Nabasa mo ba hin maopay an bag-o nga mga gowa han An Barantayan ngan Ang Bantayan? Kitaa kon mababaton mo an masunod nga mga pakiana:

Kay ano nga gintugotan ni Jehova an pakiggirra ha kadaan nga Israel?

Mahigugmaon hi Jehova. Pero usahay, gintutugotan niya an pakiggirra kon namimeligro nga mag-antos hin karaotan ngan panalumpigos an iya katawohan. An Dios la an nagdidesisyon kon hin-o an makikigbahin ha girra ngan kon san-o.—w15-TG 11/1, p. 4-5.

Ano an kinahanglan buhaton han mga kag-anak basi mabansay an ira mga tin-edyer nga mag-alagad kan Jehova?

Kinahanglan higugmaon han mga kag-anak an ira mga tin-edyer ngan ipakita an pagpaubos pinaagi han ira susbaranan. Importante liwat nga magpakita hira hin hilarom nga pagsabot ngan mangalimbasog nga sabuton an ira mga tin-edyer.—w15 11/15, p. 9-11.

Kay ano nga an papa diri sadang tagdon sugad nga kasaliwan ni Pedro?

An Mateo 16:17, 18 waray magsiring nga hi apostol Pedro an magigin ulo han Kristiano nga kongregasyon. Iginpapakita han Biblia nga hi Pedro waray labaw nga katungdanan; hi Jesus amo an magigin “pandugtong nga bato ha eskina” han kongregasyon. (1 Ped. 2:4-8)—wp16.1, p. 12-14.

Ano an sadang naton hunahunaon antes magyakan?

Basi magamit naton hin maopay an aton dila, kinahanglan naton hinumdoman (1) kon san-o magyayakan (Ekles. 3:7), (2) kon ano an iyayakan (Prob. 12:18), ngan (3) kon paonan-o magyayakan (Prob. 25:15).—w15 12/15, p. 19-22.

Ano an pipira han diri tangkod nga buhat nga sadang likyan han mga Kristiano?

Ginlilikyan han mga Kristiano an pagbuwa ngan pagpakaraot ha iba. Diri hira nagsusumat hin mga impormasyon nga sayop ngan nakakadaot ha reputasyon han iba, ngan diri liwat hira nanlilimbong ngan nangangawat.—wp16.1-TG, p. 5.

Hin-o an “punoan nga mga saserdote” nga gin-unabi ha Biblia?

An mga pulong nga “punoan nga mga saserdote” nagtutudlok ha nangunguna nga mga membro han pagkasaserdote, upod na an hitaas nga mga saserdote nga ginpaiwas.—wp16.1-TG, p. 10.

Paonan-o naton sadang trataron an usa nga nakikigbahin ha mga emblema ha Memoryal?

Diri iginpapahitaas han mga Kristiano adton nakikigbahin ha mga emblema. An tinuod nga dinihogan diri naruruyag nga igpahitaas hiya ngan diri liwat niya ginpipinanumat an iya pagin dinihogan. (Mat. 23:8-12)—w16.01, p. 23-24.

Ano an aton mahibabaroan ha kon paonan-o hi Abraham nagin sangkay han Dios?

Nakilala ni Abraham an Dios bangin pinaagi kan Sem. Nagkaada hiya eksperyensya tikang ha paagi han pagtratar han Dios ha iya ngan ha iya pamilya, ngan nagparig-on ini han iya pagtoo. Mahimo naton ito buhaton.—w16.02, p. 9-10.

Paonan-o nagkaada kapitulo ngan bersikulo an Biblia?

Han ika-13 ka siglo, ginbahin-bahin han klero nga hi Stephen Langton an Biblia ha mga kapitulo. An Judio nga mga parakopya an siyahan nga nagbutang hin mga bersikulo ha Hebreo nga Biblia, ngan han ika-16 ka siglo, ginbutangan liwat han eskolar nga hi Robert Estienne an Kristiano Griego nga Kasuratan.—wp16.2, p. 14-15.

Literal ba nga gindara ni Satanas hi Jesus ha templo han ginsulay Hiya?

Diri kita sigurado han baton. An Mateo 4:5 ngan Lucas 4:9 mahimo magpasabot nga gindara hi Jesus pinaagi hin bisyon o nga aktuwal nga tinindog hiya ha igbaw han pader han templo.—w16.03, p. 31-32.

Paonan-o an aton Kristiano nga ministeryo pariho han tun-og?

An tun-og hinay-hinay nga nabubug-os. Nakakarepresko ito ngan nakakasustinir han kinabuhi. An literal nga tun-og bendisyon han Dios. (Deut. 33:13) Pariho liwat hito an urosa nga pangalimbasog han katawohan han Dios ha ministeryo.—w16.04, p. 4.