Kilalaha hi Jehova Sugad nga Aton Parahimo hin Daba
“O Jehova, . . . ikaw an amon parahimo hin daba; ngan kami ngatanan buhat han imo kamot.”—ISA. 64:8.
KARANTAHON: 89, 26
1. Kay ano nga hi Jehova an pinakamaopay nga Parahimo hin Daba?
HAN Nobyembre 2010, may seramik nga plorera han Tsina nga tikang pa han ika-18 ka siglo an iginbaligya hin mga 70 ka milyon dolyares ha London, Inglatera. Oo, puydi himoon han parahimo hin daba an waray bili nga lapok nga magin makaruruyag ngan marahalon nga obra maestra. Pero waray tawo nga parahimo hin daba nga makakapariho kan Jehova. Ha ikatarapos han ikaunom ka adlaw han paglarang, ginhimo han Dios “tikang ha tapotapo [o, lapok] han tuna” an perpekto nga tawo ngan gintagan hin abilidad nga maipakita an mga kalidad han naghimo ha iya. (Gen. 2:7) Ito nga perpekto nga tawo, hi Adan, nga ginlarang tikang ha tuna angayan nga tawagon nga “anak han Dios.”—Luc. 3:38.
2, 3. Paonan-o naton masusubad an disposisyon han mabinasulon nga mga Israelita?
2 Pero nawara ni Adan an iya pagin anak han Dios han nagrebelde hiya ha naghimo ha iya. Bisan pa hito, ha sulod hin damu nga katuigan, may “madakmol nga dampog” han katulinan ni Adan nga sumuporta ha pagkasoberano han Dios. (Heb. 12:1) An ira mapainubsanon nga pagpasakop ha ira Maglalarang nagpapakita nga karuyag nira nga hi Jehova an ira magin Amay ngan Parahimo hin Daba, diri hi Satanas. (Juan 8:44) An ira pagkamaunungon ha Dios nagpapahinumdom ha aton han mga pulong ni Isaias may kalabotan ha mabinasulon nga mga Israelita: “O Jehova, ikaw an amon Amay; kami an kalot [o, lapok], ngan ikaw an amon parahimo hin daba; ngan kami ngatanan buhat han imo kamot.”—Isa. 64:8.
3 Yana, an ngatanan nga nagsisingba kan Jehova ha espiritu ngan kamatuoran nangangalimbasog nga maipakita an sugad nga pagpaubos ngan pagpasakop. Gintatagad nira nga pribilehiyo nga tawagon hi Jehova nga ira Amay ngan magpasakop ha iya sugad nga ira Parahimo hin Daba. Usa ka ba nga mahumok nga lapok ha mga kamot han Dios, andam magpamolde basi magin makaruruyag nga surudlan ha iya mga mata? Ginhuhunahuna mo ba an imo tagsa nga espirituwal nga kabugtoan sugad nga padayon pa nga ginmumolde han Dios? Basi mabuligan kita may kalabotan hini, hisgotan naton an tulo nga butang nga ginhihimo ni Jehova sugad nga aton Parahimo hin Daba: Kon paonan-o niya ginpipili adton iya mumoldehon, kon kay ano nga ginmumolde niya hira, ngan kon paonan-o niya hira ginmumolde.
GINPIPILI NI JEHOVA ADTON IYA GINMUMOLDE
4. Paonan-o ginpipili ni Jehova adton iya iginpapahirani ha iya? Paghatag hin ehemplo.
4 Kon gin-oobserbaran ni Jehova an mga tawo, diri hiya nagpupokus ha pisikal nga hitsura. Lugod, gin-uusisa niya an kasingkasing, an tinuod nga pagkatawo. (Basaha an 1 Samuel 16:7b.) Iginpakita ito han Dios han ginporma niya an Kristiano nga kongregasyon. Iginpahirani niya ha iya ngan ha iya Anak an damu nga indibiduwal nga bangin gintatagad han mga tawo nga waray pulos. (Juan 6:44) Usa ha ira an Pariseo nga hi Saul nga ‘parapasipara, paratimaraot, ngan nanmamaltrato.’ (1 Tim. 1:13) Kondi waray kitaa hi Saul han “nagsasari [o, nag-uusisa] han mga kasingkasing” sugad nga waray pulos nga lapok. (Prob. 17:3) Lugod, nakita han Dios nga puydi hiya himoon nga makaruruyag nga surudlan—usa pa ngani nga ‘surudlan nga ginpili’ basi magsangyaw “ngadto ha mga nasud pati ha mga hadi ngan ha mga anak ni Israel.” (Buh. 9:15) An iba nga nakita han Dios nga puydi himoon nga mga surudlan “para ha dungganon nga paggamit” nag-uupod han mga parahubog, imoral nga mga tawo, ngan mga kawatan. (Roma 9:21; 1 Cor. 6:9-11) Samtang nagkakaada hira husto nga kahibaro ha Pulong han Dios ngan nagpapakita hin pagtoo, nagpapamolde hira kan Jehova.
5, 6. Paonan-o an aton pagsarig kan Jehova sugad nga aton Parahimo hin Daba sadang makaapekto han aton pagtagad (a) ha mga tawo ha aton teritoryo? (b) ha aton kabugtoan?
5 Paonan-o makakabulig ha aton an gin-unabi nga impormasyon? Tungod kay natoo kita nga nakakabasa hi Jehova han kasingkasing ngan kaya niya ipahirani ha iya adton iya ginpipili, nabulig ini ha aton nga diri hukman an mga tawo ha aton teritoryo ngan an kabugtoan ha kongregasyon. Tagda an ehemplo ni Michael. “Kon may nabisita ha akon nga mga Saksi ni Jehova,” siring niya, “diri ko hira gin-aasi ngan baga hin diri ko hira nakikita. Waray gud ako respeto! Ha urhi, may nakilala ako nga pamilya, ngan binilib ako ha ira tungod han ira maopay nga panggawi. Katapos, usa ka adlaw hinbaroan ko nga mga Saksi ni Jehova hira—diri gud ako makatoo hito! An ira panggawi nagpagios ha akon nga usisahon kon kay ano nga maraot an akon pagtratar ha ira. Nasantop ko nga ginbubuhat ko ito tungod han kakulang hin kahibaro ngan basado la ha uruistorya, diri ha kamatuoran.” Basi hibaroan an kamatuoran, umuyon hi Michael nga mag-aram ha Biblia. Ha urhi, nagin Saksi hiya ngan sumulod ha bug-os-panahon nga pag-alagad.
6 An aton pagkarawat kan Jehova sugad nga Parahimo hin Daba makakaapekto liwat ha aton pagtagad ha mga igkasi-tumuroo. Gintatagad mo ba an imo kabugtoan pariho han pagtagad ha ira han Dios—diri sugad nga tapos na mamolde, kondi padayon pa nga ginmumolde? Nakikita ni Jehova an tinuod nga pagkatawo han usa nga indibiduwal ngan an iya magigin pagkatawo kon Iya hiya moldehon. Salit nagpupokus hi Jehova ha mag-opay nga kalidad han usa, diri ha temporaryo nga mga kaluyahan. (Sal. 130:3) Masusubad naton hiya kon magpupokus kita ha mag-opay nga kalidad han iya mga surugoon. Ngani, makakabulig kita ha aton Parahimo hin Daba kon susuportaran naton an pangalimbasog han aton kabugtoan nga magin hamtong ha espirituwal. (1 Tes. 5:14, 15) Sugad nga “regalo nga kalalakin-an,” an mga tigurang an sadang manguna may kalabotan hini.—Efe. 4:8, 11-13.
KAY ANO NGA GINMUMOLDE KITA NI JEHOVA?
7. Kay ano nga gin-aapresyar mo an disiplina ni Jehova?
7 Bangin may nabatian ka na nga nagsiring hini: ‘Naapresyar ko la hin bug-os an pagdisiplina han akon mga kag-anak han nagkaada na ako mga anak.’ Samtang nagtitikadamu an aton eksperyensya ha kinabuhi, bangin mas makita naton an kapulsanan han disiplina ngan hunahunaon ito uyon ha panhunahuna ni Jehova—sugad nga kapahayagan han gugma. (Basaha an Hebreo 12:5, 6, 11.) Oo, hinigugma ni Jehova an iya mga anak, salit mapailubon nga ginmumolde kita niya. Karuyag niya nga magin maaramon ngan malipayon kita ngan higugmaon liwat hiya. (Prob. 23:15) Diri hiya nalilipay kon nag-aantos kita; diri liwat hiya naruruyag nga mamatay kita sugad nga ‘mga anak han kangalas,’ nga aton napanunod kan Adan.—Efe. 2:2, 3.
8, 9. Paonan-o kita gintututdoan ni Jehova yana, ngan paonan-o ini nga pagtutdo magpapadayon ha tidaraon?
8 Sugad nga ‘mga anak han kangalas,’ damu an aton magraot nga kalidad hadto, bangin sugad-hayop pa ngani an pipira hito! Pero, nagpapasalamat gud kita kan Jehova nga tungod han iya pagmolde nabag-o kita; nagin pariho na kita hin karnero. (Isa. 11:6-8; Col. 3:9, 10) Salit, nagkikinabuhi kita yana ha espirituwal nga paraiso diin padayon pa kita nga ginmumolde ni Jehova. Dida hito, inaabat naton nga talwas kita ngan may kasigurohan bisan kon naukoy kita ha maraot nga kalibotan. Dugang pa, naieksperyensyahan na yana han pipira nga nagdaku ha masamok ngan diri mahigugmaon nga pamilya an tinuod nga gugma. (Juan 13:35) Ngan maaram na kita kon paonan-o hihigugmaon an iba. Labaw ha ngatanan, nakilala naton hi Jehova ngan inaabat naton an iya gugma sugad nga Amay.—San. 4:8.
9 Ha bag-o nga kalibotan, mapapahimulosan naton hin bug-os an mga bendisyon han espirituwal nga paraiso. Maieksperyensyahan liwat naton an makalilipay nga kinabuhi ha literal nga paraiso ilarom han pagmando han Ginhadian han Dios. Durante han bug-os-kalibotan nga pagpahiuli, padayon nga mumoldehon ni Jehova an mga umurukoy han tuna, ngan tututdoan hira tubtob ha sukol nga bangin diri gud naton mahahanduraw yana. (Isa. 11:9) Dugang pa, hihimoon han Dios nga perpekto an aton hunahuna ngan lawas basi masabtan naton an iya mga igintututdo ngan mabuhat an iya kaburut-on ha perpekto nga paagi. Salit magin determinado kita nga padayon nga magpasakop kan Jehova ngan ipakita nga gintatagad naton an iya pagmolde sugad nga kapahayagan han iya gugma ha aton.—Prob. 3:11, 12.
KON PAONAN-O KITA GINMUMOLDE NI JEHOVA
10. Paonan-o iginpakita ni Jesus an kaabtik ngan pagin mapailubon han Harangdon nga Parahimo hin Daba?
10 Sugad nga pinakamaopay nga parahimo hin daba, maaram hi Jehova kon ano nga klase hin lapok an aada ha iya mga kamot, ngan ginmumolde niya ito uyon ha klase hito. (Basaha an Salmo 103:10-14.) Oo, gintatagad kita niya sugad nga indibiduwal—an tagsa naton nga kaluyahan, limitasyon, ngan espirituwal nga pag-uswag. Iginpakita niya an iya pagtratar ha diri hingpit nga mga surugoon pinaagi han iya Anak. Hunahunaa kon paonan-o gintagad ni Jesus an mga kaluyahan han iya mga apostol, labi na an ira tendensya nga maglantugi kon hin-o ha ira an pinakalabaw. Kon nakadto ka han naglalantugi an mga apostol, huhunahunaon mo ba hira nga malumo ngan masayon mamolde? Bisan pa hito, waray maghunahuna hi Jesus hin negatibo ha ira. Maaram hiya nga an iya magtinumanon nga apostol mahimo mamolde kon buotan ngan mapailubon nga sasagdonan niya hira ngan kon makikita nira an iya susbaranan han pagpaubos. (Mar. 9:33-37; 10:37, 41-45; Luc. 22:24-27) Katapos banhawon hi Jesus ngan ibubo an baraan nga espiritu, an mga apostol waray na magpokus ha kon hin-o an pinakalabaw o bantogan, lugod nagpokus hira ha buruhaton nga igintoka ha ira.—Buh. 5:42.
11. Paonan-o ginpamatud-an ni David nga mahumok hiya nga lapok, ngan paonan-o naton hiya masusubad?
Sal. 63:6) Nagsurat liwat hiya: “Magbibendisyon [o, magdadayaw] ako kan Jehova, nga naghatag ha akon hin kasalagdonan; oo, an akon kasingkasing nagtututdo ha akon ha mga kagab-ihon.” (Sal. 16:7) Oo, gintugotan ni David an sagdon han Dios nga makadulot gud ha iya “kasingkasing” o ha iya tinuod nga pagkatawo ngan magmolde han iya panhunahuna ngan pagbati bisan kon makuri karawaton an sagdon. (2 Sam. 12:1-13) Maopay gud nga susbaranan hi David may kalabotan ha pagpaubos ngan pagpasakop! Ginpapamalandong mo ba liwat an Pulong han Dios, ngan gintutugotan ito nga makaimpluwensya ha imo tinuod nga pagkatawo? Kinahanglan mo pa ba an dugang nga pangalimbasog may kalabotan hini?—Sal. 1:2, 3.
11 Yana, an nangunguna nga ginagamit ni Jehova ha pagmolde ha iya mga surugoon amo an iya Pulong, an iya baraan nga espiritu, ngan an Kristiano nga kongregasyon. Mamomolde kita han Pulong han Dios kon aton ito babasahon, papamalandungon, ngan hahangyoon an bulig ni Jehova basi maiaplikar naton ito. Hi David nagsurat: “Akon nahinunumduman ikaw ha bawbaw han akon higdaan, ngan namamalandong ha imo ha akon pag-agma ha kagab-ihon.” (12, 13. Paonan-o kita ginmumolde ni Jehova pinaagi han baraan nga espiritu ngan han Kristiano nga kongregasyon?
12 An baraan nga espiritu makakagmolde ha aton ha damu nga paagi. Pananglitan, makakabulig ito nga makultibar naton an personalidad nga pariho han kan Kristo nga nag-uupod han bunga han espiritu han Dios. (Gal. 5:22, 23) Usa nga bahin hito nga bunga amo an gugma. Hinigugma naton an Dios ngan karuyag naton nga sugton hiya ngan magpamolde ha iya kay maaram kita nga an iya mga sugo diri mabug-at. An baraan nga espiritu makakabulig liwat ha aton nga diri mamolde han kalibotan ngan han maraot nga espiritu hito. (Efe. 2:2) An batan-on hadto nga hi apostol Pablo nga naimpluwensyahan gud han mapahitas-on nga disposisyon han Judio nga mga lider han relihiyon, ha urhi nagsiring: “Kay ha ngatanan nga butang may kusog ako pinaagi ha iya nga naghahatag ha akon hin gahum.” (Fil. 4:13) Salit pariho kan Pablo, padayon nga mag-ampo para han baraan nga espiritu. Diri igbabalewaray ni Jehova an sinsero nga pangamuyo han mga mapainubsanon.—Sal. 10:17.
Ginagamit ni Jehova an Kristiano nga mga tigurang basi moldehon kita, pero kinahanglan naton buhaton an aton bahin (Kitaa an parapo 12, 13)
Gal. 6:1) Lugod, mapainubsanon nga nangangaro hira ha Dios hin pagsabot ngan kinaadman. Nagios hira uyon ha ira mga pag-ampo pinaagi ha pag-usisa han Pulong han Dios ngan ha aton mga publikasyon samtang ginhuhunahuna nira an aton kahimtang. Salit naihahatag nira an bulig nga aton ginkikinahanglan. Kon buotan ngan mahigugmaon nga sasagdonan ka nira, pananglitan, may kalabotan han imo pamado, kakarawaton mo ba ito sugad nga kapahayagan han gugma han Dios ha imo? Kon oo, iginpapakita mo nga mahumok ka nga lapok ha mga kamot ni Jehova, ngan andam ka magpamolde para ha imo kapulsanan.
13 Ginagamit ni Jehova an Kristiano nga kongregasyon ngan an mga paramangno hito basi moldehon an tagsa ha aton. Pananglitan, kon naoobserbaran han mga tigurang nga may problema kita ha espirituwal, nangangalimbasog hira nga buligan kita. Pero diri hira nagsasagdon uyon ha kinaadman han tawo. (14. Bisan kon may katungod hi Jehova ha lapok, paonan-o niya iginpapakita nga gintatahod niya an aton kagawasan ha pagbuot?
14 Kon nasasabtan naton kon paonan-o kita ginmumolde han Dios, makakabulig ito ha aton nga magkaada maopay nga relasyon ha aton mga igkasi-tumuroo, magin positibo ha mga tawo ha aton teritoryo, pati na ha aton mga Bible study. Ha panahon han Biblia, an parahimo hin daba diri la basta nga nakuha hin lapok ngan ginmumolde dayon ito. Gin-aandam anay niya an lapok—ginkukuha an mga bato ngan an iba pa nga diri maopay nga nahisalakot dida hito. Sugad liwat hito an ginhihimo han Harangdon nga Parahimo hin Daba nga hi Jehova. Ginbubuligan niya pag-andam an mapinasakupon nga mga indibiduwal basi mamolde niya hira. Pero gintatahod niya an ira kagawasan ha pagbuot. Diri niya hira ginpipirit nga magbag-o; lugod, iginpapahayag niya an iya magtadong nga suruklan basi malimpyohan nira an ira kinabuhi o kinaburut-on nga maghimo hin mga pagbag-o.
15, 16. Paonan-o maipapakita han mga estudyante ha Biblia nga karuyag nira magpamolde kan Jehova? Iilustrar.
15 Tagda pananglitan hi Tessie nga taga-Australia. “Ginkarawat dayon ni Tessie an kamatuoran ha Biblia,” siring han sister nga nagba-Bible study ha iya. “Pero diri hiya nag-uuswag ha espirituwal—diri ngani hiya natambong ha Kristiano nga mga katirok! Salit katapos ko ig-ampo an mahitungod hito, nagdesisyon ako nga iundang an amon pag-aram. Pero may nahitabo nga diri ko ginlalaoman. Durante han amon kataposan na unta nga pag-aram, iginsumat ni Tessie an iya inaabat. Nagsiring hiya nga inaabat niya nga hipokrito hiya kay naghuhuygo pa gihapon hiya. Pero nagdesisyon hiya nga iundang na ito nga bisyo.”
16 Waray pag-iha katapos hito, nagtikang hi Tessie pagtambong ha Kristiano nga mga katirok ngan pagpakita hin Kristiano nga personalidad, bisan pa han mga pagtamay han iya mga kaupod ha paghuygo hadto. An sister nagpadayon: “Inabot an panahon, nabawtismohan hi Tessie ngan ha urhi nagregular payunir, bisan kon may gudtiay pa hiya nga anak.” Oo, kon an mga estudyante ha Biblia magtikang paglimpyo han ira kinabuhi basi lipayon an Dios, magigin duok hiya ha ira ngan mumoldehon niya hira para magin makaruruyag gud nga mga surudlan.
17. (a) Ano an imo gin-aapresyar kan Jehova sugad nga imo Parahimo hin Daba? (b) Ano an iba pa nga bahin han pagmolde an hihisgotan ha masunod nga artikulo?
17 Yana, an pipira nga parahimo hin daba nga mano-mano pa gihapon an pagmolde nakapokus gud ha lapok nga ira gintatrabaho. Ha pariho nga paagi, an aton Parahimo hin Daba nakapokus gud ha pagmolde ha aton ngan mapailubon nga ginbubuhat niya ito pinaagi han iya sagdon, ngan ginkikita niya kon ano an aton reaksyon hito. (Basaha an Salmo 32:8.) Inaabat mo ba nga interesado gud ha imo hi Jehova? Inaabat mo ba an iya mahigugmaon nga pagmolde ha imo? Kon oo, ano pa nga mga kalidad an mabulig ha imo nga magpabilin nga mahumok ngan masayon mamolde nga lapok ha mga kamot ni Jehova? Ano nga disposisyon an sadang mo likyan basi diri ka magin matig-a o makuri moldehon? Ngan paonan-o makakabulig kan Jehova an mga kag-anak ha pagmolde han ira mga anak? Hihisgotan ini ha masunod nga artikulo.