Hi Jehova ‘Napaid ha Imo’
KAY ano nga makakasarig ka hito nga mga pulong, nga hi Jehova napaid gud ha imo? An usa nga rason tungod kay an Biblia mismo an nagsiring hito. An 1 Pedro 5:7 nasiring: ‘Ipasa ha iya an ngatanan mo nga kabaraka, kay napaid hiya ha imo.’ Ano an mga pamatuod nga importante ka gud kan Jehova?
AN DIOS NAGTATAGANA HAN MATERYAL NGA PANGINAHANGLAN HAN MGA TAWO
Hi Jehova nagpakita hin ehemplo ha pagin buotan ngan mahinatagon
An Dios may mga kalidad nga posible nga ginbibiling mo ha imo duok nga sangkay. Kasagaran nga nagigin duok nga magsangkay an duha nga indibiduwal kon buotan ngan mahinatagon hira ha usa kag usa. Sugad han imo naoobserbaran, iginpapakita ni Jehova an iya pagkabuotan ngan pagkamahinatagon ha mga tawo kada adlaw. Tagda ini nga ehemplo: “Iya ginpapasirang an adlaw ha magraot ngan mag-opay nga tawo ngan nagpapauran ha magtadong ngan diri-magtadong.” (Mat. 5:45) Ano an nahihimo han adlaw ngan uran? Pinaagi hini ngan han iba pa nga butang, ‘gintatagan han Dios an mga tawo hin damu nga pagkaon ngan ginpupuno an ira kasingkasing hin kalipay.’ (Buh. 14:17) Oo, ginsisiguro ni Jehova nga an tuna naghahatag hin damu ngan magrasa nga pagkaon, ngan naghahatag liwat hiya hin iba pa nga butang nga nakakapalipay ha aton.
Kondi kay ano man nga damu gud an nagugutom? Tungod kay an tawhanon nga mga magmarando agsob nga nakapokus ha pagkaada gahum ha politika ngan materyal nga mga bentaha imbes nga ha pagpauswag han kinabuhi han mga tawo. Diri na mag-iiha, susulbaron ni Jehova an problema mahitungod ha kahakog; sasaliwnan an presente nga sistema han politika han langitnon nga Ginhadian nga pagmamandoan han iya Anak. Hito nga panahon, waray na Sal. 37:25) Diri ba ito pamatuod nga napaid ha imo hi Jehova?
magugutom. Samtang waray pa ito, gintataganahan han Dios an iya matinumanon nga mga surugoon. (HI JEHOVA ANDAM MAGHATAG HIN PANAHON
Hi Jehova nagpakita hin ehemplo ha pagin andam maghatag hin panahon
An maopay nga sangkay naghahatag hin panahon ha imo. Bangin magpinakiistorya hiya ha imo hin maiha mahitungod han mga butang nga makapainteres ha iyo. Ngan atentibo liwat hiya nga namamati kon iginsusumat mo ha iya an imo mga problema ngan kabaraka. Sugad ba liwat hito hi Jehova? Oo! Namamati hiya ha aton mga pag-ampo. Salit gin-aaghat kita han Biblia nga “magpadayon ha pag-ampo.”—Roma 12:12; 1 Tes. 5:17.
Mationan-o kaiha andam mamati hi Jehova ha imo mga pag-ampo? Ginbabaton ito han Biblia pinaagi hin usa nga ehemplo. Antes hi Jesus magpili han iya mga apostol, “bug-os nga gab-i [nga] nag-inampo hiya ha Dios.” (Luc. 6:12) Ha iya pag-ampo, posible nga usa-usa niya nga gin-unabi an ngaran han iya mga disipulo, ginkonsiderar an ira mga kalidad ngan kaluyahan, ngan nagpabulig ha iya Amay ha pagpili kon hin-o an iya magigin mga apostol. Kinabuwasan, pagsirang han adlaw, sigurado hi Jesus nga napili niya an pinakakwalipikado nga mga apostol. Sugad nga Parapamati han pag-ampo, nalilipay hi Jehova pamati ha ngatanan nga sinsero nga nag-aampo. (Sal. 65:2) Bisan kon mag-inampo hin maiha an usa nga indibiduwal may kalabotan ha butang nga importante gud ha iya, padayon hi Jehova nga mamamati ha iya.
AN DIOS ANDAM MAGPASAYLO
Hi Jehova nagpakita hin ehemplo ha pagin andam magpasaylo
May kalabotan ha pagpasaylo, bisan an duok nga magsangkay usahay nakukurian ha pagbuhat hito. May mga panahon nga nadadaot an relasyon bisan han maiha na nga magsangkay tungod kay nakukurian gud hira magpasaylo. Diri sugad hito hi Jehova. Gin-aaghat han Biblia an ngatanan nga sinsero nga indibiduwal nga mangaro hin pasaylo ha iya, ‘kay hiya nagpapasaylo hin damu gud.’ (Isa. 55:6, 7) Ano an nagpapagios ha Dios nga magin mapinasayloon?
Tungod ito han iya diri matupngan nga gugma. Hinigugma gud niya an kalibotan nga iya iginhatag an iya Anak, hi Jesus, basi talwason an mga tawo tikang Juan 3:16) Ngan may iba pa nga nahihimo an lukat. Tungod han halad han Kristo, napapasaylo han Dios adton iya mga hinigugma. Hi apostol Juan nagsurat: “An Dios maunungon ngan matadong, salit kon aton igsumat an aton mga sala, papasayloon kita niya ha aton mga sala.” (1 Juan 1:9) Tungod han pagpasaylo ni Jehova, an mga tawo padayon nga nagigin kasangkayan niya, ngan an paghibaro hini nakakabantad gud han aton kasingkasing.
ha sala ngan ha maraot nga mga epekto hito ha katawohan. (ANDAM HIYA BUMULIG HA IMO
Hi Jehova nagpakita hin ehemplo ha pagin andam bumulig ha aton
An tinuod nga sangkay andam bumulig ha usa nga nanginginahanglan. Ito ba liwat an ginbubuhat ni Jehova? An iya Pulong nasiring: “Bisan [an usa nga surugoon han Dios] matumba, diri hiya mahihirukapa kaopay; kay hi Jehova nakapot ha iya kamot.” (Sal. 37:24) Hi Jehova ‘nakapot ha kamot’ o nabulig ha iya mga surugoon ha damu nga paagi. Tagda ini nga eksperyensya tikang ha isla han St. Croix ha Caribbean.
Usa nga daragita an gintatamay han iya mga kaklase kay diri hiya nasaludo ha bandera tungod han iya mga gintotoohan. Katapos niya mag-ampo kan Jehova para hin bulig, gin-atubang niya an isyu. Ha iya sumunod nga report, iginpresentar niya ha ira klase an mahitungod ha pagsaludo ha bandera. Gamit An Akon Libro han mga Istorya ha Biblia, iginsaysay niya kon paonan-o nakaapekto ha iya desisyon an asoy mahitungod kanda Sadrak, Mesak, ngan Abednego. Hiya nagsiring, “Ginpanalipdan ni Jehova an tulo nga Hebreohanon tungod kay nadiri hira pagsingba ha imahen.” Katapos, iya igintanyag an libro ha mga nakadto. Onse han iya mga kaklase an naruyag magkaada kopya hito. Inabat niya nga gintagan hiya ni Jehova hin kaisog ngan kinaadman nga makasangyaw may kalabotan hinin sensitibo nga topiko, salit nalipay gud hiya.
Kon nagruruhaduha ka nga napaid ha imo hi Jehova, pamalandonga an mga teksto ha Biblia sugad han Salmo 34:17-19; 55:22; ngan 145:18, 19. Pakianhi an mag-iha na nga mga Saksi kon paonan-o hi Jehova nagpakita hin pagpaid ha ira. Ngan kon kinahanglan mo an bulig basi mawara an imo pagruhaduha, ig-ampo ito ha Dios. Diri mag-iiha, aabaton mo nga ‘napaid ha imo’ hi Jehova.