibabaroan liwat naton kon paonan-o makakabulig ha aton ini nga mga kalidad. Pero hisgotan anay naton an perpekto nga susbaranan ni Jehova ngan ni Jesus ha pagin makatadunganon.

3. Paonan-o kita nahibaro nga makatadunganon hi Jehova?

³ Hi Jehova gintatawag nga “an Bato” kay marig-on hiya ngan diri nababantad. (Deut. 32:4) Pero makatadunganon liwat hiya. Samtang nagbabag-o an kahimtang hini nga kalibotan, an aton Dios padayon nga nagpapahiuyon basi matuman an iya katuyoan. Ginlarang kita ni Jehova uyon ha iya dagway, salit may abilidad kita nga makapahiuyon kon nagbabag-o an mga kahimtang.  Naghatag hiya hin klaro nga mga prinsipyo ha Biblia nga nabulig ha aton nga makahimo hin maaramon nga mga desisyon anoman nga mga problema an bangin naton atubangon. An ehemplo ni Jehova ngan an mga prinsipyo nga iya iginhatag ha aton nagpapakita nga bisan kon hiya “an Bato,” makatadunganon liwat hiya.

4. Paghatag hin ehemplo han pagin makatadunganon ni Jehova. (Levitico 5:7, 11)

⁴ An mga paagi ni Jehova perpekto ngan makatadunganon. Makonsiderasyon hiya ha mga tawo. Tagda pananglitan kon paonan-o hi Jehova nagin makatadunganon ha mga Israelita. Waray niya obligara an ngatanan nga maghalad hin parapriho, riko man o pobre. Ha pipira nga kahimtang, gintugotan niya an kada tagsa nga maghalad uyon ha iya maaakos.—Basaha an Levitico 5:7, 11.

5. Paghatag hin ehemplo han pagin mapainubsanon ngan mapinairon ni Jehova.

⁵ An pagin mapainubsanon ngan mapinairon ni Jehova nagpagios ha iya nga magin makatadunganon. Pananglitan, nakita an pagin mapainubsanon ni Jehova han hirani na niya bungkagon an magraot nga mga tawo ha Sodoma. Pinaagi han iya mga anghel, ginsidngan ni Jehova an matadong nga hi Lot nga pumalagiw ngadto ha kabukiran. Hi Lot nahadlok pagkadto. Salit naghangyo hiya nga hiya ngan an iya pamilya tugotan nga kumadto ha Zoar, usa nga gutiay nga bungto nga ginhukman na nga bungkagon. Puydi unta obligaron ni Jehova hi Lot nga sundon kon ano gud an iya instruksyon. Pero gintugotan ni Jehova hi Lot nga kumadto ha Zoar ngan waray niya bungkaga ito nga bungto. (Gen. 19:18-22) Paglabay hin damu ka siglo, nagpakita hi Jehova hin pagpaid ha mga umurukoy han Nineve. Ginsugo niya hi propeta Jonas nga ipasamwak an tiarabot nga kabungkagan han syudad ngan han magraot nga umurukoy hito. Pero han nagbasol an mga taga-Nineve, ginpasaylo hira ni Jehova ngan waray bungkaga an syudad.—Jon. 3:1, 10; 4:10, 11.

6. Iilustrar kon paonan-o ginsubad ni Jesus an pagin makatadunganon ni Jehova.

⁶ Ginsubad ni Jesus an pagin makatadunganon ni Jehova. Ginsugo hiya nganhi ha tuna basi magsangyaw ha “nagkawawara nga mga karnero han panimalay ni Israel.” Pero nagin makatadunganon hiya ha pagtuman hito nga toka. Pananglitan, usa nga diri Israelita nga babaye an nakimalooy kan Jesus nga tambalon an iya anak nga “nag-aantos gud tungod kay ginsaniban hin demonyo.” May pagpaid nga gintuman ni Jesus an hangyo han babaye ngan gintambal an iya anak. (Mat. 15:21-28) Ini an usa pa nga ehemplo. Ha tinikangan han ministeryo ni Jesus, hiya nagsiring: “An bisan hin-o nga nagsasalikway ha akon . . . , isasalikway ko liwat.” (Mat. 10:33) Pero ginsalikway ba niya hi Pedro, nga ginnigar hiya hin tulo nga beses? Waray. Ginkonsiderar ni Jesus an pagbasol ngan pagtoo ni Pedro. Han nabanhaw hi Jesus, nagpakita hiya kan Pedro ngan posible nga ginpasarig niya hi Pedro han iya pagpasaylo ngan gugma.—Luc. 24:33, 34.

7. Uyon ha Filipos 4:5, ano an karuyag naton nga magin reputasyon ta ha iba?

 ⁷ Hinbaroan naton nga hi Jehova nga Dios ngan hi Jesu-Kristo makatadunganon. Kumusta man kita? Hi Jehova naglalaom nga magigin makatadunganon kita. (Basaha an Filipos 4:5.) Ini an siring han usa pa nga hubad hini nga teksto: “Magkaada reputasyon han pagin makatadunganon.” Mahimo ta pakianhan an aton kalugaringon: ‘Kilala ba ako nga makatadunganon, mapauyon-uyon, ngan diri ginpipirit an karuyag? O kilala ako nga sobra kaistrikto, masakit manyakan, o matig-a an ulo? Ginpipirit ko ba nga buhaton han iba an mga butang nga ginhuhunahuna ko nga tama? O namamati ako ha ira ngan ginsusunod hira kon angayan?’ Kon mas makatadunganon kita, mas masusubad naton hi Jehova ngan hi Jesus. Hisgotan ta an duha nga sitwasyon diin importante an pagkamakatadunganon—kon nagbabag-o an aton kahimtang ngan kon an panhunahuna ngan desisyon han iba diri pariho han ha aton.

8. Ano an mabulig ha aton nga magin makatadunganon kon nagbabag-o an aton kahimtang? (Kitaa liwat an footnote.)

⁸ An pagin makatadunganon nag-uupod han pagin mapauyon-uyon kon nagbabag-o an aton kahimtang. Ito nga mga pagbag-o mahimo magresulta hin diri ginlalaoman nga mga problema. Bangin tigda kita nga magkasakit. O an tigda nga pagbag-o ha ekonomiya o ha gobyerno diin kita naukoy bangin magpakuri gud han aton kinabuhi. (Ecles. 9:11; 1 Cor. 7:31) Bisan an pagbag-o hin teokratiko nga toka mahimo magsari ha aton. Anoman an magin problema, makakapahiuyon kita ha bag-o nga mga kahimtang kon bubuhaton ta inin upat nga butang: (1) karawta an reyalidad, (2) hunahunaa an tiarabot, (3) pagpokus ha positibo, ngan (4) buligi an iba. b Hisgotan ta kon paonan-o nakapahimulos an pipira nga kabugtoan ha pagbuhat hini nga mga butang.

9. Ano an ginbuhat han mag-asawa nga misyonero basi makaya an diri ginlalaoman nga mga problema?

⁹ Karawta an reyalidad. Hira Emanuele ngan Francesca gin-asayn nga mga misyonero ha iba nga nasud. Han nagtitikang pa la hira mag-aram han linggwahe ngan makilala an kabugtoan ha ira bag-o nga kongregasyon, nagtikang liwat an COVID-19 nga pandemya salit kinahanglan nira ibulag an ira kalugaringon. Katapos, tigda nga namatay an nanay ni Francesca. Karuyag gud niya nga makaupod an iya pamilya, pero diri hiya puydi magbiyahe tungod han pandemya. Ano an nakabulig ha iya nga makaya ini nga mga kakurian? Siyahan, hira Emanuele ngan Francesca nag-ampo para hin kinaadman nga makaya nira an adlaw-adlaw nga mga problema ngan diri sobra nga magkinabaraka. Ginbaton ni Jehova an ira mga pag-ampo pinaagi han napapanahon nga espirituwal nga mga tagana. Pananglitan, naparig-on hira ha ginsiring han brother ha usa nga video: “Kon kakarawaton dayon naton an aton bag-o nga kahimtang, mas madali nga mabalik an aton kalipay pati na an higayon nga makag-alagad kan Jehova hiton bag-o nga kahimtang.” c Ikaduha, nagdesisyon hira nga pauswagon an ira abilidad ha pagsangyaw pinaagi han telepono ngan nakagtikang pa ngani hira hin Bible study. Ikatulo, malipayon nga ginkarawat nira an mahigugmaon nga pagparig-on ngan bulig han kabugtoan. Usa nga buotan nga sister an nagpapadara ha ira kada adlaw hin halipot nga mensahe nga may teksto ha sulod hin usa ka tuig. Kon ginkakarawat liwat  naton an aton bag-o nga kahimtang, magigin malipayon kita ha kon ano an aton mahihimo.

10. Paonan-o an usa nga sister nakapahiuyon ha daku nga pagbag-o ha iya kinabuhi?

¹⁰ Hunahunaa an tiarabot, ngan pagpokus ha positibo. Hi Christina, usa nga Romanian nga sister nga naukoy ha Japan, nasubo han na-dissolve an English congregation nga iya gin-aatenderan. Pero waray niya ito paghinunahunaa. Lugod, sumuporta hiya ha Japanese congregation ngan ginbuhat an iya pinakamaopay ha pagsangyaw hin Japanese. Ginhangyo niya an iya katrabaho hadto nga tutdoan hiya basi mas mahibaro pa hin Japanese. An iya katrabaho inuyon nga gamiton an Biblia ngan an Mabuhi hin Malipayon ha Waray Kataposan! nga brosyur ha pagtutdo ha iya hin Japanese. Labot la nga hi Christina nagin mas maopay magyakan hin Japanese, an iya katrabaho nagtikang liwat mainteres ha kamatuoran. Kon diri ta paghihinunahunaon an naglabay ngan magigin positibo kita, an tigda nga mga pagbag-o mahimo magresulta hin diri ginlalaoman nga mga bendisyon.

11. Ano an nakabulig ha usa nga mag-asawa nga nagkaada problema ha pinansyal?

¹¹ Buligi an iba. Usa nga mag-asawa nga naukoy ha nasud diin igindidiri an aton buruhaton an nagkaproblema ha pinansyal han nagkaada krisis ha ekonomiya an ira nasud. Paonan-o hira nakapahiuyon? Siyahan, ginpasimple nira an ira kinabuhi. Sunod, imbes nga magpokus ha ira mga problema, nagdesisyon hira nga magpokus ha pagbulig ha iba pinaagi ha pagin busy ha pagsangyaw. (Buh. 20:35) An bana nagsiring, “Tungod kay busy kami ha ministeryo, gutiay na la an amon panahon ha paghunahuna hin negatibo ngan mas damu an amon panahon ha pagbuhat han kaburut-on han Dios.” Kon nagbabag-o an aton kahimtang, dapat ta hinumdoman kon ano kaimportante an padayon nga pagbulig ha iba, labi na pinaagi han aton pagsangyaw.

12. Paonan-o an ehemplo ni apostol Pablo makakabulig ha aton nga magin mapauyon-uyon ha aton pagsangyaw?

¹² Ha aton ministeryo, kinahanglan mapauyon-uyon kita. An mga tawo nga aton nasasangyawan may iba-iba nga gintotoohan mahitungod ha Dios ngan nagtikang ha iba-iba nga lugar ngan kultura. Hi apostol Pablo mapauyon-uyon, ngan may mahibabaroan kita ha iya ehemplo. Ginpili ni Jesus hi Pablo sugad nga ‘apostol ha mga nasud.’ (Roma 11:13) Salit, hi Pablo nagsangyaw ha mga Judio, Griego, edukado, ubos nga mga tawo, mga opisyal han gobyerno, ngan mga hadi. Basi maabot an kasingkasing hini nga iba-iba nga mga tawo, hi Pablo nakiangay “ha ngatanan nga klase hin tawo.” (1 Cor. 9:19-23) Naghatag hiya hin atensyon ha kultura, gintikangan, ngan gintotoohan han iya mamarati ngan iginpahiuyon hito an iya pakiistorya. Magigin mas epektibo liwat kita ha aton ministeryo kon mapauyon-uyon kita ngan hihimoon an pinakamaopay basi makasangyaw uyon ha interes han aton nakakaistorya.

13. Ano nga peligro nga gin-unabi ha 1 Corinto 8:9 an mahimo naton malikyan kon rirespetuhon naton an panhunahuna han iba?

¹³ An pagin makatadunganon nabulig liwat ha aton nga respetuhon an panhunahuna han iba. Pananglitan, may mga sister nga naruruyag mag-make-up, pero may iba liwat nga nadiri hito. May mga Kristiano nga nainom hin makahurubog nga irimnon ha kasadangan la, pero an iba nagdesisyon nga diri gud uminom hito. An ngatanan nga Kristiano karuyag magin mahimsog pero nagpipili hin iba-iba nga klase han pagtambal. Kon naghuhunahuna kita nga pirme tama an aton ginpipili ngan ginpipirit naton ito ha aton mga kakongregasyon, mahimo kita makapakdol ha iba ngan magin hinungdan han pagkabahin-bahin. Diri gud naton karuyag nga buhaton ito! (Basaha an 1 Corinto 8:9;  10:23, 24) Hisgotan naton an duha nga ehemplo nga nagpapakita kon paonan-o an pag-aplikar ha mga prinsipyo ha Biblia makakabulig ha aton nga magin balanse ngan matipigan an kamurayawan.

14. Ano nga mga prinsipyo ha Biblia an mabulig ha aton kon nagdidesisyon parte ha pamado ngan pag-ayos?

¹⁴ Pamado ngan pag-ayos. Hi Jehova waray magsiring kon ano an angay naton igsul-ot, pero naghatag hiya hin mga prinsipyo nga dapat naton sundon. An aton pamado kinahanglan angayan para ha mga ministro han Dios, nga nagpapakita hin pagin makatadunganon, may kasadangan, ngan “maopay nga panhunahuna.” (1 Tim. 2:9, 10; 1 Ped. 3:3) Salit, diri naton karuyag nga makaagaw hin atensyon an aton pamado. An mga prinsipyo ha Biblia mabulig liwat ha mga tigurang nga likyan an paghimo han ira kalugaringon nga mga surundon parte ha pamado ngan estilo han buhok. Pananglitan, karuyag buligan han mga tigurang ha usa nga kongregasyon an pipira nga batan-on nga brother nga naimpluwensyahan han popular nga estilo han buhok nga halipot pero nagguguronggong. Paonan-o ito nga mga batan-on mabubuligan bisan kon an mga tigurang diri maghimo hin mga surundon? Ginsagdonan han paramangno han sirkito an mga tigurang nga isiring ini ha mga brother, “Kon aadto ka ha entablado ngan an imo mamarati mas naghahatag hin atensyon ha imo pamostura kay han imo ginsisiring, may problema an imo pamado ngan pag-ayos.” Ini nga simple nga esplikasyon nakabulig ha batan-on nga mga brother nga masabtan an ira angay buhaton bisan kon an mga tigurang waray maghimo hin mga surundon. d

15. Ano nga mga balaud ngan prinsipyo ha Biblia an mabulig ha aton kon nagpipili hin klase han pagtambal? (Roma 14:5)

¹⁵ Pagpatambal. An tagsa nga Kristiano an magdidesisyon kon paonan-o niya aatamanon  an iya kahimsog. (Gal. 6:5) May-ada la pipira nga espisipiko nga mga balaud ha Biblia nga makakaapekto ha desisyon han usa nga Kristiano ha pagpatambal, sugad han sugo nga maglikay ha dugo ngan espiritismo. (Buh. 15:20; Gal. 5:19, 20) Pero ha iba pa nga bahin, an kada tagsa na an magdidesisyon kon ano nga klase hin pagtambal an iya pipilion. Mas ginpipili han pipira an pagpatambal ha mga doktor, pero an iba naman mas karuyag an alternatibo nga paagi han pagtambal. Anoman kita kakombinsido nga makakaopay o makakadaot an usa nga klase han pagtambal, dapat naton respetuhon an katungod han aton kabugtoan ha pagdesisyon han ira karuyag nga pagtambal. Salit angay ta hinumdoman ini nga upat nga punto: (1) An Ginhadian han Dios la an makakahatag hin bug-os ngan permanente nga pagtambal. (Isa. 33:24) (2) An tagsa nga Kristiano dapat “magin kombinsido gud” kon ano an pinakamaopay para ha iya. (Basaha an Roma 14:5.) (3) Diri kita naghuhukom ha iba o naghihimo hin mga butang nga makakapakdol ha ira. (Roma 14:13) (4) An mga Kristiano nagpapakita hin gugma ngan mas importante ha ira an pagkaurosa han kongregasyon kay ha ira kalugaringon nga opinyon. (Roma 14:15, 19, 20) Kon hihinumdoman naton ini nga mga punto, matitipigan naton an duok nga relasyon ha aton kabugtoan ngan an kamurayawan ha kongregasyon.

16. Paonan-o maipapakita han usa nga tigurang nga makatadunganon hiya ha iya pagtratar ha iya mga igkasi-tigurang? (Kitaa liwat an mga piktyur.)

¹⁶ An mga tigurang dapat magpakita hin maopay nga ehemplo han pagin makatadunganon. (1 Tim. 3:2, 3) Pananglitan, an usa nga tigurang diri dapat maglaom nga pirme kakarawaton an iya opinyon tungod la kay mas edaran hiya kay ha iba nga tigurang. Maaram hiya nga mahimo pagiuson han espiritu ni Jehova an bisan hin-o nga tigurang nga maghatag hin suhestyon nga makakabulig para makahimo hin maaramon nga desisyon. Ngan kon waray man prinsipyo nga natatalapas, kinaburut-on nga ginsusuportaran han makatadunganon nga mga tigurang an desisyon han kadam-an nga tigurang, bisan kon iba an ira karuyag.

17. Ano nga mga bendisyon an napapahimulosan han makatadunganon nga mga Kristiano?

¹⁷ Kon makatadunganon kita, nagpapahimulos kita ha damu nga paagi. May-ada kita maopay nga relasyon ha aton kabugtoan, ngan an kongregasyon may kamurayawan. Nalilipay kita ha magkalain-lain nga personalidad ngan kultura han nagkakaurosa nga katawohan ni Jehova. Labaw ha ngatanan, nalilipay kita kay ginsusubad naton an aton makatadunganon nga Dios, hi Jehova.