Ayaw Tuguti an Sayop han Iba nga Makapakdol ha Imo
“Padayon nga . . . kinasingkasing nga magpinasayloay kamo.”—COL. 3:13.
KARANTAHON: 121, 75
1, 2. Ano an igintagna han Biblia may kalabotan ha pagdamu han katawohan ni Jehova?
MAY naiiba gud nga organisasyon ha tuna nga ginkukompwesto han matinumanon nga mga surugoon han Dios—an mga Saksi ni Jehova. Oo, diri hira perpekto ngan nakakasayop hira. Bisan pa hito, ginigiyahan han baraan nga espiritu han Dios an iya bug-os-kalibotan nga kongregasyon basi magdamu ngan mag-uswag. Hisgotan naton kon paonan-o ginbibendisyonan ni Jehova inin magsinugtanon nga katawohan bisan kon diri hira perpekto.
2 Han nagtikang an kataposan nga mga adlaw hinin presente nga sistema han 1914, gutiay pa la an mga surugoon han Dios dinhi ha tuna. Pero ginbendisyonan ni Jehova an ira pagsangyaw nga buruhaton. Han sumunod nga mga dekada, minilyon an nahibaro han kamatuoran ha Biblia ngan nagin mga Saksi ni Jehova. Ngani, igintagna ni Jehova inin makatirigamnan nga pagdamu: “An usa nga gutiayay mahihimo nga usa ka yukot, ngan an usa nga gutiay usa nga nasud nga makusog: ako, hi Jehova, mag-iikag [o, magpapadagmit] hini ha iya panahon.” (Isa. 60:22) Ito nga tagna natutuman gud hinin kataposan nga mga adlaw. Ngani, an katawohan han Dios yana mas damu pa kay ha populasyon han damu nga nasud.
3. Paonan-o iginpakita han mga surugoon han Dios an gugma?
3 Durante hinin kataposan nga mga adlaw, ginbubuligan liwat ni Jehova an iya katawohan nga mas kultibaron pa an iya nangunguna nga kalidad—an gugma. (1 Juan 4:8) Hi Jesus, nga nagsubad ha gugma han Dios, nagsiring ha iya mga sumurunod: “Naghahatag ako ha iyo hin bag-o nga sugo, nga maghigugmaay kamo . . . Tungod hini an ngatanan mahibabaro nga mga disipulo ko kamo, kon naghihigugmaay kamo.” (Juan 13:34, 35) Nagin importante gud an pagsunod hito labi na hinin naglabay nga mga katuigan han nakigbahin an mga nasud ha makangingirhat nga girra. Pananglitan, mga 55 ka milyon an namatay ha Girra ha Kalibotan II. Kondi an mga Saksi ni Jehova waray makigbahin hiton bug-os-kalibotan nga pamatay. (Basaha an Mika 4:1, 3.) Nakabulig ini ha ira nga magpabilin nga ‘waray baratunon ha dugo han ngatanan nga tawo.’—Buh. 20:26.
4. Kay ano nga makatirigamnan an pagdamu han katawohan ni Jehova?
4 An katawohan han Dios padayon nga nagdadamu bisan pa kon naukoy hira hinin maraot nga kalibotan nga sumala ha Biblia kontrolado ni Satanas, an “dios hini nga sistema.” (2 Cor. 4:4) Ginmamaniobra ni Satanas an politika pati na an media. Pero diri niya napapaundang an pagsangyaw han maopay nga sumat. Kondi tungod kay maaram hiya nga halipot na la an iya panahon, nangangalimbasog hiya nga ipahirayo an mga tawo ha tinuod nga pagsingba, ngan nagamit hiya hin iba-iba nga pamaagi ha pagbuhat hito.—Pah. 12:12.
PAGSARI HAN PAGKAMAUNUNGON
5. Kay ano nga usahay bangin mapasubo kita han iba? (Kitaa an retrato ha tinikangan hini nga artikulo.)
5 Ginpapabug-atan ha Kristiano nga kongregasyon nga importante gud nga higugmaon an Dios ngan an igkasi-tawo. Ito an igintutdo ni Jesus nga sadang buhaton. Han may nagpakiana ha iya kon ano an pinakaimportante nga sugo, hiya nagsiring: “‘Higugmaa hi Jehova nga imo Dios ha bug-os mo nga kasingkasing, ha bug-os mo nga kalag, ngan ha bug-os mo nga hunahuna.’ Ini an pinakaimportante ngan an siyahan nga sugo. An ikaduha amo ini: ‘Higugmaa an imo igkasi-tawo sugad ha imo kalugaringon.’” (Mat. 22:35-39) Bisan pa hito, an Biblia matin-aw nga nasiring nga tungod han sala ni Adan, kita ngatanan igin-anak nga diri perpekto. (Basaha an Roma 5:12, 19.) Salit usahay, bangin may kabugtoan nga makapasubo gud ha aton tungod han ira ginyakan ngan ginbuhat. Mahimo ini magsari han aton gugma kan Jehova ngan ha iya katawohan. Ano an aton bubuhaton ha sugad nga mga sitwasyon? Bisan an matinumanon nga mga surugoon han Dios hadto nakayakan o nakabuhat hin mga butang nga nakapasubo gud ha iba, ngan may mahibabaroan kita tikang ha ginsisiring han Biblia mahitungod hini.
Kon nabuhi ka ha Israel han panahon ni Eli ngan han iya mga anak, ano daw la an imo magigin reaksyon? (Kitaa an parapo 6)
6. Ha ano nga paagi napakyas hi Eli ha pagdisiplina ha iya mga anak?
6 Pananglitan, an duha nga anak han Hitaas nga Saserdote nga hi Eli waray magsunod ha mga balaud ni Jehova. Aton mababasa: “An mga anak nga kalalakin-an ni Eli mga banyaga [o, ‘magraut gud,’ Baraan nga Biblia] nga mga tawo; waray hira kilala kan Jehova.” (1 Sam. 2:12) Bisan kon an ira amay may importante nga papel ha tinuod nga pagsingba, nagbuhat hira hin seryoso gud nga sala. Maaram hini hi Eli ngan sadang unta niya hira disiplinahon, pero waray niya ito buhata. Salit ginhukman ni Jehova an panimalay ni Eli. (1 Sam. 3:10-14) Ha urhi, an iya katulinan waray na tuguti nga mag-alagad sugad nga mga saserdote. Kon nabuhi ka ha panahon ni Eli, ano daw la an imo magigin reaksyon ha pagkonsinter ni Eli ha sala han iya mga anak? Tutugotan mo ba ito nga makapakdol ha imo tubtob ha punto nga umundang ka na ha pag-alagad ha Dios?
7. Ano nga seryoso nga sala an ginbuhat ni David, ngan ano an ginhimo han Dios may kalabotan hito?
7 Hinigugma ni Jehova hi David, ‘usa nga tawo nga inuuyonan han iya kasingkasing.’ (1 Sam. 13:13, 14; Buh. 13:22) Pero ha urhi nag-adulteryo hi David kan Batseba, ngan nagburod hi Batseba. Nahitabo ini han an iya bana nga hi Uria nakadto ha pakig-away. Han umuli hi Uria, naghimo hi David hin paagi nga makighilawas hi Uria kan Batseba basi sidngon nga hi Uria an tatay han ginbuburod ni Batseba. Waray buhata ni Uria an ginsiring han hadi, salit nagplano hi David nga mamatay hi Uria ha girra. Nag-antos gud hi David tungod han iya sala—naeksperyensyahan niya ngan han iya panimalay an damu nga kasakitan. (2 Sam. 12:9-12) Pero nalooy an Dios kan David nga ha kadak-an nga bahin han iya kinabuhi naglakat ha atubangan ni Jehova nga ‘may bug-os nga kasingkasing.’ (1 Hadi 9:4) Kon usa ka han katawohan han Dios hadto, ano daw la an imo magigin reaksyon? Mapapakdol ka ba ha sayop nga ginbuhat ni David?
8. (a) Paonan-o napakyas hi Pedro ha pagtuman han iya ginsiring? (b) Bisan kon nakasala hi Pedro, kay ano nga gin-gamit pa gihapon hiya ni Jehova?
8 Usa pa nga ehemplo ha Biblia amo hi apostol Pedro. Ginpili hiya ni Jesus sugad nga usa han mga apostol; pero usahay may nayayakan o nahihimo hi Pedro nga iya ginbabasolan ha urhi. Pananglitan, ha usa nga makuri nga kahimtang, ginbayaan hi Jesus han iya mga apostol. Antes hito, nagsaad hi Pedro nga bisan kon bumaya an iba, diri gud hiya mabaya. (Mar. 14:27-31, 50) Pero han gindakop hi Jesus, ginbayaan hiya han ngatanan nga apostol—pati na ni Pedro. Pauroutro pa ngani niya nga iginnigar hi Jesus. (Mar. 14:53, 54, 66-72) Pero ginbasolan gud ito ni Pedro, salit padayon hiya nga gin-gamit ni Jehova. Kon usa ka han mga disipulo hadto, diri ka na ba magmamaunungon kan Jehova tungod han ginbuhat ni Pedro?
9. Kay ano nga nasarig ka nga nagios pirme hi Jehova uyon ha hustisya?
9 Pipira la ito nga ehemplo han mga indibiduwal nga nakabuhat hin sayop ngan nakapasubo ha iba. Damu pa nga ehemplo han mga surugoon ni Jehova hadto ngan yana nga nakabuhat hin
sayop ngan nakasakit ha iba an mahimo unabihon. An punto amo ini: ano an imo magigin reaksyon ha sugad nga sitwasyon? Tutugotan mo ba an ira mga sayop nga makapakdol ha imo, nga tungod hito babayaan mo hi Jehova ngan an iya katawohan, pati na an imo mga kakongregasyon? O huhunahunaon mo ba nga bangin gintatagan ni Jehova hin panahon an nakasala nga magbasol ngan tatadungon an iya sayop ngan bubuhaton an husto? Ha luyo nga bahin, usahay iginsasalikway hadton nakahimo hin seryoso nga sala an kalooy ni Jehova ngan diri nagbabasol. Ha sugad nga kahimtang, masarig ka ba nga huhukman ni Jehova an nakasala ha husto nga panahon ngan bangin paiwason pa ngani ha kongregasyon?MAGPABILIN NGA MAUNUNGON
10. Paonan-o gintagad ni Jesus an sala ni Judas Iscariote ngan Pedro?
10 May mga asoy ha Biblia mahitungod ha mga surugoon han Dios nga nagpabilin nga maunungon kan Jehova ngan ha iya katawohan bisan pa han seryoso nga sala nga ginbubuhat han mga tawo nga nakapalibot ha ira. Pananglitan, katapos ni Jesus mag-ampo ha iya Amay ha bug-os nga gab-i, ginpili niya an 12 nga apostol. Usa ha ira hi Judas Iscariote. Ha urhi, han gintraydor hiya ni Judas, waray tuguti ni Jesus ito nga diri pagkamaunungon nga makadaot han iya relasyon ha iya Amay nga hi Jehova; o bisan an pagnigar ha iya ni Pedro. (Luc. 6:12-16; 22:2-6, 31, 32) Maaram hi Jesus nga diri hi Jehova o an Iya katawohan an nakasala ha iya. Salit padayon hiya nga nagmaunungon ha pag-alagad kan Jehova bisan pa han sayop nga ginbuhat ha iya han pipira han iya mga sumurunod. Tungod hito, ginbalosan hiya ni Jehova pinaagi ha pagbanhawa ha iya, ngan ha urhi ginhimo hiya nga Hadi ha langitnon nga Ginhadian.—Mat. 28:7, 18-20.
11. Ano an igintagna han Biblia may kalabotan ha katawohan ni Jehova yana?
11 May marig-on gud nga basihan an pagsarig ni Jesus kan Jehova ngan ha iya katawohan. Kon aton tatagdon an mga nahihimo ni Jehova pinaagi han iya mga surugoon hinin kataposan nga mga adlaw, urusahon gud ito. Waray na iba nga katawohan nga ginigiyahan ni Jehova ha pagsangyaw han kamatuoran ha bug-os nga kalibotan kay han iya nagkakaurosa nga kongregasyon yana. Ginhuhulagway han Isaias 65:14 an espirituwal nga kahimtang nga naieksperyensyahan han katawohan han Dios: “Kitaa, an akon mga surugoon magkakanta tungod han kahimongaya han kasingkasing.”
12. Paonan-o naton sadang tagdon an sayop han iba?
12 An mga surugoon ni Jehova nalilipay ha ira mag-opay nga mga nahihimo tungod kay ginigiyahan hira ni Jehova. Ha kabaliktaran, an kalibotan nga ginmamandoan ni Satanas nasusubo gud, siring pa, samtang nagtitikaraot an mga kahimtang. Diri maaramon ngan diri husto nga basulon hi Jehova o an iya kongregasyon tungod han mga sayop han pipira niya nga surugoon. Kinahanglan kita magpabilin nga maunungon kan Jehova ngan ha iya mga kahikayan ngan mahibaro kon paonan-o naton tatagdon an sayop han iba pati na an sadang naton magin reaksyon hito.
ANO AN SADANG NATON MAGIN REAKSYON?
13, 14. (a) Kay ano nga kinahanglan naton magin mapailubon ha kada tagsa? (b) Ano nga saad an sadang naton hinumdoman pirme?
13 Ano an angay naton magin reaksyon kon may surugoon han Dios nga nakayakan o nakabuhat hin nakakapasubo ha aton? Makakabulig ini nga prinsipyo ha Biblia: “Ayaw pagmahinanalion ha imo espiritu ha pagkasina; kay an kasina napahuway ha dughan han mga lurong.” (Ekles. 7:9) Sadang naton tigamnan nga nawara an pagin perpekto han tawo mga 6,000 ka tuig na an naglabay ha Eden. An diri perpekto nga tawo may tendensya gud nga makasala. Salit, diri kita angay nga maglaom hin sobra ha aton mga igkasi-tumuroo ngan tugotan an ira mga sayop nga makagwara han kalipay nga resulta han aton pagin bahin ha katawohan han Dios hinin kataposan nga mga adlaw. Labi na gud nga diri husto nga tugotan an sayop han iba nga makapakdol ha aton ngan magin rason nga bumaya kita ha organisasyon ni Jehova. Kon hihimoon naton ito, mawawara naton diri la an pribilehiyo nga buhaton an kaburut-on han Dios kondi pati an paglaom nga mabuhi ha iya bag-o nga kalibotan.
14 Basi matipigan an aton duro nga kalipay ngan marig-on nga paglaom, hinumdoman naton pirme an nakakaliaw nga saad ni Jehova: “Kitaa, ako nagbuhat hin bag-o nga langit ngan hin bag-o nga tuna; ngan an una nga mga butang diri na hinunumdoman, o diri na maabot ha panumdoman.” (Isa. 65:17; 2 Ped. 3:13) Ayaw gud tuguti an sayop han iba nga magin hinungdan nga diri mo mapahimulsan ito nga mga bendisyon.
15. Ano an ginsiring ni Jesus nga sadang naton buhaton kon may nakakasayop ha aton?
15 Kondi tungod kay waray pa kita ha bag-o nga kalibotan, kinahanglan naton tagdon an panhunahuna han Dios kon ano an angay naton magin reaksyon kon may nakakayakan o nakakabuhat hin nakakapasubo ha aton. Pananglitan, sadang naton hinumdoman an prinsipyo nga ginsiring ni Jesus: “Kon pasayloon niyo an mga tawo han ira mga sala, papasayloon liwat kamo han iyo Amay ha langit. Pero kon diri niyo pasayloon an mga tawo han ira mga sala, diri liwat papasayloon han iyo Amay an iyo mga sala.” Hinumdumi liwat nga han nagpakiana hi Pedro kon sadang ba kita magpasaylo hin “pito ka beses,” binaton hi Jesus: “Susumatan ko ikaw, diri la tubtob ha pito ka beses, kondi tubtob ha 77 ka beses.” Matin-aw an iginpapasabot ni Jesus, kinahanglan magin andam kita magpasaylo; ito an siyahan nga sadang naton buhaton pirme.—Mat. 6:14, 15; 18:21, 22.
16. Ano an maopay nga ehemplo ni Jose?
16 Hi Jose, an suhag nga anak ni Jacob kan Raquel, maopay nga ehemplo ha kon ano an sadang naton magin reaksyon kon may nakasayop ha aton. Naawa kan Jose an iya kabugtoan ha amay tungod kay pinaura hiya han ira tatay. Salit iginbaligya nira hi Jose ha pagkauripon. Paglabay hin damu nga katuigan, hi Jose nagin ikaduha ha magmarando ha Ehipto tungod han iya mag-opay nga ginbuhat didto. Han nagkaada gutom ha Canaan, an kabugtoan ni Jose kinadto ha Ehipto basi pumalit hin pagkaon, pero waray nira hiya makilala. Puydi unta gamiton ni Jose an iya awtoridad para bumulos ha ira tungod han ira maraot gud nga pagtratar ha iya. Pero waray niya ito buhata. Lugod, ginsarihan niya an iya kabugtoan basi hibaroan kon nagbag-o na hira. Han nakita ni Jose nga nagbag-o na gud an iya kabugtoan, nagpakilala hiya ha ira. Ha urhi hiya nagsiring: “Diri kamo mahadlok: pagpapakaunon ko kamo ngan an iyo mga gudtiay nga kabataan.” An asoy nagdugang: “Sanglit iya ginpasarig hira pinaagi hin maloloy-on nga mga pulong nga nakabantad han ira mga kasingkasing.”—Gen. 50:21; Maupay nga Sumat.
17. Ano an karuyag mo buhaton kon nakakasayop ha imo an iba?
17 Maaramon liwat nga hinumdoman naton nga tungod kay kita ngatanan nakakasayop, mahimo kita makapasakit ha iba. Kon nasantop naton nga nabuhat naton ito, nagsusugo an Biblia nga kadtoon naton an aton nabuhatan hin sayop ngan makigtuhay ha iya. (Basaha an Mateo 5:23, 24.) Mapasalamaton kita kon ginpapasaylo han iba an aton nabuhat nga sayop, salit ito liwat an sadang naton himoon. An Colosas 3:13 nag-aaghat ha aton: “Padayon nga mag-inantosay ngan kinasingkasing nga magpinasayloay kamo bisan kon may hinungdan an usa ha pagreklamo kontra ha iba. Sugad la nga hi Jehova kinasingkasing nga nagpasaylo ha iyo, kinahanglan ito liwat an iyo buhaton.” An Kristiano nga gugma ‘diri nag-iihap han karat-an’ sumala ha 1 Corinto 13:5. Kon nagpapasaylo kita ha iba, papasayloon kita ni Jehova. Oo, kon may nakakasayop ha aton, sadang naton subaron an pagtagad han aton maloloy-on nga Amay ha aton mga sayop.—Basaha an Salmo 103:12-14.