1-2. Hin-o hi Zadok? (1 Cronicas 12:​22, 26-28)

 IMADYINA ini nga eksena. May sobra 340,000 nga kalalakin-an an nagkatitirok basi himoon nga hadi hi David ha bug-os nga Israel. Ha sulod hin tulo ka adlaw, an mga kalalakin-an nagpabilin ha batoon nga mga bungtod nga hirani ha Hebron. Nagkaragtatawa hira, nag-iristorya, ngan malipayon nga nagkanta hin mga pagdayaw kan Jehova. (1 Cron. 12:39) An batan-on nga hi Zadok posible gud nga waray mapansin han damu nga tawo. Pero napansin hiya ni Jehova ngan karuyag niya nga mahibaroan naton nga aada hi Zadok. (Basaha an 1 Cronicas 12:​22, 26-28.) Hin-o hi Zadok?

² Hi Zadok usa nga saserdote nga nakatrabaho han Hitaas nga Saserdote nga hi Abiatar. Gintagan liwat han Dios hi Zadok hin damu nga kinaadman ngan abilidad nga masabtan an Iya kaburut-on. (2 Sam. 15:27) Napakadto an mga tawo kan Zadok kon kinahanglan nira hin maaramon nga sagdon. Maisugon liwat hiya nga tawo. Ito nga aspekto han iya personalidad an aton pupokusan hini nga artikulo.

3. (a) Kay ano nga kinahanglan magin maisugon an mga magsiringba ni Jehova? (b) Ano an aton hihisgotan hini nga artikulo?

³ Hinin kataposan nga mga adlaw, mas nagtitikagrabe an mga pag-atake ni Satanas ha katawohan han Dios. (1 Ped. 5:8) Kinahanglan naton magin maisugon samtang ginhuhulat naton nga tapuson na ni Jehova hi Satanas ngan an iya maraot nga sistema. (Sal. 31:24) Hisgotan naton an tulo nga paagi nga masusubad naton an kaisog ni Zadok.

SUPORTARI AN GINHADIAN HAN DIOS

4. Kay ano nga kinahanglan han katawohan ni Jehova hin kaisog basi masuportaran an Ginhadian han Dios? (Kitaa liwat an piktyur.)

⁴ Sugad nga katawohan ni Jehova, bug-os-kasingkasing naton  nga ginsusuportaran an Ginhadian han Dios, pero agsob nga kinahanglan naton hin kaisog nga mabuhat ito. (Mat. 6:33) Pananglitan, hinin maraot nga kalibotan, kinahanglan naton hin kaisog basi magkinabuhi uyon ha mga suruklan ni Jehova ngan basi maisangyaw an maopay nga sumat han Ginhadian. (1 Tes. 2:2) Ngan agsob nga kinahanglan an kaisog basi makapabilin nga neutral ha politika hini nga sistema nga nagtitikaduro an pagkabahin-bahin. (Juan 18:36) Damu ha katawohan ni Jehova an nag-aantos hin problema ha pinansyal, pag-abuso ha pisikal, o kapriso tungod ha pagdumiri nga makigbahin ha politika o ha mga buruhaton ha militar.

5. Kay ano nga kinahanglan ni Zadok hin kaisog basi suportaran hi David?

⁵ Hi Zadok kinadto ha Hebron diri la para iselebrar an pagkahadi ni David. Kinadto hiya nga may dara nga armas ngan andam ha pakiggirra. (1 Cron. 12:38) Andam hiya nga sumunod kan David ha pakiggirra ngan depensahan an Israel tikang ha mga kaaway. Posible nga kulang hin eksperyensya hi Zadok ha pakig-away sugad nga sundalo, pero maisugon gud hiya.

6. Paonan-o hi David nagpakita kan Zadok hin maopay nga ehemplo han kaisog? (Salmo 138:3)

⁶ Diin nahibaro an usa nga saserdote pariho kan Zadok nga magin maisugon? Damu an iya kilala nga kalalakin-an nga makusog ngan maisugon. Sigurado nga nahibaro hiya tikang ha ira ehemplo. Pananglitan, an ehemplo ni David ha pagin maisugon ha ‘pagpanguna ha Israel ha mga pakiggirra’ nagpagios ha bug-os nga Israel nga suportaran hiya hin bug-os-kasingkasing. (1 Cron. 11:​1, 2) Hi David pirme nasarig kan Jehova nga bubuligan hiya kontra ha iya mga kaaway. (Sal. 28:7; basaha an Salmo 138:3.) Hi Zadok nahibaro liwat han maisugon nga ehemplo han iya mga nakaupod—sugad kanda Jehoiada ngan ha iya girriro nga anak nga lalaki nga hi Benaias, pati liwat ha 22 nga iba pa nga lider han mga tribo nga sinuporta kan David.  (1 Cron. 11:​22-25; 12:​26-28) Ini ngatanan nga kalalakin-an ginios dayon basi suportaran an pagkahadi ni David.

7. (a) Ano an aton mahibabaroan ha mga ehemplo han kaisog ha moderno nga panahon? (b) Ano an imo nahibaroan tikang ha ehemplo ni Brother Nsilu, sugad han iginpakita ha video?

⁷ Nagkakaada kita kusog ngan kaisog kon aton ginhuhunahuna an mga ehemplo hadton maisugon nga sinuporta ha pagmando ni Jehova. An aton Hadi, hi Kristo Jesus, waray gud magpadara han presyur nga magin bahin han politikal nga sistema han kalibotan ni Satanas. (Mat. 4:​8-11; Juan 6:​14, 15) Pirme hiya nasarig kan Jehova nga tatagan hiya hin kusog. Damu liwat an ehemplo ha moderno nga panahon han batan-on nga kalalakin-an an nagdumiri nga umapi ha militar o makigbahin ha mga buruhaton ha politika. Puydi mo basahon an ira mga eksperyensya ha jw.org. a

BULIGI AN IMO KABUGTOAN

8. San-o posible kinahanglan han mga tigurang an kaisog basi mabuligan an ira kabugtoan?

⁸ An katawohan ni Jehova naruruyag gud ha pagbinuligay ha usa kag usa. (2 Cor. 8:4) Pero danay, nagkikinahanglan ito hin kaisog. Pananglitan, kon may-ada girra, maaram an mga tigurang ha kongregasyon nga an ira kabugtoan nagkikinahanglan hin pagdasig, suporta, ngan bangin espirituwal o pisikal nga bulig. Hinigugma han mga tigurang an kabugtoan, salit iginhahatag nira an ira kinahanglan bisan pa kon delikado gud an pagbuhat hito. (Juan 15:​12, 13) Kon ginbubuhat nira ito, ira ginsusubad an maisugon nga ehemplo ni Zadok.

9. Sugad han mababasa ha 2 Samuel 15:​27-29, ano an iginpabuhat ni David kan Zadok? (Kitaa liwat an piktyur.)

⁹ Namimilegro an kinabuhi ni David. An iya anak nga hi Absalom determinado nga agawon ha iya an ginhadian. (2 Sam. 15:​12, 13) Kinahanglan ni David bumaya dayon ha Jerusalem! Iya ginsidngan an iya mga surugoon: “Pagkabuhát kamo, ngan pamalagiw kita, kay waray bisan  usa ha aton nga makakatalwas tikang kan Absalom!” (2 Sam. 15:14) Samtang nabaya an mga surugoon, nahunahuna ni David nga kinahanglan may magpabilin basi magsumat ha iya han mga plano ni Absalom. Salit iya ginpabalik ha syudad hira Zadok ngan an iba pa nga saserdote basi magin mga espiya. (Basaha an 2 Samuel 15:​27-29.) Kinahanglan gud nira maghirot. An iginsugo ni David hito nga mga saserdote delikado ngan maninelikado pa ngani an ira kinabuhi. Hi Absalom bayolente ngan makikalugaringon nga tawo nga nagtraydor ha iya kalugaringon nga tatay. Imadyina la kon ano an iya puydi buhaton kan Zadok ngan ha iba pa nga saserdote kon madiskobrehan niya nga nag-iespiya hira basi protektaran hi David!

10. Paonan-o ginprotektaran ni Zadok ngan han iya mga kaupod hi David?

¹⁰ Naghangyo hi David kan Zadok ngan ha usa pa niya nga maunungon nga sangkay, hi Husai, nga buligan hiya ha usa nga plano. (2 Sam. 15:​32-37) Pinaagi ha pagsunod han plano, nakuha ni Husai an pagtapod ni Absalom ngan nagsuhestyon hin estratihiya han pag-atake nga maghahatag kan David hin panahon basi makapangandam para hito. Sunod, ginsumatan ni Husai hira Zadok ngan Abiatar mahitungod han plano. (2 Sam. 17:​8-16) Katapos, ginsiguro hini nga duha nga lalaki nga maisumat ito nga plano kan David. (2 Sam. 17:17) Ha bulig ni Jehova, hi Zadok ngan an iya mga igkasi-saserdote nagkaada importante nga papel ha pagprotektar ha kinabuhi ni David.​—2 Sam. 17:​21, 22.

11. Paonan-o naton masusubad an pagin maisugon ni Zadok kon nabulig kita ha aton kabugtoan?

¹¹ Paonan-o kita magigin maisugon pariho kan Zadok kon an aton kabugtoan aada ha peligro ngan nagkikinahanglan hin bulig? (1) Sunda an instruksyon. Ha sugad nga mga kahimtang, importante nga magin masinugtanon kita basi magpabilin nga nagkakaurosa. Sunda an mga instruksyon han branch office ha iyo lugar. (Heb. 13:17) An mga tigurang dapat regular nga magrepaso han lokal nga mga kahikayan para  ha pagpangandam ha mga kalamidad pati na liwat han mga instruksyon han organisasyon kon ano an bubuhaton kon may tiabot nga kalamidad. (1 Cor. 14:​33, 40) (2) Magin maisugon pero naghihirot. (Prob. 22:3) Paghunahuna anay antes gumios. Magpabilin nga talwas tubtob nga posible. (3) Sarig kan Jehova. Hinumdumi nga hi Jehova interesado gud han imo kaopayan ngan han imo kabugtoan. Mabubuligan ka niya basi mabuligan mo an imo kabugtoan ha safe nga paagi.

12-13. Ano an imo nahibaroan ha mga eksperyensya nira Viktor ngan Vitalii? (Kitaa liwat an piktyur.)

¹² Pansina an eksperyensya han duha nga brother nga hira Viktor ngan Vitalii, nga amo an nagdideliber hin pagkaon ngan tubig ha ira igkasi-tumuroo ha Ukraine. “Namiling kami hin pagkaon ha bisan diin,” siring ni Viktor. “Agsob nga may purupsilay hirani ha amon. Usa nga brother an nagdonar hin pagkaon tikang ha iya stock. Ini nga donasyon nakahatag ha damu nga magwarali han ira kinahanglan basi may makaon ha sulod hin pipira ka panahon. Samtang may iginkakarga kami ha amon trak, may bomba nga binuto mga 20 metros an kahirayo tikang ha amon. Ha bug-os nga adlaw, nakimalooy ako kan Jehova nga tagan ako hin kaisog nga akon kinahanglan basi padayon nga mabuligan an mga magwarali.”

¹³ “Nagkikinahanglan adto hin daku nga kaisog,” siring ni Vitalii. “An siyahan ko nga biyahe inabot hin 12 ka oras. Nag-inampo ako kan Jehova ha bug-os nga biyahe.” Maisugon hi Vitalii, pero naghihirot liwat hiya. Nagsiring pa hiya: “Pirme ako naghahangyo kan Jehova nga magkaada kinaadman ngan kilalahon an akon limitasyon. Inagi la ako ha mga dalan nga ginpapaagian han mga awtoridad. Naparig-on an akon pagtoo han nakita ko nga an kabugtoan nagbuburubligay. Gintatanggal nira an mga ulang ha dalan, ginkukolekta ngan ginkakarga an mga ayuda, ngan gintatagan kami hin pagkaon ngan hin lugar nga mapapahuwayan samtang nagbibiyahe.”

MAGPABILIN NGA MAUNUNGON KAN JEHOVA

14. Paonan-o kita mahimo maapektohan kon an usa han aton mga hinigugma nagin diri maunungon kan Jehova?

¹⁴ An usa han pinakamakuri nga mga problema amo an kon an usa nga membro han pamilya o an usa nga duok nga sangkay binaya kan Jehova. (Sal. 78:40; Prob. 24:10) Kon mas duok ka hito nga tawo, mas makuri an pagkarawat han sitwasyon. Kon nakakaeksperyensya ka hin sugad nga masakit nga sitwasyon, makakaparig-on ha imo an ehemplo ni Zadok han pagkamaunungon.

15. Kay ano nga kinahanglan ni Zadok hin kaisog basi magpabilin nga maunungon kan Jehova? (1 Hadi 1:​5-8)

¹⁵ Hi Zadok nagpabilin nga maunungon kan Jehova han an iya duok nga sangkay nga hi Abiatar waray magin maunungon. Nahitabo ito ha kataposan han pagmando ni David. Han hi David lagas na ngan tikamatay na, an iya anak nga hi Adonias naningkamot nga agawon an trono nga iginsaad ni Jehova kan Solomon. (1 Cron. 22:​9, 10) Ginpili ni Abiatar nga suportaran hi Adonias. (Basaha an 1 Hadi 1:​5-8.) Ha pagbuhat hito, waray magin maunungon hi Abiatar diri la kan David kondi pati liwat kan Jehova! Imadyina la, sigurado nga nasubo gud hi Zadok. Ha sulod hin sobra 40 ka tuig, nagin duok hira ni Abiatar nga magkatrabaho sugad nga mga saserdote. (2 Sam. 8:17) Nagkaupod hira ha panginano han “Arka han tinuod nga Dios.” (2 Sam. 15:29) Ha tinikangan, pariho nira ginsuportaran an pagkahadi ni David—ngan nagkaupod hira ha damu pa nga buruhaton.​—2 Sam. 19:​11-14.

16. Ano an posible nga nakabulig kan Zadok nga magpabilin nga maunungon?

¹⁶ Hi Zadok nagpabilin nga maunungon kan Jehova bisan pa han nagin desisyon ni Abiatar.  Waray gud ni David pagruhaduhai an pagin maunungon ni Zadok. Han nabuhayhag an plano ni Adonias, ginpili ni David hira Zadok, Nathan, ngan Benaias ha pagdihog kan Solomon nga magin hadi. (1 Hadi 1:​32-34) Tungod kay kaupod niya an maunungon nga mga magsiringba ni Jehova, sugad kanda Nathan ngan han iba pa nga nasuporta kan Hadi David, sigurado nga naparig-on ngan nadasig hi Zadok. (1 Hadi 1:​38, 39) Han nagin hadi hi Solomon, “ginpili [niya] hi Zadok nga saserdote kasaliwan ni Abiatar.”​—1 Hadi 2:35.

17. Paonan-o mo masusubad hi Zadok kon an usa nga duok ha imo nagin diri maunungon kan Jehova?

¹⁷ Paonan-o mo masusubad hi Zadok? Kon an usa nga duok ha imo nagdesisyon nga bumaya kan Jehova, ipakita kan Jehova nga ginpili mo nga magin maunungon ha iya. (Jos. 24:15) Tatagan ka ni Jehova hin kusog ngan kaisog nga imo kinahanglan. Sarig ha iya pinaagi ha pag-ampo ngan pagpabilin nga duok ha maunungon nga mga igkasi-magsiringba. Ginpapabilhan ni Jehova an imo pagin maunungon, ngan babalosan ka niya tungod hito.​—2 Sam. 22:26.

18. Ano an imo nahibaroan ha eksperyensya nira Marco ngan Sidse?

¹⁸ Pansina an eksperyensya ni Marco ngan han iya asawa nga hi Sidse, nga an duha nira nga anak nga babaye binaya ha kamatuoran. Hi Marco nagsiring: “Tikang ha adlaw nga natawo an imo mga anak, hinigugma mo gud hira. Bubuhaton mo an ngatanan basi maprotektaran hira. Salit kon magdesisyon hira nga bumaya kan Jehova, masakit gud ito.” Nagsiring pa hiya: “Pero hi Jehova pirme aada para ha amon. Iya ginsiguro nga kon maluya ako, an akon asawa makusog, ngan kon hiya naman an maluya, makusog ako.” Hi Sidse nagsiring liwat: “Diri kami makakailob kon hi Jehova waray maghatag hin kusog nga amon kinahanglan. Nasubo gud ako ngan inabat ko nga sayop ko kon kay ano nga inundang an akon mga anak ha pag-alagad kan Jehova, salit iginsumat ko kan Jehova an akon gin-abat. Waray pag-iha katapos hito, usa nga sister nga damu na ka tuig nga waray ko makita an dinuok ha akon, kinapot hiya ha akon mga sugbong, nagkita ha akon mga mata, ngan nagsiring: ‘Hinumdumi, Sidse, diri mo ito sayop!’ Ha bulig ni Jehova, natipigan ko an kalipay ha pag-alagad ha iya.”

19. Ano an imo determinasyon?

¹⁹ Karuyag ni Jehova nga an ngatanan niya nga magsiringba magin maisugon pariho kan Zadok. (2 Tim. 1:7) Pero diri Niya karuyag nga sumarig la kita ha aton kalugaringon nga kusog. Karuyag niya nga sumarig kita ha iya. Salit kon aada ka ha usa nga sitwasyon nga kinahanglan mo hin kaisog, pangaro hin bulig kan Jehova. Makakasiguro ka nga bubuligan ka niya nga magin maisugon pariho kan Zadok!—1 Ped. 5:10.